March 17
Jesuh aa
dingin Puankhui Jamaica gam pan
Mavis
Burrell Spencer, kum 66
Mavis Burrell Spencer in puankhui nasem a pasal in a nusiat khitteh bang
sem ding cih ngaihsun thei lo hi. A pasal in puankhui-na mun 3 bangah
puankhui-na nei a, mi 25 bangin ama khut nuai-ah nasem hi. A tawpna-ah Mavis in
nasep kipan ding hong khensat hi.
A pasal nusiat zawh kum 10 bang hong cingta ahih manin Mavis in SDA
sungah kituiphum ding hong khensat hi. Ahi zongin Saturday ni pen nasep tam
penpen ni hi. Mavis in Sunday ni tawlnga ahih manin Sabbath a zak sawt nai lo
hi. Thukham 10 lakah thupiak 4 na, Sabbath ni a siangtho-in zat ding phawk in,
cih thu tel lo hi. Ahi zongin a lawmte khat in Lai Siangtho thusinna khatah
kihel dingin zawn a, Mavis zong tua thusinna-ah va kihel hi. Hih Adventist
thu-um nu in Mavis tawh Lai Siangtho sinna nei a, tua a kipan Mavis nunzia hong
kilamdang hi. Hih Adventist nupi a pasal in a nusiat ma-in a nupa-un thungen
khawm den uh a, Mavis tawh zong thungen khawm dingin a zol hangin ut lo hi.
Nidangin Mavis in Lai Siangtho sin ding a nial hangin tu-in Lai Siangtho sin
hong kipan hi. Lai Siangtho thuman a theih hetlohlam hong kiphawk hi. Sabbath
thuman a kipan Jesuh hong pai kik ding ahihna thute zak ngei lo hi. Lai
Siangtho thuman khat khit khat thei-behnopna lungsim hong nei semsem hi. Ahi
zongin Sabbath ni-in a puankhui nasep khawl thei lo hi. Nitak khat a nasepna
pan a ciah ciangin aw ging khat za a, “ na ut utna-ah na tai thei hi. Ahi
zongin kuama theih loh dingin na kisel zo kei ding hi,” cih awging khat za hi.
Sabbath thuman hoihtak a zawk nading thungen hi. Topa tawh kigamla-in
ahi zongin Ama muhna pan kisel zo lo ahihlam zong hong kiphawk hi. December
2016 sungin Sabbath ni hong
tun ciangin a puankhui nasep khak dingin puankhui-na sai-ah lai khat
hong suang hi. “Sabbath ni puankhui lo ding” ci-in hong khensat hi. Ahi zongin
Sunday ni-in a puankhui sai hong ding ci-in pulaak hi.
Mavis in January 7 ni-in kituiphum hi. Saturday ni-in a puankhui sai
kikhak ahih manin mi tampi heh uh hi. Ama kianga puankhui ngeite’n Mavis
mawhsak uh hi. “ Nasep hau mahmah hi ve cin, bang hangin Saturday ni-in na
puankhui sai khak na hiam? ci-in kidong hi. Mavis in lungduaitakin dawngkik hi.
Vantunga ka Pa in na khempeuh, gam sunga om ganhing khempeuh a kipan na
khempeuh Ama aa hi. Na khempeuh in Ama ukna nuai-ah om hi, ci-in dawng kik hi.
Saturday ni-in a puankhui sai a khak hangin Sunday ni-in a sai hon ding
mi tampi in hoihsa zaw uh hi. Sunday ni-in nasep tawmin, Saturday ni ahih leh
mi tampi hong pai uh a mawtaw koihna ding zong kimu zo lo hi. Sunday niteh lah
mi tawm hi. Mavis in a vanzuakte khawng semsem hi. Saturday ni sangin Sunday
ni-in van lei nuamsa zaw uh hi. Sunday ni-a van zuak khot zawk sangin Saturday
ni tawlnga-in kikhop pen manpha-sa zaw hi. Sabbath ni a kikhop masak pen in
pawlpi mite’n zong hoihtak na muak uh a, kikhop pen nuamsa mahmah hi. Pawlpi
mite zong itna nei-in mi hehpih thei uh hi. Mavis in tua bangin a nuntakna-ah
nuamsa ngei nai lo hi.
Mavis tu-in kum 66 cingkhin a, a nasemte tawh zingsangsimin thungen
khawm den hi. A puankhui-na ah hong pai mite aa ding, a nasemte aa dingin
thungetsak den hi. Hun khat lai-in a nasemte khat le khat kisel kitawng uh a,
tu-in khat le khat hoih kitak kiho, nuamtakin nasem khawm thei uh hi. A nasemte
tawh Lai Siangtho sinpihna zong nei zel hi. Tu-in a nasemte khat kituiphum hi.
Sabbath ni tawlnga-a nasem mite aa dingin “Sabbath ni nasep loh hangin bang mah
supna om lo hi. Topa aa dingin nungta lehang supna khat beek om lo, metna vive
hi,
ci-in hanthawn hi.
Mavis in “Kei hong thahatsak Pa in na khempeuh ka hih
zo hi,” cih pen a deih mahmah Lai Siangtho hi (Phil. 4:13). “ Jesuh mitsuan
tawntung in. Bang hang hiam cihleh Amah in nuntakna phungpi hi. Amah lo-in bang
mah kimanna i nei kei hi. Amah tawh na khempeuh i hih zo hi.
