MUC

Print Friendly and PDF

Sunday, March 18, 2018

LESSON 6 May 5 – 11 THUKHAM KIKHELNA






LESSON 6     May 5 – 11
THUKHAM KIKHELNA

SABBATH NITAK: TU KAAL SUNG SIM DING: Rom. 8: 1; 7: 15 – 25; 7: 1-14; John 20: 19- 23; Sawl. 20: 6, 7; Dan. 7: 23 – 25; Mang. 13: 1-17.

KAMNGAH: “Amah in a Lianpen Pasian langpangin thu gen ding a, Pasian’ mite a bawlsia ding hi. Amah in amaute’ biakna tawh kipawl thukhamte le hunte kheelsak ding hanciam ding a, ama khut sungah kum thum le a lang sung Pasian’ mite a om ding uh hi.” Daniel 7: 25.

     Hun nunung a thupiang tawh kizomin Pasian thukham tawh kisai thu kihel hi. Thukham dangte sang thupiak li-na, piansak ni sagih Sabbath in thu tampi gen hi. Thukham zuihna, Sabbath zuihna hang hi lo, upna tawh hotkhiatna kingah hi mah taleh hun nunungah Pasian’ thukham, Sabbath in a kimu thei ciaptehna, kingakna munkip a pulaak i hi hi. Mang. 13, 14 sunga kigenkhol mah bangin biakna makaite le gam makaite kipawlin amau thuneihna tawh mihing’ bawltawm biakna man lo zui ding thukhun hong neih uhteh Sabbath in Pasian’ mi hi le hi lo hong khen ding hi. Pasian’ mi khempeuh in “vantung, leitung, na khempeuh Piangsak Pa bia ding uh hi” (Mang. 14:7). Piangsak Pasian simloh kuamah bia lo ding uh hi.
     Tu kaal sung i sin ding thu in: Pasian thukham a diakdiakin Sabbath tawh kisai thu hi ding hi.  Thukham khel ding a hanciam mite le kuate tungah siatna hong tung ding cih thute zong i kikum ding hi.

SUNDAY        MAY 6
KAMCIAM

     Lai Siangtho sungah a lian mahmah kamciam khat Romans 8: 1 sungah kimu thei hi. “Tua ahih manin tu-in ci le sa deihna zui loin Kha Siangtho’ deihna a zui, Jesuh sunga a om mite aa dingin mawhsakna a om nawn kei hi.” Hih in Romans 7 a thukhupna hi-in, thu bul lianpi khat hi.  Romans 6, 7 cihte sunga Paul’ gen thute siksan lehang Romans 8: 1 in lametna lianpi hong pia hi.
     Rom. 7: 15- 25 sim in. Bang thugil pulaak hiam? Tua in Romans 8: 1 sung a kamciam bangzahin nuamhuai hiam?
_______________________________________________________________________________________________________________________________

     Paul’ nunzia muhna kibang lo tampi a om hangin a kitel mahmah thu in: Paul in mawhna thu kician takin pulaak hi. Christian hi taleh mi khempeuh in mawhna tawh kipelh kuamah om lo hi. Ci le sa deihna, siatna a thei kha lo kua om ding hiam? A hoih thei napi in, thu sia mah kizui kha zel hi lo hiam? I deih loh siatna mah kizui kha zel hi lo hiam? Paul in thukham tawh buai lo hi. Ci le sa buai pih hi. Khrih sungah thak suahna nei Khristian khat in mawhna tawh kipelh thei lo hi mah taleh, Pasian thu a mang nuam mi khat in siatna nawk kha hamtang hi, ci-in Paul in hong hilh hilh hi. Tua ahih manin Paul in “ mi genthei pa ka hi taktak hi! A si ding hih pumpi panin kua in kei hong honkhia ding ahi hiam? ci hi (Rom. 7: 24).  Tua hamsatna pan Khrih sungah tawldamna om hi. A lian mahmah kamciam Khrih sung a om mi “mawhsakna om nawn lo hi” Tua mi in Khrih’ hehpihna tawh Kha Siangtho makaihna bangin nungta hi.
     Thu-um mi in ze-etna tawh kipelh lo hi. Mawhna tawh kipelh lo hi mah taleh Khrih sung a om ciangin mawhsakna om nawn lo hi; thukham nuntakpih hi. Tua ahih manin ci le sa deihna nial-in Kha Siangtho kimakaihsak uh hi.

     Romans 8: 1 sim kik in. Bang ci bangin na pom hiam? Bang hangin Romans 8:1 in a lamdang kamciam hi, kici thei hiam?

MONDAY      MAY 7         
THUKHAM LEH MAWHNA

     Zan ni-in Khristian a kipan mi khempeuh in mawhsak a thuakna thu, (Rom. 8:1), Paul in mawhna a siatna Paul’ pulaak thute i sin hi.
     Rom. 7: 1-14 sim in. Koi bangin Thukham le mawhna in kizopna nei hiam? Koici bangin Thukham tawh mawhmai thei lo ahihlam hong hilh hiam?
________________________________________________________
_________________________________________________________________
     Paul in thu lian nih pulaak hi.  Thukham in mawhna hi lo hi, ci-in hong hilh masa hi. Thukham in hoih hi, siangtho hi.  Mawhna in deihhuai lo hi. Bang hang hiam cihleh tua in sihna manawh hi. A nihna in: thukham in sinna le mawhna panin hong honkhia thei lo hi. Thukham in mawhna le sihna a pulaak zongin mawhna le sihna pan hong khakkhia thei lo hi.
     Lai Siangtho limtak sim kei lehang Rom. 8: 1 in Thukham 10 bei hi, ci-in kipulaak kha ding hi.  Paul in Thukham 10 a kipna pulaak hi. Thukham 10 bei hi, ci lo hi. Thukham in kip tawntungin, mawhna pulaak ahih manin, mawhna pan suahtak lungdamna thu kisam hi, ci-in hong hilh hi zaw hi. “Tua ahih leh bang gen ding i hiam? Thukham in mawhna ahi hiam? Ahi peuhmah kei hi. Tua cih thadah, thukham om kei leh mawhna bang hiam cih ka thei kei ding hi. Thukham in, “Deihgawh kei in,” ci hi kei leh deihgawhna in bang hiam cih ka thei kei ding hi” (Rom. 7: 7).
     Rom. 7: 13 limtak sim in. Paul in thukham a gen thute banah bang hangin thukham kisam hi, ci-in pulaak hiam?
________________________________________________________
______________________________________________________________
     Sihna a piangsak in thukham hi lo hi; mawhna hi. Thukham in mawhna’ siathuai-na hong laak hi. Thukham in hoih hi. Bang hang hiam cihleh mawhna hong theisak hi. Thukham in mawhna zawh nading vangliatna nei lo hi. Lungdamna Thu bek in nei hi. Hotkhiat ngah khin Khristiante in Kha Siangtho’ thaksuahna tawh nungta uh hi (Rom. 7:6). Tua in Jesuh tawh kizopna nei-in Ama dikna le siantho-na muangin upna tawh  nuntakna hi.

     Koi bangin Pasian’ hehpihna kisam na hihlam thukham in hong theisak hiam?

TUESDAY        MAY 8
SABBATH PAN SUNDAY MAW?

     SDA hi lo Khristian dangte in thukham nuai-ah om nawn lo, hehpihna nuai-ah nungta i hih manin thukham bei hi, ci uh hi. Amau gennop taktakin thukham 10 bei hi, ci uh hi lo-in Sabbath bei hi, a ci uh hi zaw hi. Amau cihna-ah ni sagih Sabbath ni pen ni masa, sihna pan Jesuh thawh ni Sunday tawh kilaih hi, ci-in Lai Siangtho siksan uh hi. Tua bangin Lai Siangtho siksanna munte limtak et phat kul hi. Bang hang hiam cihleh Lai Siangtho sungah ni sagih Sabbath panin ni masa Sunday ni ah kilaih hi, ci-in a kigelhna mun om lo hi. Ni sagih pan ni masa ni ah kikhel takpi mah hiam? Ahih kei leh tua ni a thupiangte a gen uh hi zaw hiam? cih hoih tak ngaihsut ding kisam hi.
     John 20: 19 – 23 sim in. Bang thu hangin Nungzuite in ni masa ni-in tua inn sungah kikaikhawm uh hiam? Thawhkik ni pahtawi-na-in kikaikhawm  ahi hiam?
____________________________________________________________     _____________________________________________________________

     Sawl. 20: 6, 7; 2: 46 sim in. Sabbath panin ni masa Sunday siantho-sak dingin Sabbath kikhel hi, ci-in pulaak hiam?
_________________________________________________________________  _________________________________________________________________
     1Kor. 16: 1- 4 sim in. Ni masa ni-in sumpi kaikhawm a kikaikhawm uh hi, cih simloh thukham Sabbath pan Sunday ah kikhel hi, ci-in hong hilh hiam?
     _____________________________________________________________
     _____________________________________________________________

     1Kor. 16: 1-4 siksanin ni sagih Sabbath aitangin ni masa Sunday ni kizang hi, ci-in siksan uh hi. Tua bangin kikaihkhop uh hangin ni sagih Sabbath aitangin ni masa ni-in kilaih hi, ci-in hong hilhna om lo hi. A beisa kum za tampi panin Khristian pawl khat in ni masa, Sunday a na zat  uh tu dongin kizang suak hi zaw hi. Lai Siangtho sungah ni sagih Sabbath panin ni masa Sunday ah kilaihna om lo hi.

Wednesday       May 9
Thuciam Thak Sunga Ni Sagih

    Ni sagih pan ni masa Sunday ah kilaih hi, cihna Lai Siangtho sungah om lo hi, cih thu zanni-in i gen hi. Thuciam Thak sungah Ni sagih Sabbath kigelhna munte in Pasian’ Thukham 10 kiplai hi, cih pulaak uh hi.
    Luke 4: 14 – 16; 23: 55, 56 sim in. Khrih hong sihma le a sih khit, Sabbath tawh kisai bang pulaak hiam?
______________________________________________________________    _____________________________________________________________
   
    Khrih tawh kikhawl numei-te in thukham om bangin Sabbath ni-in tawlnga uh hi (Lk. 23: 56). Tua thukham in Sinai muala kigelh thukham li-na hi, cih kitel hi.  Jesuh tawh a kikholhlai-un Jesuh in a zuih thukham in Pasian thukham simloh thukham dang hi lo hi. Tua thukham in Sabbath zong pulaak hi. Khrih in a nungzuite kiangah “Kei nong it uh leh ka Thukhamte na zui ding uh hi,” ci-in hilh hi (John 14: 15). Jesuh mahmah in zong Sabbath a kipan Ama thukhamte nuntakpih hi. Sabbath aitangin Sunday kizang ding hi leh Mary le a lawmte in zong Sunday ni tawlnga ding uh hi.
    Sawl. 13;14, 42 – 44; 16: 12, 13 sim in. Nungzuite in ni sagih Sabbath a tawlngak lamuh bangin hong lak hiam? Ni masa Sunday siangtho-sak ding gen hiam?
    ________________________________________________________________
    Sabbath panin Sunday ah kilaih hi, cihna khat beek om lo hi. Jesuh a kipan pawlpi masate in ni sagih Sabbath ni-in tawlnga ahihlam kitel zaw hi. Sawl. 16: 13 tawh kisai-in synagogue biakinn pua-a kikhop a genna hi zaw hi. Thu-um mite in gun gei-ah pai-in thungen zelzel uh hi. Sabbath ni-in zong nidang a neih ngei mah bangun gun gei-ah pai-in thungen uh hi. Khrih sih khit kum tampi sung tua bangin gun gei-ah thungetna nei uh hi. Sabbath panin Sunday ah tawlngak ni kilaih hi leh Lai Siangtho in pulaak ding hi.
   
    Bangci bangin kitot kisel lo-in Sunday tawlnga mi khat kiangah  Sabbath thu gen ding na hiam?


Thursday              May 10
Sabbath Khel Ding Hanciamna

     Pasian’ Thukham 10 kipden hi (James 2: 10 – 12). Ni sagih Sabbath thupiak in kip tawntung hi. Lai Siangtho’ hong sawl hi lo, bang hangin Khritian tampi in Sunday tawlngakna-in nei uh hiam?
__________________________________________________________
_________________________________________________________________

     Daniel 7 in kumpi 4, Babylon, Media- Persia, Greece le a nunung pen, kumpi tawpna ding Rome kumpi thu pulaak khol hi. Roman Empire panin ‘ki neu’ hong khang hi. Tua ‘ki neu’ in Roman Empire tawh kizom hi. Rome pan hong khang khia papacy sim loh leitungah vangliatna nei kua om hiam? Kum 1600 kim a khangkhia Thomas Hobbes in hih bangin pulaak hi: “Leitung ukzawhna nei pawlpi kua hi ding hiam ci-in kidong hi leh Roman Empire sung pan hong khangkhia papacy simloh a dang om lo hi.” Thomas Hobbes, Leviathan (Oxford: Oxford Univertisy Press, 1996).
Daniel 7: 23 – 25 in Sunday siantho-sak a hong kipatna bang pulaak hiam?
_________________________________________________________
___________________________________________________________________
     Aramaic tawh kigelh Lai Siangtho in ‘ki neu’ in thukham khel ding hanciam hi, ci-in pulaak hi. Leitung kumpi in Pasian’ thukham khel zo takpi ding hiam? Pawlpi tangthu sungah papal Rome in Pasian biak ni ding pen ni sagih Sabbath panin Sunday  ah laih hi. Tu-in Protestant pawlpi a tam zaw in ni sagih Sabbath ni siantho-sak ding sangin ni masa Sunday ni siangtho-sak zaw hi.
Mang. 13: 1-17 le Dan. 7: 1-8; 21, 24, 25 in a kibang limciinna bang om a, tuate in a hong tung ding bang thu hong hilh hiam?
________________________________________________________
____________________________________________________________
     Daniel sungah limciinna zangin papal Rome a khankhiat ding kigenkhol hi. Mangmuhna Bu sungah ‘sapi a bia lo peuhmah’ in bawlsiatna thuak ding hi, ci-in hong hilhkhol hi.

Koi bangin Mang. 14: 6, 7 in Thukham li-na (Pai. 20: 11) pulaak hiam? Koi bangin hun nunung ciangin Sabbath, biakpiakna in hong thupi semsem ding hiam?

FRIDAY May 11
Ngaihsutbeh Ding: Vantung pan Pasian a langpan Gulpi Satan mah in (Mang. 12: 7) Pasian thukham a zui a mitedo hi (Mang. 12: 17; 13: 2, 4). Satan in amah kibia dingin sawl hi (Mang. 13:4). Vantung pan Pasian a langpang Satan in leitung ah zong Pasian langpan hi. A hih theihzahin Pasian’ thukham langpan hi. “Thupiak li-na in Pasian in vantung, leitung na khempeuh piangsak ahihna pulaak hi. Tua in pasian tuamtuamte tawh a kilamdanna hi pah hi. Thupiak li-na, ni sagih ni Sabbath siantho-sakna in piansak thu hong hilh hi.  Na khempeuhte sangin Piangsak Pasian masak zaw-a, Amah bek mah biak ding hi, cih hong hilh hi. Satan in Pasian i muan ding sangin amah a muang dingin nasem hi. Pasian’ thupiak zui ding sangin Satan nungzui ding hong zol den hi. Tua ahih manin Pasian in Piangsak Pa hi, cih a kipulaak khempeuh Satan in langpan hi.” Ellen G. White, The Great Controvery, 53, 54.
     Eite’n Topa mah i bia hi. Bang hang hiam cihleh Amah in vantung, leitung na khempeuh a Piangsak Pa hi. Ni sagih Sabbath in Piangsak Pasian hong hilh hi (Pian. 2: 1-3). Satan in Pasian’ thuneihna – ni sagih Sabbath langpan hi. Hun bei kuan ciangin Pasian in Ama tungah a citak, Piangsak Pa bek mah a bia mi nei ding hi.

KIKUP DING DOTNATE

1.  Siatna, mawhna in hoih lo hi, cih thei napi-in thukham bei hi, a ci             teitei mite’n bang thu tel lo uh hi ding hiam? Siatna langpan uh hi            napi, thukham bei khin hi, ci vet se uh hi. Bang hangin tua bangin                 kici kawikawi hi ding hiam?

2.  Sunday pawlte tawh Sabbath thu na kinial ngei hiam? Koi bangin             Sabbath thuman na gen hiam? Na gen thu a sang thei uh hiam?            Sabbath tawlngakna tawh hotkhiatna ngah sawm mite hong cih uh ciangin koi bangin na dawng hiam?

3.  Hun nunung a ding kiginkholhna-ah Sabbath in a bulpi khat ahih manin bang hangin ‘sapi ciaptehna’ thupiak gingkhia nai lo ahihna i theih ding thupi hiam?

To get the latest update of me and my works

>> <<