FEB 10
Nupi Nu’
A Thunget Ngah Belize gam pan
Olga
Chee, kum 39 Johnny Chee, kum 70
Olga Chee in a pasal Johnny kiangah SDA biakinn-ah kikhawm dingin a zol
masak penin a pasal in SDA biakinn simloh mundang biakinnte-ah kikhawm ning,
ci-in dawng kik hi. Johnny in SDA pawlpi pen Lai Siangtho thuman zui lo-in
biakna man taktak hi lo ( cult) bangin ngaihsun hi. Kaal nih khitteh Olga Chee
in a pasal kiangah SDA biakinn ah kikhawm ding a zol kikta leh a pasal in nial
teitei hi.
Mi 15000 val bang a teenna Orange Walk khua-ah Olga Chee le a pasal
Johnny-te nupa zong teeng uh a, kikhop nading biakinn khat zong zong uh hi.
Johnny in biakna kin mahmah lo hi. Ahi zongin a zi Olga Chee in zol teitei-in
tua bangin biakinn khatah kikhawm uh hi. Sunday nisial-in tua bangin kikhawm
den uh hi mah taleh lungkimna ngah ngei lo uh hi. I kikhop khop hangin i nunzia
bang mah kilamdanna om kei, ci-in a pasal kikhop thadah hi. A lawm a gualte
gensia, a pasal in zu dawn,tua bang teng tawh Olga Chee a lungnuam thei lo hi.
Amau omna inn nungah Adventist thu-um innkuan khat om hi. Adventist nupi
nu in Olga Chee tawh kiho thei zelzel uh hi. Tua banah thungen khawm zel uh hi.
Tua Adventist thu-um nupi nu’ innah hawh dingin Olga Chee sam zel hi. Olga Chee
le a thumte zong va hawh zel banah SDA biakinn ah va kikhawm zel uh hi. Olga
Chee in kikhawm dingin a pasal zong zawn lel a, a pasal in zong va zui thei zel
hi. Tua bang teng tawh kum 5 bang hong cing hi. Olga Chee le Johnny in
lungkimna nei thei lo uh hi. A nuntakna uah a kisam khat om lai hi, cih kiphawk
uh hi. Lungkimna ngah dingin thungen uh hi.
Tawl khat khitteh pizza ( nek theih namkhat) nasep nei khat hong hawh
hi. Hih nasepna-ah nasem dingin tua pa in Johnny hong zawn hi. Topa’deih na hi
ding hiam ci-in Johnny in thungen hi. Hih pizza nasepna-ah nasem ding Topa’ awi
ahih leh a lamdangin Pasian in lamlah ding ngen hi. Pizza nasepna-ah a pai
dingteh inn panin bang mah pua khia lo dingin khensat hi. Kha khat khitteh hong
kituah khia uh hi. A zi kiangah bang mah puak lo ding, hi ci bangin pai ding hi
hang, ci-in a innkuanun hong pai khia uh hi.
A nasep nading mun uh hong tun uhteh biakinn ah hong mu kha uh hi.
Biakinn mai-ah Lai Siangtho kigelhin Olga lungsim hong la hi. “ Tuni-in Topa’
aw na zak leh na lungsim khuahsak kei in” (Hebrews 3: 15). Olga in hih Lai
Siangtho mun kha 6 sung bang mu den hi. Johnny in a nasepna pan inn hong tunteh
a innkuanun Orange Walk ah hong kituah kik uh a, bang mah kilamdanna nei lo uh
hi. Zingsang khat Olga in radio a hon leh Adventist thugensiam Doug Batchelor
in Sabbath thu tawh kisai a gen va ngai kha hi. Tua in Olga lungsim sukha lian
hi. “ Tu ni-in a aw na zak leh na lungsim khuah sak kei in” cih Lai Siangtho a
lungsimah hong suakkhia-lian hi. Olga in a pasal Johnny kiangah Sabbath thu
bang ci muh na hiam? ci-in hong dong hi. A pasal in nakpi-in takin tua Sabbath
thu peuh mah hong gen kha kei in. Sabbath cih pen Wednesday ni zong hi thei,
Friday ni khat zong hi thei, ni khat peuh peuh hi thei lel hi, ci-in dawng hi.
Olga in nupa kitot nading hi mawk leh hih thu pen Pasian kiang pan hong pai thu
hi lo ding hi, ci-in ngaihsun hi.
Tua ni-in Olga in anhuan kawmin anbuk ah khukdinin thungen hi. “ Topa
aw, Sabbath thuman zui dingin nong deih ahih leh ka pa in zong Sabbath hong
zuih zawh nading, nangmah in innkuan na bawl a, innkuan kikhen ding na deih kei
hi, ci-in thungen hi.
Tua zanin Olga in zan 9 teh lumna zuan hi. Zingsang 1 kim pawlin zun tha
dingin a pai khiat leh Johnny in Lai Siangtho na sim hi. Johnn in zon khat nei
ahih lam thei-in Olga in bang mah pau lo-in lumkik hi. Zingsang ciangin Olga
nasep a pai ma-in a pasal in Sabbath ni-in nasep khawl-in Pasian bia ding cih
pen tu-in ka tel hi. Pasian in Sabbath thuman sungah nungta dingin hong deih
hi, ci-in a zi kiangah hong pulaak hi.
Olga in tua bangin a pasal in a pulaakteh lamdangsa hi. A pasal Johnny
in bangci bangin Sabbath thuman um thei hiam, ci-in Olga in dong hi. Johnny in
a zi Olga lupkhitteh TV a et leh tua Doug Batchelor in Sabbath thuman tawh
kisai a thugen ngai kha-in tua panin Sabbath thuman zuih dingin khensat ahihlam
a zi kiangah hong gen hi. Tua a kipan Johnn le Olga in SDA upna sungah om uh
hi.
Tu quarter 13 Sabbath School sumpi in Belize ah kipuak ding hi. MUC in
Pinlong pawlpi puak ding hi.
