Jan. 20
Britain’
Kumpi Nu le Vantung’ Kumpi Pa Belize Leticia August, Kum 60
Leticia in a mangngilh ngei loh nop a sak mahmah khat in a nu in
Guatemala-a om a pi tawh om dingin a khualzinna uh hi. Leticia’ nu le pa in
Sunday thu-um hi-in, gamtat hoih ding cih kithuhilhte zak thadahsa hi. Belize
khua-ah gualnopna bek zui-in lamna club cihte ah a hun beisak hi. Ahi zongin a
lungsim ah a nuntakna bei leh bang suak ding cih pen lunghimawh tawntung hi.
Ni khat Adventist thu-um nupa khat Letica-te innah vahawh uh hi. Hih
Adventist nupa-te in Letica’ pa neu, Lai Siangtho sinpih uh a, Letica in a
thusin thute uh thukimpih lo hi. Lai Siangtho sungah tua bang thu om kei, ci-in
nial ding sawm hi. Tua lai hunin Letica in kum 17 pha pan hi.
Adventist nupa-te in kamtuam pau tawh kisai Sawltakte Tangthu sunga
thute pulaak uh hi. Sawltakte’n amau pau tawh thuhilhin, thungai mite’n amau
pau ciat tawh za uh hi. Letica in kamtuam ciang cih ciangin kuama theihloh,
kuama telloh kampau dingin ngaihsun hi. A sawtteh Letica in tua Adventist
nupa-te tawh hong kimu uh hi. Nupa-te kiangah “na hilh thute man lo hi. Lai
Siangtho sungah tua bang thu om lo hi, ci-in nial hi. Tua bangin khat le khat
thu kikupna panin Letica in Lai Siangtho sinna hong nei hi. Lai Siangtho sinna
a neih khitteh Lai Siangtho thuman hong telmuh zaw ahih manin SDA pawlpi sungah
kituiphum ding hong khensat hi.
Ahi zongin Letica in SDA a suah ding a theih uhteh SDA na suah peuhleh
inn panin pai khia ding ci-in SDA a suah ding phal lo uh hi. Bang hang hiam
cihleh SDA pen Khristian taktakin ngaihsun zo lo uh hi. Letica in kituiphum
ding hamsatna hong tuakta hi. A kituiphum ni ding hong tung ta hi. Ahi zongin
Letica kimu lo hi. Kituiphum ding nungkikin, a lawmte tawh khua sungah vakin
gualnuam uh hi.
Ahi zongin Pasian in Letica nusia lo-in pastor in va mu-in kituiphum
ding khensat veve hi. A innkuanpihte in annek khawngah voksa koihsak zel uh hi.
Inn ah an limtak ne thei lo hi. Sabbath ni ciangin pawlpi mite kiangah va
hawhin pawlpi mite’n an a piak uh leh an ne pan hi. Letica in SDA sungah
kituiphum manin hamsatna tampi phukha ahih manin amah bangin SDA hong suakte
tungah hehpihna nei hi.
A sawl lo-in Letica in a nu omna Guatemala-ah hong ciah kik hi. A nu kiangah
a va ciah ciangin tangval khat tawh hong kithei uh a, hong kiteng uh hi. Letica
in nurse sinin Pasian’ nasem hi. Tua bangin a hih theih bang bangun Pasian
nasem uh a, tu-in a nupa-un nasepna hangin mi 1000 val bang kituiphum khin hi.
A pasal in nusia khin hi mah taleh Letica in kum 60 bang pha khin ahih
hangin cidamin hat mahmah lai hi. Kimlepaam nasepnate-ah zong kihel hi. 2016
kumin England kumpi nu Queen Elizabeth II in pahtawi-na a piakte lakah Letica
zong kihel hi. Mi khat in ka min na pia hi ding hi. Leitung pahtawi-na ngahin
ka lungdamna sangin Pasian in kei-ma minthanna hi, a cih ding hangin ka
lungdamna lian zaw hi. Ni khat ni ciangin Pa Pasian in a citak ka nasem, hong
cih kaal ding ka ngaklah hi. Pasian in kei aa dingin nasem tawntung hi, cih ka
phawk hi. Amah ka phawk theih nadingin kum 43 sung sawt hi. Tu-in Topa’ hong
itna ka tel zaw semsem hi.
Tu quarter 13 Sabbath School sumpi in Belize ah kipuak ding hi. MUC in
Pinlong pawlpi puak ding hi.
