April 7
A Phengphi
Naupang aa Ding thungetsakna
Marshall
Tuikulh Pan
Thupuak:
Elisa Albertsen, 21
Lomon
naupangno in sanghon ni Friday ni-in sangpuan silh lo-in sang va kah hi. A sangkahna mun in Ebeye sang hi-in Marshall
Tuikulh ah om hi.
A ni nih ni-in kum 5 a pha pasal no khat in bombi vom khat
le a puang puan khat silhin sang hong kah hi. A sia uh pen Elisa Albertsen
hi-in, USA pan hong pai hi. A lungsim uhah lai om lo, kimawl mawl nuam zaw uh
hi. Tua leh Lomon in a gei-a tu-te khoihsuk khoihto ahih manin, Elisa in
tuamtut sak hi. Ahi zongin Lomon in a kimawl ngei bangin a lawmte mawlpih nuam
den hi. Gam ui peuh kineih in voooooo, voooo ci-in awng awng hi. A sia nu
Elisha in nawngkai-sa lua ahih manin sia pipa kiangah paipih hi. Lomon in sia
pipi kiang hong tun ciangin dai takin om hithiat hi. Ama hangin a lawm dang
sangnaupang 19 in hoih takin laisin thei lo uh hi. Khatlekhat kisawk, kimawl
mawl uh hi.
Ni khat sangkhaan sung panin kongkhak
man sutamin a pua lamah pai ding hong sawm uh hi. Elisha in va tuak kha ahih
manin paisak lo hi. Elisa in Lomon’ pa
neu mu dingin va hawh hi. Lomon’ nu le pa in Pacific tuikulh khat om hi, cih va
thei kha hi. Hih tuikulh in 80 acres bang
a gol tuikulh khat hi-in, mi 12000 val
teng uh hi.
Elisa in , Lomon a nu le pa tawh om lo
ahih manin a hilh, a makaih ding om lo hi, ci-in hehpih hi. Innkuan gina lo sung pan hih
bangin sang hong kah naupangno khat in itna le hehpihna kisam hi, cih hong
phawk hi.
Ni khat Lomon in a liamsa-in sang hong
kah, Elisa in va mu hi. Lomon’ sanggamte khat hangin tua bangin liamna ngah
hi. Elisa in Lomon inn sungah thusia
khat piang hi, cih phawk hi. A thupiang khempeuhte Elisa in sia pipa kiangah va
gen hi. Tua bangin a liamma pen naupangno khat ahihteh ci-in kuamah in thupi
simsak lo hi. Naupang hoih takin kep
ding kin lo uh hi.
Elisa in Lomon’ buai-na a pulaak kawikawi ding
sangin Pasian tungah thungetsak ding simloh bangmah dang geel nawn lo hi. Ni
khat khitui luangsa-in thungen hi. Lomon in naupang dangte bangin hoih tak
sangkahin mipil, milian khat a suah ding deihsak hi. Elisa in naupangte in
hamsatna lianpi thuak uh hi, cih theitel hi.
A sia le a pha a khentel thei nai lo
naupang zong tampi om a, Elisa in tua bang naupangte pantah ding lunggulhna
lianpi nei hi. A thunget ciangin zong kum khat sung a laihilh lawhcing dingin
zong thungen hi. Elisa in Lomon aa ding
bek hi lo, a nasepna sanginn lawhcin nadingin zong nisimin thungen hi. Satan in
naupangnote siasak nuamin nasem tawntung ahih manin, naupangte hoih tak pantah
ding kisam mahmah hi.
Elisa in lai bek hilh hi lo-in gamtat zia
le tong hoih hilh hi. Zingsang, nitak
simin sangnaupangte khat khit khat aa dingin thungetsak hi. A laihilhna-ah
sangnaupangte nunzia kilam dang dingin zong lametna nei hi.
Lomon in thu a man loh ciangin Elisa
in inn ciahsak nai lo-in sanginn ah tawl
khat omsaklai-in thungetsak hi. Lomon in thungen thei nai lo ahih manin Elisa
in thunget dan ding hilh hi. “ Vantung
Pa Pasian aw, nuntakna nong piak ka lungdam hi. An nong piak ka lungdam
hi. Sia-te’ thu ka man loh ka khial kha
hi. Ka lawmte ka hehsak ka khial kha hi. Ka khialhna hong maisak in. Tu-a kipan
ka thumang ding hi; ka migi ding hi, ci-in thunget kizui sak hi.
Ni khat Elisa in Lomon tawh thungen
khawmin a om laitakun Lomon in “ Sia-nu aw, tutphahte ka hem khia diam? Kong
huh diam, ci-in Elisa hong dong hi.
Elisa in Lomon aa ding a thunget kaal nih khit ciangin Lomon hong kikhel
hi. Lomon in nidang bang nawn lo-in,
sangkhaan sung niinte paikhia, innphiat cih bangin thumang mahmah hi. A lawmte
tawh zong kitawng nawn lo hi. A khialh
khak leh zong “sorry, hong maisak in,” ci-in thuum thei ta hi.
Sangsia-te in sangnaupangte kibangin a
hilh ding kisam a, gup tuam, paih tuam nei ding hi lo hi. Ahi zongin Elisa in
sangnaupang dangte sangin Lomon pen it zaw, pakta zaw hi.Tua bangin a it zawkna
a hang pen Lomon in nidangin thumang lo, a phengphi mahmah naupangno khat
hi-in, ahi zongin Elisa makaihna hangin Lomon zong hong kikhel hi.
Tu quarter
leitungbup Sabbath 13 sumpi in Ebeye sang ah kipuak ding hi. MUC in Mayaan,
Kachin ah puak ding hi. Mayaan ah biakinn thak apna kinei khin hi.
