NOV. 4
ZATO PANIN NA LAMDANG THUMTE (Natalya Grigiryeva, 57)
Kum 19 ka phakin tui ka kiphum hi.
Ahi zongin kha 6 khitteh SDA pawlpi ka nusia hi. Kum 33 val bang SDA pawlpi ka
nusia hi. Ahi zongin ka innkuan sung uah na lamdang thumte hangin biakinn ka zuan
kik hi.
Na lamdang masa
Sanggam numei 4 ka nei a, Olga in
SDA thu-um mi khat hi. Sunglam dam lohna hangin thum vei ki-at khin hi. Khat
vei ki-at kik kul ding hi, ci-in siavuante’n a genteh ka sanggam nu in thungen
ding hong sawl hi. Li vei ki-at ding hi mawk aiteh, amah zong lau hi. Xray
ki-etsak teh a sunglam ah cancer natna dan khat kimu hi. Kei zong ka sanggamnu
aa dingin khukdinin thu ka ngetsak hi. Tua bangin nidangin a ki-at dingteh
zatep lo, zu dawn lo, sa siang lote ne lo hi. Ki-at ni ding hong tungta, Olga
in siavuante’n bang mah hong at kei uh, innlam ciah ding ci’n pulaak hi. Bang
hangin siavuante’n at ding a cih uh hong at lo uh hiam, ci’n ka dong hi. Xray
nihvei hong la uh, a nihin bangmah om kei hong ci uh hi, ci’n Olga in dawng kik
hi. Cancer natna damna hong pia Pasian min ka phat uh hi.
Sabbath hong tungin ka sep ngei
bsdangin nasem dingin ka kuan khia hi. Ahi zongin ka lungsim ah Pasian in ka
sanggam nu cancer natna pan damna hong pia-in Pasian’ thu mang lo-in ka gamtat
pen hoih lo hi, cih ngaihsutna ka nei hi. Ka nasepna mun pan innlam zuanin ka
ciah a, kikhawm dingin biakinn ka zuan hi.
Na lamdang nihna
Olga cancer natna pan a dam zawh
kum 4 hong cingkhin hi. 2015 kum ciangin ka nu in lungtang natna hong nei a,
zata ka zuan uh hi. A kim a omte’n cihna ding ka thei kei uh hi. Ka nu uh dam
nadingin thu ka ngen uh hi. Noptuam lo ahih manin zato pan tuakin inn ka zuan
kik hi.
Ni khat ka nu a
lupna pan hong tho khia-in lam hong pai hi.A tu nu kum 9 khawng khat in
lamdangsa-in hong awnggawp hi. Topa’min ka phat uh hi. Tua leh 2016 kum ciangin
ka pa kum 79 pha khin hi-in, cycle tuangin a vakna pan mawtaw khat in nawk kha hi. Zato ka zuan uh hi. Ka pa in Pasian om kei,
ci-in, ka nu in SDA sungah tui a kiphum a kipan ka nu le ka pa kikhen uh hi. A
kiten kikun kei pen kum 13 ka pha hi. Ka pa kiangah biakinn ah kikhawm ding,
ci-in ka genteh ka pa in hong hopih vet lo hi. Tua bangin a hehteh biakna tawh
kisai laibu, CD cihte inn sung pan piakhia mang hi. Ka pa in mawtaw tuahsiatma
kaal nih ma-in, ka Lai Siangtho piak balkek gawm hi.
Na Lamdang Thumna
Ka pa in mawtaw tuahsiatna hangin khua-phawk lo-in zato lum cih ka zak
uh hangin ka omna uh pan gamla lua ahih manin ka pai zo kei uh hi. Ka sanggamnu
Olga le ka nu zato lum cih ka zak uh a kipan amau aa ding thu ka ngen uh hi. Ka
pa’ cinatna hangin nakpi-in thu ka ngen uh hi. A diakdiakin Pasian thu-um mi
khat a hong suah nading mah ka lunggulh uh hi. Zato tunzawh ni 3 khitteh ka pa
in khuaphawk-in koi ah om ka hiam, ci’n a kuama peuh dong hi. Bang hangin zato
tung ka hiam, cih zong kitel lo hi. A phawk zawh nai 3 khitteh ka pa’n hong
nusia hi. Tua a khua-phawk kik hun sung teng ka pa in bangteng ngaihsun cih pen
Pasian bek in thei ding hi. Bang bang ahi zong ka pa in a hong nusiat kuan
ciangin amah le amah kitelin mawhmai ding ngen hi. Tua bangteng ka tuahkhak
khitteh Pasian tawh ka kinai zaw hi. Pasian in a mite’ thungetna hong dawng
takpi hi, cih ka tel pha kikkik hi.
Thunget ding kisam hi.Na innkuanpihte aa ding, naupangte aa ding, nu le
pa aa ding banah veng le paam mite aa dingin thunget ding kisam hi. Pasian’
mite thungetna Topa in hong dawng hi.
Tu quarter 13 Sabbath School Sumpi in Rostov-on-Don khua-a khuasung
khantoh nading hall khat lamh nadingin kizang ding hi.
MUC SDA conference in Kimlai biakinn puah nadingin kipuak ding hi.
