NOV. 11
Sabbath
ni-in Sangkah Lo (Nikita Kirkachev, 22)
Ka nu in SDA thu-um mi khat hi-in ka neutung a kipan Pasian thu tawh
hong pantah hi. Ahi zongin ka pa in kikhop ding hong phal lo hi. Kum 18 ka phak
khitteh bek na ut na-ah om thei hong ci hi. Kum 18 ka phak masiah ama’ thu bek
zui dingin hong hilh hi.
Kum 18 ka cin ciangin Rostov-on Don khua-ah sangkahin ka om hi. Hih mun
ka tunphetin SDA biakinn ka kan pah hi. Sabbath nisial kikhawmin Lai Siangtho
sinnate-ah ka kihel pah hi.
Sabbath Thubuai
Ka sangkahna panin buai-na hong om hi. Saturday ni ciangin sangkah lo ka
hih manin ka sia-te in lai hong khak den uh hi. Sangnaupang khat in tua bang
siate’ tung pan lai ngah tawntung leh sang kikah thei nawn lo ding hong suak
hi. Ka pa in hih thu a theih a kipan ka tungah heh mahmah hi. Phone tawh hong
hopihin Saturday ni-in sangkah dingin hong gen hi. Ama hong cihsa mah bangin
kum 18 ka cinkhitteh na ut peuh zui thei ci ahih manin ka pa hong gen ka mang
tuan kei hi.
Ka nu bel Sabbath ni ka kikhop nuam zaw hi. Ka nu in Isaiah 41:10
siksanin hong hanthawn hi. “ Lau kei inla lungkia kei in. Bang hang hiam cihleh
kei in na Pasian ka hi hi. Thuman dikna tawh kidim ka taklam khut tawh nang mah
kong len hi.”Tua bangin ka nu in thu hong ngetsak hi. Ken zong tua bang mahin
thu ka ngen hi.
Sangsiate kiangah Saturday ni-in sangkah lo ding hong phal nadingun ka
ngen hi. Ahi zongin ka ngah kei hi. Tua bangin hong phal hi leh, sangnaupang
dangte’n thuman lo hi, ci kha ding uh hi, ci’n hong dawng hi.
Saturday ni-a lai hong hilh ding siate kiangah ka ngen hi. Tua bangin ka
nget leh laihilhsiate’n zong hong phal uh hi. Tua bangin kum nih sung sang ka
kah hi. Saturday ni laivuan dingte a ni dang khat ciangin ka vuan hi. Ka
sangkahpihte’n a kipatcilin lamdangsa uh hi. Ahi zongin ka sia-te kiangah hong
nget pih uh hi. Ahi zongin sia tampi mah in Saturday ni sang ka kah loh pen
deihlo uh hi. Bang hangin sangkah ding sangin kikhop ding ka teelzawk man
lamdangsa uh hi. Sang pan hong kihawl khiat ding patau kawmkawmsa-in sang ka
kah hi. Ka pa in zong ka sangkah ding hong deihsak mahmah, a lungkham ding zong
ka deih tuan kei hi.
Ut lo pipi Sawl Ngah Teitei
Ni khat ka siapi khat in hong sam hi. “Saturday ni sang na kah kei leh
sang pan hong kihawl khia ding” hong ci hi. Pawlpi mite kiangah zong hih thu ka
pulaak a, thu ka ngen uh hi. Pastorte zong ka siapi pa tawh kimu dingin va
hawhin, bang hangin Saturday ni sangkah lo cihte va gen uh hi. Pasian in hong
huhin nasembeh dingin Saturday ni sangkah lo ding ka ngah hi. Tua bangteng tawh
sang ka kah thei hi. Ahi zongin siapi pa dang khat hong tung hi. Buai-na hong
kipan kik hi. Ka sangsiate’n laivuan ding hong phal lo uh hi.
Ka lawmte’n lai bawl ding hong pia uh hi. Ka siate kiangah bang hangin
Saturday ni ka sangkahlohna thu ka pulaak hi. Tua bangin ka genteh ka siate’n
Saturday ni nong pai kei leh a nidangteh zong laivuan thei lo ding hiteh hong
ci uh hi.
Ka sia-te a kipan sangsiapi pa in hong phal lo ahih manin ka sangkah
tawpna hita ve maw, ci’n ka ngaihsun hi. Topa’ hong huh ding ka ngen hi.
Ngaihsutna kikhel
Ni khat ka siapa in hong pai in, ci’n hong sam hi. Cikmah hong phal
ngeilo ka sia pa in tu-in Saturday ni-in ka kinget hong pia hi. Pasian in a
lungsim na khelsak hi. Tua bangin sangkah ka zom toto hi. Saturday ni tawh
kisai-in hamsatna tampi ka phu-kha hi. Ahi zongin Pasian’ panpihna ka ngen hi.
Topa in zawhna hong pia hi. A sawt lo-in sangkahzo-in nasem a kipan ding ka hi
ta hi.
Tu quarter 13 Sabbath School Sumpi in Rostov-on-Don khua-a khuasung
khantoh nading hall khat lamh nadingin kizang ding hi.
MUC SDA conference in Kimlai biakinn puah nadingin kipuak ding hi.
