Feb. 3
Mercedes
Ruiz, kum 54
Mercedes Ruiz in kitaklah den hi. Kaal khat in ni 6 Radission hotel ah
anhuan makaipi sem hi. A an huante uh America vanleng tuang mite nek dingin
kipuak hi. Biakinn mun tuamtuamah pai-in kikhawm kawikawi hi.
Mercedes in Mayan minam hi-in Pasian a lunggulh den numei khat hi. A
kikhop zawh kha 3 bang cingkhin a, ahi zongin a nuntakna-ah kisam khat a om lam
phawk tawntung hi. Lai Siangtho sim kipanin a zaw diakin Daniel limtak sim hi.
Daniel nunzia panin tampi tha ngah hi. “Daniel in Pasian aa dingin nungta thei
ahih kei leh, kei zong ka nungta thei ding hi, ci-in khensat hi. Mercedes in
antangin thungen hi.
Nisim in Daniel thunget bangin Mercedes in zong thungen hi. “Topa aw,
kong ngetna hong za in; Topa aw, hong maisak in! Topa aw, hong za inla hong sem
in! Ka Pasian aw, na khuapi le na mite in nangma Min pua ahih manin nangmah na
kikhualna- in hong ziakai kei in,” ci-in Daniel mah bangin Mercedes in zong
thungen hi.
Sunday nitak khat kikhop khit ciangin Mercedes in lampi-ah laidal khia
honkhat mu hi. Bang lai hi peuh mah ding hiam ci-in tua laidalte hong sim hi.
SDA-te thugenna om ding a, tua thugenna-ah hong pai un, cih sapna lai hi. Amah
zong tua thugenna-ah va pai hi. Nitak khat zong pelh lo-in thungai-in kikhawm
hi.
Sabbath ni ciangin a nasepna panin tawlnga-in biakinn ah va kikhawm hi.
Pastor in kituiphum nuam a om hiam, ci-in a pulaak ciangin Mercedes zong
kituiphum dingin a min pia hi. A nasepna nu in tua bangin kituiphum ding a zak
ciangin Mercedes tungah heh hi. Sabbath ni tawlnga thei lo ding ci-in pulaak
hi. A nasepna nu in mi that hi lo, guta lah hi lo, kituiphum kul lo hi. SDA
suah kul lo hi, ci-in khaam hi. Ahi zongin Mercedes in Sabbath ni pen Topa biak
ni ding hi, ci-in a upna pulaak hi. A nasepna nu’ phalna om ta kei leh Mercedes
in a nasepna pan khawl ding ngaihsun hi. Sabbath ni-in nasepna pan tawlnga thei
kei leh, Topa tawh kinai-na om thei lo ding hi, ci-in ngaihsun hi. Mercedes in
a nasepna pan khawl dingin khawlna lai pia hi. Nasepna pute’n tua lai a muhteh
niinbung ah paihsak hi. Nasep khawl lo ding, Saturday ni, tawlngak hong pia
ding hi ung, ci-in dawng kik uh hi. Tua banah kha sum zong khangsak dingin gen
hi.
Nasepna aa makai pa in Mercedes in Saturday ni nasep kuan lo ci-in a
nidangten nasep tam zaw pia hi. A nasep a zawh nadingin Mercedes in thungen hi.
Ni khat a nasepna panin a makai pa uh a khualzinna-ah mi gilote’n suamlumin si
hi, cih thu za hi. Tua kipan Mercedes nasepna-ah bang mah nawngkai-na om nawn
lo hi.
Tua bangin nuamtakin nasem thei hi mah taleh Mercedes’ pasal hong si hi.
A pasal nusiat khitteh Mercedes in a tate tawh mundang khatah kituah uh hi.
Mercedes in ki-ap mahmah hi. Pastor kiangah Lai Siangtho sinna zong hong nei
hi. Tua bangin Mercedes in Lai Siangtho sinte midangte kiangah zong va hilh
zelzel hi. A inn mai munkhat sap-in sabuai, tutphah cihte koih a, Lai Siangtho
thusinna-in zang hi. Friday nitak ciangin kikhawm ding mi honkhat va kaikhawm
hi. Pastor in kikhawm ding mihon a muh ciangin lamdangsa mahmah hi.
Mercedes omna khua-ah SDA thu-um mi om nawn lo hi. Ama inn ah kikhawmin
Sabbath simin biakpiakna nei uh hi. Lai Siangtho thusin mi hong kibehlap hi.
Tu-in kituiphum khin mi 16 pha hi. Kum khat khitteh Mercedes hanciamna tawh
biakinn khat ding zo hi. A mipih Mayan mi tampi in SDA thuman thei nai lo ahih
manun tuate tungah thugen ding lunggulh den hi. Tua dingin Global Mission
nasepna-ah Mercedes zong kihel hi. Tu-in Belize’ khuapi Belmopan-ah pawlpi
makai hi.
