March 3
Lamet Loh
A Lamdang Nate Mexico gam pan
Laura
del Carmen Flores Dias, kum 23
Laura’ nunzia lamdang mahmah hi. Kum 10 a phakin a lawmte khat kiangah
va hawh hi. Party nei ding a pai hi napi Lai Siangtho sinna na nei uh hi. Laura
in Lai Siangtho thuman sinna nuamsa-in kum khat bang tua bangin sin toto a,
Sabbath ni ciangin SDA biakinn ah va kikhawm hi.
Pasian thugenna khat om a, tua khitteh kituiphum ding a nget ciangin
pawlpi makaite in kituiphum ding phal nai lo uh hi. Lai Siangtho sinbeh lai-in
ci uh hi. Kum 11 hi panin a innkuanpihte zong SDA hi nai lo uh hi taleh a
tawpna-ah kituiphum veve hi.
Tan 10 a zawh khit ciangin Collge sangkah nuam hi taleh sum ding nei lo
hi. Adventist college ah sangkah hi leh Lai Siangtho sin kha ding ahih manin
SDA sangah sangkah ding lunggulh mahmah hi. A gol ciangin Pasian nasem ding
ngimna zong nei hi.
“ Adventist college ah sangkah theih nadingin thungen a, a kah theih leh
Pasian na sem ding ci-in kamciam pia a, sang a kah theih kei leh, pasal nei-in
tua khitteh sangkah ding ci-in thungen hi.
Pasian in Laura’ thungetna dong hi. Kha 6 sung sangkah nading sum nei-in
Pasian’ makaihna tawh Adventist college ah sang kah thei hi. Sangsap dingin
innna sem kawikawi hi. Tua bangin nasep kawmin sangkah-in huhna zong kipia hi.
Kum 4 sangkah khitteh sang zo thei a, a kamciamsa bangin Lai Siangtho hilh ding
sangsia ding a ut hangin MA a zawh kul hi. Sangkah nading sum nei lo ahih manin
huhna zong kawikawi hi. Laibu zuak kawmin MA zom thei dingin Navojoa University
ah sangkah kipan kik hi. Sangkah kawmin nasem hi. A lawmte in Laura hamsatna a
theih uh ciangin panpih theihzahin panpih ciat uh hi. Laura in tu-in Navojoa
University ah sangkahin Tan 10 khatah laihilh hi.
Laura in James 1:12 deih mah mah khat hi. “ A hoih takpi mah hiam, ci-in
sinna a thuak ciangin a nangzote a hampha mahmah ahi hi. Tua bangin a nangzote
in, amah a itte tungah Pasian in a piak dingin a ciam nuntakna lukhu a ngah
ding uh hi.” Khangnote’n hamsatna tampi a nawktan kul hi. Ahi zongin Pasian’
huhna ngen lehang tua hamsatna kizo thei hi, ci-in Laura in a maban zom thei
hi. Pasian a it mite Pasian in hamsatna zawhpih hi.
Laura in a lamet loh tampi tuakkha hi. Laura in khangnote kiangah “sum
neihloh hangin lungkia kei un,” ci-in hanthawn hi. Na khempeuh a nei Pasian hi.
Amah a muang mi khempeuh, na kitangsap khempeuh hong pia ding hi.
Tu quarter Sabbath School 13 sumpi in Mexico gam Villahhermosa khua-a
zato ah kipuak ding hi. MUC in Pinlong biakinn lam nadingin kipuak ding hi.
