LESSON 9 May 26 – June 1
Hun Nunung Sung A
Khemnate
Sabbath Nitak: Tu
Kaal Sung Sim Ding: Mang. 2: 13, 24; 13: 1-17; 2Kor. 11: 13 – 15; Late 146: 4;
Pian. 1 -2:3.
KAMNGAH: “Leitung khempeuh a khem Dawimangpa, Satan kici tanglai
Gulpi pen ama nungzuite tawh leitungah a kikhiasuk hi” (Mang. 12: 9).
Vantung pan a
kihawlkhiatma-in zong Satan in vantungmite khem dingin hanciam hi. Pasian tawh maitang kimu-in om hi napi Lucifer
in vantungmite lakah lungkimlohna holhthawh thu thehthaang hi. A simthamin
nasem a, tawl khat sung Pasian zahtak kineihin a ngimna vantungmite’n mu kha lo
uh hi. Vantung a uk Thukham suksiat ding hanciam hi. Tua Thukhamte kulsa lo
hi.” Ellen G. White, The Great Controversy, 495.
Eden huanah Satan in
amah le amah gulpi in kineih hi. Tua tawh Eve khem hi. Tua a kipan kum tul
tampi tuhun dongin a ngimna sem khia dingin hong khem tawntung hi (Mang.
20:8). Satan in pilin, vanglianin
mihingte sangin lungsim thuk nei zaw ahih manin Jesuh tawh kizop tawntung ding,
Ama kammal Lai Siangtho simloh tua khemna pan hong suakta sak ding omlo hi.
“Ahi zongin TOPA Pasian a lenkipte khempeuh in kip tawntung ding hi” (Thkna.
4:4). Hih in tuni dongin thuman hi.
SUNDAY MAY 27
A LAUHUAI PEN KHEMNA
Lesson masa lamah
vantungah kido-na thu kigen khin a, vantung bek hi lo leitung dongah tua
kido-na hong tung hi. Mi tampi in hih ‘kido-na lianpi’ um lo uh hi. Bang hang
hiam cihleh tua bang mite’n Satan om hi, ci-in um lo uh hi. Siatna, gimnate
tawh kisai-in Satan ci-in min kivawhna hi lel hi. Star Wars cihte a kipan
leitung pilna tawh siatna omzia pulaak uh hi. Ahi zongin Lai Siangtho in Satan
om takpi a, ama nasepte zong hong hilh hi.
Mang. 2: 13, 24; 12: 3,
7- 9, 12, 17; 13: 2; 20: 2, 7, 10 cihte in hun nunung a Satan le ama nasep bang
pulaak uh hiam?
_________________________________________________________ _________________________________________________________________
Satan in na tuamtuam a
sep zawh nadingin hatna nei hi. Hun nunung ciangin Satan in amah tawh nasem
khawm ding mi tampi nei a, Jesuh tungah a citak mite bawlsia ding uh hi. Satan’
vanzat khempeuh lak pan a lian penpen a vanzat in Satan om lo hi, cih
ngaihsutna hi. Satan om hi, cih um keileh Pasian tungah a kingak kul lo hi,
cihna hi. Khristian kici mi tampi in Satan om hi, ci uh hi. Pasian’ kammal pawl
khat amau ut bangin a khiatna gen uh a, Satan om hi, cih nial uh hi. Hun
nunungah tua bangin a um mi hong tam semsem hi. Lai Siangtho in Satan om hi,
ci-in hong hilh hi napi, Satan om hi, cih thu in Lai Siangtho hoih tak tel ding
kisam pha mahmah hi, cih hong musak hi.
Hun nunung ciangin
Satan in a lamdang tuamtuam sem ding a, Mang. 12: 11 in lametna bang hong hilh
hiam? Koi panin Satan a zo ding vangliatna hong pai ding hiam?
Monday May 28
A Lian Mahmah Khialhna Nihte
A nuai-a Lai Siangtho
in Satan’ zuaukhem vangliatna bang pulaak uh hiam?
2Kor. 11: 13- 15 ______________________________________
2Thes. 2: 9,10 ________________________________________
Mang. 12: 9 ____________________________________
Mang. 20: 10 _
_______________________________________
I gensa om bangin hun nunung ciangin zuau khemna lianpi om ding
hi, ci-in Jesuh in Nungzuipite hilhkhol hi. Tua a gennate lak pan Khrih kineih
khem, kamsang zuau hong om ding a, mi tampi khem ding uh hi (Matt. 24: 5).
Khrih kineihkhemte le kamsang zuaute in hun nunung ciang bek in
hong om ding hi lo, nidanglai pekin om khin uh hi. Galpa in mi a khem zawh
zahzah khem dingin hanciam hi. Khristiante in tua zuaukhemnate i tel ding kisam
hi. Lai Siangtho’ hong hilh thute theihtelna le a hong sawl bangin nuntakna in
Satan khemna pan hong suakta-sak ding hi.
Ellen G. White in a lian mahmah zuaukhemna nihte hih bangin
pulaak hi: “Sih ciangin pumpi sung pan a si lo khat pai khia hi, cih upna le
Sunday ni siantho-sakna,” hi. Mi tampi in hih thunih um uh hi. Pumpi taksa bek
si thei a, si thei lo khua-phawk thei khat om hi, cih thu in sikha hopihna tawh
hong kizom ding hi. Sunday ni siantho-sakna in Rome tawh kizopna hi. USA gam pan Protestant pawlpite in hih thu
nih ah hong hat mahmah ding uh a, Rome tawh khut kilenin nasem ding uh hi. USA
in Sunday ni siantho-sakna le sikha hopihna hong hat mah mah ding a, thuman
deihtel theihna khaktanin, Rome nungzui ding uh hi.” The Great Controversy,
588.
Kum za tampi lai-a kigenkholh a lamdang mah bangin tuhun
dongin ‘pumpi sih khitteh a nungta kha om cih thu le Sunday ni siantho-sakna’
lian semsem hi.
Tuesday May 29
A Si Thei Lo Nunna
Thuhilhsia 9:5, 6,
10; Late 115: 17; 146: 1; 1Kor. 15: 16 – 18; Dan. 12: 2 sim in. A si mite thu
bang gen hiam? Sunday ni siangtho-sakna le a si thei lo kha” upna pan hong dal
thei hiam? ___________________________________________________________ ___________________________________________________________
Lungtang kisai nawnlo,
nak nawn lo, a si vat mihon khat khua hong phawk kik uh hi. Tua bang mite’n a
khuaphawk loh uh sunga a piang a tuahkhak thute gen kik uh hi. Huih lakah
lengto-in a pumpi uh ahih leh leitungah om hi, cih pulaak uh hi. Pawl khat in
itna, hehpihna tawh kidimin vak kawikawi hi, ci uh hi. Pawl khat in a si mite tawh kiho uh hi, ci-in
pulaak uh hi. Hih bang thute ‘sihkuan tuahkhak thute’ (Near Death Experience)
ci-in leitung pilte’n ciamteh uh hi. Hih tawh kisai a kibang lo ngaihsutna
tuamtuam om hi. Khristian tampi in hih bang thute siksanin pumpi a sih hangin
mihing in a si lo khat nei hi, ci-in pulaak uh hi.
Hih bang upna in “Sunday
ni siangtho-sakna le a si thei lo kha’ cih upna hi. Pumpi a sihteh a si lo khat
pumpi sung pan paikhia hi, cih upna in si-kha, dawi upna pan hong pai upna hi.
Tua bang upna in Jesuh kisam nawn lo hi, cih upna hi pah hi. Tua bangin tawl
khat sung si pakin khua phawk kikna neite in a si khin mite kiang pan hehnepna,
itna ka ngah uh hi, ci-in pulaak uh hi. Thuman bulpi - Khrih hong hotkhiatna,
mawhna, thukhenna cihte pulaak lo uh hi.
Thuman gen uh hi leh Khristian
upna thu bulpite pulaak ding uh hi. New Age ci-in si-kha thu-upna thupi takin a
ngaihsut mite’n Khristian upna panin lampial uh hi.
Bang hangin
Khristiante in, leitungah up huai thu tampi om taleh, Pasian’ kammal Lai
Siangtho lenkip ding thupi hiam?
Wednesday May 30
Sabbath le Nate Amau thu-in piangtawm hi, cih upna
Satan in a si lo hinna mihing in nei hi, cih zuau thu tawh mi
tampi khemzo hi. Tua bangin a zawh mah bangin Lai Siangtho’ thupiak Sabbath
suankhia-in, Sunday ni siangtho-sakna tawh leitung huzaap hi. Piansak ni sagih
Sabbath thupi ngaihsut lohna dingin, evolution theory (Na khempeuh amau thu-a
hong piangtawm hi) cih upna nei mi tam semsem hi.
Pian. 1 – 2:3 sim in.
TOPA in nate bawl, piangsak a, nate a piansak nadingin bang tan vei sawt hiam cih pulaak
hiam? __________________________________________________________________ ___________________________________________________________________
Piansakna tawh kisai thu
lianpi nih kidawk hi. Amasa-in na khempeuh geelkholhna tawh kipiangsak hi. Ama
thu-in tha khatin a piang tawm mawk om lo hi; a piang kha pak cihte om lo hi.
Geelkholhna omlo-in Pasian in bang mah bawl lo hi. Nihna-ah nate in amau
namzui-in kipiangsak hi, cih kimu hi. Khat le khat kibang lo hi. Nuntakna nei
khat panin na khempeuh hong piangkhia hi lo hi.
Piancil Bu in hih thu
nih pulaak hi. Ahi zong Darwin hong khankhiatteh nuntakna nei khat panin na
khempeuh hong piangkhia hi. Tha khatin hong piang hi, ci-in pulaak hi. Bang
hangin leitung mipil tampi in Piancil Bu tawh kituak lo-in piansak thute pulaak
uh hi ding hiam? Khristian thu-um mipil tampi in Lai Siangtho tawh kituak lo
piansak thute um uh hi. Hun nunung a thupiang dingte genkholhna-ah hih bang
thute zong kihel hi. Bang hangin kum tampi hi lo-in ni guk sungin na khempeuh
kipiangsak hi, cih thu thupi ngaihsut ding kisam hiam?
Nate in amau thu-in hong
piangtawm hi, cih thu in Pasian in ni guk sungin na khempeuh piangsak hi, cih
thu nial hi. Pasian in ni guk sungin na khempeuh piangsak hi, ci-in um lo-in,
nate in amau thu-in a hong pian nadingin kum tampi sawt hi, cih a um zaw mite
in, Sabbath thuman zui-in Sunday siangtho-sakna hanga bawlsiatna, sihna thuak
lo ding uh hi.
Thursday May 31
Thumgawm Pasian A Kineihkhem
Piancil pan Mangmuhna
sung khempeuh in thum gawm Pasian khat thu hong hilh hi. Ahi zongin hun
nunungah khemna, bawlsiatna hong piang ding hi. Thum gawm Pasian kineihkhem
gulpi, tui sung pan sapi le leitang pan sapi kigawm ding uh hi, ci-in Mangmuhna
Bu in hong hilhkhol hi.
Mang. 12: 17; 13: 1, 2
sim in. Bang thu kipulaak hiam?
__________________________________________________________
____________________________________________________________________
Gulpi in Pa Pasian kineih
hi-in ukna nei hi, cih kilang hi. Hih gulpi in tui sung a om sapi tungah
thuneihna le ama tokhom pia hi. Tui sung a om sapi in Khrih kineih hi. Bang
hangin hih tui sung a sapi in Khrih kineih hi ding hiam?
Mang. 13: 2-5 sim in. Tui sung a sapi in bang pianzia nei hiam?
______________________________________________________
__________________________________________________________________
Jesuh in Pa tung pan
ukzawhna a ngah mah bangin (Matt. 28:18), tui sung pan sapi in gulpi’ piak
thuneihna ngah hi. Khrih in kum thum le lang sung nasemin tua khitteh sihna
thuakin sihna pan a thawh kik mah bangin, hih tui sung pan sapi in zong (Mang.
13:3) kha 42 sung
(kum thum le a lang) tawntung ukzawhna le thuneihna ngah hi.
Mang. 13: 11- 17 koi bangin leitung pan sapi’om zia pulaak hiam?
___________________________________________________________
__________________________________________________________________
Kha Siangtho in kiliansak
lo-in Jesuh liansak bangin (John 16: 13, 14), leitung pan sapi in tui sung pan
sapi panpihin vangliatna pia hi. Kha
Siangtho in vangliatna tawh meikuang panin a hong kilatkhiat mah bangin (Sawl.
2:3), leitung pan sapi in zong nalamdang bawl hi (Mang. 13:13). “Leitung pan
sapi in Pentecost khanlawhna zuau hong zang ding a, Pasian man hi, ci-in
leitung mi khempeuh hong khem ding hi.” Jon Pauline, “What the Bible Says About
the End-Time (Hagestown: Review and Herald Publishing, 1998), 111.
Zuau khemna sung om
khakloh ding kidop kisam a, koi bangin thuman lo theithei ding i hiam?
Friday June 1
Ngaihsutbeh Ding: Nate in amau le amau-in hong
piangtawm hi, cih upna in hun nunung a nungta mite huzaap hi; a diakdiakin
Sabbath thu-ah tampi sukha hi. Hih upna a pulaak masa pen Charles Darwin in
‘Kido-na Lianpi’ thei kha lo ahih manin, itna tawh kidim Piangsak Pasian om hi
napi bang hangin siatna, gimna om hiam, cih thu zong tello hi. Tua bangin a
telloh thute hangin nate in amau thu-in piangtawm hi, cih upna hong nei hi. Tua
bang upna hong khankhiat hun sung mahin (AD 1800’s) Pasian in Ama thuman pulaak
dingin Seventh-day Adventist pawlpi piangsak hi. Seventh-day Adventist pawlpi
in Piangsak Pasian om a, na khempeuh ni guk sungin Ama piansak hi, ci-in tangko
hi.
Darwin in Ellen G.
White’ laigelhte sim kha lo ding hi, kici thei lo hi. Ellen G. White in “nate
in mawhna tawh a kidim hangin nate tung pan i sin ding thu tampi om hi,” ci-in
pulaak hi. Siatna in leitung maitang tuamin, tui, huih le na khempeuh, mun
khempeuh kisia khin napi, nate a kipiansak hunin hoihna, Pasian zia le tong
tawh kidim hi. Tu-in nate in Satan’ zia le tong tawh kidim hi. Mawhna hangin
tu-in nate in a sia, le a pha hong theisak hi.” Ellen G. White, Education, 26.
Darwin in upmawh thute
siksanin Pasian’ zia le tong, nate hong pianzia a gen thute in a man lo thu hi
mah taleh Satan in hih thute mah siksanin mi tampi hong khem hi.
Kikup Ding Dotnate
1. Bang hangin mi tampi in
Satan in a taktakin a om hi lo hi, ci-uh hi ding hiam? Hih bang thu upna in Lai
Siangtho’ hong hilh thute a nial suak ahih manin bang zahin lauhuai
hiam?
2. Sihna tawh kisai-in pumpi
taksa a sih ciangin a si lo kha khat pusuak khia hi, cih thu koi bangin na
dawng hiam?
3. Nate in amau thu-in hong
piangtawm hi, cih zuau thu hi taleh bang hangin hun nunungah mi tampi in um uh
hi ding hiam?
