MUC

Print Friendly and PDF

Tuesday, December 12, 2017

LESSON 13 MARCH 24- 30 NEIHSA ZEEKSIAMNA PANIN HAMPH

LESSON 13 MARCH 24- 30

NEIHSA ZEEKSIAMNA PANIN HAMPHATNA











SABBATH NITAK

TU KAAL SUNG SIM DING: 2Tim. 3: 1-9; Eze. 14:14; Phil. 4: 4-13; Pau. 3:5; 1Pet. 2:11, 12; Matt. 7: 23; 25: 21.


KAMNGAH: “ Gentile-te in siatna a bawl mite bangin a hong kosiat uh hangin amaute lakah a pahtakhuai-in na gamta un.

Tua hi leh note gamtatna pha-te mu-in thukhen ni ciangin Pasian a phat thei ding uh hi.” 1Peter 2:12.

Neihsa kem i hih mah bangin Pasian aa dingin teci dingin nuntak ding kilawm hi. Tua a cih ciangin i kimlepam mite i nunzia in huzaap ding kisam hi, cihna hi. I gen thute in kimlepaam mite tawh kikhenthei hi lo hi. Kimlepaam mite in a theih loh thuman thute a theisak ding, a hilh dingin a hampha mi na hi hi.

Neihsa kepna-ah hanciamna kisam a, tua mah bangin Pasian’ deihna tawh kituakin nungta in. Midang tawh kibang lo a tuamzaw-in a nungta thei dingin Pasian in siamna hong guan hi (2Kor. 6:17). Tua bang nunzia mite’n zong a lunggulh ding uh kisam hi.Tua hi-in bang hong kihilh hiam cihleh “Ahi zongin note lungsim sungah a tuamin Topa Pasian koih unla, note lametna thu hong dong mi khatpeuh lungnemna le zahtakna tawh na dawnkik theih nadingun a kigingsa-in om den un.” 1Pet. 3: 15.

Neihsa kepna tawh kisai-in hamphatna, upna thuphate, lawhcinnate, huzaap neihna kipan lungkimna cihte i kikum ding hi. Hihte khempeuh a kicin nadingin i sungah Khrih a hong om kul hi (Kol. 1:27).

SUNDAY       MARCH 25

NEIHSA KEPNA LE PASIAN SUTNA


Pasian sutna i cih in tampi huam hi. Pasian sutna nei mi in a siangtho nuntakna nei uh hi (Titus 1:1); Khrih bangin Pasian lungkimna tawh kituak ngaihsutna, gamtatna nei uh hi (Late 4:3; Titus 2:12). Pasian deih tawh kituak nuntakna in biakpiakna man hi. Tawntung nuntakna kamciam ngah ding hi. Leitung pilna, hauhna, minthanna, vangliatnate in tua kamciam hong ngahsak thei lo hi.

2Tim. 3: 1-9 sim in. Paul in a citak neihsa kep mi tawh kisai bang hong hilh hiam?

_______________________________________________________________

_______________________________________________________________

Job Lai Siangtho in Job nunzia pulaak hi. Gimna tuak taleh Pasian sutna nei mi’ nunzia ding hong hilh hi. Satan in Pasian deihna bangin a nungta mite mudah hi, cih hong theisak hi. Pasian in Job bangin upna nei, thuman tawh a nungta mi kuamah mu lo hi. Tua hi taleh “ Uz gamah Job min nei mi khat om hi. Tua mipa in paubaang lo-in, thumanin gamta hi.

Amah in Pasian zahtakin siatna pel hi”(Job 1:1). Tua hi-in Job in a um minpua bek hi lo-in a upna nuntakpih hi. Ze-et gimna thuak taleh Pasian a zahtakna a gamtat in pulaak hi. Pasian sutna nei mi i cih ciangin kicingkhin mi hi, cihna hi lo hi. I nuntakzia in kicinna pulaak cihna hi.

Eze. 14:14 sim in. Mite’ nunzia bang pulaak hiam? I nuntakna-ah a kimu thei amau gamtatna bang pulaak hiam?

_______________________________________________________________

_______________________________________________________________

Neihsa zeeksiamna in Pasian’ mi hihna pulaak hi. A citak neihsa zeeksiam mi in a minpua beka nasem hi lo-in Pasian in a piak thupha-te hoihtak a kem mi hi. A nunzia in Pasian pulaak hi. A gamtat un a upna uh pulaak hi; siatna a pelhnate in zong a upna pulaak hi.


MONDAY        MARCH 26

LUNGKIMNA


“Huhna ka kisap manin hih thu a hong gen ka hi kei hi. Bangci bangin om taleng a lungkim dingin ka kisin khinzo hi.” Phil. 4: 11. I neih bang tawh lungkim ding i hih leh koi panin tua lungkimna hong pai hiam?

___________________________________________________________

____________________________________________________________

Paul in Timothy a laikhakna sungah biakna tawntungin hauhna ngah ding a lamen mite pulaak hi (1Tim. 6:5). TV tungtawnin vanzuakte’n zong a vanzuak uh lei lehang lungdam nopna ngah dingin pulaak uh hi. Hoihtakin a thugen uh ngai-in amau gen bangin citak hi lehang kihau ding hi, ci-in mite lungsim huzaap dingin thugen uh hi. Citakna hangin hauhna kingah hi, ci-in a um mite in biakna paulapin leitung nopna zong uh hi.

A taktakin Pasian biakna in hauhna tawh kizopna nei lo hi. Hauhna le

Pasian biakna in kizopna nei hi leh leitunga sumhau penpente upna-ah a hat pente hi ding hi. Ahi zongin neih bangbang tawh lungkimna in hauhna lianpen hi, ci-in Paul in hong hilh hi (1Tim. 6: 6). Bangbang dinmun tawh na nungta zongin Pasian biakna le lungkimna kop lehang, tua in hauhna lian pen hi. Bang hang hiam cihleh Pasian hong hehpihna in na khempeuhte sangin manpha zaw hi. Tua hi-in nek ding le silh ding i neih nak leh lungkim ding kisam hi (1Tim. 6:8). Neihlelamh hau mahmah taleng a tawpkhakna-ah kicing khin cih om thei lo hi.

“I nuntakna bang bang tawh lungkim theihna in a manpha mahmah nuntak siamna khat hi. Pasian in zong tua dingin hong deih hi. A lungkim thei dingin kisin kul hi. I theihtel ding thu thuk khat hi. Khristian lungkimna deihhuai hi. Sunglam lungnopna hi. Lungdaihna le hehpihna nei hi. A lungkim mi in Pasian tungah ki-ap hi; Pasian’pilna sungah nuamsa-in, pa in ta ahilh bangin

Pasian’ hilhna mang hi. Lungkimna in manpha mahmah hi. Lunggim, sinkham hunin hong lungnuamsak hi.” Jeremiah Burroughs, The Rare Jewel of Christian Contenment, 1, 3.

Rom. 8: 23; Heb. 13:5; Phil. 4: 4-23 sim in. Lungkim nading bang kisam hiam?


TUESDAY       MARCH 27

MUANNA


Pau. 5:3 sim in. I theihna suanglo-in bang muang ding hong hilh hiam? Isa. 55: 9; 1Kor. 4:5; 13:12.

_____________________________________________________

_____________________________________________________

Pasian’ nasem khat in ama theihna suanglo-in a lungsim khempeuh tawh Topa a muang ding mi hi (Pau. 3:5). A gen baih a, a taktak ciangin hamsa hi. Pasian umin, amah in hong it, hong kem hi, ci-in thei napi, lunghimawhna khat tuak kha lehang muanna bei pah hi lo hiam? Khat veiveiteh mailam thupiang dingte ngaihsutna in hong dipkua-sak hi lo hiam? Tua ahih leh koi bangin neihsa zeeksiam mi khat in Pasian muang ding hiam? A hong thupiak bangin nungta-in sepna khempeuhah amah muan ding kisam hi. Muanna in lungsim sung pan hong piangkhia hi-in Topa i muanna khang semsem leh sepna tam semsem ding hi. Citakin neihsa kem mi’ nuntakna in Topa a muanna kilangsak hi. Hih muanna in neihsa kepna ah a bulpi le a masawtsakpi pen hi. Sepna in muanna pulaak hi.

“Na lungsim khempeuh tawh Topa muang in.” Lai Siangtho sungah ‘lungtang’ cih kammal in gentehna-in kizang kammal khat hi. A khiatna in khentatna khat in – i mihing hihna bulpi - i nunzia, gamtat, ngimna, tupna tungah kinga hi (Matt. 22: 37), cih pulaak hi. I septheih loh nate hangin Topa muan ding hamsa lo hi. Cihna ding theih nawnlohteh Topa kimuang mah hi. Ahi zongin lungsim takpi tawh a muang mi in ama septheih himah taleh Topa muang veve hi.

Sawltakte in a lungsim khempeuh uh tawh Topa a muanzia uh hih bangin pulaak hi: “upna neu, cimawh hi mah ta le-uh, tu-in a lungsim khempeuh uh tawh Topa muang uh hi.” Lungsim, nuntak hauhna nei uh a, na khempeuhah Pasian a nung, a mai uah koih tawntung hi.” Ellen G. White, Gospel Workers, 25.

WEDNESDAY  MARCH 28

EITE HUZAAP


“Paul in a kikhel lungsim hih bangin pulaak hi: “ amah khuavak sungah a om mah bangin, (1John 1:7; Isa. 30:21), nisim nuntakna-ah khuamial tungah huzaap nei ding kisam hi. Jesuh in “Keimah leitung khuavak ka hi hi,” ci hi (John 8: 12) Nisim i nunzia tungtawnin tua khuavak tangsaksawn ding kisam hi.

Koi bangin neihsa zeeksiamna in Pasian minthangsak hiam? I gamtat in mite a huzaap hiam? Matt. 5:16; Titus 2:7; 1Pet. 2: 11, 12.

_______________________________________________________________

______________________________________________________________

Neihsa kep i cih in Pasian ii neihsa sawma khat zeekkhiat banah innkuan sung, kiimlepam, leitung le na khempeuh kepna cihte zong huam hi (1Kor. 4:9). Neihsa kepna in i sepna khat peuhah vantung gam khuavak tansakna kihel hi. Tua hi-in mi a huzaap thei hi. Hehpihna, gamtat hoihna, Piangsak
Pa’ deihna bangin kalsuanna cihte tungtawnin Khrih na kilangsak thei hi.

Gamtat hoihna bangin nate zatsiam ding kisam hi. I nasep tungtawnin neihsa kepna-ah thumanna kimu thei hi. “Nangma dikna khuavak bangin nangma thumanna nitaang bangin hong langsak ding hi” (Late 37: 6). Neihsa zeeksiam khat in a sepna munah huzaap nei-a, mualtunga om khua mah bangin (Matt. 5:14), khuavak in kiselcip thei lo hi (Lk. 11: 33). Innah na om a, nasepna munah hi taleh huzaap nei dingin na khentat leh, tua bangin huzaap nei na hi ding hi. “ Piansak na khempeuh in amau sep ding ciatin sem uh hi. Mihing khat ciat in zong Pasian hong piakna tawh kizui-a a kalsuan ding kisam hi. Pasian in a hong piakna tawh kizui-in nasep ding hong lamen hi. Tuhun in gamtat hoih, mannei-a a nungta ding hun hong kipia hi. Khrih in hong huh dingin kiging tawntung hi. Lungsim khempeuh tawh Ama tung ki-ap in.” Ellen G. White, This Day with God, 243.

Na inn sung hi taleh, na nasepna munah hi taleh na gamtatna in bangci bang huzaap nei hiam? Na nunzia in na upna thu bang a pulaak hiam?

THURSDAY      MARCH 29

I ZAKNOP KAMMALTE ( LEH I ZAKNOP LOH)


Leitungah khualzin mi, lengla i hi hi. Na khempeuh kicinna, hoihna, lungnopna tawh kidim vantung manawh mi hi hi (Heb. 11: 13, 14). Tua mun i tun mateng hih leitungah a om ding i hi hi. Satan le Pasian kido-na sungah khat teitei na teel ding kisam hi. A nihin kop le kaih hi thei lo hi. Pasian aa dingin nuntak maw, ahih kei leh Satan aa dingin nungta, khat koppihin kinungta hi. “Kei tawh a hong pangkhawmlo peuhmah ka langpang hi a, a hong kaihkhoppihlo peuhmah a thehthang mi ahi hi” (Matt. 12: 30). Topa hong paiteh koi lamah i om ding hiam?

Khrih hong pai ciangin Ama lamah a oma mite tungah bang thu kipulaak ding hiam? Matt. 25:21; 7: 23.

__________________________________________________________

_________________________________________________________

Khrih’ kammal ‘a diktat’ ‘na hoih sem’ cih kammal in nuamna, lungkimna pulaak kammal hi. Topa’ neihsa zeeksiamna nei-in kingaihsun kei mah taleh uh, a siamna uh sitlo-in a hihna khempeuh uh tawh a sep manun tua bang kipahna thu za ding uh hi. Tua bangin a ngah theihna uh in amau gamtatna hang hi lo-in, Khrih in eite aa dingin a hong sep manin tawntung hotkhiatna sung thei hi zaw hi (Rom. 3:21; 4:6). Tua bangin a citak neihsa kem mi in a upna kilangsak hi. Gamtat siksanin Pasian’ maipha ngah ding a hanciam mite’ kampau in hoih a kisakna khempeuh pulaak uh hi (Matt. 7: 21, 22).
Tua bang hanciamna in a mawkna pi hi (Matt. 7: 23).  Khrih nungzuite-in

Topa aa, amah a kipiak kik uhteh amau tungah kipiakbeh ding hi. “A diktat, citak nasem pa aw, Topa sungah nopsakna ngah ta-in,” cihna ngah ding uh hi.” Ellen G. White, The Desire of Ages, 523.

A tawpkhakna-ah neihsa zeekna, sepna khempeuh tha hong pia, hong hatsak thute in a lian mahmah thupiak nih tungah kingah hi:

Pasian itna le mite itna hi. Koi bangin na nunzia, neihsa kepzia in hih thunih kilangsak hiam?

FRIDAY      MARCH 30

NGAIHSUTBEH DING: Jesu in Pasian’ itna pulaak dingin leitungah hong pai hi. A nungzui khempeuh in tua bang dingin hong deih hi. Khat le khat kihuh, tha kipia ding hanciam ni. Midang phattuam nading a bawl mi in lungnopna taktak nei hi. Pasian a it mi, itna nei mi in supna thuak lo hi.

Angsung khualna hemkhiat tam semsem leh lungnopna khang semsem hi.

Bang hang hiam cihleh ama sungah Pasian’ deihna kicingsak hi.” Ellen G. White, Counsels on Stewardship, 24, 25.

“Nuntakna nei pawlpi in a khangto pawlpi, a khangcing pawlpi hi. Tua bang pawlpi in piakkhiatna tha-in thupha ngah zaw semsem uh hi. Topa tungah piakhia semsem uh a, Topa’ thupha sang tektek uh hi. Pasian in amah a umte thupha le khuavak pia hi. Pasian’na a sep uh ciangin tua thupha le khuavak mite tungah pia khia uh hi. A ngah thupha-te a piak manin ngahna tam semsem hi. Nisimin hehpihna thupha le thuman ngah tawntung hi. Thuman khuavak telmuh tektek, theihna khang semsem hi. Piakkhiatna le ngahna tungtawnin pawlpi nungta-in khangto hi. Ngahna napi a pia ngei lote, a ngahna uh kiam tektek ding hi. Nisim vantung thuphate i ngah nop leh piakkhiat kul hi.” Ellen G. White, Counsels on Stewardship, 36.

KIKUP DING DOTNATE

1.    Koi bangin Topa muanna in hong lungkimsak hiam? Lungsim, ngaihsutna khempeuh tawh Topa muan nadingin bang kisam hiam? 2Kor. 10:5. Bang hangin “ na khempeuh a hoihin piang hi” cih thu pulaak ding hamsa sa lo-in, up taktak ding hamsa hiam? Pasian muang kici napi, mailam thu ding lungpatau zel hi lo i hiam?

2.    “Neihsa kem/zeek’ i cih in bang hiam? Bang hangin neihsa zeek/kepna in thupi mahmah hiam? Na lawmte tawh kikum in.

3.    Matt. 7: 21- 23 sim in . Bang thupiang hiam? Bang hangin mite in a gamtatnate pulaak uh hiam? A kampaute un a nunzia bang pulaak hiam?

Koi bangin upna le thumanna, Pasian’ min tawh na sepnate, khemna sung na tung loh nading cihte ah neihsa kem/zeeksiamna in bang hong hilh hiam?

4.    Nangma huzaap bek hi lo, bangci bangin pawlpi huzaapna nei thei ding hiam? Pawlpi in bangci bangin khua sung a huzaap hiam?



To get the latest update of me and my works

>> <<