Jan. 6
Kawm Nei Lo Biakinn
Puerto Rico gam pan
Thupuak: Raquel Marrero Torres, kum 52
Puerto Rican mun khatah pawlpi mite kimkhat Sabbath ni khat zingtung nai 5 pawlin biakinnah thungen, Lai Siangtho a sim khit uhteh zing an ne uh hi. Tua bangin nuamsa-in a om laitak uh inn nei lo, nek ding nei lo mi kim khatin mu hi. Amau lamet bang lo-in tua a kipan kaal simin inn nei lo, annek ding nei lote omna-ah pai-in biakpiakna nei uh hi. Ni kum Easter Sunday ni khat pastor in nekkhawm nekpih hi.
College sangpi khatah math laihilh kum 52 a pha Raquel Marreo Torres in “Tua biakpiakna mun pen kawm nei lo biakinn,” ci-in ka min vawh uh hi, ci-in pulaak hi. Hih bangin kawm nei lo biakpiaknate tungtawnin Puerto Rico gama mi tampi tungah Jesuh itna kitangko thei hi. Hih Puerto Rico in Caribbean tuikhulh hi taleh US tawh tai 100 val bang kigamgi uh hi. Pawlpi kimkhatte in biakinn huang sungah inn nei lo anvak zel uh hi. Tua banah khua sung mite’ inn haihsiangsak zel uh hi.
Raquel le a pawlpi mite’n Mayaguez paakhuan khatah kha khatin khat vei bang biakpiakna nei zel uh hi. Puerto Rico gamah Antillean Adventist University khat om hi. 2012 kumin khat vei khuapi laizang mun khatah Sabbath biakpiakna kinei hi. Anne-in tua bangin a kikhop ngeingai uh ciangin inn nei lo hon khat zong va kihel kha uh hi. Tua a kipan Sabbath nisialin inn nei lote anvakna nei toto uh hi.
Kum 50 a pha nasep nei mi khat in anhuan semin Sabbath nisialin nek ding neilote anvak hi. Raquel in ama hih pa kiangah an bek piak ding lungkim huai kei, Pasian thu zong a zak ding uh kisam hi, ci-in ngaihsun uh hi. Tua bangin Raquel tawh kithuahin Pasian thuhilh uh hi. Sabbath zingtungin tua bangin mi hong pai 35 bang val thei hi. 2017 a kipan mi 65 – 70 kipha thei zel hi. Zingsang nai 7 bangin Pasian thungai dingin mite hong pai ta uh hi. Hong kikhawm mite muak, hopihin, Pastor in minute 20 sung bang thugenna nei hi. Tua hong kikhawm mite’n Lai Siangtho sinna (Discover Bible) nei uh a, mi 40 valin zo uh hi.
Zingsang nai 8 bangin an kipia ahih hangin thungai dingin nai 7 bangin mi tungkhin hi. Innnei lo, nek ding nei lote an pia masa photin, tua khitteh Pasian thugenna kinei hi. Hong pai mite’n thu kigente zaknopsa-in, lasaknate zong kihelin biakpiak nuamsa thei mahmah uh hi. A masa lama hong pai mi pawl khat nungta nawn lo uh hi. Khat le khat kimeltheihna, kizopna kip semsem ahih manin innkuan khat bangin nungta uh hi. Tua mite’n Raquel phone nambat kem uh a, thunget sak ding a deih hun hunun, hopih, sam thei uh hi.
Tua hong kikhawm mi kimkhat in khua sungah inn nei zo zong om uh hi. Pawlpi mite khat khit khat kikhelin nek ding nei lo mite anvak uh hi. Inn nei lote samin hoih tak puah uh hi. Pawl sung nupi khat ii nasepna company in haza, ha-nawtna cihte a kipan van zat kisam khempeuh pia khia hi. Nute Ni, Pate Ni hong tunteh inn nei lo a om nupi pate zong letsong pia uh hi.
Easter pawi bawlna khatah pastor in tua hong kikhawm mite nekkhawm pia ding kithawi uh a, nekkhawm nekma-in khat le khat khe kisilsak uh hi. Tua bangin khe kisilsak uhteh khitui luang ciat uh hi.
Raquel in “ tua bangin mite khe ka sil ciangin Pasian in amaute’ mawhna maisak hi,” ci-in ka thei hi, ci-in pulaak hi. Tua mite in cikmah hunin hih bang thei kha ngei lo uh hi. Tua munah mi tampi kituiphum uh hi. Kha Siangtho in na lianpi sem hi, cih kimu hi. Thuman khaici kituh khang semsem ding hi, ci-in makaite’n upna nei hi.
Tu quarter 13 Sabbath School sumpi in Antillean Adventist University ah kipuak ding hi.
MUC SDA conference in Pinlong biakinn lam nadingin kipuak ding hi.
Puerto Rican gamah mi 3415000 val bang om hi. Puerto Rican Union Conference sungah pawlpi 310 om a, SDA member 32,875 om hi. Gammi 104 ciangin SDA thu-um mi khat om cihna hi.
