DEC. 30
Anjila: ka min Anjili hi. Kum 18 ka pha-a, ka sanggam pa kum 14 pha hi.
Ka innkuanun Moldova gam nitumna lam khua khat ah ka teng uh hi. Ka pa’ min in
Dmitry hi. Amah pen lungtom mahmah hi.
Dmitry: Music sia dingin sang ka kah ngei hi. Ahi zongin nasep mulo ka
hih manin mihau khat ii neihsa bual khat cingin ka om hi. Ngasa-te an pia,
nga-siah ding hong pai a om leh tai in ka om hi.
Anjili: Kum 12 ka phakin SDA thu-um numei khat hong hawhin biakinn ah
kikhawm dingin hong zawn hi. Ka nu in Sabbath nisim in kum khat sung bang hong
kikhoppih den hi. Ka pa, ka pu-te’n
tua bangin ka kikhop lungkim lo uh hi. “I khuapihte’n hong zahpih,
zumhuai” ci-in kikhop ding hong khaam uh hi. Ka nu in kikhawm dingin ka pa zawn
zelzel mah taleh ka pu-te kihta ahih manin hong zui ngam lo hi.
Dmitry: nasep manlah ka hih manin Pasian aa ding hun ka nei ngei kei hi.
Kikhop ding sangin innkiim innpaam nasepteng tawh ka buai den hi.
Anjila: Biakna tawh kisai-in ka pa kiangah bang mah ka gen nawn kei uh
hi. Ka innkuante un zong kikhop ding hong phal nawnlo uh hi. Tua SDA nupi nu in
Sabbath ni kikhawm ding hong zawn hangin ka zui nawn kei uh hi. Tawl khat
khitteh ka pa in inn nasepteng manta ing, tu’n hun ngah zaw deuhta ing, hongci
hi.
Anjili: Ahi zongin ka pa in Pasian biakna ding hun nei ngei lo hi.
Kikhawm ding a cih hangin kikhop hun hong tun taktakteh paulap khat nei
hamtangin kikhawm ngei lo hi. Tua bangteng tawh a lamdangin ka pa in amah kia
inn ah hong ngam lo hi. Amah kia om ding lau hi. Nidang bangin gamtang thei
nawn lo hi. Tau ngaungau den hi. A si khangin siavuante’ zatui piak nene phot
hi. Ahi zong bang mah phatuam thei lo hi. Siavuante’n zong a cihna ding uh thei
tuan lo hi.
Ka pi in inngei-a phungzi sang khat ah pai dingin sawl hi. Ka pa zong va
pai hi. Ahi zongin bang mah hoihtuamna nei thei tuan lo hi. Ka pa’n nuntakna
mungtup bang hiam,ci-in hong kan kawikawi hi. Tua leh SDA upa khat tawh hong
kimu kha uh hi. Tua upa pa in kikhawm dingin zawn a, ka pa zong va kikhawm hi.
Dmitry: Ka kikhopna nuam kasa mahmah hi. Biakpiaknate in ka lungsim hong
lawngkha mahmah hi.
Anjila: Ka pa in tua bangin kikhop nop a sak, ka nu in zong lamdangsa
hi. Sabbath kik ciangin ka vekun ka kikhawm uh hi. Dmitry: Kikhop ka pai ma-in
thu ka ngen khol hi. Hehna, lau-na tawh kidimin ka nuntak nuam thei lo hi.
Nuntakna in bang man nei hiam, ci-in ka ngaihsun hi. Satan in ka nuntakna susia
nuam hi, cih ka phawk hi. Ka nuntakna hong la nuam hi. Ni khat thu ka ngen a,
Pasian bek in hong honkhia thei hi. Hong hon in,ci’n thu ka ngen hi. Tua bangin
ka thunget manteh ka lungkham vangikteng khempeuh hong zangin, lungnopna khat
ka ngah hi. “Mainawt in. Nang kong ompih ding hi,” cihna aw khat ka za hi.
Anjila: Ka innkuanun ka kikhawm thei uh hi. Pastor in Lai Siangtho sinna
hong neihpih hi. Ka nu le pa, ka sanggam pa tawh ka li-un, ni kum sungin tui ka
kiphum uh hi. Ka pi le pu bel nuam lo uh hi. Kei le ka sanggampa hangin ka nu
le pa zong tui kiphum hi, ci’n hong ngawh uh hi. “ Ka mai uh hong zumsak uhteh”
ci-in hong tawngden uh hi. “ Na tanu, na tapa-te kuamah tawh kikhawl thei lo
ding, kuan amau tenpih ding hiam? ci-in ka nu le pa phin den uh hi. Lawm le
gual tawh kituahna, kipi kitenna in nuntakna sungah a thupi pen hi kei, ci-in
ka dawng kik uh hi. Ka pi le pu zong kikhawm dingin ka zawn uh hangin, hong zui
ngei lo uh hi.
Ka pa’ hong kikhel manin ka lungdam mahmah hi. Na lamdang mahmah khatin
ka ngaihsun uh hi. Lungkhamna, lau-na cihte nei nawnlo hi. Biakna ah nuamsa-in
pawlpi ah zong deacon le la makai khatin kiseh hi.
Dmitry: Ka innkuanun tui ka kiphum uh hi. Ka kituiphumna mun uh bel
cidamna tawh kisai (resort) mun kibawl khat hi-in tu-in Pathfinder camp le
thusinna mun in kizang hi.
Tu quarter 13 Sabbath School sumpi hih mun ah kipuak ding a, innpuah
nadingin kizang ding hi.
MUC SDA conference in Kimlai biakinn puah nadingin kizang ding hi.
Sumpi
khiat ngei a zah 3 khiat ding phawk ciat ni.
