MUC

Print Friendly and PDF

Sunday, March 18, 2018

LESSON 12 June 16 – 22 Babylon le Armageddon





LESSON 12 June 16 – 22
Babylon le Armageddon

Sabbath Nitak: Tu Kaal Sung Sim Ding: Mang. 14: 8; 16:19; 18: 1- 10; 16: 12-16; Isa. 52: 9; 1Kum 18: 1- 40; 1Kor. 15: 1, 2.

KAMNGAH: “A taltang tungah, “ A paktat numeite le leitung kihhuai-nate khempeuh a pianna, A Lian Babylon Khuapi,” ci-in khiatna tuamkhat a nei min a kigelh hi” (Mang. 17: 5).

     Mangmuhna Bu in Thuciam Lui sunga limciinna tuamtuam, kammal tuamtuam limzat mahmah hi. Gentehna-in Mangmuhna sungah Babylon cih kammal 6 vei bang kimu hi. Ahi zongin hih Babylon in a beisa kum za tampi Nebuchadnezzar hun lai-a Babylon a gen hi lo hi.  John in thuman a pulaakna dingin Thuciam Lui sung a kizang lim hong zang kik hi. Nidangin Babylon in Pasian’mite a bawlsia vangliatna nei kumpi, biakna lamah a hat mahmah gam khatin kiciamteh hi. Babylon in hun nunung ciangin tua bang mahin a hong khang ding ukzawhna nei kumpite limcing hi.
     Mangmuhna Bu sungah Armageddon kammal tawh kinai pen kammal in Megiddo Mual hi.  Hih mual in nidanglai Israel mite’ teenna mun khat hi. Armageddon tawh kisai-in muhzia tuamtuam om hi. Mi tampi in hun beikuang ciangin Megiddo kimtengah nasia takin gal kido-na om ding hi, ci-in ngaihsun uh hi. Tu kaal sungin Lai Siangtho in Babylon le Armageddon minte limciinna-in zangin a hong hilhnop thute i kikum ding hi.

Sunday     June 17
“Ama Hehna Lenggahzu”

     Babylon cih min kimuhna mun Mang. 14: 8; 16: 19; 17: 5; 18:2, 10, 21 sim in.  Thuciam Lui sungah zong Babylon cih min om hi, cih phawk in.  Hun nunung ciangin hih Babylon cih min in bang hong  hilh hiam?
__________________________________________________________     ___________________________________________________________
     Mi tampi in Lai Siangtho sung a thute in khuapi nih – Jerusalem le Babylon tawh kisai thu hi, ci-in pulaak uh hi. Jerusalem khuapi in Pasian’ khuapi le Pasian in a mite tawh a thuciam limcing hi, ci-in kimu thei hi (Late 102: 21; Isa. 52: 9; 65: 19; Mang. 3: 12). Babylon in langpanna, gitlohna, biakna man lo, Pasian langpanna cihte limcing hi. Gentehna-in Babel tausangpi ngaihsun in (Pian. 11: 9). Hebrew laimal “Babel” a khiatna in “Babylon gam” cihna tawh a kibang kammal hi. 1Pet. 5:13 sungah Peter in Babylon a om pawlpi panin a hopihna kimu hi. Hih Babylon in Iraq gam a om kisia khin nidanglai khuapi Babylon a gen hi lo-in, a sawt lo-in pawlpi a langpang ding Rome limcing hi zaw hi. Mangmuhna Bu in Rome tawh kisai tampi hong hilh hi.
     Mang. 14:8; 18:3 sim in.  Huzaap lianpi nei Babylon in Pasian’mite tung lianpi bang sem hiam?
___________________________________________________________
_____________________________________________________________
     Mangmuhna Bu sunga Babylon cih min in limciinna hi,  cih pen phawk ding kisam hi.  Hih Babylon in leitung khempeuh huzaap hi.  “ Ama hehna lenggahzu’ cih kammal in (Mang. 14:8).  Hih in upna man lo, thuhilhna man lo, gamtatsiatna cihte in Babylon pan hong paikhia hi, cih hong hilh hi.  Babylon in siatna tawh mun khempeuh, minam khempeuh tunga siatna tun hi” (Mang. 18:3). Tua hi-in siatna sung i tun loh nading kidawp kul hi.
    
     Tuhun paiziate ngaihsun in. Mun khempeuh in siatna khempeuh, kinengniamna tuamtuam tawh kidim hi lo hiam? Hih thu in Jesuh le Ama thu sungah zungkha ding hong hilh hi lo hiam?


Monday    June 18
Babylon Kisia hi

     A beisa hunin Babylon in siatna tawh kidimin, vanglianin huzaap lian nei hi mah taleh a kisiatcipna hun hong tung ding hi, ci-in Mangmuhna Bu in hong hilh hi.
    Mang. 18: 1-10 sim in.  “ A Lian Babylon” thu bang pulaak hiam?
_________________________________________________________________
_________________________________________________________________
    “Mang. 14: 8 sunga Vantungmi Nihna in Babylon in kisia hi, ci-in a tangko thu Mang. 18:2 in genkik hi. Hih Babylon in sia lua mahmah hi. Topa hong pai ma-in Satan in na lianpi, na lamdang bawl ding a, thuman itna nei kei taleng hotkhiatna sung kilut thei veve hi, ci-in leitung mite hong khem ding hi. Mi tampi mah in tua bang zuau thu um ding uh hi (2Thess. 2: 9-11).  Hih bang hun hong tunma-in biakna le pawlpi khempeuh in leitung kumpite tawh kigawm ding uh hi. Hih in Babylon kisiatcipna hi ding hi. Tua dingin tu-in kipan pan khin ta hi. A sawt lo-in Mang. 14:8 sunga genkholhna hong tung taktak ding hi.” Ellen G. White, The Great Controversy, 389, 390.
    Tu-in genkholhnate tangtung tung ta hi. Upna le biakna man lo Babylon  in ni khat ni ciangin Pasian’ thukhenna thuak ding hi. Bang hang hiam cihleh Babylon’ mawhna in lianlua hi. “Ama mawhna in van ban a, a gamtat hoih lohnate Pasian in phawk gige hi.” Mang. 18:5. Hih in Thuciam Lui  sung, thukhenna thuak nidanglai Babylon hong phawksak hi ( Jer. 51: 9). 
    Thukhenna hong tung hamtang ding hi. A hong tung ding thukhenna lamdangsak ding hi lo hi. Nidanglai Babylon in thukhenna thuak khin hi (Daniel 5).  Ni khat ni ciangin Babylon a kipan mi khempeuh in gamtatna tungtawnin thukhenna thuak ding hi. Nang le kei aa dingin tua thukhenna-ah PALAAI hong sem, eite dinmunah hong dinsak ding khat nei ihih manin bangzahin lungdam huai hiam? (1John 2: 1; Dan. 7:22) Tua hi kei leh Babylon sangin i phattuamzawkna om lo ding hi.

    Leitung in thuman lohna tawh kidim hi mah taleh ni khat niteh Pasian in thukhen ding hi, cih kamciam hangin lungmuanna a nei ding i lo i hiam?


Tuesday     June 19              
Armageddon

     Khristian le midang tampi in Mangmuhna Bu sung a Armageddon tawh kisai theikhial uh hi (Mang. 16:16). Mipil tampi in zong leitung hunpai-zia a muhna tungtawnin hun khat ciangin leitung nate bei ding hi, ci-in mu khia uh hi. Hollywood movie in zong leitung nate kisiatzia ding movie a lakna uhah vankuumpi sung pan leitung khat in i tenna leitung hong nawk ding a, hih leitung kisia ding hi, ci uh hi. Khristian thu-um mi hi lo mi tampi in zong ni khat ni ciangin hih leitung kisia ding hi, cih um uh hi.
     Khristian tampi in Middle East gamlam panin Armageddon galpi hong tung ding a, tua tawh hih leitung bei ding hi, ci uh hi.  Pawl khat in Asia gam panin galkap 200000000 val bangin Israel Saklam gamte do ding a, leitung bei ding hi, ci uh hi. Pawl khatte genna-ah gam tuamtuam pan galkapte le kumpite Megiddo munah kido ding uh a, tua in Armageddon galpi hi ding hi, ci uh hi.
     Lai Siangtho in tua bangin gen lo hi. Armageddon galpi in leitung gal kido-na hi lo ding hi. Gam le gam khat kido-na, kumpi khat le kumpi khat, thauvui thautang tawh kido-na hi lo ding hi. Leitung thuneite kihelna hih leitung a uk vangliatna nei nih kido-na hi ding hi.
     Mang. 16: 12 – 16 sim in. Hih in Armageddon gal tawh kisai bang hong hilh hiam?
__________________________________________________________
_________________________________________________________________
     Limciinna ahi gulpi kam sung, zuau kamsangte sung le sapi kamsung panin uipuk tawh kibang kha hong pusuak uh hi.Hihte in Mang. 13:11  sunga vangliatna nei, leisung pan hong pusuak kamsang zuau tawh kizopna nei hi. Hih Armageddon kido-na lianpi in ‘kha gilote (Mang. 16: 14) in Sangpen Pasian do dingin kuankhia uh hi. Tua hi-in koi bangin kido ding cih i telsiang zo kei zongin Armageddon galpi in Khrih le Satan kikaal kido-na thuman le zuau thu kido-na hi. Megiddo mun tuhun Iraq gamah thauvui thautang tawh kido ding hi lo hi.

     Mang. 16:15 sim in.  Leitung gimnate lakah Khrih in hong hotkhiatna thu gen dingin a hong thupiakna Nih Vei hong pai kik ding kamciam, Ama dikna ngah ding kikhel dingin a hong hilh thute hong lawpsak hiam? Koi bangin tu-in thuman le zuau kido na tuak hiam?

Wednesday           June 20
Armageddon le Carmel Mual: Khawk Masa

     Armageddon galpi in bang hi ding hiam? A masa-in Megidoo Mual pulaak hi. Ahi zongin Megiddo min nei mual om lo hi. Megidoo kimteng ah Carmel Mual min nei om ahih manin Lai Siangtho thuthuk kan pawl khat in Carmel Mual hi ding hi, ci uh hi. Carmel Mual ah Baal kamsang zuaute le Elijah kido-na thu om  ahihmanin, Carmel Mual tunga thupiang in Mang. 13 sunga thupiang dingte limcingkhol hi, ci uh hi.
     Zanni-a a kipulaak bangin Mang. 16: 13 sunga gulpi, sapi le kamsang zuau tawh kisai-in Mang. 13 sunga thu piang dingte le lesson 9 sunga i sin thu, a man lo Thum gawm Pasian upkhialhnate tawh kizom hi.
     Mang. 13 sung a genkholhna nunung pen a hong piang dingte aneu 13, 14 ah kimu thei hi. Sapi nihna in nalamdang lianpi bawl ding a, vantung panin meikuang kia-sak ding hi (Mang. 13:13). Hih in Satan in Pasian a langdo-na, a nungta Pasian a bia mite le ‘sapi ciaptehna a bia mite’ kido-na lianpi hi ding hi (Mang. 13:14).

     1Kum. 18: 1-8 sim in. Hun nunung a piang ding bang thupiang pulaak hiam?


_____________________________________________________
     Satan in Pasian a langpannate Elijah in pulaak hi. Pasian’ thukham nusia-in Baal, milim pasiante bia uh hi. Leitung tangthu khempeuh in hih bang siatna tawh kidimin milim biakna nam tuamtuam tawh hong kilang hi lo hiam? Vantung, leitung, tuipi, ciktui Piangsak Pasian bia ding maw, ahih kei leh mihing le leitung na khat peuh bia ding maw? (Mang. 14:7).
     Genkholhna om bangin (Mang. 13) mi tampi in Topa bia lo-in sapi le ama lim bia uh hi. A nihin bia khawm bang om thei lo hi. Pasian lamah na om kei leh, Satan lamah a om na hi ding hi. Tua hi-in Armageddon galpi in Pasian bia ding maw, ahih kei leh Satan bia ding maw, cih sittelna om ding a, Satan bia lote in bawlsiatna thuak ding uh hi. Carmel Mual tungah Pasian bia mi le Satan bia mi kitel sinsen mah bangin hun nunung ciangin zong tua bang mahin kitel ding hi.

Thursday        June 21 
Armageddon le Carmel Mual: Khennihna

     1Kum. 18: 18 – 40 sim in. Bang thupiang hiam? Koi bangin tua thupiang bei hiam? Koi bangin a hong piang ding thu – siatna kici khempeuh a bei-siang ding na mu khol hiam?
_______________________________________________________
________________________________________________________________
     Carmel Mualah Pasian’ kamsang Elijah le Baal siampite kikal kido-na om khin hi.  (Hoihna sangin siatna tam zaw ahihzia ngaihsun in).  A man Pasian, vantung, leitung na khempeuh a bawl, leitung mite a khem gulpi tawh kilaak Baal pasian a bawl Pasian in kua hiam, cih sittelna hi (Mang. 12:9).  Baal siampite in biakna tau tungah kikoih bawngtal a haltum dingin vantung pan meikuang kia-sak dingin Baal tungah thungen uh hi. Zingsang a kipan suun ciang dong thungen uh hi. Elijah in “nakpi-in kiko un. Na pasian uh ihmu hi kha ding hi”ci-in zahpih hi (1Kum. 18: 27). Baal siampite lungsim bei khin uh hi. Amau le amau temta tawh kikui-in a pumpi tung panun siluang hi. Gim, nasa, cimawh uh hi. Nitak biakpiak hun hong tung ahih manin khawl phot uh hi.
     Elijah in biakna tau thum vei tui buak dingin sawl hi. Biakna tau tui dimlet hi. Elijah in a lungsim tak tawh thungen hi. Pasian in a thunget pia-in biakna tau tungah om suang a kipan leitang donin kangtum hi. A man Pasian’ vangliatna le Baal pasian kilamdanna kitel mahmah hi.
     Mang. 16: 13; 19: 20, 21 sim inla Baal kamsang zuau-te tawh enkak in. Bangna phawk hiam?
____________________________________________________________
______________________________________________________________
     Armageddon thu i telsiang zo kei zongin, tu-in a kitel mahmah thu in, Armageddon a hong pianna hangin Pasian a langpan mite tungah thukhenna in amau bei-na ding hi. Ahi zongin Pasian in a mi siangtho-te’ thaman pia ding hi, cih kitel hi.

     1Kor. 15: 1, 2 sim in. Armageddon gal tawh thupiang kibatlohna a om hangin Paul in bang thu hong theisak nuam hiam? A hong piang ding thute hangin bang hangin Paul gen thute in tuhun tawh kituak hiam? Mang. 16:15 Armageddon tawh kisai hi-in bang thu hong hilh uh hiam?

Friday   June 22
Ngaihsutbeh Ding:  Armageddon gal tawh kisai thute sungah zumhuai le kihtaakhuai tuamtuamte tawh kipulaak hi mah taleh tua thute in mimal nuntakpih ding thuman pulaak uh hi. Tuate lak pan khat gen lehang, Mang. 16:15 “ Na ngai un!Guta bangin kei ka hong pai hi. Mihon lakah guaktangin pai-in maizumna a ngahkhak loh nadingun a puante uh kemin, pilvang khuaphawkin a om mite a hampha uh hi.” Armageddon tawh kisai thu kipulaakna-ah hih bang thu in leitung hun bei-in Khrih hong pai ciangin mite’ omzia ding Thuciam Thak’ sunga hilhkholhnate hong phawksak hi.
    A dang mun khat Mang. 17:14 “Amaute in Tuuno a sim ding uh hi. Ahi zongin Tuuno pen kumpite’ Kumpi, topate’ Topa ahih manin, amah le ama sap, a teel mite citakin amah a zuite in tua kumpi sawmte a zogawp ding uh  hi.” Armageddon kido-na in thauvui thautang tawh mite suksiat ding hi lo-in Pasian’ sapna a citak mite hotkhiatna hi zaw hi. Armageddon gal in tulai hun a gam khat le gam khat kido-nate dan a kido-na gal hi lo ding hi. I pulaaksa om bang mahin Armageddon gal in lungsim galdo-na – thahna thuak Tuuno’ hong sapna citakin zui ding maw, ahih kei leh zui lo ding cih lungbuai-na hi ding hi.” Jon Pauline, Armageddon at the Door (Hagestown: Review & Herald, 2008), 193.

Kikup Ding Dotnate
1. Koi bangin Mangmuhna Bu sunga Armageddon galpi in thauvui               thautang tawh kido-na galpi hi ding hi, ci-in a um mi khat thuman                  hilh ding na hiam?  Bangci bangin tua bangin piang lo ding ahihna                   pulaak ding na hiam?

2. Babylon in leitung huzaap hi. Babylon pan hong kipan khia thute in              koi bang thute hi-in, koi bangin tuate pelh ding na hiam?

3. Monday ni a Ellen G. White’ gelh biakna makaite le kumpi ukna nei        mite hong kipawl mateng Babylon kisiat a tawpkhakna hi nai loding hi, cih thu    in a lauhuai bang thu hong hilh khol hiam?

To get the latest update of me and my works

>> <<