MUC

Print Friendly and PDF

Monday, December 18, 2017

LESSON 1 DEC. 30 – JAN. 5 NATE LUNGGULHNA’ HUZAP

LESSON 1     DEC. 30 – JAN. 5

             NATE LUNGGULHNA’ HUZAP





SABBATH NITAK

TU KAAL SUNG SIM DING: 1John 2: 16, 17; Lk. 14: 26 – 33; 12: 15 – 21; Thkna. 8: 10 – 14; 1Tim. 6: 10; John 15: 5; Gal. 2: 20.


KAMNGAH: “Hih leitung deihna tawh kizui-in na gamta nawn kei unla, na lungsim uh thaksuaksakin na kipumkhel un.” Romans 12: 2.



Eite in leitung tawh kipawl lo dingin hong kihilh hi. Ahi zongin leitung nate deihluatna, hauhnopna in hong zo mahmah hi. A hau, a zawng mi tawmno khat bek in vantung thute kin uh hi. Hau ding, neih le lamh kicing nei ding nasep hahkat cihte hoih mah hi. Ahi zongin na dang kin nawn lo, hauh ding bek, sum bek ngaihsutna in dawimangpa’ thaang ah a awk, leitung deihna zui cihna hi.

Mi tampi in nunna hoih, a kicing nuntakna cihte in sum tungah kinga hi, ci-in ngaihsun uh hi. Satan’ thaang sungah sum hauhna om hi. Leitung hauhna bek ngaihsutna in Satan in a hong do nading vanzat khat hi. Sum deih lo kua om diam? Sum in nuntak khuasakzia nuam tuamsak hi lo hiam? Sum in nopna tampi hong pia thei hi ven, ahi zongin i kitangsap pipen hong pia thei lo hi.


SUNDAY            DEC. 31

LEITUNG’ PASIAN

Sum in leitung pasian hong suak hi. Neihlelamh kidelh hi. Neihsa hauhna in lungmuanna tawmno khat sung hong pia thei mah hi. Ahi zongin lungkimna taktak hong pia thei lo hi. Upna thu, vantung thute sangin neih le lamh nate lunggulh zaw-a, manpha zaw-in ngaihsutna in nate in hong huzaap cihna hi. Nate in manpha mah hi. Ahi zongin tua nate in i nuntak hong huzaap ciangin siatna tun hi. “Sum iplah peuhmah in sum a deihzah nei ngei lo a; hauhna iplah peuhmah a ngahzah tawh a lungkim ngei kei hi.” (Thn. 5:10).

Hih in nate a lunggulh mi’ nunzia hong lak hi. Bangzah in neihsa kicing taleh kicing hi, cih om thei lo hi. Behlap toto, deih tektek lungkim cih om ngei lo ding hi. Thaang sung awk!

1John 2: 16, 17 sim in. A thupi taktak bang hong hilh hiam?

_________________________________________________________________

_________________________________________________________________

Luke 14: 26 – 33 ah Khrih in bang hong hilh hiam? Bang thupi pen ding hiam?

______________________________________________________________

______________________________________________________________

Nate, sum, neih le lamh iplah mite in a tawpkhakna ah a ngah ding uh ngaihsun in: “Mi khatin leitung buppi a neih hangin a hinna taan leh bang phatuam ding ahi hiam?”Mark 8: 36.

“Khrih in leitungah a hong nuntaklai-in mihingte in a sia penpen dinmun ah nungta uh hi. Gamtatsiatna tawh kidim uh hi. Thuman thutak om lo hi. Biakna in zuau tawh kidim hi. Nate iplahna, numei pasal thaangtatna tawh kidim uh hi. Tawntung nunna nunghei-in leitung aa ding bekin nungta uh hi.”
Ellen G. White, Education, 74, 75.

Neih le lamh deih lo kua om hiam? Ahi zongin i kidot ding thu in “ tawmno nei taleng, koi bangin nate in hong huzaap lam kithei ding i hiam? Kua in hong huzaap leh hoih ding a, koi bangin Topa tawh nungta khawm na hihlam kiphawk ding na hiam?

MONDAY            JAN. 1

ANSAL DIMSAK

Luke 12: 15 – 21 sim in. Bang thupuak hong gen hiam? Koi bangin nektawm zong mi khat in tua thuman nuntakpih ding hiam?

_____________________________________________________________________

_____________________________________________________________________


Leitung nate in a hau, a zawng mi khempeuh hong uk thei hi. Mitphiat kalin a mangthang thei nate sangin a kip tawntung nunna deihhuai zaw hi. Kham, ngun, milim mai-ah kunin bia kei taleh mi tampi in lampi tuamtuam tawh tua nate bia uh hi.

Luke 12 sunga gentehna in tuhun aa dingin nate iplahna lauhuai-zia hong hilh hi. Vanzuakte’n in a zuak na tuamtuamte in nopna hong pia ding hi, ci-in zuak uh hi. Mite’n zong tua ding mahin lamen uh ahih manin tua nate a neih mateng hanciam uh hi. Khristiante’ lamet in leitung nate hi lo hi. Tua hi napi mi tampi in leitung nate hong khemna sungah kidiah uh hi.

Thkna. 8: 10 – 14 sim in. Bangci bangin pawlpi mite in a lauhuai leitung nate’ huzaap sung om kha thei hiam?

______________________________________________________________

______________________________________________________________



Eite etteh dingin Lai Siangtho sung pan hi taleh, tulai thu-um mite hi taleh sum, neih le lamh hauhnate hangin Pasian a itna khangin, vantung thute a kin zaw kua om hiam?

TUESDAY    JAN. 2

       LEITUNG NATE HONG ZOLNA

Vanzuakte’n a vanzuakte uh mite deih theih dingin tangko/pulaak uh hi. Sum tampipi bei-in tua bangin tangko uh hi. Leiloh phamawh phialin leinopna lungsim hong guan uh hi. Van kizuak lei-in, vanzuakte omdan danin ki-om nuam hi.Nate hong huzaapna in siatna hong tun thei ahihlam kingaihsun kha lo hi. Kiphawk hi leh huzaap siatna tawh i kipelh thei ding hi. Lungsim hong thei dingin vanzuakte in sem uh a, nate hong huzaap lauhuai-na in guu bangin pelh ding kisam hi.

Matt. 6: 22 – 24 sim in. Ngaihsutna le gamtatna tawh kisai-in mit in bangzah in vanglian hiam? Koi bangin iplahna pan suaktak thei ding i hiam?

________________________________________________________________

________________________________________________________________

Vanzuakte in a vanzuakte uh iplah dingin zuak uh hi. A taktakin a piang thei lo ding hi taleh, mite deihtheih dingin hanciam uh hi. Nate iplahna hangin mi tampi in vantung thute kin lo-in leitung nate bek mitsuan uh hi. Leitung nopsak nading mahin tua nate hong kipia hi, ci uh hi. Tua bangin leitung nopsakna sungah va kidiak nadingin sum tampi kizang hi.

“Kha Siangtho hong sawlna bangin gamta unla, na pumpi uh utna bangin gamta kei un”Gal. 5: 16. Pumpi’ deihna cih ciangin numei le pasal ut bang kituahna bek hi dingin kingaihsun zel a, tua lo a dang bang huam kha hiam?


WEDNESDAY       JAN.3

EI LE EI KI-ITNA

“Pasian in kei tungah hehpihna hong piakkhongna hangin note tungah kong gennop thu in: Note tawh a kituakzah valin kilian ngaihsutzaw kha kei un. Pasian in note tungah upna hong piakzah tawh kizui-in kingaihsun bek zaw unla, a kilawm ciang khat bekin kingaihsun un” Rom. 12: 3.

Pasian in “ Na melhoihna na kisaktheihpih kha a, na minthanna in nang hong haitatsak hi…….. “ Ezek. 28: 17. Lucifer amah le amah kikhem hi. Ama hihna sangin a lian zaw-in kingaihsun hi. A lungsim ah “Sangpenpa bangin ka lian hi” (Isa. 14:14) ci-in ngaihsun in amah le amah a kiliatsakna, Pasian a langpanna pholak hi. Kiliatsakna, thuman lohna cihte in Lucifer’ lungsim pulaak hi. Lucifer’ lungsim puak in mawhna hong kipatkhiatna – huaihamna, deihgawhna, ahihna sangin kiliatsak zawkna cihte kimu thei hi. Hihte sangin a siahuai zaw i gamtat khak a om hiam? Mikim sungah om hi lo hiam? Nebuchadnezzar in amah le amah Pasian bangin kingaihsun hi( Dan. 4: 30). Pharisee-te zong amau le amau kiliansak uh hi (Luke 18: 11, 12). Neihsa hauh manin, kidawp kei leh, kiliatsakna lungsim hong om thei hi.
2Tim. 6:10 sim in. Paul in a lauhuai bang pulaak hiam?

___________________________________________________________________

____________________________________________________________________

Paul in Timothy kiangah sum iplah mite a kipan siatna bawl mite kidop ding pulaak hi (2Tim. 3: 1-5). Sum itna a uangtatna, kihihsakna, kuamah thusim lohna hong nei-sak thei hi. Sum hauhna, neihsa kicinna cihte in mi lakah kihisakna lungsim hong guan thei hi. Neihsa hauhna in midangte sangin kiliatsakna lungsim hong nei-sak thei hi. A hau nuam lo kua om ding hiam? Ahi zongin mikim hau lo hi. Tua hi-in a hau-te kiliatsak ding, kiphatsak ding hamsa lo hi.

Phil. 2:3 sim in. Bang hangin leitung nate iplahna in upna thute tawh kituak lo hi, cih thu koi bangin na tel hiam?

THURSDAY       JAN.  4

                NATE IPLAHNA IN A MAWKNA TAKTAK

Pasian a it mi tampi om hi. Leitung nate in tua bang mite zo lo hi.

Thkna. 7:6; 1Pet. 2:9; John 15:5; Gal. 2:20 sim in. Pasian’ neihsa cih thu in bang a cihnopna hi ding hiam? Pasian’mi na hihna koi ah kimu thei hiam?

______________________________________________________________

___________________________________________________________

“Kei in lenggui kung ka hi hi. Note in a hiang na hi uh hi. Kei lo-in bangmah nasem zo kei ding uh hi” (John 15:5). Hih in Khrih tawh kizopna kician hong hilh hi. “ Thumanna khempeuh in lungsim takpi tawh thuman hi ding hi. Tua in Khrih tawh kopna nuntakna hi. I lungsim ngaihsutna khempeuh, i nuntakna khempeuh in amah tawh pum khat hi dingin i khentat nak leh Khrih in i sungah hong nungta nuam hi. A thupiak i zuih ciangin i deihna hong tangtung ding hi.” Ellen G. White, The Desire of Ages, 668.

Ahi zongin leitung nate deihluatna hong ukcip hi. Leitung hauhna, neihsa-te tawh mihing manphatna ciang tan uh hi. Tua bang a lauhuai-na James in hih bangin pulaak hi: “ Na ngun le na khamte uh kekseu khinta hi. Hih kekseu-na pen note langah teci suak a, mei in a kattum bangin na sa uh hong netum ding hi. Hih a hun nunung ciangin tu-a bangin a piang dingin neihsa a khol na hi uh hi” (5: 3). Nate kaikawmin a khol mite’n tua nate hangin nuntakna manpha-in ngaihsut uh hi (Lk. 12: 19 – 21).

Mi tampi in neihsa kicingin hauhnate nuntakna bulpi dingin ngaihsun uh hi. Amau pasian in neih le lamh, hauhna hi (Matt. 6: 19 – 21). “Bang mah ka neih kei leh ka mihing hihna om kei” ci-in a ngaihsun om hi. Tua bangin a ngaihsun mi hehpih huai-pha mahmah hi. Khristian kici napi mitphial sung a mangthang thei nate, nilim bangin a bei thei nate siksan lianbelin a nei-te hehpih huai hi. Pasian thupi pen in koih ding maw, nate koih zaw ding? Khat teitei na tel kul hi.

Na neih nate tungah na nuntakna bang zah kinga hiam?

FRIDAY  JAN. 5

NGAIHSUTBEH DING: “Satan in kimanna nei lo nate tawh hong zo hi.

“Nang le nang in bang mah lo nate aa dingin na nungta hi.” Satan in leitung nopsakna, sum, gualnopna tawh na nuntakna hong lei hi. Satan in man kiseh thei lo Khrih’ sisan in hong lei-sa nunna leitung nate tawh susia hi.” Ellen G. White, 5T., 133.

Satan in leitung nate tawh na nunna hong lei ding mungtup nei den hi.

Satan hong thaangsiahnate a deihhuai tawh kibang hi. Nate’ huzaap in kuamah deidan lo hi. A hau, a zawng mi khempeuh tungah leitung nate in gualnopna, lungdamna hong pia thei mah hi. Ahi zongin neihsa hauhnate in “bang kisam lai hiam? kisap bang mah nei keng. Bang lunghimawh ding om hiam? cih lungsim guan thei hi. Tua hi’n leitung nate’n lungsim ngaihsutna susia thei hi; Pasian muan zawk ding sangin nate muangsak zaw hi. Ahi zongin Vanglian Pa Pasian in hatna, vangliatna tawh hi lo, keima Kha Siangtho’ tha bek tawh na zo zo ding uh hi” ci’n hong kamciam hi (Zech. 4:6).

Kha Siangtho in a hong makaih dingin Pasian’ hehpihna tawh lungsim a khentat mite in leitung nate iplah lo uh hi.

KIKUP DING DOTNATE

1.  Bang mah nei kei taleng leitung nate tungah kinga kha thei zel i hiam?

2.  Mi kimkhat in ‘sum tawh buai keng, sum i cih in bang mah hi kei’ ci uh hi. Tua bang a gente pen sumhaute hi diak hi. A taktakin tua bang ngaihsutna manlo hiam? Sum pen thupi hi. Nuntak nading na tampi sem thei hi. A thupi-in ah “ koi bangin Lai Siangtho tawh kituakin sum tungah lungsim puak nei ding kisam hiam?

3.  “Nget in a nek theih lohna, a kekseu theih lohna, gutate in luhin a guk theih lohna mun vantungah note aa dingin khol zaw un.

Bang hang hiam cihleh na sum omna uhah na lungsim uh om tawntung ding hi” Matt. 6: 19-21. Khrih in bang hong hilh hiam? Koi bangin leitung nate iplah lo-in om ding na hiam?



To get the latest update of me and my works

>> <<