NOV. 25
Bawlung tungtawnin Khangnote lakah Nasepna (Bakhriddin Sanginov)
Bakhriddin in SDA thu-um mi khat hi-in Tajikistan khua-a bawlungsui
khangnote makaih hi. Bakhriddin in bawlung sangin a thupi a sakzawk tampi om
hi. Kimawlna ah kampau hoih lo a zangte daan kipia, nih vei daan ngahte
khawlsak hi.
Nu le pa tampi in Bakkhriddin’ makaihzia hoihsa uh hi. Nu le pa in
bawlungsuihna pan inn hong ciah uhteh khangnote sungah kikhelna tampi a muh
uhteh lungdam mahmah uh hi. Pasalnote’n kamsia zang nawn lo uh hi.
Nasepna Thak
Bawlungsuih kawmin mite tungah hotkhiatna thu gen zel uh hi. Tajikistan
gam ah SDA thu-um mi 200 khawng bek om hi. Gamsung hoihlohna hangin SDA thu-um
mi 1000 val bang gamdang ah kituah uh hi. Gam ki-ukna in Khristian biakna phal
lo ahih manin Pasian thugen ding hamsa mahmah hi. Ahi zongin 2016 kum sungin mi
18 kituiphum hi. Pawlpi makaite’n lampi tuamtuam zangin hotkhiatna thu pulaak
uh hi. Bawlungsui, mangpau sinna, innkuan sung kimakaihzia, cidamna tawh kisai
thusinna cihte tungtawnin khat le khat kimeltheihna, kilamtatna hong omin tua
panin hotkhiatna thu hawmsawn uh hi.
Geelkholhloh Nasepna
Adventist biakinn gei khat ah mi kim khat in bawlungsui uh hi. Hih
bawlungsui-te 2015 kum a kipan a sui uh hi-in, Bakhriddin in amaute makai
dingin a ngetteh amau zong ut pah bilbel hi. Bakhriddin in bawlungsui khangnote
banah a nu le pa-te tawh hong kithei toto uh hi. Bawlungsui makaih nadingin van
kisam zong tam lo hi. Phiit khat, nai khat, le bawlung hi ziau hi. Bakhiriddin
in Asian Football Conferderation – Asia gam sung a bawlung tawh kisai kipawlna
panin, naupang bawlungsui makaih ding phalna laipi hong ngah hi.
Bakhriddin in kaal khat in mun nih, mun thum bangah makaih hi. Mun khat
ah minute 90 bang hun bei hi. Tua banah gamtat khuahek zia ding zong hilhbeh
hi. Hih naupang bawlungsuite kum 11 – 13 khawng bek pha pan uh a, guihtheih,
khamtheih zang vive hi. Ahi zongin tampi in tuate nusia thei uh hi. Bawlungsuih
bek hi lo, naupangte’n a inn ah hawh dingin Bakhriddin sam uh hi. Nu le pa in a
tate uh bawlungsui-in khamtheih tuamtuam a nusiat uh a muh uhteh lungdam mahmah
uh hi.
Bawlungsuih a zo ding bek hi lo-in amaute lungsim zong a zawh nadingin
thungetna kisam hi.
Tu quarter 13 Sabbath School Sumpi in Tajikistan gam-a Adventist pawlpi nasep
nadingin kizang ding hi. Hih gam ah gammi 8000000 bang om a, Adventist thu-um
mi ahihleh 200 val deuh khawng bek om hi. Hih gamah 1929 kum a kipan SDA thuman
kitangko hi.
MUC SDA Conconference in Kimlai biakinn puah nadingin kipuak ding hi
