OCT. 14
Kimekna pan Hotkhiatna thugenna (Nikolai, 20)
Kum 20 a pha, Adventist khangno
khat Nikolai in Christian kilangpan mahmahna, Muslim biakna zui mi tamna khua
khat ah mi cimek khangno khat hi. Adventist zato mun khat panin cimek dan a sin
khitteh facebook le mun tuamtuam ah cimek dingin tangko kawikawi hi.
Huhna Kisam Nupi Khat
A sawt lo-in nupi khat in a tapa
mek dingin Nikolai hong sam hi. Nikolai zong tua nu kiangah va pai hi. A tapa a
muh takteh ama bawl theihnam ding hi lo ahih manin, tua nu kiangah “ kei pen
nasem kipancil ka hih manin hih bang natnate bawl thei nai lo hing,” ci-in gen
hi. Ahi zongin tua nu in bang leh bang leh, na siamzahin hong bawlsak in.
Kuamah in ka tapa bawl zo lo hi, ci-in pulaak hi.
Nikolai in na tapa pen bawl zo lo
ding hing, ci taleh tua nu in hi lo hi. Hehpihna tawh hong bawlsak in. Nang bek
mah kong muan hi, ci-in kun teitei hi.
Thungen Ni
Nikolai in zong
hehpihhuai-sa ahih manin, tua nu kiangah, “ Kei pen Khristian biakna zui hing.
Ka Pasian kiang pan ka tapa ka bawlzia
ding ka nget kul hi. Ka cimek masialin thu ka nget kul ding hi,” ci-in pulaak
hi. Tua leh tua nu in zong thunget ding phamawhsa lo hi.
Nikolai in tua nu kiangah thum vei a pai-na ah inntekpa tawh kimu thei
hi. Nikolai in cimek ding sialin thunget phot ahih manin, inntekpa in a thunget
lamdangsa hi. Inntekpa in kumpi nasem ulian khat hi sawnsawn hi. Ahi zongin
Nikolai in a cih nading dang thei lo hi. Cimekdan le cimekma-in bang hangin
thungen cihte pulaak hi. Hih naupangno a mek dingin siamna a neihlohlam, a
cimek kipancil ahihlam inntekpa kiangah zong pulaak hi.
Tua bangin Nikolai in a genciangin inntekpa zong lungkim mahmah hi.
Nikolai in cimek zom suak dingin inntekpa in gen hi. Ni khat a cimek laitak,
phone hong pai-in inntekpa manlangtakin a va pai khiat kul ahih manin, a pai
khiatma-in Nikolai in, inntekpa aa ding thungetsak hi. Thunget khitteh inntekpa
zong paikhia pah vingveng hi.
Lametloh
minphatna ngah
Tua bang kimekna panin naupang in damsiang ahih loh hangin, tampi
nuamtuam hi. Nidangin a hih theihlohte tu-in hong hih thei-ta hi. Inntekpa zong
nuam lua ahih manin a naseppih a lawmte kiangah a tapa noptuamzia gen hi. Tua
bangin Nikolai in mi tampi theih cimeksiampa hong suak hi. Kumpi nasem ulian
tampi tawh zong hong kithei uh hi. Nikolai in “Khrih Jesuh hangin na khempeuh
ka hih thei hi (Phil. 4:13) siksanin teci pang hi.
Nikolai bangin na nasem thei kei zongin Pasian aa dingin na khat
peuhpeuh, thungetna beek ahi zongin nasem thei hi. Pasian hong makaih ding
kisam hi. Tua dingin thungen in.
Tu quarter 13 Sabbath School sumpi in Euro-Asia Division sunga om
Afghanistan, Kazakhstan, Kyrgyzstan, Tajikistan, Turkmenistan, Uzbekkistan
gamte ah kipuak ding hi. Hih gamte sungah mi 103000000 val om ding hi. Tua
lakah Adventist thu-um mi 4200 val bek om hi. Mi 24,500 ciangin Adventist
thu-um mi khat cihna hi. Nasep nading tampi om lai cihna hi.
