Zolai Siangtho

Tedimpau in Laisiangtho buppi a kineipah hilo in tawmtawm in kipan toto in, a tawpna ciangin abup in a kinei thei pan ahi hi. Tua ahih manin a kipat a kipan a hunhun a sepna a kiciaptehna anuai abang ahihi.

Tedim Laisiagntho Khanghunte:

1915: Matthai: Laisiangtho i neih a kipat cilna hi a, Tedim gamah thuhilhna a sem American mi Dr. J.H. Cope in a tei ahi hi.

1931: Mualtung Thuhilhna: Pau Cin Hau laitawh kikhen hi.

1932: Thuciamthak: Hih pen Dr. J.H. Cope in a tei hi a, Rev. Vial Nang in huh hi, ci-in kiciamteh hi.

1958: Nau Pang Laisiangtho tangthu: Hih pen 1954 kum a kipan Baptist Board of Publication in a sawlna bangin Kam Khua Thang in a tei hi a, 1958 ciangin a bu in kingah hi.  Laisiangtho taktak ahih loh hangin, Thuciamthak leh Thuciamlui kigawm thute mite in Tedim pau in a theih masakna ahi hi.

1964: Late: 1961 pan in Tedim Baptist Association (TBA) in Thuciamlui tei ding  kipan a, Thuciamlui sung pan Late a kizawh khit ciangin a bu tuamin kikhenkhia hi. Late a bu tuam in a kikhet khit  ban ah Thuciamthak leh Thuciamlui sung pan in Late kigawm in bu khat in kisuaksak hi. Nidangin thulu (Section heading)  a kinei ngei nailo hi a, hih sungah thulu a kiguan, a kipat cilna ahi hi.

1977: Laisiangtho : Thuciamlui tei a kizawh khit ciangin kingaklah lua ahih manin Dr. J.H cope in a tei Thuciamthak leh TBA vaihawmna tawh a kitei Thuciamlui kigawm in Laisiangtho a bupin a kineih cilna ahi hi.

1982: Laisiangtho: Thuciamlui tei kipat lai in British & Foreign Bible Society (BFBS) te' makaihna tawh a kisem hi a, 1970 kum ciangin United Bible Societies (UBS) a kicite in tavuan honglai-in amau' makaihna tawh nasep a kizom to ahi hi. Ngimna leh nasepzia zong kibang lo ahih manin nasep ziazong a kikhelna tampi om hi.  Thuciamthak pen puah (revive) loin a thakin tei ding deih uh ahihmanin a thakin kitei pha hi. Thuciamthak a kitei khit ciangin Thuciamlui zong empha kikin TBA in Laisiangtho bup a sep a kizawhna lungdam kohna pawi lianpi khat October 17, 1982 Nipi ni in Tedim a TBA tual ah kibawl a, mi 7000(Tul sagih) bang kikhawmin, hun saupi sung kikhopna kinei a, a pai khempeuh sun an phel khat ciat kipia hi.  A Laisiangtho pen 1983 kum ciangin a laibu in kingah thei hi. A kikhet cil in bu 10,000 (Tul sawm) a kikhen hi a, bei pahpah ahih manin tulnga vive in thum vei kikhen kik hi.

1980: Laisiangtho: kum a kipan Tedim pau in lailam nasep kipawlna  Zomi Christian Literature Society (ZCLS) a kiphuat khit ciangin TBA in lailam nasep a tavuan khempeuh ZCLS ap a, TBA in laitei in a zat Rev. Kam Khua  Thang zong ZCLS sungah 1984 pan in laitei mahin a om ahi hi.

Tedimpau tawh Laisiangtho kibawl thakte:

Zokam International Version, Thuciamthak, Phatna Late leh Paunakte, New International bulphu a kitei hi a, Bible league pan a masa pen 1994 kumin kibawl hi. Saklam khanglam Tedim mite zattang theih ding a kibawl hi a, nasep thupi, leh a zatnuam mahmah ahi hi.

Thuciamthak: Salan Late leh Paunakte: Sihzang pautawh kibawl masapen hi a, Bible Society of Myanmar pan 1999 kumin kizo hi.

Thuciamthak: King James Version bulphuh deuhin kibawl a, Cope Topa kammal zatte kizangh ahih manin a zat nuam khat ahi hi.

Rev. Dr. Thuam Khan Thang

Source: Bethel Bible College Journal No. 10

http://thalmual.com/article/articles-in-zolai/303-tedim-laisiangtho-kiteizia  (Hih atung aate pen hih website pan aa kila hi)

Friday, August 21, 2009

Hilhcianna Kithuah LAI SIANGTHO thu:Murlen

Thuam Khan Thang:Tedim pautawh Lai Siangtho ineih masakpen Mate bu hi a, 1915 kum in Rev.J.H Cope in hong teisak ahi hi. Thuciam Thak bu 1932 kumin inei a, Lai Siangtho bup (Thuciam Lui + Thuciam Thak) 1977 kumin inei hi. Lai Siangtho tei kizomto to-in, puahphat kikkik zong om a, a tuam a kitei zong om hi. Hilhcianna tawh Kithuah Lai Siangtho (Study Bible) pen tu a ineih masak ahi hi. Hongpian khiatna leh Tedim pautawh a kiteina tangthu atom lamin anuai bang ahi hi.

A Pankhia pa Donald C.Stamps[1]America gammi, Nazarence pawlpi mi ahi Donald C. Stamps pen Brazil gamah Missionary nasem khat hi a, kha khanlawhna sungah kidiahin Kha Siangtho sung kiphumna ngah hi. A pawlpite in sang lo ahih manin, a nasepna pan khawlin America ciahkik hi. A upna uhtawh kituak pawlpi a zon uh ciangin Assemblies of God pawlpi tawh kizom uh hi. Brazil gammah kuankik ding vei mahmah uh ahih manin, AG zumpi ah gen uh a, phalna ngahin kuankik uh hi. Brazil gam hong tunkik ciangin, mite lawpthei mahmah uh a, Pasian thu kiduhthei mahmah ahih lam mu hi.

Ahi zongin pastor te a tamzaw Lai Siangtho sangkah lo hi uh a, a pawlpi mite hoihtakin Pasian thutawh makaih thei lo uh hi cih mu hi. Pastor te zat Study Bible te a et ciangin atamzaw in Scofield Reference Bible zangh uh hi. Hih Scofield Reference Bible pen, Kha Siangtho nasepna a langpan a kigelh Hilhcianna kithuah Lai Siangtho ahi hi. Don in Pastor te zattheih ding Pentecostal Upna leh Kalsuan ziatawh kibawl Hilhcianna kithuah Lai Siangtho kisam hi cih mu hi.A sawt lo-in America gam zin a, AG Lai Siangtho sangkhat ah thu a vahilhleh, sangsiate leh sang naupangte in Scofield Reference Bible leh Ryrie Study Bible bekbek atawi uh mu leuleu hi. Hih tenihpen tuhun Kha Siangtho nasepna sang lo hilhcianna te ahi hi.

Don lung himawh semsemin, AG makaipi te kiangah 'Hilhcianna Kithuah Lai Siangtho khat bawlbaih ding kisam hi' ci-in a vagen leh makai te'n na thusim lo uh hi. Don in Lai Siangtho hilhna banga Upna leh Kalsuanna te hilhcianna tawh kithuah Lai Siangtho neih loh phamawh ding hi cih khentatin, lai kaihkhop kipan hi.

1980 kumteh Thuciam Thak tawh panin, hilhcianna tom (Study notes) leh hilhcianna sau (Articles) te gelh kipan hi. 1990 kumteh Thuciam Thak zosiang a, Thuciam Lui kipan leuleu hi. Asawt lo-in gilpi um Cancer tawh nahi. Zato kahzeel, kawm mahin hanciamtakin hilhcianna tom leh hilhcianna sauté kaikhawmin gelh hi. AG zumpi panin, hih nasepna thupi sa uh a, asep pihding Committee geelsak hi. Thuciam Lui a kizawh siang madeuh November 7,1991 ni-in Don in leitung nusiata hi. Ama nungah nasep kizom suak a September 1,1992 in Mikang lai tawh Full Life Study Bible kizo siang hi. Hih Full Life Study Bible hong kibawl ciangin hoih kisa mahmah a, Pasian nasemte leh thu-um mite adingin phattuamna piangsak mahmah hi.

AG makaipi te inzong hih Lai Siangtho pen leitung pau namkim tawh a kitei nangin geelna nei uh hi. Tudong pau nam 25 in kitei khin a (Tedim lai-25na), nam 31 valin kitei sanlaitak ahi hi.[2] Kawlgam ah Tedim pau bektawh kitei pan hi.[3] Jacod Thupha:[4]1999 kum sungin Asia Pacific Theological Seminary, Philippines a, Dean of Students a sem Rev. Dr. Chin Do Kham leh tua laitak a Life Publication a Director sempa Gene Svchachterle kimu hi. Dr. Chin Do Kham' ngetna tungtawnin laitei ding phalna hong ngah a, Kawlgam hong ciahpahin, laitei ding Committee mi 5 tawh September 1,1999 ni-in maa hongpan hi.

Septheih bangin nasep hawmin kisemto pah a, kum beikuan lam ciangin laitei ding nih kibehlapin, 2000kum September khaciangin laitei sate enpha ding (2nd Committee) 8 kiteel hi. 

Laitei Committee te[5]:

1. Rev. Dr. Chin Do Kham Ph.D; General Director

2. Rev. Thuam Khan Thang D.Min; Assist. General Director

3. Sia Kham Khen Mang M.Div; Translator

4. Sia Than Lian Pau M.Div; Translator

5. Sia Khup Lian Suum M.Div; Translator

6. Sia Do Sian Pau M.Div; Translator

7. Rev. Suak Za Go B.R.E;

TranslatorEndik Committee te:[6]

1. Rev. Tuan Suan Dal Superintendent, Tedim Section

2. Rev. Khup Khan Thang Superintendent, Tonzang Section

3. Rev. E. Thang Do; Superintendent, Thuklai Section

4. Rev. Khai Khan Suan Superintendent, DC-4 Council

5. Rev. Suak Do Pau; Pastor, Zion AG, Church,Tamu

6. Rev. Lam Suan Thang; Pastor, AG Church, Phunom

7. Rev. On Khan Suan; Pastor, AG Church,Phaiza

8. Rev. Go Za Nang; Pastor, Agape AG, Kalaymyo

Laitei nang a kisam sumte Dr. Chin Do Kham mahin hanciamin hong zong a, AG pawlpi khatin hong huh a, a kisapna thuleh, pawlpi honghuh te thapia ding Dr.Kham avahawh leh, pawlpi mite'n thangahin hong veilua uh ahih manin, 'ngiimna zahnih hongpha hi' ci-in teci hong pang a, kilungdam mahmahin, Topa tungah lungdam kiko hi. Hih laitei nasepna adingin America AG pawlpi mite-in nai 1000 sung thu hong ngetsak pah uh hi.Lawptakin nasep hawmna bangin kisem ciat a, endikte in kumkhatin livei kituahin enbpha, puahpha uhhi.

2005 kum ciangin laitei atamzaw, ahonpi kizo a, Rev. Suak Za Go in Editorial Co-ordinator tavuan tawh, Life Publications tetawh kizomin sem hi. A kisamlaite teikawm, puahkawmin, hanciamin hong semto a 2007 kum ciangin kizo siangin, laikhetna ding mun kipuak hi. December khasung a ngahding lamet hi napi, laidal hoihte kisapna hangin hong zekai-in April,2008 ciangin cidamin Kawlgam hongtung ta hi. May 3, 2008 ni-in Kawlpi (Agape AG Church) ah Apna pawi kibawl a, May 6,2008 ni-in Yangon (Park Royal Hotel) ah Apna pawi kibawl hi.

Hih Hilhcianna Kithuah LAI SIANGTHO hong piankhiat nangin, lampi hong mukhia masa, sepding hong geelkhia masa, a kisamding sum hong zong Dr.Chin Do Kham hi a, laitei te inzong hanciamin kitei ciatin, Endik te-in zong hanciam takleh cilgil takin endikin puahpha hi.

Rev.Suak Za Go in hanciamtakin khettheih dong gamdang tawh kizopna teng hong sem hi. Apuak tavuan la omin, akep tavuan la om a, azuak tavuan la omin, maapan khawmna (Teamwork) tawh maa kitun ahi hi. Sum le paitawh maa hongpang pawlpite, thungetna tawh maapang thu umte khempeuh leh itheihkhak loh maapangte tungah lungdam iko hi.Etkak laibu: PUSH BACK THE DARKNESS: by Bob Burke with David A.Womack, Lumina Press, Springfield, Missourie ------------ --------- --------- --------- --------- --------- -

[1] Mailam ah a thu a kicingzawin laibu-in kibawl laiding hi.

[2] Bill William hong zasakna bang.

[3] Rev. Gin Za Lian in Asia Pacific Theological Seminary, Philippines akah lai-in "Thuciam Thak kamu a, Articles te tei dingin Donald Stamps zi kiangah phalna kangen a hongpia hi. Ka pankhin a, laibawl ding tamluatna hangin maban ka zomzo kei hi" cih gen hi.

[4] Ngahdinga kilawm lo thupha kingah hi a, Jacob ngah thupha tawh kibang hi. Ahi zongin bemeh tawh kikhek hi lo hi.

[5] Tua laitaka, apanmun uhleh a dinmunte uh zui a kigelh ahi hi.

[6] Tua laitak adinmunte uh ahi hi.

Posted by DS Pau