April
21
Tan
9 Sangnaupang khat ii Nasepna
Kamlitha
Bulles, 62
Harold
Bulles, 60
Kamlitha in Adventist cih min a zak
masak penna in kum 10 a pha sangkah tapa tung pan a zak masak pen hi. A tapa in Marshall
Tuikulh a om Adventist sangah sangkah hi.
Kamlitha in ta 8 nei nupi khat hi. Sunday nusia nuam lo hi. A tapa in a hilh thu-te lamdangsa ahih hangin
a Sunday siantho-sak nusiat ding ngaihsun lo hi. Saturday ni-a Pasian biak pen
khialhna hi, hih bang upna ka zui kei ding hi, ci hi. A tapa Fredick in, Lai Siangtho sim in. Ka gen
thute thuman ahihna na mu ding hi, ci-in a nu kiangah gen hi.
Kamlitha
in a tate pil ding a deihna tawh Seventh day Sangah a kahsak hi-in, tua banah
hih sang ah mangpau kihilh ahih manin Adventist sangah a tate a sangkahsak
khial kisa lo hi. Hih sangah gamdang pan missionary laihilh pawl khat om uh hi.
Fredrick in Lai Siangtho a theih
sunsunte mite hawmsawn hi. Matt. 6: 33, Pasian gam le ama dikna zong masa un.
Tua hi leh tua nate khempeuh hong pia thuah ding hi, cih pen lotngah hi. Ellen
G. White kamsangnu zong um mahmah hi. Bang hangin mi tampi in Ellen G. White
langpan uh hi ding hiam? Ama laigelhte in Lai Siangtho hong theisak hi, ci-in
pulaak hi.
Kamlitha in a tapa Fredrick pulaak Lai Siangtho sung thute a zak ciangin
lamdangsa mah mah hi. A tapa in
Adventist biakinn ah kikhawm ding a zot ciangin a nu in nial den hi. Ahi zongin
a tapa Fredrick in SDA sungah tui kiphum ding a khentat ciangin a nu in zong
nialsam lo hi.
Kamlitha in Pasian kiangah, biakna
man, pawlpi man a om leh hong hilh in, ci-in thungen hi. Tua leh hun khat guahzu lo, kial hong tung hi. Ebeye tuikulh ah mi
12000 val bang teng hi. Gambup mi phazah
lak pan a lang phial bang pen khangno 18
nuaisiah vive hi ding hi. Gambup mi a lang in sehnel gamah teng uh hi.
Kamlitha in nisim in US galkapte kiang pan tui va tawi hi. Tua bangin tui-tawi dingin kigual in a om
laitak, Kamlitha in Andrea tawh hong kimu kha uh hi. Amah pen Britain gam pan
hi-in a sangkah zo nai lo, Pasian nasem laihilh khangno khat hi. A nih un hong
kiho ho uh a, a ni thum ni ciangin Andrea in Lai Siangtho sinkhawm ding
Kamlitha hong zawn hi. Tua bangin kaal khat sung Lai Siangtho hong sinkhawm uh
hi.
Pasian in Kamlitha lungsim lawng ahih
manin amah zong tui kiphum ding hong khentat hi. Ka tapa in Adventist biakinn
ah kikhawm ding hong zawn den hi ven, kikhawm ding ka nial kha den hi, ci-in
Kamlitha in pulaak hi.
A nu kituiphum manin Fredrick zong
nuam mahmah hi. Kamlitha in pawlpi ah siate a huh dingin hong kipia khia hi. A
pasal aa ding zong thungetsak hi. A pasal Harold aa ding thungen den hi. Tua bangin a thunget kum 2 khit ciangin ni
khat a pasal in a nasepna panin zukhamsa-in inn hong ciah hi. A pasal pen
zuhai, za hai mahmah khat hi. A pasal in
Lai Siangtho sin ding thukim ahih manin Adventist pastor khat tawh Lai Siangtho
sinna hong nei uh hi. Tua bangin Lai Siangtho sinna a neih khitteh a pasal Harold in zong kituiphum ding hong khentat hi.
Tu-in a pasal in kum 60 val khin hi.
US galkap zumpi khatah nasem hi. Tua banah Ebeye Adventist pawlpi ah upa khatin
kiseh hi. Hih Ebeye Adventist pawlpi in biakinn nei zo nai lo hi. Kamlitha in
kum 52 bang val khin a, Marshall Tuikulh Adventist sangah laihilh hi. A veng a
pam kaikhawmin Lai Siangtho sinna nei zelzel hi. Tua bang nasepna panin mi 5 in
kituiphum khin uh hi.
Tu-in Kamlitha in Maloelap tuikulh ah
nasem dingin khentat hi. Hih tuikulh neu ah mi 150 khawng bek teng uh a, SDA om nai lo hi. Kamlitha le a pasal nasepna tungtawnin thu-um
mi hong kibehlap hi. Ebeye tuikulh ah SDA sanginn om nai lo a, Kamlitha le a
pasal in SDA hong suah uh kipan amau hanciamna tawh tu-in Ebeye tuikulh ah SDA
sang hong om thei hi.
Leitungbup Sabbath 13 na sumpi in hih
Ebeye tuikulh a SDA sang ah kipuak ding hi. MUC in Mayaan, Kachin ah kipuak
ding hi.
