MUC

Print Friendly and PDF

Monday, December 18, 2017

LESSON 5 JAN. 27 – FEB. 2 EDEN KHIT NEIHSA KEPNA

LESSON 5      JAN. 27 – FEB. 2

EDEN KHIT NEIHSA KEPNA





SABBATH NITAK


TU KAAL SUNG SIM DING: Isa. 22: 14 – 18; 1Kor. 4: 1, 12; Kol. 2: 2, 3;Eph. 6: 13- 17; 2Kor. 5: 10.


KAMNGAH: “ Ahi zongin Pasian in ama hoihsakna bangin, lungdamna thu hong apna tawh kizui-in thu ka gen uh a, mihingte’ lungkim nading a gen hi lo-in ka lungsim uh hong sittel Pasian’ lungkim nadingin ka gen uh hi” (1Thess. 2: 4).


Adam le Eve tung ah kipia nasep khat in nate kepcing dingin thu kipia hi.

Amau neihsa hi kei taleh, Eden huan le piansak nate tawh nuamsa ding, a kem ding le tua nate tungah ukna kipia hi (Pian. 2: 15). Tua nate cingin a kem ding muanna tawh amaute tungah ki-ap hi.

Tu kaal sung i thusin ding in: Mawhna om khit, Adam le Eve in Eden pan hawlkhiat a thuak khit, neihsa kepna tawh kisai thu hi ding hi. Eite zong Pasian’ neihsa kemte i hi hi. Ahi zongin Adam le Eve nupate’ nopsak hun lai tawh kibang nawn lo hi.

Bang in neihsa kepsiamna kici hiam? Lai Siangtho sunga mite tungtawnin hih thu kitel thei hi. Pasian’ neihsa kem mi in leitung nate mitsuan nawn lo ding a, Piangsak Pa le Ama nasep mitsuan hi. Adam le Eve tungah a kipiak mah bangin eite tungah zong neihsa kem ding hong kipia hi. Mawhna om a kipan neihsa kepna tawh kisai kikhel hi. Piansak nate, leitung nate kemsiam ding banah thuman thutak a cing, a kem dingin hong kisawl hi.

SUNDAY     JAN. 28

THUCIAM LUI SUNGA NEIHSA ZEEKTE

Thuciam Lui sungah ‘Neihsa kem’ cih kammal tam om lo hi. ‘Inn khat sung ukpi’ ci-in kitam zat zaw hi (Pian. 43: 19; 44: 1, 4; 1Kum. 16: 9). Neihsa kem khat in a topa’ neihsa hoihtak kem, inn sung vai khempeuh ama khut sung ah om hi. Neihsa kepna-ah na le vante kikhen lo hi. Tua nate in ama nasepzia pulaak hi.

Thuciam Lui sunga neihsa kem pawl khat en lehang: ( 1). Dinmun thupi kipia hi (Pian. 39: 4). Neihsa kem dingte siamna zui-in mi kitengkhia hi. Mite’ zahtakin om uh a, a topa in zong muang hi.

(2). Neihsa kemte in amau tung ah ki-ap van le nate, a topa’ neihsate thei uh hi. A kemte le a neite kilamdan hih hi pah hi. Neihsa kemte in a dinmun, a nasep uh kitel uh hi.

(3). Neihsa kemte tungah ki-ap van le nate amau deih bangin zang le uh, a topa tawh kizopna kisia pah hi. A topa in hawlkhia thei hi (Pian. 3: 23; Hosea 6:7)

Isa. 22: 14 – 18 sim in. Hezekiah in kumpi a sep hun sungin sum, van le nate kem dingin Sheba kiseh hi. Ahi zongin Sheba in a na kepna ah citak lo ahih manin bang tuak hiam?

________________________________________________________________

__________________________________________________________________

Neihsa kemte in a topa tawh kibangin thupi hi. Van le nate kem dingin kikoih ahih manin a topa’ dinmun ah om hi. A topa’ lunghimawhnate ama lunghimawhna hong suak hi. Neihsa kemte mi thupi hi. Bang hang hiam cihleh a topa in amah muang hi. A topa’ neihsa tawh ama angsung nopna dingin zang hi leh, ama tunga om muanna bei ding hi.”Ellen G. White, Vol.
9., 246.

Koi bangin i nuntak sungin i neih van le nate a kemcing ding cih thu na tel hiam? Hih bangin theihtelna in i nunzia hong huzaap ding kilawm hi lo hiam?

MONDAY      JAN. 29

       THUCIAM THAK SUNG A NEIHSA ZEEKTE

Thuciam Thak sungah ‘epitropos’ laimal mun thumah kigelh hi.

“Oikonomos’ laimal tamveipi kizang hi. A khiatna in khat ii van le nate kemcing, a uk cihna hi. A nasep un neihsa kemte pulaak hi. Thuciam Thak in neihsa kemte in masuan lianpi nei (Lk. 12: 48), hoih tak nasem dingin a topa in lamen hi ( 1Kor. 4:2). Thuciam Lui in neihsa kemte sangin nate a nei Pasian pulaak zaw hi. Thuciam Thak in inn sung vasai nasemte sangin a tangzai zaw nasep pulaak hi.

A citak lo nasem pa (Lk. 16: 1-19) thu gentehna ah Jesuh in neihsa kem cih thu hong hilh hi. Tua bangin a hong hilhna-ah sum le nate bek hi lo, Satan in a suksiat loh nadingin thuman kepcing ding zong hong hilh hi. A pilvang neihsa kem mi khat in Jesuh hong kum kik ding a kigingkhol mi hi
(Matt. 25: 21).

1Kor. 4: 1, 2; Titus 1:7; 1Pet. 4:10 sim in. Neihsa kem le nate thu bang hong hilh hiam?

_____________________________________________________________

______________________________________________________________

“Kha Siangtho i sungah hong om ciangin Pasian in muanna tawh hong piak tha le ngal, ngaihsutnate thaksuak ding hi lo hiam? Ka nuntakna in

Khrih aa hi. Ama nasem dingin ka nungta hi. A hong hehpihna thupha kemcing mi ka hi hi,” cih ding kisam hi. Ellen G. White, Fundamentals of

Christian Education, 301.

Jesuh in zong gentehna-in ‘neihsa kepna’ pulaak hi (Lk. 12: 35 – 48). A citak neihsa kem pa in Mihing Tapa hong pai kik ding kiging khol hi. A citak lo neihsa kem pa ahih leh ka topa hong pai hak ding hi, ci-in a nasep kin lo hi. A citak lo nasem pa in hehin a nuai-a nasemte tungah ngongtat hi. A gina lo nasem, neihsa kemsiam lo mi suak hi. Etteh takcing lo nasem mi hi.

Khrih i san ciangin Ama nasem, Pasian’neihsa kem i hi hi. Tua banah a thupi in van le nate kemcing banah Khrih hong pai kik dingin kiginkholhna-ah thuman thutak a kemcing hi ding thupi hi.

Lk. 12: 45 sim in. Bang hangin Khrih hong pai hak ci-in SDA thu-um tampi in nungkik uh hiam?

TUESDAY    JAN. 30

PASIAN’ THUTHUK KEMCING
  
Kol. 2: 2, 3; 1Tim. 3: 16 sim in. Hihte in thuthuk bang pulaak hiam? I telzawh loh thuthukte in mihing’ lungsim ngaihsutnate in ciangtan nei ahihna bang pulaak hiam?

____________________________________________________________

___________________________________________________________

Zophar, Naamathite in Job kiangah “Pasian’ thuthukte theitel ding na hiam? ci-in dong hi (Job 11: 7). “ Pasian’ thuthuk’ cih kammal in ‘telhak,’ ‘kithei lo,’ ‘hilhcianlo,’ ‘theihzawh ding hi lo,’ cihte pulaak hi. Lai Siangtho in Pasian’ thuthukte pulaak hi. Tua thuthukte i thei zongin i telsiang taktak zo kei ding hi. Tua hangin thuthuk ci-in kiciamteh hi. Vantung a om nate i et hangin i mucian zo kei hi. Pasian in a hong lakkhiat thute i thei a, tua lote i theih zawh ding hi lo hi.

Thkna. 29: 29 in Pasian in bang thute hong lak hiam?

______________________________________________________________

______________________________________________________________

I telzawh loh thuman thute Satan in a suksiat loh nading a kemcing i hi hi. Lai Siangtho’ hong hilh thute le Pasian lahkhiat thute bek i thei hi. I kepcing ding a lian penpen in Khrih’ nasem (sila) ding le Pasian’ thuthukte a kemcing ding, (1Kor. 4:1). Pasian’ hong lahkhiat thuman siatna panin a dal ding, a kemcing ding, a hilh ding, “Lungsim kisuanna om lo-in thuman sungah a kip ding i hi hi (1Tim. 3:9).

Mihing in Khrih tawh a nuntakkhopna-ah a lamdang penpen in vangliatna tawh Khrih a hong pai ding lametna hi. Hotkhiatna in a lamdang Pasian kiang pan hong pai hi-in, mihing in tua thu a telsiang zo kei ding hi. Mimawhte hon dingin Khrih in Amah mah, Piangsak Pa in a piansak nate lakah mihingin hong nungta hi (John 1: 1-3). Kuamah in tatkhiatna thu a telsiang zo kei ding hi. Vantung mite in zong bang hangin leitungah Khrih hong pai hi ding hiam, ci-in tel zo lo uh hi (1Pet. 1: 12). Tua hi mah taleh i theih thute in Topa’ vangliatna, a hoihna hong phat theisak hi (Mang. 5: 13).


Tatkhiatna thuman a cing dingin hong kikoih hi. Hih thu in bang sem dingin hong sawl hiam?

WEDNESDAY     JAN. 31

THUMAN THUTAK A ZEEK MITE


Neihsa kep i gen ciangin van le nate bek i ngaihsun hi. Tua zong hi mah hi. Ahi zongin tuate sangin tangzai zaw hi. Van le nate banah a kimu thei lo vantung thute zong kihel hi. Pasian in vantung thute hong pia-in, tuate hangin Khrih sungah zia le tong hoih neito-in, Ama sungah a nungta thei i hi hi. Tua ahih manin van le nate kepcing sangin tua thute limtak kep ding thupi zaw hi. Bang hang hiam cihleh tua thute in ciangtan nei lo-in manpha hi.

Eph. 6: 13 – 17 sim in. Pasian’ neihsa kemcing dingin hong kikoih hi, ci i hih leh, Pasian in i kep ding bang hong pia hiam? Bang hangin tuate limtak kep ding thupi hiam?

_____________________________________________________________________

_____________________________________________________________________

I Topa Khrih sungah tawntung nunna, Pasian’ hong piakkhong i ngah hi Rom. 6: 23). Leitung le a sung om nate in Khrih sung a hong kipia hotkhiatna hong pia thei lo hi. I neih a manpha penpen in Pasian’ hong piak hotkhiatna hi. Hih thu in Pasian’ hong piak van le nate hoihtak a kemcing thei dingin hong huh hi.

“ Kalvary pan hong tangkhia khuavak in leitung nate hong mutelsak hi. Bethlehem khua pan hong piang thu le Singlamteh in siatna tungah zawhna in genzawh lohin hoih hi. A hoih thupha khempeuh in piakkhong hotkhiatna panin hong luangkhia hi, cih hong lak hi.” Ellen G. White, Education, 101.

Hotkhiatna in ei aa hi. Bang hang hiam cihleh Jesuh in hong tatkhiat nadingin man pia khin hi. Paul in “A kicing mahmah ama hehpihna thupha tawh kizui-in ama sisan hanga tatkhiatna ahi mawh maisakna ama sungah i ngah hi” (Eph. 1:7). I ngah thupha in hotkhiatna thupha hi. Tua thupha eima neih hi. Ahi zongin Pasian in a hong piak ciang bekin a nei thei i hi zaw hi. Tua hi-in Satan le siatna in a hong suksiat loh nadingin Pasian’ galvan khempeuh neih ding kisam hi (Eph. 6: 11). Tua galvan i neihtheih nading lampi in Pasian kammal hong lamlahna zui-in, tua thute nuntakpih ciang bekin siatnate i do zo ding hi (Eph. 6: 17). A hong kipia khuavak upna tawh zuihna in eite galvan lian penpen hi.

Eph. 6: 13 – 17 sim kik in. Koi bangin Pasian galvante nei ding i hiam? Bangci bangin tuate kemcing ding na hiam?

THURSDAY      FEB. 1

NATE KEM DING TAVUAN NEIHNA


A pil neihsa kemte in sepnopna lungsim takpi tawh nasem uh hi. A sepna peuh ah thuman takin sem hi. A sep bangin a gah at dingin kiging khol thei hi. A sem ding tavuan nei ahihlam kiphawkin, tua bangin sem pah hi. A citak nasem khat in a na sepna, a topa’ sawl bangbang nial lo-in sem hi. Pasian tawh kizopna ah zong tua bang ding kisam hi.

“Pasian in Amah tawh kizopna nei dingin lunggulh hi. Tua kizopna-ah

Pasian in mimal tungah a hong piak nasep, citakin a sem dingin hong lamen hi. Ama makaihna ngen tawntungin, Ama tungah lungsim khempeuh kinga ding hong deih hi. Mimal khat ciat tungah vantung piakkhong thupha-te citakin a kem dingin hong ap hi. A hong Pia Pa in ama lamlahna bangin muanna tawh a hong kepsak hi-in, tua bang mah in mimal in i sepna bangin
Ama tungah i pulaak kik ding hi” Ellen G. White, Vol. 7., 176.

Nate kem dingin hong kikoih ahih manin, sem lo-in midang khat ahih kei leh pawlpi sep ding hi, ci-in na pia sawn kei ding hi. I kim a om mite tawh i zopzia in Pasian tungah i cihtakna pulaak hi (Pian. 39: 9; Dan. 3: 16). Na sep dingin hong kipia-te na septheih zah, na siam zah sit lo-in sem in. Pasian mai-ah lawhcinna in siamna, pilna tungah kinga lo-in i upna le siantho-na tungah kinga hi.

2Kor. 5: 10 sim in. Koi bangin a pil nasem (neihsa kem) mi nunzia na tel hiam?

____________________________________________________________

____________________________________________________________

Pasian’ thu kan mite le mipilte in deihtelna tawh kisai kum tampi buaipih uh hi. Ahi zongin Lai Siangtho in kiteltakin hong hilh hi. Mihing in deihtel theihna, khentatna nei hi. Mihing in deihtelna nei kei leh a gamtat bangin thukhenna thuak ding cih pen thuman lo ding hi.Tua hi-in mimal in mawhpuak kinei hi. I Topa’ nate citakin a kem dingin, Ama hehpihna in a hoih khentat theihna, deihtelna hong nei sak hi.

FRIDAY       FEB. 2

NGAIHSUTBEH DING: Thuciam Lui ah ‘neihsa kem’ cih kammal in kammal khat bek pan hi lo-in a kigawm kammal tuantuam (asher al bayt) panin a hong mengkhia kammal hi. Pian. 43: 19 ah “Tua ahih ciangin Josef’ innsung nasempa’ kiangah amaute paito uh a, inn kongkhakah amah tawh kiho hi” (Pian. 43: 19). Mi khat in mundang innkuan khat tawh innkuan bangin kingaihsun thei ahih leh, ama innkuan in bang zahin manpha zaw ding hiam? A topa’ nate a kem dingin ki-ap hi bek a, ama neih ding hi lo hi. Ama inn sung nate sangin a topa aa hoihtak a kep ding kisam hi. Tua bang mahin Thuciam Thak in zong tuhun a neihsa kepsiamna tawh kisai thugil, ngaihsutzia ding limtak hong hilh hi. Greek laimal in ‘oikia’ kammal zang hi. A khiatna in ‘inn’ cihna hi. ‘Oikonomos’ a khiatna in inn nasem - inn sung nate limtak kemcing, cihna hi.” Handbook of Seventh-day Adventist Theology (Hagerstown: Review & Herald, 2000), 653.

KIKUP DING DOTNATE

1.  Nek loh ding singgah a nek manun Adam in ‘khial kha mah ing’ ci lo-in Pasian tungah bang pulaak hiam?Pian. 3: 12. A kipat a kipan i khialhna mawhpua nuam lo-in ngawh paulapkinei tawntung hi. Koi bangin i khialhna, i mawhna midang ngawh lo-in nang mah in mawh pua ding na hiam?

2.  Satan suksiat loh dingin koi bangin thuman kemcing na hiam? Bangci bangin vantung thute na zeek hiam?

3.  Vantungmi thumte’ thupuak (Mang. 14: 6-12 ngaihsun in. Van le nate kepna tawh kisai bang hong hilh hiam?

4.  Bang hangin i tel zawhloh thuman thute muan ding le up ding hamsa hiam? Koi bangin leitung lungsim tawh kalsuan kha zel i hiam?




To get the latest update of me and my works

>> <<