March 24
Jamaica
gam pan Raglan Waite, kum 50
Pasian’ Tate
Tagah kikepna inn pan khangkhia ka hi hi. Kum 6 ka phak a kipan Sunday
thuzui innkuan khatah ka om hi. Kum 17 ka phakin kei hong kem nupate’n hong
nusia khin uh hi. Tua a kipan nuntak hamsa-in ka pianna nu zon ka kipan hi.
Naupang kepna innah ka tung kik a, ka pianna nu ka kan hi. Ahi zongin kuamah in
hong gen thei lo uh hi.
Kumpi Cimawh Huhna pia-te kiangah ka pai hi. Hih taka kumpi nasemte in
ka pianna nu le ka sanggamte’ min na thei kha uh hi. Ka pianna nu le ka
sanggamte in zong kumpi huhna ngah uh hi. Ka pianpih sanggamte zong kumpi Tan
10 ah sangkah uh hi. Ahi zongin tua zah val bang mah hong gen nuam lo uh hi.
Ahi zongin ka pianpihte tawh kiho nuam ka hih manin a omna uh hong gen un,
ci-in ka ngetteh hong pia uh hi.
Ni khat bawlungsuihna khat ka en a, tua laitakin mi khat in Raglan na hi
hiam, ei pen unau hi hang, ci-in ka nung panin mi khat in hong hopih hi.Ka nuam
mahmah hi. Carl in kum 7 cingta hi. Ka vante pawl khat guanin ama nung ka zui
a, innthak khat na hi-a, ka pianna nu ka muhcilna ahih manin ka nuam mahmah hi.
Ka nu pen cidam pha lo ahih manin a ta ka hihlam hong thei nawn lo hi. Ahi
zongin ka nu mu ka hih manin nuam mah mah ing. Ka sanggampa pen SDA thu-um mi
khat na hi hi. Sabbath ni ciangin kikhawm dingin hong zawn hi. Laisim thei lo
ka hih manin pawlpi mite’n lai hong hilh uh hi. Sabbath School lesson sim ka
kipan hi. Adventist University ah khal sangkah dingin pawlpite’n hong huh uh
hi.
Kum 22 ka phak ciangin zi ka nei hi. Ta ka nei a, tu-in dat-si zuakna
khatah na ka sem hi. Pawlpi ah upa khatin hong kikoih hi. Khuakim khua pamah
pai kawikawi-in Sabbath School lesson laidalte balkhia-in pawlpi hong nusia-te
sim dingin amau muhna-ah ka paai uh hi. Tua bangin pawl sung panin a pai khia
mi 50 bang pawl sung hong lut kik uh hi.
Kum 36 ka phak ciangin ka zi tawh ka kikhen uh hi. Zi kik ka nei hi.
Pawlpi upa khat tawh kikamtam kha ung a, pawlpi ka nusia hi. Biakinn kikhawm
nawn lo-in Sabbath ni ciangin innah bangmah sem lo-in ka om hi.
Tu-ma kum 3 lai-in ah Jamaica khuapi Kingston ah nasem dingin ka zi tawh
ka pai uh hi. Ka zi in a sanggamte tawh om khawm hi. Ka nasep hoih lo ahih
manin ka nasep nusia-in nasep dang khat ka zong hi. Ka nasep ka khawlna panin
ka zi tawh zong kizom nawn lo-in lamdungah kha 3 sung ka om hi.
Ni khat paakhuan-ah ka pai-a, inn nei lo khat kisil ka mu hi. A kisil
khitteh puankhekin an ne ka mu hi. Tua mipa tawh ka kiho a, nang zong Good
Samaritan Inn ah va pai in. Annek ding le puansilh ding hong pia ding uh hi,
ci-in hong gen hi. Kei zong ama hong gen bangin ka va pai pah hi. Good
Samaritan inn a nasemte thunuam peuh mah uh hi. An, puansilh ding hong pia uh
hi. Good Samaritan inn pen SDA pawlpi in cimawh genthei mite huh nadingin a
koih ahihlam hong kigen hi. Hih innah ka pai zel, inn huang hah cihte a kipan
Sabbath ni ciangin zong amau tawh ka kikhawm hi.
Tu quarter Sabbath School 13 sumpi in Jamaca gam Kingston khua-a Good
Samaritan inn panin cimawh huh nasep nadingin kipuak ding hi. MUC in Pinlong
biakinn lam nadingin kipuak ding hi.
Mai Sabbath in Sabbath 13-na ahih manin Sabbath School sumpi khiat ngei
ii a zah 3 khiat dingin kiging ciat ni.
( Mai
Sabbath-ah Mission news gen ding mi 3 sawl in)
