MUC

Print Friendly and PDF

Sunday, March 18, 2018

LESSON 7 MAY 12- 18 Matthew 24, 25





LESSON 7                MAY 12- 18
Matthew 24, 25

SABBATH NITAK: TU KAAL SUNG SIM DING: Matt. 24: 1-25; 7: 24- 27; 25: 1-30; Mang. 13: 11- 17; Luke 21: 20; 2Kum. 23: 13.

KAMNGAH: Bang hang hiam cihleh Khrih a kineihkhemte le kamsang a kineihkhemte hong piang ding a, ahih zawh  leh a teelsa mite nangawn a khem nadingun lim le nalamdang lianpipi hong bawl ding uh hi” (Matt. 24:24).

     Khrih in a gen hun nunung a piang ding thute le kiginkholhzia ding cihte Matt. 24, 25 in pulaak hi. Khrih in hih thu a genin-ah Jerusalem kisiat ding a genkholhna zong hi-in, hun beikuan ciangin a piang ding a genkholhna zong hi. Nungzuipite tungah kigenkhol hih thute in tua hun lai-a mite aa ding le hun beikuan ciang a nungta mite aa ding zong hi. Tua genkholhnate in dipkuathuai vive hi.  Gal, gimna, natna, Khrih zuau, bawlsiatnate cihte hong tam ding hi. A beisa thute ngaihsun kik lehang Khrih’ genkholhnate tangtung hi. Tua ahih manin a hong piang lai ding genkholhnate tangtung takpi ding hi, cih kithei hi.
     Khrih in Amah hong pai ding a theikhol ding bekin hong hilhkhol hi lo hi. Matthew 25 sunga gentehna mah bangin, Mihing Tapa hong pai kik ciangin a kigingkholsa-in i om ding zong hong deih hi. Hun hamsa hong tung ding hi.Ahi zongin Amah dawn dingin kigingkhol mite in Amah tawh mangkhawm ding hi.

SUNDAY              MAY 13
A LIAN MAHMAH GENKHOLH KIPSAKNA

     Singlamteh tungah kithahna a thuakma-in Jesuh in Olive Mualah Nungzuipite thuhilh hi. Jerusalem biakinnpi kisia ding hi, cih Nungzuipite mah bangin nang zong a za dingin kingaihsut in. Nungzuipite’n bang a ngaihsun uh diam? Nungzuipite’ dotna ngaihsun lehang biakinnpi kisiatma-in thupiang dingte in leitung beikuan a thupiangte zong pulaak hi, cih kimu thei hi.
     Matt. 24: 1-25 sim in. Jesuh in Ama nungzuite tungah hun bei ding ciang a piang ding thu bang pulaak hiam?




     Matt. 24: 1-25 sungah hong piang ding thu hong hilhkhol hi.  Tuate lak pan Khrih in ama nungzuite’ aa ding a lunghimawh bel thu in Khrih kineihkhem le zuau kamsangte hi. Khrih a kineih kamsang, thuhilhsia hong tam ding hi. Khrih a dawn dinga kiging mi pawl khatte in tua kamsangzuaute’ nung zui ding uh a, hih in a lauhuai pen ding hi.
     Dahhuai mahmah thu hi taleh Lai Siangtho’ gen thute tangtung  hi. A beisa-in hi taleh tuhun-in zong ‘Kei in Khrih ka hi hi,” ci-in Khrih a kineihkhem mi tampi om khin hi. Genkholhnate lamdang zen si!  A tangtung khin genkholhnate ngaihsun lehang, Khrih’ hun lai-in a tangtun loh hangin, genkholhna bangin tung takpi hi. Zuau kamsang tampi hong pai lai ding a, tuate lamdangsak ding hi lo hi.
Khrih hong hilhkholh upna tawh kisai thute zong ngaihsun in. Tanglai- pan mi tampi in leitung nate ki-uksak uh hi. Leitung nate in mihing’ gimna beisak ding hi, cih lametna khempeuh in a mawkna taktak hi, cih kilang semsem ding hi. Mi tampi in leitung nopsak nadingin gamsung ki-uk, kimakaihzia, leitung vanzat khantohnate tungah kinga uh hi. I theihsa mah bangin tua bang lametnate a mawkna taktak hi, cih kimu thei hi. Tu-ma kum 2000 val pek a Jesuh hong genkholh thute tangtung takpi hi.

     Matt. 24: 25 sim in. Upna kip nadingin bang hepkhiat ding kisam hiam?

Monday        May 14
Hun Bei Dongin Thuakzawhna

     Matt. 24: 9; Mang. 13: 11- 17 sim in. Jesuh’ gen thute le John tungah a kipulaak thute a kibang thu hi lo hiam?     ____________________________________________________________     _______________________________________________________________
    
     Hun beikuan ciangin thuneihna zangin upna man langpanna, a man lo biakna hong khang semsem ding hi. Hih thu mah Khrih in a nungzuite aa ding lunghimawh pen hi. Thuman a lenkip mite’n bawlsiatna, muhdahna, sihna dong thuak ding uh hi.
     Matt. 24: 13 sim in. Langpana thuak taleh bang in cihtakna, hotkhiatna hong ngahsak dinghiam?     _____________________________________________________________     _____________________________________________________________

     Lai Siangtho thuman tawh a kidal mite bek mah in gimna khempeuh nawktan zo ding hi.” The Great Controversy, 493, 494.  A man lo thute in Lai Siangtho thuman susia zo lo ding hi. Thuman thutak tawh tu-in a nungta lo mi in zuaukhemna sungah awk ding hi.
     Matt. 7: 24 – 27 sim in. Bang in Pasian tungah hong citaksak thei hiam?     ____________________________________________________________
     _____________________________________________________________

     Pasian’ kammal Lai Siangtho a thu-in theihna kisam hi mah taleh, tuabek  tawh hamsatna kinawktan zo lo ding hi. I theih thuman bangin nuntak ding kisam hi. Thuman hong sawl bangbang zuih kul hi. Thugentehna in suang tung a innlam pa in Jesuh thugen bangin nungta hi-in, sehnel tung a innlam pa ahih leh Jesuh gen thute zui lo, thumang lo hi. Amaute gel kilamdanna in thumanna le thuman lohna hi.
  
     Bang hangin a thumang mi kisia lo-in, thumang lo mi kisia hiam? Topa’ thu manna in upna thu-ah bang kilamdangsak hiam?

Tuesday             May 15
“Lipkhaphuai Siatna”

     Khrih in hun beikuan a piang ding thu a genkholhna-ah Daniel Bu sung a genkholhna pulaak kik hi (Dan.9:27; 11:31; 12:11).  Pasian in Ama thukham palsata –milim biakna (Dan.27:15) numei pasal thaangtatna(Siam.18:22), cihte ‘lipkhaphuai’ci-in pulaak hi. Hih ‘lipkhaphuai siatna’ sungah thuman langpanna kihel hi.

     Matt.24:15; Lk.21:20 sim in. Koi bangin Khrih’ pulaak lipkhaphuai siatna tawh kisai thu hong hilh hiam?
_____________________________________________________________
     _____________________________________________________________
     Khrih in hun bei kuan a piang ding a genkholhna hi in, a gen khit  a sawt lo-in a piang ding thute zong kihel hi. AD 70 in pagan Rome in Jerusalem khuapi banah biakinnpi zong susia  hi. Jerusalem kisiat ding a genkholhna ahih mah bangin hun beikuan ciangin zong hong tangtunglai ding hi. “Jerusalem in uplohna, langpanna, mawhna hang a Pasian’ thukhenna limcing hi.” Ellen G. White, The Great Controversy, 22, 23.
     Daniel 12: 11; 11; 31 sunga ‘lipkhaphuai siatna’ in papal Rome tawh kizom hi. Papal Rome in vantung hotkhiatna langpangin, vantung biakbuk sunga Khrih siampi’ thuneihna suankhia uh hi. Dan. 8: 9-12 in a beisa-a Romans kumpi’ vangliatna khempeuh pulaak hi. Rome khan masak, ‘ki neu’ hong khangkhia-in pagan Rome vangliatna tawh hong kizom hi (Dan. 8:9).
     Tua khitteh tua ‘ki neu’ hong khangkhiatna hangin ‘aksi honkhat kaikhia’ – Pasian’ mite in bawlsiatna thuak uh hi (Dan. 8: 10-12). Vantung Jesuh bangin amah le amah kibawltawm hi (Dan. 8: 11). Pagan Rome vangliatna a beiteh Rome’ thuneihna hong lian semsem hi. Tua hi-in ‘ki neu’ in pagan Rome le papal Rome limcing tuak hi. Pasian’ thukhenna (Dan. 7: 9, 10) biakbuk siansuahna (Dan. 8:14), ni, kha, aksi-te tungah nalamdangte (Matt. 24: 29) in hun nunung a bawlsiatna thuak Pasian’ mite kihotkhiatna ding hong hilhkhol hi.


Wednesday      May 16   
Nungak Siangtho 10

     Khrih in a hong pai-ma thupiang dingte a genkholh khitteh (Matt. 24) a hong pai ding kiginkholhzia zong hong hilh hi (Matt. 25).
     Matt. 25: 1-13 sim in. Nungak siangtho thugentehna in Amah a dawn ding mite’ kiginkholhzia ding bang hong theisak hiam?
____________________________________________________________
_______________________________________________________________
     ‘Nungak siangtho’ cih in Khristian thu-um mite limcing hi. Satan tawh kipawl lo uh hi. Vantung Gam sung lut ding mite hi (Matt. 25:1). Ahi zongin a vekun ihmu uh hi (Matt. 25:5). Khrih in Ama hong pai ding ngak a, vil ding hong hilh hi (Matt. 24:42).  Amah hong paiteh a dawn thei ding a om ding hong hilh hi.
     Tua nungak siangtho khempeuh in meivaksa-in mopa dawn dingin paikhia uh hi. A vekun Ama hong pai ding lamen uh hi. Topa hong zekai hi.  Khrih hong pai ding hi, cih ngak uh hi napi a vekun ihmu uh hi. Thakhat thu zankimlaitakin mopa hong tung a, a vekun mopa dawn dingin khanglo uh hi (Matt. 25: 1-6). A hai nungakte in kigingkhol uh hi.  A meivak uh mit hi (Matt. 25:8) Greek laimalah ‘a meivakte uh mit ding hi ta hi’ ci-in kigelh hi. Tawmtawm meivak kuanglai hi. Meitui tawm khat nei lai sam uh hi. Ahi zongin Khrih dawn dingin kiging lo uh hi. Tua ahih leh bang kisam?
     Hih nungak siangthote in Khrih hong kum ding lamenin a ngak mite limcing hi. Ahi zongin hih mite in a nuntakna khempeuhah Khrih tawh kizopna nei lo uh hi. Meitui tawm nei sam uh hi – Kha Siangtho’ ompihna tawmno khat bek nei uh hi. Nuntakna buppi Kha Siangtho tawh kidim ding hi napi, Kha Siangtho ki-uksak nuam lo uh hi. Tampi kisam uh hi napi tawmno khat bek tawh lungkim uh hi.
     “Kha Siangtho i lunggulhna, i deih zah tawh kituakin i nunna hong khel hi.  A hai nungakte in lungsim takpi kikhelna nei lo mite limcing hi.  A hai nga-te in Pasian thei lo uh hi. Ama zia le tong kantel lo uh hi. Amah tawh kizopna nei lo uh hi. Tua ahih manin Topa muan ding, amah tawh kizop ding, a maipha et ding thei lo uh hi.  A sepna khempeuh uh kineihkhemna vive suak hi.” Ellen G. White, Christ’s Object Lesson, 411.
    
     Koi bangin a hai nungakte bang lo-in nungta ding i hiam? Koi bangin kikhel ding i hiam?

Thursday         May 17     
Na Talents Zang in

     Matt. 25: 13- 30 sim in. Khrih dawn ding kiginkholhna-ah Pasian hong piak talent in bang dinmun nei hiam?
_________________________________________________________________
     Gentehna tuamtuam zangin Khrih in a hilh hangin Amah dawn dingin kiginkholh ding a hong hilhna vive hi. A kiging mite le a kiging lote’ tuah ding thu hong hilh hi. A kiging lo mite, tawntung nunna a kin lo khempeuh in tawntung kisiatna sung tung ding uh hi.
     Meitui in Kha Siangtho limcing hi. Talent (Greek: talanta) in Kha Siangtho hong piakkhong siamna, hihtheihna tuamtuamte limcing hi; pianpih siamnate zong kihel hi” (Matt. 25:15) The SDA Bible Commentary, vol. 5., 510.
     Nasem khempeuh in a pu uh (a topa) neihsa ki-ap ngah ciat uh hi (Matt. 25: 15). A topa in nasemte’ siamna tawh kizui-in zat ding muanna tawh ap hi. Nasemte in amau neihsa hi lo khat a kem, a zek ding uh hi ta hi. A sepna bang bang uh a gah at kik ding uh hi. Tua ahih manin a topa hong tunteh “nasemte thusit hi” (Matt. 25: 19). Kha Siangtho in silpiak, siamna pia khong hi (1Kor. 12: 1-11, 28- 31; Eph. 4:11).  Silpiak siamna lianpi ngah lote in lungneu nading om lo hi. Siamna Pia Pa nei lo-in kuamah in silpiak siamna ngah lo hi. Tua hi-in Kha Siangtho i neih leh a lian penpen silpiak siamna ngah i hi hi.
     Khrih sungah tua silpiak siamnate i ngah khin hi. Ahi zongin i neih taktak, i zat taktak theihna in Kha Siangtho tung i ki-apna tungah kinga hi. Talent gentehna-ah a talent selcip mipa in Kha Siangtho tungah a ki-ap lo, bang mah sem lo hi. Tua in ama khialhna lianpi hi. A talent phungsak lo hi. Hanciam lo hi. Hehpihna tawh a kipia, a sep theih bangin a sep ding kilawm hi. Bang mah sem lo ahih manin Khrih in ‘mi gilo, mi thadah” ci hi (Matt. 25: 26).

     Jesuh in gentehna zangin hun nunung a piang ding thute le Ama hong kumkik nading thu hong hilhkhol hi. Hun hunung a ding kiginkholhna-ah koi bangin talent zang ding i hiam?

Friday     May 18
Ngaihsutbeh Ding: “Talent khat ngah pa paikhia-a lei-ah phumin a topa’ sum sel hi.” Talent khat ngah mipa in a talent zang lo hi. Khrih aa dingin bang mah ka sep theih om lo hi; bang mah siamna ka nei kei hi,’ a ci mite tungah lauhuai thu hong hilh hi. Na lianpi sem zo ding uh hi leh lungdam takin sem ding uh hi. Ahi zongin a sep theihsun na khat peuh sem lo uh hi. Bang mah sep nei lo uh ahih manin, tua in khialhna lianpi hi. Topa silpiak in gamtat zia le tong sittel hi. A talent zang lo mipa in a citak lo nasem ahihna amah le amah a kipulaak hi pah hi. Talent khat kipia mipa in a talent lei sung a phum mah bangin talent nga kipia mah hi mah lezong lei sungah sel ding hi. A talent sel in vantung pan piakkhong siamnate a thusimlohna pulaak hi gige hi. “ Na neu-no khatah a citakte in na lianpi-ah zong citak hi” Lk. 16: 10.
     “Na neu-no khat a hoihna kiphawk khial hi. Bang hang hiam cihleh cihtak kisa lo hi. Ahi zongin na neu-no khat in nunzia tampi huzaap  hi. Khristian nunna-ah thuneu khat zong om lo hi. Thuneu-ah citak lohna in gamtat nunzia sia-sak thei ahih manin thuneu ci-in awlmawh lohna in lauhuai hi.”  Ellen G. White, Christ’s Object Lessons, 356.

Kikup Ding Dotnate

1.  Bang thute in leitungah nopna tawh kidim hi, ci-in mite umsak                  hiam?  Tua bang lametna, ngaihsutnate  in khial hiam?

2.  Pasian in hong sawl bangin thumanna in bangci bangin i upna hatsak hiam? Bang hangin gamtat thuzuihna om lo upna in a si hi, kici hiam? (James 2: 26). Pasian’ thukham a lenkip mite in bawlsiatna thuak ding uh hi, cih thu hangin, bang hangin tu-in upmawh loh kal hong tung thei gimnate aa dingin kiginkholh thupi hiam?

3.  Nungak sawmte ngaihsun in. Kibatlohna tampi om hi mah talehbang hangin nungak sawmte in thu hong hilh uh hiam? A hai nungakte hi lo-in koi bangin ei le ei kikhemna pelh i hiam?

4.  “Ahih theih leh teelsa mite nangawn in khem thuak ding hi” cih a             khiatna in bang hiam? Koi bangin ‘teelsa mite’ cih na tel hiam         (Matt.24:31; Rom. 8:33; Kol. 3:12).  Hih in bangzahin khemna lauhuai cih hong hilh hiam?

To get the latest update of me and my works

>> <<