Lesson 8 May 19 – 25
PIANGSAKPA BIA UN
Sabbath Nitak: Tu Kaal Sung Sim Ding: Mang. 14: 6,7; 14: 8-12; Matt. 24:14; Gal. 3:22; Luke 23: 32 – 43; Pian. 22: 12.
KAMNGAH: “Leitungah a teeng mite a kipan gam khempeuh, nam khempeuh, pau khempeuh, pawl khempeuhte kiangah Pasian’ Lungdamna Thu hilh dingin vantungmi a dang khat in van kim lai-ah a leeng ka mu hi” (Mang. 14:6).
SDA thu-umte in ‘tulai thuman’ (2Pet. 1:12) ci-in a hun tawh kizui-in Pasian in thuman hong hilh hi, ci-in i um hi. Khang khat khit khang khatah tua bangin thuman muhthakna om toto hi. Lungdamna thu masa Pian. 3: 15 sunga mah bangin numei’ suan tungtawnin hotkhiatna thu hong piang ding hi, ci-in Adam le Eve tung kipulaak hi. Pasian in Abraham kamciam pia-a “Nang in a lian a thahat minam suakin, leitung minam khempeuh in ama thupha ngah bangin thupha a ngah nadingun hong ngen ding uh hi,” ci hi (Pian. 18: 18). Hotkhiatna thu hong kitel laak zaw hi. Jesuh in mihingin hong pai takteh “ Mihing Tapa, midangte ama na a semsak dingin hong pai hi lo hi. Midangte’ na a sem ding le mi tampi a tatkhiat nading ama nuntakna a pia dingin a hong pai ahi zaw hi” (Mk. 10: 45). Hih sangin hotkhiatna hong kitel laakna om lo hi. Tu-in Vantung mi thum thupuak (Mang. 14: 6 -12) in Khrih hong pai madeuh a nungta mite aa dingin tulai thuman ci-in i tangko hi.
Tu kaal sungin Vantung mi khatna thupuak sunga hun nunung lauhuai-na sung a nungta mite in Topa tungah cihtakna thute i kikum ding hi.
SUNDAY May 20
MI KHEMPEUH AA DING HOTKHIATNA
Mang. 14:6; Matt. 24: 14; 28: 19 sim in. Bang thu kipulaak hiam? Koi bangin thuman teci, pawlpi nasep a thupitna hong telsak hiam?
_________________________________________________________________ _________________________________________________________________
Vantung Mi khatna’ thupuak in hun nung aa dingin “ Khrih hong Sawlna Lianpen” (Matt. 28:19) hi. “Tuhun thuman” hi. Mun khempeuhah, gam khempeuhah, pau-nam khempeuh tungah hotkhiatna thu puak ding hong hilh hi. Hotkhiatna in mi khempeuh aa ding hi, ci-in hong hilh hi. Mi khempeuh in hotkhiatna thu a zak ding kisam hi.
Gal. 3:22 sim in. Bang hangin mi khempeuh in hotkhiatna thu a zak ding kisam hiam?
________________________________________________________
________________________________________________________________
Mawhna in mun khempeuh tuamcip ahih manin hotkhiatna thu zong mun khempeuhah a tangko ding sapna i ngah hi. “ Minam khempeuh, pau-nam khempeuh in Pasian’ thukham palsat ahih manin mawhna ukcip i suak khin hi. Adam’ mawhna in mihing khempeuh hong lawh hi; mawhna nei lo mi kuamah a om kei hi. Mawhna hangin gimna, natna, sihna i thuak a, tawntung sihna thuak ding i hi hi. Ahi zongin tawntung sihna pan suahtak nading – Khrih, mihingin hong nungta, hotkhiat nasem, si, thokikin a kisik mi khempeuh aa ding mawh vantung biakbukah thuumna nei hi. Jesuh Khrih bek in mawhna pan suahtakna lampi hi. Mimal khat ciat in Khrih sungah tawntung hotkhiatna lametna lianpi hong kipia hi. Tua manin Seventh-day Adventist pawlpi in hotkhiatna mun khempeuhah i tangko hi.
Bang hangin hotkhiatna thu a tangko mite’n vantung thupha le hamphatna ngah uh hiam? Tua hi-in bang hangin mite tungah hotkhiatna thu genin, Khrih hong pai ding a kiginkholhna a hoih pen hong suak hiam?
Monday May 21
Singlamteh Tunga Guta-pa le Tawntung Lungdamna Thu
Mang. 14:6 sungah mun khempeuhah kitangko ding ‘Tawntung Lungdamna Thu’ pulaak hi. Lamet bei mite tungah lametna hong guan hi.
Lk. 23: 32 – 43 sim in. Koi bangin mimawh khempeuh aa dingin lametna lianpi tawh kidim ‘tawntung lungdamna thu’ pulaak hiam?
Singlamteh tunga guta-pa tawh kisai-in Ellen G. White in hih bangin gelh hi: “Hun khat lai-in Jesuh thungai ding hanciam hi napi Jesuh tawh kinai ding kikhaktan hi. Tua a kipan siatna tawh kidiahin mat le hen thuakin singlamteh tungah thahna thuak hi.” Ellen G. White, The Desire of Ages, 749.
Hi mah taleh ama tungah bang thu piang hiam? Singlamteh tung a kikhai laitakin gutapa in Jesuh in Pasian a hihna phawk kik hi. “Topa aw, na Kumpi Gam na phuh ciangin kei hong mangngilh kei in,” ci-in ngen hi (Lk. 23:42). Koi bangin Jesuh in dawng kik hiam? “Aw, hong huh nuam mahmah ing. Ka thu hong um ngei mah hi ve cin, mawhna sungah a si ding hi teh,” ci-in a dawng hiam? Jesuh in “Na dikna uh thukhamhilh siate le Pharisee-te dikna a khup zawh kei leh vantung kumpigam sungah na lutthei kei ding uh hi,” ci-in a dawng hiam? (Matt. 5: 20). “Na mawhnate kisik in,” ci-in dawng hiam? Tua bangin dawng lo hi.
Gutapa in dikna ngah nadingin bangmah a piak theihlohlam Jesuh in thei hi (Matt. 27:44). Mi thakin mu ahih manin na mawhna, na khialhna khempeuh kimaisak khin hi. Tua hi-in kei tawh Paradise ah na om ding hi, ci-in kamciam pia hi (Lk. 23:43). Hih thu in ‘tawntung lungdamna thu,’ Vantungmi masa thupuak’ bulpi zong hih thu mah hi. Hih thu lo-in Thukham, Sabbath, misite’ omzia cihte in khiatna nei lo hi.
“Tawntung lungdamna thu” lo-in i up thute in bang khiatna nei hiam? Hih in lametna bang hong hilh hiam?
TUESDAY May 22
Pasian Kihta unla A Vangliatna Phat Un.
Vantungmi Masa in a thupuak “Tawntung lungdamna thu mun khempeuhah” kipuak ding a gen khit ciangin hih thupuak a kicing zaw-in hong kihilh hi. Tawntung lungdamna thuman sungah tuhun thuman tangko ding zong kihel hi. “Tuhun thuman’ in hun nunung a om eite’ tangko ding thuman ahi hi (Mang. 14:7.
Mang. 14:7 sim in. Pasian kihta un cih thu le Ama vangliatna phat un, cih a khiatna in bang hi ding hiam? Koi bangin Pasian kihta-in Ama vangliatna phat ding i hiam? Koi bangin tua thu in hotkhiat lungdamna thu tawh tomkhawm hiam?
_________________________________________________________
______________________________________________________________
Pasian kihta cih thu le Ama vangliatna phat un cih thu in a tuam tuak hi lo hi. Pasian’ deihna bangin Amah a kihta lehang Ama vangliatna a phat i hi hi. A nihin kizom bilbial hi.
Pian. 22: 12; Pai. 20;20; Job 1:9; Thuhilhsia 12:13; Matt. 5:16 sim in. “Pasian kihta” ci thu in koi bangin Ama vangliatna phat un cih tawh tawh kizom hiam?
________________________________________________________
__________________________________________________________________
Pasian kihtakna in Ama thupiakte zuihna tawh kizom hi. Ama thu mangin, a hoih nate i sep i bawl ciangin, Ama min a thangsak i hi hi. Pasian kihtak cih in Amah zahtakna, lamdangsaknate sangin tangzai zaw hi. Pasian kihta un, ci-in hong kihilh hi. Mawhnei mi siatna tawh kidim i hi hi. Tawntung sihna tuak ding a kilawm mi i hi hi. I gamtatsiatna kua-in thei lo-in om ding hiam? A siangtho, a thuman Pasian’ thukhenna tuak ding kilawm i hihna a phawk mite in Pasian zahtak uh hi. Tua bang kiphawkna in mawhmai-sak Pasian kiang hong tunpih ding hi. Amah a zuan mi khempeuh in mawhmai-na, siantho-na ngah ding uh hi. Khrih hong si lo hi leh tawntung siatna sung tung ding i hi hi (Matt. 10:28).
Koi bangin Pasian a zahtak mi na hi hiam? Koi bangin Pasian zahtakna in thuman sungah kiptakin om a, Ama hong sawl bangin nungta thei ding hong huh hiam?
Wednesday May 23
A Thukhen Hun Hong Tungta Hi
Vantungmi Masa’ thupuak – Pasian kihtak unla Ama Vangliatna phat un cih thuman in thukhenna tawh kizom hi (Mang. 14:7). Lai Siangtho hong hilh thute thuman ahih manin Pasian pen a thuman Pasian, thu a khen Pasian hi. A thuman lo, siatna dim hih leitungah thumanna le thukhenna hong tung takpi ding hi.
Mi khempeuh in Pasian a zahtak kul hi. Tua ahih manin ‘tawntung lungdamna thu’ sungah thukhenna zong kihel hi. Koi bangin hih thunih in kizom hiam? “Hotkhiat lungdamna” cih thu in, Pasian’ thupiak palsatin mawhnei mi hi mahta lehang, singlamteh tunga gutapa bangin, thukhen niteh, mawhsakna le i mawhna tawh kituak gimna tawh a kipelh ding i hi hi.
Matt. 12: 36; Thuhilhsia 12:14; Rom. 2:6; 1Kor. 4:5 sim in. Ka gamtat hoihna in hotkhiatna hong tun zo ding hiam, ci-in ngaihsun in.
__________________________________________________________
________________________________________________________________
Lutung a om samzang khempeuh a malmal a thei Pasian in thu hong khen ding hi. Ahi zongin ‘tawntung lungdamna thu’ hangin, thu hong kikhen takteh, mawhsakna i ngah nawn kei ding hi. Bang hang hiam cihleh Jesuh citakin zui-in, Ama sisan in hong sawpsiang, hong siangtho-sak hi. Ama siantho-na, Ama dikna in eite’ siantho-na, eite’ dikna-in hong kiciaptehsak hi. “ Hihte in mihing’ gamtat hoihna tawh kingah thei hi lo hi. Pasian mai-ah mawh dim nunna puan bangin silhin, a mawhnate pulaakin om hi. Kisikin, upna tawh nungta-in a ki-ap mite aa dingin Khrih in palai semin mawhthuumna nei hi. Kalvary-a a thuakna tawh Khrih in Satan’ hong mawhsakna khempeuh hong hepkhiatsak hi. Kalvary-ah a hong sih dongin Khrih in a Pa thu mang banah vantung le leitungah vangliatna khempeuh Amah kipia-in, Pa Pasian tung pan hehpihna ngenin, Amah tawh kilemna hong bawlsak hi.” Ellen G. White, 5T., 471.
Thukhenna in mawhmai-sak kitangsapna bang pulaak hiam? Koi bangin Pasian hong piak hehpihna le mawhmai-sakna siksanin ei tungah hong khialte’ mawhna maisak ding i hiam?
Thursday May 24
Vantung le leitung a Piangsak Pa bia un
Mang. 14: 6, 7 sim in. Vantungmi masa’ thupuak a mal mal-in bang pulaak hiam? Koi bangin tua thute khat le khat kizom hiam?
_______________________________________________________
________________________________________________________________
Hotkhiat lungdamna thu tawh kizomin leitungah teci hi dingin sapna ngahin, Pasian kihta ding le Ama vangliatna phat ding cih thu in Piangsak Pa, amah bek Pasian bia ding cihna hi. Hih thute in i tangko ‘tuhun thuman’ hi; tawntung lungdamna thu, thukhenna, teci hi ding cihte in Pasian in na khempeuh Piangsak Pa hi, cih thu om kei leh a mawkna hi lo ding hiam?
I up thute in Topa khat bek, Topa in Piangsak Pa hi, cih thu panin hong mengkhia hi. Topa in Piangsak Pa hi, ci-in amah biakna in thu bul mahmah hi. Hih in mihing hihna man, nuntakna man, nuntakna ganhingte tawh kibang lo-in Pasian lim le mel sunin hong kibawl ahihna pulaak hi. Topa in Piangsak Pa hi, ci-in Amah i biak ciangin i nunna khempeuh le i lametna khempeuh Ama tungah kinga hi, cih a pulaak i hi hi. Tua hi-in piansak ni sagih Sabbath in thupi mahmah hi. Sabbath in Pasian bek in eite hong Piangsak Pa, Amah bek i biak ding kul hi. Lungdamna thu, thukhenna thu cihte in Topa in Piangsak Pa hi, cih biakna tawh kipawl hi.
Mang. 14: 8- 11 sim in. Topa in Piangsak Pa hi, ci-in biak ding bangzahin thupi hiam?
_________________________________________________________
_________________________________________________________________
Hun nunung a thupiang ding genkholhnate hong tungtung ta a, Piangsak Pasian biak ding sangin sapi bia ding thupiak hong hat semsem ding hi. Sapi le ama milim a bia mite’ thuak ding a lauhuai thute ngaihsun lehang Piangsak Pasian mah biakhuai zaw mahmah hi, cih hong theitelsak hi. A hong tung ding hun haksa sungah hih thu hong hat semsem ding hi.
Piansak leitung a lamdanna tuamtuamte ngaihsun in. Leitung in Pasian’ bawl ahihna bang hong hilh uh a, bang hangin Topa bek mah i biak dingin kilawm hiam?
Friday May 25
Ngaihsutbeh Ding: Lai Siangtho thukante in Mang. 14:7 – vantung le leitung, tuipi le ciktui Piangsak Pa bia un cih sapna leh Thukham li-na ( Pai. 20:11) in kizopna nei hi, cih pulaak uh hi. Ni guk sungin TOPA in van le lei, tuipi le tuate sunga om khempeuh bawl hi, ci-in Sabbath in hong hilh hi. Mang. 14:7 sungah TOPA in “Tuinak le tuipi” Piangsak Pa ci-in hong kilang hi.
John Baldwin in hih bangin gen hi: “Mang. 14:7 in Pai. 20: 11 sunga piansak nate – singkung, vasa, nga-sa, mual le guam kipulaak nawn lo hi ding hiam cihleh Mang. 14:7 ‘tuinak le tuipi Piangsak Pa in thukhenna tangko-ta hi, cih hong hilh hi. Noah hunlai-a tuiciin tawh thukhen khin ahih manin a sawt lo-in hong tung ding Pasian’ thukhenna hong hilhkhol hi. Vantungmi Masa’ thupuak, mimal tungah hi taleh leitung buppi-in hi taleh, Pasian’ thukhenna thuak ding hi, cih thu ngaihsut ding hong hilh hi.” John Baldwin, ed., Creation, Catastrophe, and Calvary: Why a Global Flood is Vital to the Doctrine of Atonement (Hagerstown: Review & Herald, 2000), 27.
KIKUP DING DOTNATE
1. “Tuu bangin lam i pial khin hi” (Isa. 53:6) a cih mah bangin TOPA in i mawhna khempeuh Jesuh puak dingin suan hi. Bangzahin mawhin khial khin mah lehang mawhmai-sakna in lian zaw hi lohiam, ci-in koi bangin hong phawksak hiam?
2. Singlamteh tunga kikhai gutapa in bang thuman hong hilh hiam? Gentehna-in tua gutapa a mawhna kimai-sakin singlamten tungpan kikhahkhia hi leh,ama nunzia ding ngaihsunin Khrih hangin a kikhel nunzia hong gen ding thute ngaihsun in.
