MUC

Print Friendly and PDF

Saturday, December 30, 2017

Jan 13, 2018 (Pheituam Puan Eng)



January 13

Pheituam Puan Eng

Keryt Torres Castellano

Kum 39

Ka pa pen SDA innkuan sung panin khangkhia hi. Ahi zongin kikhopna biakinnah jean bombi tawh a va kikhop leh pawlpi mite’n jean bombi tawh kikhop hoih lo hi, ci-in a gen manun tua a kipan SDA pawlpi nusia hi. Tua hunin ka pa pen kum 19 pha khin hi. Tua lai-in ka nu tawh kiteng nai lo uh a, ka nu pen Sunday Nipi zui hi. Mite’n ka nu le ka pa nungak tangval lai vua, a puansilh nikteente uh gensiatna hangin ka nu le pa kikhawm nawn lo uh hi.

Palik ulian inn sung pan a khangkhia ka hi hi. Ka pa pen thagol mahmah khat hi-in, amah le amah superman tawh kigenteh zel hi. Ka pa in kitot, zatep, zudawn cihte nuamsa hi. Ka pa in kei le ka nau kiangah bang hong gen hiam cihleh a tha hatte bek gual tungtuang ding hi. No zong na hat uh kul ding hi, hong ci hi.

Kum hong pai toto-in ka nu le ka pa hong kikhen uh hi. Ka pa kum 45 a phakin natna lianpi nei-in zato lum hi. Siavuante’n ka pa gilzang khempeuh kisia khin hi, ci-in pulaak uh hi. Siavuante’n ka pa sunglam hoihna khempeuh atkhiatsak uh hi. Ka pa ngoi pi 9 val ding bang lakkhiatsak uh hi.

Tua bangin ki-at khitteh ka pa in nak haksa hi. Ka pa in a beisa huna a gitlohna, ut bangin a gamtatna khempeuh kisik hi. A mailam hun ding a ngaihsut ciangin a lungkham hi. Jesuh’ sapna a nial detnate tu-in kisik hi. Tua bangin lungkia-in a om laitakin ka pa in vantung lampanin khut nihin lawngsukin, “lungkham kei in. Ka khut sungah na om hi,” ci-in hopihna aw khat ka pa in za hi. Tua aw a zak leh ka pa in tha khat in a tha dim kikin, hoih tak hong nak kik thei hi.

Zata tuak khitteh ka pa in biakinn pai tangh tangh hi. Ahi zongin ko a tate hong lunghimawh den hi. Ka pa in a thungetna-ah “ Topa aw, ka nuntakna nong hon hi. Ahi zongin ka ta nihte in hotkhiatna a ngah diam? ci-in thungen hi. Tua bangin ka pa in a thungetin kum 27 bang ka pha ta hi. Mawtaw ka hawl a, zu dawn, zatep cih tawh nuam ka sa hi. Ka sanggampa in dawi bia hi. Puan vom bek silhin, a khut, a lei cihte ah lim tuamtuam suai zia zua hi. A maim un 32 ah lim kisuai hi. A lupna khaan sung khempeuh a vom bekbek zut a, leitung gualnopna la bek ngai hi.

Ka pa in Lai Siangtho sihpihna hong neihpih zel hi. Ahi zongin ko ka lunglut het kei uh hi. Jesuh thu up ding ka nial uhteh ka pa pen heh semsem hi. Ni khat ka pa in “nang hong langbawlte ka langbawl ding a, na tate ka honkhia ding hi” Isaiah 49: 25 hong sim hi. Ka pa in ka unau-un Pasian’ khut sungah hong ap hi. Pasian cih ka thei kei uh hi. Ka pa’ thungette zong bang hiam cih ka thei kei uh hi. Ahi zongin a sawt lo-in kilamdanna khat ka mu hi. Friday ni khat ka lawmte khat tawh ka kimu uh a, khua sungah kawi kawi-in zu dawnin ka gualnuam mahmah uh hi.

Monday niteh inn ka ciah pan hi. Ka nunzia tawh ka lungkim zo kei hi. Ka nuntakna-ah a kisam khat om hi, cih ka phawk hi. Zingsang 11 hunin thu ka ngen hi. “Topa aw, ka nuntakna-ah a kisam khat om hi. Lamdungah ka nuntakna bei lel ding maw, ahih kei leh numei gina lote tawh kikhawlin natna hoih lo ngahin ka nuntakna bei sak ding ka hiam, hong hilh in,” ci-in thu ka ngen hi.
Bangci bangin Jesuh in ka nunna hong khel cih ka thei kei hi. A zingsang ciangin ka om dan khat hong nuam mahmah a, lungnopna khat ka ngah hi. Zatep nuam nawn lo, zu dawn nuam nawn lo, leitung gualnopna kici khempeuh ka taisan hi. Tua bangin ka om zawh kum 10 khitteh Adventist pastor khatin na ka sem hi. Ka zi zong Adventist thu-um mi khat hi-in, tu-in ta 5 ka nei uh hi. Ka sanggam pa in Boston khuapi-a om SDA pawlpi-ah nasem hi. 2012 kumin ka nu zong keima tuiphumna tawh SDA hong suak hi.

Ka pa in zi dang khat nei a, SDA sungah om lai hi. Ka pa tawh ka neulai hun khawng uh ka gen zel uh a, nuihzakna tampi ka phawk kik uh hi. Tua hun lai-in pa-ta zu dawn khawm ka hih uh hangun, tu-in tapa-in ka kikhawm khawm uh hi. Jesuh in ko innkuan sung hong khel ahih leh note zong hong khel thei hi.

Kermyt Torres in pastor a sep zawh kum 7 val khin hi. Tu-in Antillena Adventist University ah MA sinin sangkah hi.

Christopher Columbus in 1493 kumin Puerto Rico gam a muhkhiat hi-in, tua zawh kum khat khitteh America gam mukhia hi. Columbus in Tuiphum John min siksanin Puerto Rico gam pen San Juan Bautista ci-in minphuah hi.


Tu quarter 13 Sabbath School sumpi in Puerto Rico gamah kipuak ding a, MUC in Pinlong biakinn aa dingin kipuak ding hi.

To get the latest update of me and my works

>> <<