April
28
Mexican Khat in A Neihsateng Pia Khia
Nerly
Macias Figueroa, 32
Gam
tuamtuam a Pasian nasem mite’ thu ka zak ciangin kei zong amau bangin na ka sem nuam hi. Kum
17 ka phak ciangin Mexican gam, Chiapas cihna munah missionary khatin ka om hi.
University sangkah ka zawh ciangin missionary
nasem ding ka ut hangin sum nei lo ka hi manin ka lunggulhna bangin ka sem thei
kei hi. Nitak khat Pasian kiangah thu ka ngen hi. “ Topa aw, missionary khatin
ka pai khia nuam hi.Ahi zongin vanleng letmat lei nading sum ka nei kei hi.
Missionary pai dingin na awi leh nasep khat hong musak inla, sum kholin
missionary ka pai nuam hi, ci-in thu ka ngen hi.
Tua bangin ka thunget ni nih khit
ciangin phone tawh hong kihopih hi. Southeast Adventist Zato ah nasem ding na
ut hiam ci-in hong kidong hi. Nasep nop leh hong pai in, ci-in hong sam hi. Kei
zong interview dingin ka pai pah hi. Hih zato ah nasemin ka om hi. Anhawmna
lamah nasep ka ngah hi. Pasian’ nasepdan lamdang ka sa mahmah hi. Ebeye ah pai
dingin thu ka ngen a, ka thunget ni 3 khit ciangin ka pa no khat in hong nusia
hi. Leibat tampi na nei a, tua leiba-te loh nading bangmah ka nei kei uh
hi. Ka sumkhol khempeuh Ebeye sangsiapi
pa tungah ka ap hi.
Tua zan ciangin thu ka ngen hi. “ Topa
aw, missionary pai dingin hong awi na hihleh
ci-in thu kong ngen a, tu-in zato ah nasep ka ngah hi. Ahi zongin kei
pai nopna bel gampua mun khat hi, ci-in thu ka ngen hi. Kum khat sung bang ka
nasepna pan ka sumkholteng tawh Ebeye tuikulh tunzawh nading ka ngah hi. Ka paima-in ka sanggamnu khat accident hangin
ka sumkholteng tawh kibawl hi. Tua hangin Ebeye ka pai zo kei hi. Sangsiapi pa
zong ka zasak kik hi.
Tua khit kum 2 ciangin Ebeye tuikulh
ah pai ding ka khawl kik hi. Nasep hoih khat ka ngah a, ka kha sum zong tam
mawh lo hi. Nitak khat ka sum neihteng tawh inn le mawtaw lei ding ka ngaihsun
hi. Tua bangin ka ngaihsut laitakin Ebeye tuikulh ah missionary dingin va pai ding ka lungsim ah hong
suak kik hi. Kaal khat sung khawng ka ngaihsun laiphot hi. Pasian tungah ka
kiciamna ka phawk kik hi. Adventist zato khat ah nasem ka hih manin nangma
nasem mah ka hi hi, ci-in Pasian tungah ka pulaak hi. Bang hangin ka nasep
nusia-in mundangah pai ding ka hiam, ci-in ka ngaihsun hi.
Ka lungsim ah Ebeye pai ding bek bek
hong suak hi. Tua ciangin thu ka ngen a, Pasian aw, Ebeye ah pai dingin hong
awi na hihleh US visa hong ngahsak in, ci-in thu ka ngen hi.
Mexico panin Ebeye tun nadingin Los
Angeles, Honolulu, Hawaai cihte kantan kul ahih manin US visa kisam hi. Mexico
panin US visa ngah ding hamsa mahmah hi. Ebeye ah sangsiapi pa kiangah visa
nget nadingin lai ka ngen hi.
Visa ka nget khit ciangin missionary
pai ding ka ut nawn kei hi. Bang hang hiam cihleh tu-in ka khua-sak nop mahmah
ta hi. Nidangin missionary ka ut mah hi. Ahi zongin tu-in ka ngaihsun zo nawn
kei hi. Visa ngetna-ah interview dingin
ka pai a, bang hangin Ebeye tuikulh ah pai nuam na hiam, ci-in hong kidong a,
ke’n zong missionary dingin ka pai ding hi, ci-in ka dawng kik hi. Ol takin
visa ka ngah hi. Sum na nei hiam, a hong kisapna lai, cihte bang mah hong
kidong lo hi.
Pasian in lampi hong honsak hi, cih ka
tel hi. Ka kamciam omsa bangin missionary pai dingin ka kithawi hi. Mexico ah ka nasep a kipan na khempeuh
nusia-in Ebeye tuikulh ah missionary dingin ka kuankhia hi. Ebeye tuikulh ah
kum khat ka om khit uhteh missionary khatin ka om pen ka kisik kei hi.
Ebeye Adventist sangah Tan 5 ka hilh
a, ka sangnaupangte lak pan pasal no khat bek SDA thu-um na hi hi. Hawaii tuikulh
pan ka ngah sum khempeuh Lungdambawl ciangin ka sangnaupangte letsong ka pia
hi. Ka sangnaupangte lak pan mi 5 in kituiphum uh hi.
“ Bang hangin Mexico nusia na
hiam? Ka kitangsap khempeuh ka nei hi;
ka lungdam hi. Bang hang hiam cihleh Pasian in kei aa dingin geelna khat nei
khin zo hi. Ebeye in kum 4 sung tawntung thuman a kanna tungtawnin Lai Siangtho
thuman hong mukhia hi. 2016 kum a kipan Ebeye tuikulh pai ding geelna ka nei a,
kum 4 khitteh ka tung thei hi.
Ebeye Adventist sangah Lai Siangtho sinna kinei-in tua tungtawnin
sangnaupang buppi 25% bang kituiphum uh hi.
Leitungbup Sabbath 13 sumpi in Ebeye
Adventist sanginn aa dingin kipuak ding hi. MUC in Mayaan ah puak ding hi.
