LESSON 4 April 21 – 27
HOTKHIATNA LE HUN NUNUNG
TU KAAL SUNG SIM DING: John 11: 1-3; 14: 9; Zeph. 3: 17; Rom.8: 38, 39; Late 91:15, 16; Mang. 14: 6, 7; Eph. 1: 4, 5.
KAMNGAH: Hih ka gen itna pen eite in Pasian i itna thu hi lo a, Pasian in eite hong itin, i mawhna a maitheih nadingin a Tapa a hong paisakna thu ahi hi” 1John 4: 10.
Khristian biakna le Khristian biakna hi lo khempeuh a kibatlohna khat in Khristian biakna hi lote in a biak pasian un a hilh thute siksan uh a, a pasian un amaute aa ding a sep bang mah kigen lo hi. Bang hang hiam cihleh a biak pasian un amaute sihna pan honkhia zo lo hi. Amau le amau kihot nading bek hanciam uh hi. Ahi zongin Khristian biakna ahih leh Jesuh hong hilh thute banah a nasepnate i gen gen hi. Bang hang hiam cihleh sihna pan hong honkhia zo hi. Khrih Pasian in mihingin hong nungta-in (Rom. 8:3), singlamteh tungah hong si (Rom. 5: 8)khitteh sihna zo-in nungta kik hi (1Pet. 1:3). Tu-in tua Topa in vantungah ei aa dingin nasem hi (Heb. 7: 25). Tua in mawhna, sihna panin hong honkhia hi. Mihing amah le amah kihonkhia thei kuamah om lo hi. “ Mihing ama hoihna, dikna, a ithuai-na khempeuh tawh Pasian mai-ah dikna, mawhna pan hotna ngah dingin a kingaihsut leh tua in Pasian langpanna lianpi suak ding hi.” Ellen G. White, Faith and Works, 24. Hih thuman in zuau thu, lauhuai-na tawh kidim hun nunung a nungta mite aa dingin thupi mahmah hi.
SUNDAY April 22
PA HONG ITNA
Jesuh in a sih madeuhin a kikholhpih zawdeuh a nungzuite kiangah Ama tungtawnin Pa kiangah tunzia ding pulaak hi. Tua bangin a genteh Phillip in “Topa aw, Pa hong lak lecin ka lung uh kim pah ding hi,” ci-in dawng hi (John 14:8).
Koi bangin Jesuh in Phillip dawng kik hiam? (John 14:9). Tua in Pa Pasian’ thu bang pulaak hiam? Koi bangin Pa Pasian hong theitelsak hiam?
_____________________________________________________________ _____________________________________________________________
Mi kimkhat in Thuciam Lui hun sungin Pasian in gamtatna bangin a thuk pahpah Pasian hi, Thuciam Thak sungah Pasian in hehpihna, mawhmai-sakna tawh kidim Pasian hi, ci-in pulaak uh hi. Tua bangin etkakna in khial hi. Thuciam Lui hi taleh Thuciam Thak in a pulaak Pasian in a kibang hi; a tuam tuak pulaak lo hi. Khrih leitungah mihingin a hong nuntakna in Pa Pasian hong lak hi. Kum za tampi sungin dawibia mite sung pan bek tham lo, Pasian’ teltuam mite sung panin Ama zia le tong, Ama thuman muhzia manlo tampi hong piang hi. Pasian telkhialhna khuamial in leitung tuamcip hi. Khuamial bei-in khuavak a hong tan nadingin Pasian kiang va zuan a, Satan’ khemna khempeuh beimang ding hi.” Ellen G. White, The Desire of Ages, 22. Tua dingin Jesuh in hih leitungah hong pai hi.
Pasian in kikhel ngei lo hi. Thuciam Lui sunga thupiangte theikim lehang Thuciam Lui’ pulaak Pasian in Thuciam Thak’ pulaak mah bangin Pasian in hehpihna nei Pasian, thuman Pasian hi, ci-in i tel ding hi. “ Pasian in itna hi” (1Jn. 4:8), Pasian kikhel ngei lo hi. “Jesuh in zanni, tuni, cih mahin kikhel ngei lo hi” (Heb. 13:8). Singlamteh tungah kikhai Jesuh in Thuciam Lui sunga Jesuh Pasian mah hi. Tua Pasian in lungduai, ciampel lo, itna nei, hehpihna tawh kidim, itna tawh kidim Pasian hi (Pai. 34: 6, 7). Pasian in a tawntungin itna tawh kidim hi (Late 143: 8), Amah a zui mite tungah a lungdam tawntung hi (Late 147: 11). Pasian in a mite nopsak nading hong geelsak khin hi. A mite lametna hong guan hi (Jer. 29: 11). Ama itna sungah hehna om lo ding a, a mite tawh lungdam kipakin lasa khawm ding hi (Zeph. 3: 17). Hihte banah i telloh Pa Pasian’ nunzia tampi om hi.
Jesuh in Pa Pasian hong lak hi, cih thu ngaihsun in. Bang hangin hih thu in kihtakna tawh a nungta mite aa dingin lungdamhuai, lametna thu hong suak hiam?
MONDAY April 23
Khrih Hong Itna
Mawhna in mihingte Pasian kiang pan hong khenkhia hi. Pasian kiang tun kik nading, Amah tawh kizoptheihna hong om kei leh mihing in a tawntungin mangthang ding hi. Pasian le mihing kizopna om kei leh mihing aa dingin lauhuai hi. Pasian le mihing kizop kik nadingin mihing in a sem thei kei hi. A siangtho, a thuman Pasian bek in Amah tawh kizop kik nading lampi hong bawl hi. Vanglian Pasian in mihingin hong piang a, eite mawhna hang le mawhmai nadingin Amah le amah hong kipia hi.
John 1: 1-3, 14; Phillipians 2: 5-8 sim in. Jesuh’ thu bang hong hilh uh hiam?
_________________________________________________________
_____________________________________________________________
Khrih in tawntung a om den kipatna nei lo bei-na nei lo hi. Ama nunna in kuama tungah kinga lo hi. Jesuh in Pasian tawh kibang hi lo-in Amah mah in Pasian hi. Jesuh in Pasian ahihna mah tawh leitungah mihingin hong piang hi. Thukham a hong nuntakpih dingin mihingin hong nungta hi. Thukham palsat eite khempeuh i sih tangin Amah mah hong si hi (Rom. 3: 23).
Khrih in mihingin hong piang hi. Mi lamdang hi lo hi; mihing takpi mah hi. Vangliatna tawh Pasian’ thupiak nuntakpih hi lo-in, Pasian tungah ki-apna ahih nakleh mihing khempeuh ii tangtung zawh ding thu hi. Jesuh in Pasian ahihna kiam lo, mihing ahihna zong kiam lo hi; a nihin kikim a nunna tawh hong nungta hi. Ama vangliatna tawh na khempeuh Piangsak Pa in (Heb. 1:3) bawngkuang sungah naungekin hong piang hi (Lk. 2: 16). Na khempeuh a om ma-in a om khin, Ama khut sungah na khempeuh a nei Amah in naupang pumpi le a pilna khang semsem hi (Lk. 2: 52). Amah lo-in bang mah a piang lo, Ama hangin na khempeuh a om, Amah mah in singlamteh tungah thahna hong thuak hi (Sawl. 5: 30). Tua bangin Ama hong itna hong lakin, Pa Pasian’ hong itna hong lak tua itna hangin nuamin Ama tungah lungdamin nuam in.
Romans 8: 38, 39 sim in. Koi bangin bang thute siksanin Paul hong hilh thute muang thei ding na hiam?
Tuesday April 24
Kha Siangtho’ Hong Itna
Mi tampi in Pa Pasian a kitheihkhialh bangin Kha Siangtho zong telkhial uh hi. Lai Siangtho thuthuk kan pawl khat in Kha Siangtho in Pa le Tapa kikaal ki-itna hi; Pa le Tapa kikaalah ki-itna hi. Kha Siangtho in Pasian hi, ci-in sang lo hi. Kizopna bekin ngaihsut uh hi. Ahi zongin Lai Siangtho in Kha Siangtho in Pasian hi, ci-in hong hilh hi. Khristian thu-umte in Pa, Tapa min tawh kituiphum mah bangin Kha Siangtho min tawh zong kituiphum hi (Matt. 28: 19). Kha Siangtho in Khrih lamsang hi (John 16: 14). Kha Siangtho in mawhna hong theisak hi (John 14:16); Huh Pa hi, Lamlak Pa hi. Thuman hong hilh hi (Lk. 12:12); palaai hong sem hi (Romans 8: 26); hong Siangtho-sak Pa (1Pet. 1: 2). Kha Siangtho in thuman khempeuh hong lak ding hi, ci-in Khrih in pulaak hi (John 16: 13). A tomin genleng: Pa le Tapa in Pasian ahih mah bangun Kha Siangtho in Pasian hi. Pa, Tapa, Kha Siangtho in pum khat Pasian hi.
Kha Siangtho in a nasepna khempeuhah vantung itna pulaak hi. A dang bang sem hiam? Lk. 12:12; John 16: 8 – 13; Sawl. 13: 2.
________________________________________________________________ _________________________________________________________________
Kha Siangtho in Pasian ahihna hong lak a lian mahmah thu in Khrih in mihingin a hong pianna hi. Jesuh in Kha Siangtho tungtawnin mihingin hong suak hi (Matt. 1:20). Pasian bek in tua bangin nasem hi. Kha Siangtho in Khrih hong suah nadingin nalamdang nih sem hi. Amasa-in Mary sungah mun khempeuhah a om Khrih mihingin piangsak hi. Nihna-ah Kha Siangtho in mihing hihna tawh Khrih nungta-sak hi. Kha Siangtho mah in lamdangtakin mun khempeuh a om Khristian mite tungah Khrih hong puak hi. Tua hi’n Pa le Tapa mah bangin Kha Siangtho in eite aa ding nasem hi. “Pasian in minam khempeuh a hong it manin Pa, Tapa le Kha Siangtho in mawhna pan hong honkhia hi.” Ellen G. White, Counsel On Health, 222. Pa, Tapa le Kha Siangtho in a hong itna kikim hi. Pasian Kumpi Gam sungah i nuntak tawntung nadingin hong honkhia uh hi. Bang hangin hotkhiatna awlmawh lo-in om thei ding i hiam?
Pa, Tapa le Kha Siangtho in eite nopsak tawntung nading nasem hi, cih thu in bang zahin lungmuanhuai hiam?
Wednesday April 25
Hotkhiat Kitelcianna
SDA thu-um mi kim khat in hotna ngah le ngah lo kitel lo uh hi. Tua bang mite’n hotna sungah lungmuanna nei lo hi. Tawntung nunna ngah nading hanciam theihzahkhopin hanciam uh a, kicinlohnate hangin lungkia uh hi. Amau le amau ki-en uh a, lungmuanna nei thei lo uh hi. Khrih’ nunzia le i nunzia tehkak lehang mihing kicinlohna tampi kilang hi. “Kongkawcik lampi haksa a, mi tawmno bek in zuizo uh hi”(Matt. 7: 14). Kua’n tawntung nunna sungah lut zo ding, ci-in mi tampi lungkia hi.
Hun nunung a nawktan ding mite’ kiginkholhna-ah tu-in hotkhiatna sungah lungmuanna nei ding kisam hi. Mainawt zawh nadingin hotkhiatna sungah nuntak ding kisam hi. Hotkhiatna tawh a lungmuan dingin Pa, Tapa le Kha Siangtho in i sungah nasem hi. Tua manin Topa’ hotkhiatna sungah lungmuanna i nei thei hi.
A nuai-a Lai Siangtho munte sim inla, Pasian in bang hong sepsak khitteh bang kamciam hong pia hiam? Tua thute hangin lungmuanna le lametna hong piakte ngaihsun in.
Late 91: 15, 16 ______________________________________________
Joel 2: 31, 32 _____________________________________________
John 10: 28 _____________________________________________
Romans 10: 9 – 13 ___________________________________________
1John 5: 11- 13 _______________________________________________
Siangtho-in a nungta dingin sapna ngah, a siangtho dingin hong kisawl ahih manin Khrih’ hotkhiatna ngah khin peuhmah a siangtho-in nungta uh hi. Tua siantho-na in hotkhiat ngah nading hi lo hi. Nuntak bei lawh dinmun i tung zongin Topa tung a citak ding hi mah taleh eite kingakna le lametna in piakkhong hotkhiatna bek mah hi. Hun nunung a nungta Pasian’ mite in citakin le thumang uh hi. Bang hang hiam cihleh amaute in Khrih hotkhiatna sungah khamuang uh ahih manin Topa tungah citakin a thupiak bangin nungta uh hi.
Thursday April 26
Tawntung Lungdamna Thu
Mang. 14: 6, 7 sim in. Bang in “Tawntung Lungdamna Thu”hiam?
_________________________________________________________
________________________________________________________________
“Tawntung” cih thu in Pasian in kikhel ngei lo ahihna hong lak hi. A kikhel ngei lo Pasian in a kikhel ngei lo Lungdamna Thu hong pia hi. Tua thu a um mi khempeuh in khamuanna nei uh hi. Hih Lungdamna Thu in a kikhel ngei lo Pasian’ itna pulaak hi. Mi khempeuh in tua itna thu a zak kul hi. A zak nadingun a genkhia ding Pasian in a mite hong sam hi.
“Ama mai-ah eite pen paubaanna a nei lo, mi siangthote ahi ding le Khrih hangin ama mite ahi dingin leitung a pianma pek nangawnin Pasian in a hong teelsa i hi hi. Pasian in Jesuh Khrih hangin ama mite ahi dingin eite a hong bawl ding a sehkholhsa hi a, tua bangin a hong bawl ding pen ama tupna le a utna ahi hi” (Eph. 1: 4, 5). Hih in tawntung Lungdamna Thubang honghilh hiam?____________________________________________________
_________________________________________________________________ Leitung kipiansak ma-in hong teelsa mite i hi hi. Hih in tawntung Lungdamna Thu taktak hi lo hiam? Na khempeuh kipiansakma -in hotkhiatna geelkholhsa-in om khin hi. “Teel” ‘sehkhol’ ‘nopsakna’ ‘Ama tanu tapa’ cih kammalte ngaihsun in. Topa sungah tawntung nunna tawh nungta ding Pasian’ lunggulhna pulaak hi. Pasian’ koihkholh hotkhiatna lampi in Ama hehpihna pulaak hi (2Thess. 2: 13; 2Tim. 1:9). Mihing in hoih ahih man hi lo-in Pasian’ hong itin hong hon hi zaw hi. Khrih sungah hotkhiat ngah dingin i pianma-in kigeelkhol khin ahihleh bangci bangin gamtat hoihna in hong honkhia thei peuhmah ding hiam? Mimal in tua hotkhiatna teel ding maw, nial ding i khentat ding hi.
Bang in Pasian’ teel mi na hihna pulaak hiam? Ama mai-ah siangtho, paubaanna om lo-in i om theihna zong (Eph. 1:4) tua dingin Pasian in a hong teelkholhsa i hi hi.
Khrih hong pai ma-in mun khempeuhah ‘Tawntung Lungdamna Thu” tangko dingin sapna i ngah hi.Hih Lungdamna Thu midang tungah i pulaak ma-in bang hangin ei mahmah in i nuntakpih ding kisam hiam?
Friday April 27
Ngaihsutbeh Ding: Hotkhiatna sungah i lungmuang thei hi. Ahi zongin tua lungmuanna sittel ding kisam hi. Lungmuanna man lo om hi lo hiam? Jesuh in zong tua bang a lauhuai-na hong hilh hi. “ Topa aw, Topa aw hong ci mi khempeuh vantung ki-ukna sung lut lo ding hi. Ahi zongin vantung a om ka Pa’ deihna bang bekin a nungta mite bek lut thei ding hi. Tua ni ciangin mi tampi in kei kiangah “ Topa, Topa aw, nangma min tawh thu hilhin, nangma min tawh nalamdang lian tampi bawlin, nangma min tawh dawite hawlkhia hi lo ka hi uh hiam? ci ding uh hi (Matt. 7: 21, 22).
Hih mite’n khialhna lianpi nih nei uh hi. Topa’ min tawh na lianpi pi sem uh hi mah taleh Topa’deihna zui lo, Ama Thukham nuntakpih lo uh hi. Jesuh in amaute tungah “mawhna nei lo mite aw, khialhna nei lo, kicinna nei lo mite ka kiang panin kihem khia un,” ci lo hi. Kammal ‘anomian’ Topa zat a khiatna in “ Siatna bawlte” “Thukham nei lo mite” ci-in pulaak hi.
Nihna-ah: A gamtatnate uh siksan bulpi-in nei uh hi. Topa min tawh na hoih a septe, siatna a pelhte pulaak uh hi. Amau gamtatna hoih siksanin Pasian mai-ah dikna ngah ding a hanciamna uh Khrih tawh kigamlatna hi zaw lo hiam? Hong honkhia zo ding hoihna in Khrih’ hoihna bek hi; upna tungtawnin tua hoihna nang le kei hoihna-in hong kiciaptehsak hi. Hih in eite lungmuanna hi. I gamtat hoih siksanin lungmuang hi lo-in, eite khempeuh aa dingin Khrih nasep hangin a lungmuang i hi zaw hi. Lungmuanna na deih hiam? Pasian’ thukham nuntakpih in. Khrih’ dikna siksan in. Lungmuanna na ngah ding hi.
Kikup Ding Dotnate
1. Martin Luther in hih bangin pulaak hi: “ Kei le kei ka ki-et tak ciangin koi bangin hotkhiat ngah ding ka thei kei hi. Jesuh ka et tak ciangin bangci-in mangthang ka hiam cih ka thei kei hi,” ci hi. Bang hangin hih thu mitsuan ding kisam hiam?
2. “Leitung kipiansak ma-in teelkholhsa mite” cih thu ngaihsun in. Bang hangin mi khempeuh in hotkhiat ngah ding cihna hi pah lo hiam? Hotkhiatngah lo mi khat in, Pasian’ teel mite lakah kihel lo hi ding hiam? Ahih kei leh mimal khensatna hang hi ding hiam?
3. Kido-na Lianpi in siatna tawh kidim leitungah Pa, Tapa le Kha Siangtho’ hong itna hong mu teelsak hiam?
