MUC

Print Friendly and PDF

Sunday, March 18, 2018

LESSON 13 June 23 – 29 I TOPA JESUH A HONG PAI KIKNA DING



LESSON 13    June 23 – 29
I TOPA JESUH A HONG PAI KIKNA DING




Sabbath Nitak: Tu Kaal Sung Sim Ding: Isa. 6:9; Matt. 24: 30, 31; Dan. 2: 34, 35; 2Tim. 4: 6-8; 2Thess. 1: 7-10.

KAMNGAH: “Nisuahna lam panin khua a hong phia a, nitumna dong a tansuak bangin Mihing Tapa hong pai ciangin tua bangin a piang ding hi.” Matthew 24:27.

     T.S. Eliot in hih bangin gelh hi: “Ka kipatna in ka hun bei-na hi ding hi.” Haivai tawh a kibat hangin thuman hi. Kipatkhiatna in i tawpna mun hi. Hih thu i pawlpi min tungtawnin kimu hi. Seventh-day Adventist cih min in thunih pulaak hi. Seventh-day, Thukham 10 sungah Sabbath ni, ni guk sungin na khempeuh kipiansakna thu hong phawksak hi. “Adventist” a khiatna in Khrih hong pai kik ding a lamen mi, tawntung nuntakna a kipan kamciam khempeuh lametna khempeuh a tangtunna hi ding hi.
     Leitung piancil (eite kipanna) a kipan na khempeuh a bei hun (mawhna bei hun) kikal sung kum tampi kihal hi mah taleh hih nihte in kizopna nei hi. Eite hong piangsak Pasian (John 1: 1-3) mah hong pai ding a, pengkul nunung pen kitum ding a, mitphiat sungin i kikhel ding hi. I kipatna Pasian sung mah a tung kik ding i hi hi.
     Tu kaal sung i sin ding thute in a nunung pen hong piang ding thu i Topa Jesuh a hong pai kikna ding thu hi ding hi.

SUNDAY     June 24
TOPA NI

     Thuciamna Thak bek in Khrih hong pai ding thu a gen hi lo hi. A masa mihingin hong pai a, a sih khitteh sihna pan hingkik a, vankah thute khit ciangin Nihvei-na a hong pai ding thu kilimgen zaw hi. Thuciam Thak in a hong hilh bangin Thuciam Lui in zong Khrih nihvei-na hong pai ding thu hong hilh khol hi.  Nihvei a hong pai kikna ding tawh kisai-in Thuciam Thak laigelhte in a kiza ngei lo thu thak a pulaak hi lo hi. Kamsangte’ genkholhsa thute mah a hong hilh kik uh hi. Khrih sihna pan a thawhkik khit Nihvei Kumkikna a kicing zaw-in i thei ta hi.
     Isa. 13: 6, 9; Zech. 14:9; Dan. 12: 1 sim in. Khrih nihvei hong pai kik nading bang pulaak hiam?
______________________________________________________________     ______________________________________________________________

     A kisia mite aa dingin TOPA’ ni in siatna, dahna ni hi hamtang ding hi. Ahi zongin Pasian’ mi, nuntakna laibu sungah min kigelhte aa dingin tua ni in suahtakna hi ding hi (Phil. 4:3; Mang. 3:5; 13:8). Thuciam Lui Bu sungah TOPA’ ni in in migilote tungah thukhen ni banah Pasian tungah a citak mite a kihotkhiatna le thaman a ngah ni uh hi ding hi. Mi kimkhat in TOPA’ hehna a thuak uh hangin TOPA’ maipha, Ama dikna zongin a kiniamkhiat mite in TOPA’ hehna tawh kipelh ding uh hi” (Zeph. 2: 1-3).

     Matt. 24: 30, 31 sim in. Khrih hong pai kik ciangin a mangthang ding mite le hotna ngah mite kilamdanna bang pulaak hiam?
_________________________________________________________________
     Khrih hong pai ciangin mangthang ding mite le hotna ngah ding mi hong kikhen ding hi. Hotkhiatna sung na tun nadingin tu-in bang na khensat thei hiam?

Monday June 25    
Daniel le Jesuh Nihvei Hong Pai Nading

      Jesuh in mihingin a hong nuntak lai-in Jew mi tampi in Jesuh in Messiah in Roman do-in a vanglian Israel gam uk kumpi dingin lamen uh hi. Ahi zongin a hong pai masakin tua dingin hong pai ahih loh mah bangin nihvei a hong pai kik ciangin zong tua dingin a hong pai ding hi lo hi. Tua sangin a lian zaw, a mite aa dingin a kicing zaw, mawhna sihna pan mawhna om lo sih theih nawnlohna hong pia dingin hong pai ding hi.
     Daniel Bu sunga kigen a kisia leitung le a hong tung ding leitung tawh kisai thu Thuciamna Bu dangte ah kimu lo hi. A hong tung ding leitung thak in hih leitung tawh kizom suak ding hi lo hi; a kibawl pha thak leitung hi ding hi. Hih leitung tawh kilamdang mahmah ding hi.
     Daniel in leitung kumpi lian li – Babylon, Media- Persia, Greece le Rome cihte a genkholh bangin tangtung hi. Europe gam in Rome empire panin hong kaa-khia hi. Ahi zongin Nebuchadnezzar in a mang sung a milim lianpi in a ama khit a khangkhia ding kumpite limcing khol hi. Hih leitung le Khrih hong pai kik ciangin hong tung ding leitung kibang lo ding ahihna zong pulaak khol hi.
     Daniel 2: 34, 35, 44, 45 sim in. Hih leitung omzia ding bang pulaak a, a hong tung ding leitung thak bangci bang leitung hi ding hiam?
_________________________________________________________
_________________________________________________________________
     Jesuh hong pai ciangin thupiang dingte kitel takin hong hilh uh hi. Leitung kumpi khempeuh a susia suangpi thu kigen a, Jesuh in amah le amah, tua suangpi hi, ci-in kipulaak hi (Luke 20: 17, 18). Aramaic lai tawh kigelh Dan. 2: 35 in kham, silngo, buan, sik, ngun cihte buhvai huih mutkhiat bangin lengmang ding uh hi. A tunna mun uh kimu lo ding hi.  Khrih hong pai khitteh leitungah nuntakna nei bangmah om lo ding hi.  Tua laitak mahin leitung khempeuh a susia tua suangpi hong khangkhang ding a, muallianpi suakin leitung dim ding hi. Hih kumpi in Nihvei Kumkikna khitteh hong piang ding kump hi-in, kisia nawnlo a tawntung Kumpi hi ding hi (Dan. 2:44).

     Lampi nih bek in hong ngak hi. Jesuh tawh a tawntungin mangkhawm ding maw, ahih kei leh buhvai bangin a tawntungin mangthang ding maw? Khat zaw zaw in ei hong ngak hi.

Tuesday              June 26
Hun Sawtpi aa Ding Geelna

      Titus 2: 13 sim in. Lametna bang om a, bang hangin lamen i hiam?
__________________________________________________________
_________________________________________________________________
    Mi khat in leitung vankuumpi hong pianzia hih bangin pulaak hi: Tuma kum mak tul tampi hun lai-in a kimu zo lo a neu mahmah khat hong piang khia tawm a, tua panin nate hong piangkhia ciat uh hi.  Bangci bangin tua bangin hong piangkhia thei cihpen gen lo hi. Upna mah siksan hi. Tu kaal sung thusin kipatna-ah om mah bangin na khempeuh kipatna mah a tung ding i hi hi.
    Nate in amau thu thu-in hong piang hi, cih a um mite aa dingin mailam hun in lametna nei lo hi. Amau gen bangin a piang hi leh hih mihing a kipan na khempeuh mangthang ding hi. Ahi zongin Lai Siangtho in na khempeuh kipatna tua bangin pulaak hi. Pasian in na khempeuh bawl hi, cih thu uphuai zaw hi. Tua banah mailam hun in lametna tawh kidim  hi.  Na khempeuh kipatna Pasian  tungah i lungdam hi. Mailam hun in zong hoihna tawh kidim ding hi. Lametna tampi i nei hi.  Bang hang hiam cihleh Khrih hong pai kik ding hi.

    2Tim. 4: 6-8 sim in. Paul in bang gen hiam? Ama upna in bang siksan hiam?
_________________________________________________________
________________________________________________________________
    A sawtlo-in Paul in thahna thuak ding hi taleh Khrih hong pai kik ciang hotkhiatna ngah ding cih thu hangin lungmuang thei hi (2Tim. 4:8).  Khrih hong kilat ciangin ‘dikna lukhu’, ama dikna hang lo hi, ahi zongin Jesuh’ dikna hangin Paul in tua dikna lukhu ngah ding hi (1Tim. 1:15). Paul’ lametna in Khrih hong pai kik ding kamciam tungah kinga hi. Thahna thuak ding hi taleh bang bang a piang zongin Paul in a mailam hun in thu hoih tawh kidim ding hi, cih muangngam hi. A thuah ding thu bek ngaihsun lo-in na khempeuh a huampi-in mu thei ahih manin tua bangin lungmuang thei hi.

    Bangbang dinmunah na om zongin koi bangin Paul bangin lametna tawh nungta ding na hiam? Koi bangin na khempeuh a tawpna mukhol thei-in lametna tawh nungta ding na hiam?

Wednesday         June 27 
Meitung Tuangin

     Nihvei Kumkikna thu in upna bulpi khat hi mah taleh Khristian pawl khat in Jesuh, ama pumpi mahmah in hong pai kik ding hi, cih thu um lo uh hi. Khrih hong pai kik ding hi lo-in Ama aitangin Kha Siangtho hong paisak khin hi. Ama deihna bang gamtat zia le tong nei-in, Ama nun bangin i nuntak leh Khrih Nihvei hong pai hi pah hi, ci uh hi. Tua bangin gamtat hoih mahmah hi mah taleh upna man lo hi. Khrih hong pai lo ding hi leh lametna taktak i nei ding hiam?
     A nuai-a Lai Siangtho in Nihvei Kumkikna thu bang pulaak hiam? Khrih hong pai zia ding bang pulaak uh hiam?

        Matt. 24:30 _______________________________________
        1Thess. 4:16 _______________________________________
        Matt. 26: 63 ________________________________________
        Mang. 1:7 _________________________________________
        2Thess. 1: 7- 10 _____________________________________

     Vantung in laidal zial bangin kizial ding hi. Pasian’ tokhom panin vangtaang mahmah hong kilang ding hi.  Mualte in singkung bangin kivuang ding uh hi. Suangtum lianpipite kithehthaang ding hi. Lauhuai-na tuamtuam hong om ding hi. Tui hual lianpipi hong tung ding hi. Huihpi nung bangin dawite in siatna bawl ding uh hi. Leitung buppi in tuihual lianpi bangin kiling ding hi. Lei maitang puakkham ding hi. Belh na ding mun om lo phialin mun khempeuh kisia ding hi. Mualte kiciim ding hi. Tuikulhte beimang ding hi. Tuipi gei khua-te Sodom le Gomorrah khuapi bangin beimang ding uh hi. Babylon in Pasian’ thukhenna le Ama hehna lenggahzu thuak ahihlam kiphawk ding hi.” Ellen G. White, The Great Controversy, 637.
     Jesuh hong pai ciangin lei maitang kisia ding hi. Tua hun in leitung hun bei-na taktak hi ding hi. Mi khempeuh in tua hun ciangin theikim ding hi. Jesuh in mihingin a hong pai masakin a nasep’ thaman nihvei a hong pai kikna a gahkim ding hi.

     Koi bangin Nihvei Kumkikna in i nunzia hong huzaap ding kilawm hiam? Koi bangin Kumkikna thu in i nuntakna-ah a thupi mahmahte hong theitelsak hiam?

Thursday  June 28
A Nungtate le A Si-te

       Hankhuk sung pan Lazarus a thawhsakma-in Jesuh in hih kammal pulaak hi: “Keimah in a sisa mite thosakin a hingsak thei pa ka hi hi. Kei hong um mi peuhmah a sih hangin nungta ding hi” (John 11: 25). A thugen a za mite’n um le um lo dong nawn lo-in Khrih in  a muat khin, uih khin Lazarus thosak kik hi (John 11: 39).  Jesuh um hi mah taleh kisi hi. Ahi zongin ama gen mah bangin ama sunga si khempeuh in nungta kik ding uh hi. Hih in thawhkikna thuman thutak hi. Hih in Jesuh nihvei hong pai kik ding hi, ci-in i lametna bulpi hi.

     Rom. 6:5; 1Thess. 4: 16; 1 Kor. 15: 42 – 44, 53 – 55 sim in. Jesuh hong pai ciangin Ama sung a si mite bangci ding uh hiam?
_________________________________________________________________
_________________________________________________________________
    
     Khrih in sihna pan a thawhkik mah bangin Ama tung a citak mite a si zongin thokik ding uh hi, cih thu kamciam in, Nihvei Kumkim hun ciangin a hong piang ding a lian mah mah lametna hi. Sihna pan Khrih thawhkikna in a mite aa dingin lametna lianpi le lungmuanna hong suak hi.

     Khrih hong pai ciangin a nungta lai mite bangci ding uh hiam? Phil. 3: 21; 1Thess. 4: 17.




     Khrih hong pai ciangin a nungta Ama tung a citak mite’n amau pumpi mah nei ding a, ahi zongin tu-a pumpi tawh kibang lo ding hi.  A si mite a si nawn lo dingin pumpi tawh hong tho ding uh hi. A nungta lai dikna ngah mite in zong mitphial kalin sihtheih nawnlohna ngah uh hi. Pasian in thupia in amaute in vangliatna tawh kidim uh hi; amaute in  a si nawn lo ding pumpi ngah uh a, sihna pan a tho misiangtho-te tawh vankimlai-ah Topa dawn dingin laktohna ngah khawm ding uh hi.” Ellen G. White, The Great Controversy, 645.

     Leitungah thupi nasak mahmahte gelh inla tawntung nuntakna tawh a khek ding hi lecin bang zah thupi taktak mah ahi diam?

Friday June 29
Ngaihsutbeh Ding: Jesuh nihvei-na hong pai ding thu in mawhna, sihna hong om khitteh a kinung geeltawm, nung behlap hi lo hi. Nihvei Kumkikna in Khristian upna bulpi pen hi. Khrih hong pai lo ding hi leh bang i ngah diam? Siatna khat khit siatna khat, sihna khat khit sihna khat simloh i tuah ding om lo ding hi. Khrih hong pai lo ding hi leh, William Shakespeare laigelh tawh kibangin, mihai khat in thugen gen napi a khiatna nei lo awging mawkmawk tawh kibang ding hi. Ahi zongin lametna i nei hi. Bang hang hiam cihleh  Pasian’ kammal in Ama hong pai ding hong hilh hi. Khrih hong pai a lamen i hi hi. Bang hang hiam cihleh Khrih in Ama nunna tawh eite hong tankhia hi (Mark 10:45). Khrih in mawhna pan hong honkhia ahih manin eite la dingin hong pai kik ding hi. Aksi-te in Khrih hong pai ding hong hilh lo uh hi. Vasa-te in zong tangko lo uh hi. Ni khat ni ciangin Jesuh hong pai ding a pengkul kitumin,  misite in sih theih nawn lohna puan bangin silh dingin hong tho ding uh hi (1Kor. 15:52); Vanglian Pasian’ taklamah Mihing Tapa omin meii lakah a hong pai na mu ding uh hi, (Mark 14:62) ci-in a tangko loh uh hangin, Pasian’ bawlsa na khempeuh in thu hoih pulaak ciat uh a,  lametna om ahihlam hong theisak uh  hi. Lai Siangtho in Khrih hong pai ding hi, ci-in hong hilh ahih manin a um i hi hi. Topa’ kammal, a kamciamte a muang i hi hi.

Kikup Ding Dotnate

1. “Khrih hong pai nawn lo ding hi; i nuntakna-ah Ama deihna bangin          nungta-in, Ama thu a kicin nak leh, tua-in Khrih hong pai-na hi,”                   cih upna thu ngaihsun in. Thu hoih hi mah taleh tua bang upna in a     tawpkhakna-ah lametna nei lo hi lo hiam?

2. Bang hangin na khempeuh in amau thu thu-in hong piangkhia tawm hi, cih thu in khiatna nei lo hiam?  hangin mite in tua bang thu um uh hi ding hiam? Bang hangin tua bang thu kizelsak nuam uh hi ding hiam? Bang hangin Pasian in na khempeuh bawl, piangsak hi, cih thu up ngam huai zaw hiam?

3. Na lawmte in tawntung nuntakna sangin hih leitung nate thupi manpha a sa zaw a om hiam? Om lo ahih leh, hotkhiatna na ngah ding a hong khaktan bang mah om lo taktak mah hiam?


To get the latest update of me and my works

>> <<