MUC

Print Friendly and PDF

Tuesday, December 12, 2017

LESSON 12 MARCH 17 – 23 NEIHSA ZEEK MITE’ ZIA LE TONG

LESSON 12     MARCH 17 – 23

NEIHSA ZEEK MITE’ ZIA LE TONG






SABBATH NITAK


TU KAAL SUNG SIM DING: Eph. 5: 15 – 17; Kol. 3: 23; Lk. 12: 35 – 48; James 4: 14; Sawl. 3: 21; 1Kor. 9: 24 – 27.

KAMNGAH: “ Tangval khat in ama gamtatna a siangtho mahmah dingin bangci kep ding ahi hiam? Nangma thu zuihna tawh ama gamtatna siangthosak thei ding hi. Ka lungsim khempeuh tawh nang ka hong zong hi. Na thupiaknate panin kei hong pialsak kei in.Nangma tungah kong khialh loh nadingin ka lungsim sungah nangma thu ka khol hi.” Late 119:9-11.

I gamtat zia le tongin i mungtup, i mailam ding pulaak hi. Zongsatna hoih nei-in neihsa kemsiamte in a citak nasemte hi. Daniel in nisim in thungen hi (Dan. 6: 10). Paul in kikhopna innte ah pai-in kikhop ama ngei-na hi (Sawl. 17: 1, 2). Paul in, “ Mite khemsa-in om kei un. Kholhpih hoihlo in gamtat hoih a susia hi” ci-in gelh hi (1Kor. 15: 33). Zongsatna hoih lo nusiat nadingin zongsatna hoih neih ding kisin kul hi. “ I gamtat in tawntung a kimang ding hi. Gamtat hoih neite in na khat peuhpeuh a sepna-ah a citak mite hi. Tua bang mite in aksi bangin tang ding uh a, midangte pai nading lampi khuavaksak hi.” Ellen G. White, 4T., 452.

Gamtat hoih nading lampi na zuihna-ah panin thaman na ngah ding hi. Zongsatna hoih i cih in a kikhel pak lo ding khensatna khat hi. Na lungsim sung pan hong suak bangbangin na gamtat in a hoih hi thei, a sia zong hi thei hi. Na nasep in gamtat hoih le gamtat siat khentel ding hi.

Tu kaal sungin Pasian’ nasepna sungah kihel neihsa kemzia i kikum ding hi.


SUNDAY       MARCH 18

GAMTAT NGEI-NA: PASIAN ZONG MASA IN

Gamtat ngei-na i nei ciat hi. I kidot ding in: bangci bang gamtat ngei-na in a hoih maw, a sia hiam? Gamtat hoih nei mi khat in nisimin Pasian zong masa den hi. “ Zingsang simin Topa tungah na nuntakna, na ngaihsutna, na pumpi, na lungsim ap in. Honpa bia-in amah muan dingin kisin tawntung in” Ellen G. White, Mind, Character, Personality, Vol. 5., 15.
Tua bang mite in nuntakna kong kawcikah a lut mite hi (Matt. 7:14).

Pasian in, “Keimah simloh Pasian dang na nei kei ding uh hi” ci-in pulaak khin hi (Pai. 20:3). I kisap nate tawh kisai-in Jesuh in “Pasian gam le Ama dikna zong masa un (Matt. 6:33). “Lungsim khempeuh tawh na hong zon uh ciangin nong mu ding uh hi” ci-in hong hilh hi.

Matt. 22: 37, 38; Sawl. 17: 28; Eph. 5:15 – 17; Kol. 3: 23 sim in.

Bangci bangin na khempeuhah Pasian i masak zawk hamtang ding na telthei hiam?

__________________________________________________________

_____________________________________________________________

I nuntakna-ah na khempeuh sangin Topa i masak zawkzia ding Jesuh in hong hilh hi.Jessuh sangin etteh huai zaw kuamah om lo hi. Jesuh in a nuntakna-ah a Pa masak tawntungzia biakinnpi-ah a thuhilh in pulaak hi.

Jesuh in a nu kiangah “ Ka Pa na ka seploh phamawh hi,” ci-in pulaak hi (Lk. 2: 46, 49). A nuntakna khempeuhah Jesuh in a Pa tawh kizopna lunggulh den hi. Tua hangin Jesuh in thungen niloh hi. Nungzuite in tua bangin a thunget telthei lo uh hi. Khuamial vangliatna in a Pa kiang panin Jesuh khenkhia zo lo hi. Bang hang hiam cihleh Jesuh in a Pa tawh kizopna kip nei tawntung hi.

Eite in zong Jesuh ettehin ngaihsutna, lungsim le nuntakna khempeuh tawh Pasian i it thei hi (Matt. 22: 37). Thungetna, Lai Siangtho simna tungtawnin Jesuh ii zia le tong i nei thei hi. Tua dingin na khempeuhte sangin Pasian i masak zawk tawntung ding kisam hi. Tua sangin a hoih zaw zongsatna hoih bang om ding hiam?

Nang le nang kisittel in. Na khempeuh sangin Pasian a masa-in na koih hiam? Koi bangin na masak zawklam a kithei ding hiam?


MONDAY          MARCH 19

GAMTAT NGEI-NA: JESUH HONG PAI DING LAMEN


Luke 12: 35 – 48 sim in. Jesuh hong pai kik ding thu tawh bangci bangin kizom hiam? Bang hangin i nuntakna in Nihvei Kumkikna siksanin nuntak ding kisam hiam?

_____________________________________________________________

____________________________________________________________


Jesuh hong paikik ding siksanin nate kepsiam ding kisam hi. A citak lo nasem pa in a gamtatna tungtawnin pulaak hi. A citak nasem pa ahih leh a topa in amah tawh a om bangin vilin nasem hi. Mailam hun aa dingin nungta-in nisimin citakna tawh nasem uh hi. “ Eite in vantunggam mi i hi a, tua gam panin Honpa Zeisu Khazih hong pai ding lawptakin i ngak hi” (Phil. 3: 20). Abraham in a tawntung khuapi lametna tawh ngak hi (Heb. 11: 10). Paul in zong Khrih hong kumkik lamenin ngak hi (Heb. 10: 25). Amaute in lametna,geelkholhna tawh nungta uh hi. Khrih a dawn dingin nisim kiging uh hi.

I pumpi a hong kihotkhiat nading ni hong tung ding i ngak hi (Titus 2: 13). Bang mah awlmawh lo-in a nungta hi lo-in Khrih hong pai ding vilin ngak, nasemin tawntung nunna in eite hong ngak hi, cih phawk a lametna tawh a mainawt ding i hi hi. Hun nununga thupiang dingte a pulaak ciangin zaknop deihhuai le ngaihsutna kihel lo pumlawp thugenna (fanciful and wild speculation) pelh ding kisam hi. Nihvei Kumkik ding kamciam in i nunzia ding hong hilh hi. I nunzia, i dinmun hong mutelsak hi. I nuntakna-ah a thupi nate hong phawksak hi. Jesuh hong paikik ding lametna in nuntak ngimna le masuan hong neisak hi.

Singlamteh in Honpa kiang hong tunpi ding lampi hi. Lai Siangtho sungah Khrih in vangliatna le vantungmi honpi tawh hong pai ding hi, ci-in a hong hilh thute hangin lametna tawh i nungta hi (Mk. 8: 38). “ A kimu thei nate mitsuan lo-in a kimu thei lo nate ka mitsuan uh hi. Banghang hiam cihleh a kimu thei nate tomkal sung bek om ding a, a kimu thei lo nate ahih leh a om tawntung ding hi” (2Kor. 4: 18). Sihna tawh kipelh ding kuamah om lo hi. I nuntakna in mitphiat khat sungin beimang thei ahihlam sihna in hong phawksak hi. Ahi zongin Nihvei Kumkikna kamciam in sihna in tawmvei sung ding a, sihna pan thawhkikna hong hilh hi. Khrih hong kumkik ding kamciam tawh nuntak ding kisam hi. Hih kamciam in i nunzia a hong huzaap kul hi. Khrih hong kumkik ding lametna nei tawntung in. I pawlpi min in zong tua lametna pulaak hi.


TUESDAY     MARCH 20

GAMTAT NGEI-NA: HUN ZATSIAM

“Eite pen zan mah mi ihi a, bangmah i thei kei hi. Leitunga i nuntakna pen niliim bang lel ahi hi” (Job 8: 9). A pailai nai na khawlsak thei hi. Ahi zongin hun na khawlsak thei kei hi. Hun in kuamah ngak lo hi. I om mawk hun sungin zong hun in hong paisan hi.

James 4:14; Late 90: 10, 12; 39: 4, 5; Thna. 3: 6-8 cihte in hun tawh kisai bang hong hilh uh hiam? Hun a manphazia a pulaak thute bang hong hilh hiam?

__________________________________________________________________

__________________________________________________________________

Nuntakna in ciangtan nei a, a beisa hun kila kik thei lo ahih manin hun zatsiam mahmah kisam hi. Tua hi-in hih leitung le vantung aa ding a thupite mitsuanin hun zeeksiamna ding kisam tawntung hi. Pasian kammal siksanin hun zeeksiam ding kisam hi. Bang hang hiam cihleh i beisa hun kizang kik thei lo hi. Sum mangsak kha hileng kimu kik thei hi. A mangkhinsa sangin tam kingah zaw thei lai hi. Ahi zongin hun pen tua bang hi lo hi. Minute khat sung a mawk bei hun in a bei tawntung hi pah hi. Hun i cih in a manpha mahmah Pasian hong piak thupha hi. Tua hi-in hoihtaka hun zatsiam ding kisam pha mahmah hi.

“I hun in Pasian’neihsa hi.Mit phiat kaal sung nangawn Ama aa hi. Ama minthan nadingin i hun zat ding kisam mahmah hi. ?iamna, nate sangin hun hong piakna tungtawnin thukhenna i thuak zaw ding hi. Hun manphatna kiciangtan thei lo hi. Khrih in hun mawkbeisak lo hi. Tua hi-in hun mawk beisak ding hi lo hi. Mawhbeisak dingin nuntak hun tom hi. Hehpihna kikhakma hun tomno i ngah sungin a bei ngei lo ding nunna sung lut nading na kiging khol thei hi. Angsung gualnop nading, mawhna sungah nopsakna ding hun om lo hi.” Ellen G. White, Christ’s Object Lessons, 342.


“Mihai bangin gamta kei unla, mipil bangin pilvangtakin gamta un. Hun le nite sialua ahih manin hun hoihte khahsuah kei un.” Eph. 5: 15, 16. Paul in bang hong hilh hiam? Koi bangin tua thute nuntakpih thei ding i hiam?


WEDNESDAY       MARCH 21

GAMTAT NGEI-NA: PUMPI, LUNGSIM, NUNTAK CIDAMNA


Mihing a hong kipiansakcilin lungsim, pumpi nuntakna bangmah siatna om lo hi.Ahi zongin mawhna in tua khempeuh susia hi. Na dangte sangin Lungdamna thu in mihing a hong kipiansakcil nunna i ngah kik nading Pasian in nasem hi.

Sawl. 3: 21; Mang. 21: 1-5 sim in. Lametna bang hong hilh hiam?

Koi bangin tua lametna i muh nading nungta ding i hiam?

______________________________________________________________

______________________________________________________________

Khrih in i lungsim, nuntakna, pumpi in kicinna nei dingin nasem tawntung hi. Pasian in mihingte a cidam ding hong deih ahihlam Jesuh’ nasep in hong lak hi. Tua hi-in neihsa kepsiamna in pumpi, lungsim cidamna hong huh hi.

Ngaihsutna khuak zatna tam semsem leh khuak cidam tektek hi. Tua hi-in “a pahtawihuai thute, a thuman, a siangtho, a ithuai thu le thu hoihte, gamtat hoih le a phatthuai thute ngaihsutpen in na nei un” (Phil 4: 8), ci-in hong hilh hi. Tua bang thu ngaihsutna in lungnopna hi (Isa. 26:3). A lungnuam lungsim in pumpi cidamsak hi (Pau. 14: 30). Lungsim cidamte in a hoih ngaihsutna le sepna nei uh hi.

Nihna-ah: cidamna ding hanciamnate – khua-ul suahsakna, thasanna, cidamna tawh kituak annekna cihte kisam hi. Taksa thasanna in lungtang cidamsakin sikhang dal hi. Pumpi thasanna nei ngeilote’ maisuahin teekmel pua hi. Manmanin khua-ul suakin tatna (exercise) a bawlte a ci a sa uh no-suah hi.

Thumna: neihsa kemsiam mi khat in pumpi, nuntak cidam nading hanciam hi. Pasian tungah ki-ap in (Late 86: 4, 5). Amah ngak in ( Late

62:5). A thuman sungah nungta in. Tua hi leh na nuamsa ding hi (3John 3). Topa hong pai ciangin kawkbanna om lo ding hi (1Thess. 5: 23).

Gamtat ngei-nate ngaihsun in. Koi bangin pumpi, lungsim, na upna huzaap hiam? A hoih zaw dingin na kikhel ding a om hiam? Na khentat ding bang om hiam? A hoih zaw dinmun ah a nungta dingin Topa’ hong kamciam tawh na nungta ding hiam?

THURSDAY     MARCH 22

GAMTAT NGEI-NA: PUMPI KI-UKNA


Neihsa kepna-ah pumpi ki-ukzawhna in a thupi mahmah zia le tong hoih khat hi. “ Pasian in lau-na lungsim hong pia hi lo-in hanna, itna, ki-ukzawhna hong guan hi” (2Tim. 1: 7). Greek laimalin ‘sophronismos’ hi-in Thuciam Thak sungah hih mun khat bekah kizang hi. Ki-ukzawhna sungah Pasian thuman thutak siksanin ngaihsut hoih neihna kihel hi. Ki-uk zawhna in a sia lak pan a hoih thute hong khentel thei-sak hi (Heb. 5: 14). Tua mi in lunggimna a piangsak thei thu a zak hangin amah le amah a kikem zo hi. Ama pumpi deihna a zui Samson bang lo-in, Daniel in humpinelkai kua sung khiatna a thuak dongin ama pumpi deihna ukzo hi. Solomon in pasian a biakpih dingin a zol namdang zi tampi nei hi. Ahi zongin Joseph ahihleh Potiphar zi’ mawhzolna pan kihemkhia hi (1Kum 11: 4,5).

1Kor. 9: 24 – 27 sim in. Paul in pumpi ki-ukzawhna tawh kisai bang hong hilh hiam? A tawpkhakna-ah ki-ukzawhna nei lote in bang thuak ding uh hiam?

_______________________________________________________________

______________________________________________________________

Leitung in pumpi deihna zui hi. Zuau thu le phuaktawm thu tam semsem hi. Siatna sung tun nadingin mun khempeuh in Satan’ thaang tawh kidim hi.

Siantho-na tawh kidimin Pasian a zahtak mite in amau pumpi deihna uk zo uh hi. Gawlduhna, lunggulhna khempeuh Kha Siangtho ki-uksak uk hi. Pumpi ki-ukzawhna in lungsim ngaihsutna hatsakin thuman thutak theihna, Pasian kammal theihna khangsak hi.” Ellen G. White, The Desire of Ages, 101.

Gamtat zia le tong kisekna in pumpi ki-ukzawhna khangsak hi. Pasian in “Na khempeuhah a siangtho ding (1Pet. 15, 22) le “biakna thu sungah nuam a sak dingin” hongsam hi (1Tim. 4:7). Kimawlna-ah kidem ding mite kisin kul a, neihsa kepsiam ding zong kisik kul hi. Pumpi’ deihnate zawh kul hi. Mihing in Pasian’ vangliatna tawh kopin a hanciam ciangin pumpi deihna uk zo ding hi.

Koi bangin siatna tawh kidim leitungah citakin, Pasian a zahtak nasem mi hi thei ding na hiam? Bangci bangin ki-ukna hong pia thei Pasian’ vangliatna sungah ki-ap ding na hiam?


FRIDAY      MARCH 23

NGAIHSUTBEH DING: Siatna tawh kidimin, leitung nate tawh nopsakna a zong mite lakah Enoch le Noah in Pasian tawh kizopna hoih nei uh hi (Pian.

5: 24; 6: 9). Pasian’ hehpihna theihtelna hong kipia nasep tungah hong citaksak hi. Khang tampi khitteh Daniel le a lawmte in dawibia mite lakah, Khristian gamtat zia le tong hoih, lungsim hoih nei-in a nungta Pasian aa dingin limpha-in nungta uh hi. Pasian in amaute thuhilhsia hi. A kimu thei lo Pasian tawh tatsat lo-in kizopna nei uh a, tatsat lo-in thungen den uh hi.

Enoch mah bangin amau zong Pasian tawh lampaikhawm uh hi.” Ellen G.

White, Prophets and Kings, 486.

“Pasian tawh lampaikhawm cih thu in neihsa kem mi khat ii nunzia pulaak hi. Ni khat khit ni khat Pasian tawh a nungta khawm uh hi. A pil nasemte in siatnate lakah Pasian tawh lampaikhawm uh hi. Pasian tawh kizopna bek mah in siatnate pan hong dal ding hi. A citak nasem mi in

Pasian tawh thukimna nei hi (Amos 3:3). Khrih sung i nuntak loh phamawh hi (Kol. 2:6). Nunna thak sungah nuntak ding kisam hi (Rom. 6:4), itna neih kul hi (Eph. 5:2), pilna tawh nungta uh hi (Kol. 4:5). Thuman sungah om uh hi (Late 86: 11). Khuavak sungah kalsuan uh hi (1John 1:7). Thuman thutak tawh nungta uh hi (Pau. 19: 1),Topa thukham nuntakpih uh hi (Pai. 16: 4).
Na hoih sem uh hi (Eph. 2: 10) Thuman lampi zui uh hi (Pau. 4: 26).


KIKUP DING DOTNATE

1.  Neihsa kem mi khat aa dingin kiniamkhiatna in bang nasem hiam? (Matt. 11: 29; Eph. 4:2; Phil. 2:3; James 4:10; Micah 6:8) Bang hangin Pasian tawh kizopna-ah kiniamkhiatna thupi hiam?

2.  Leiba tawh kidim mite bangci huh theih ding na hiam? Pawlpi in tua bang mite bang munte-ah huh thei ding hiam?

3.  Neihsa kem mi khat in hoihna bang teng nei ding kilawm hiam? Titus

2:7; Late 119: 172; Matt. 5:8.

4.  A lamdang mahmah hun tawh kisai na lawmte tawh kikum in. Bang hangin hun bei hanhan bangin ngaihsun i hiam? Hun i cih in


bang hi, ci-in koi bangin na theitel hiam? Bang hangin tawmvei nuntak hun hoih tak zatsiam ding kisam hiam? 

To get the latest update of me and my works

>> <<