Lesson 9 ( Nov 25 - Dec 1 ) MAWHSAKNA OM NAWN LO

LESSON 9   NOV. 25 – DEC. 1

MAWHSAKNA OM NAWN LO

SABBATH NITAK: TU KAAL SUNG SIM DING: Romans 8: 1-17.

KAMNGAH: “ Ahi zongin tu-in ci le sa deihna zui lo-in Kha Siangtho deihna a zui, Khrih Jesuh sunga a om mite pen mawhna thukhenna tawh kipelh hi.” Romans 8:1.

Romans 7 sunga Paul’ dotna a dawnna Romans 8 sungah kimuhi. Romans  7 sungah Paul in lawpsapna, lungkiatna le mawhna hangin thukhenna pulaak hi. Romans 8 in ahihleh tua bang mawhsaknate beimang khin a, Jesuh Khrih hangin suahtakna le zawhna thute pulaak hi. Jesuh a nial mite’nRomans 7 sunga hamsiatnate luah ding hi. Mawhna’ sila-in a nungta mi in thu hoih thei napi sem zo lo hi.

Romans 8 in ahihleh Khrih in mawhna’ sila hihna pan hong honkhia-in na hoih a sem thei dingin hong suakta sak hi, ci’n pulaak hi. Tua suahtakna in man kiseh thei lo hi. Khrih Pasian Tapa in mihingin hong nungta hi.

Mihing tawh a hong kizop nading tua lo lampi dang om lo hi. Eite etteh dingin hong nungta-in i sih ding tangin hong si hi. “Mihingte’ mawhna lungsim tawh hong nungta hi” (Romans 8: 3, 4). Tua hangin thukham’kalh dikna i sungah hong kicing hi. Khrih in mawhna zo hi. Ama nunna in thukham’ khalh khempeuh kicingsak hi. A um mite khempeuh tungah tua kicinna hong pia-in totkhiat ngah nading hi lo-in hong kihonkhia ahih manin tua kicinna nei i hi zaw hi. Thukham’ deihna bangin nunna in cikmah hunin hotkhiatna lampi hi ngei lo hi; mailam ah zong hi lo ding hi.

SUNDAY    NOV. 26

JESUH KHRIH SUNGAH

“Ahi zongin tu-in ahihleh Khrih Jesuh tawh kipawlin a nungta mite tungah mawhsakna a om nawn kei hi” (Romans 8:1). “Mawhsakna” i cih in bang hiam? Bang panin suahtakna hi ding hiam? Bang hangin tua thu in lungdamhuai hiam? Paul in "Khrih Jesuh sungah nuntakna” tam veipi pulaak hi. Khrih sungah om i cih ciangin Khrih, ama Honpa le Tanpa-in sang hi, cihna hi. Tua bang mi in a lungsim khempeuh tawh Khrih a muang mi hi. Khrih’ nun bangin amah zong nungta hi. Khrih tawh mimal kizopna nei tawntung hi.

“Khrih sungah nuntakna” le “ci le sa tawh nuntakna” kido tawntung hi.

Tua bang nunzia Romans 7 sung kigelh hi. Khrih sunga nuntakma-in ci le sa tawh a nungta mi in mawhna’ sila hi. Mawhna’ sila in sihna thuak ding hi (Romans 7: 11, 13, 24). Tua mi in mawhna sungah nuamsa hi (Romans 7: 23, 25). Tua mi in a cimawh, lamet bei mi hi (Romans 7: 24). Ahi zongin tua mi in Khrih tungah a ki-ap ciangin Pasian tawh kizopna thak nei hi.

Thukham palsat mawhnei mi ahih hangin tu-in tua mi in Pasian mai-ah a mawh ngei lo-in kiciamteh hi. Bang hang hiam cihleh Khrih’siantho-na in amah tuamcip hi. Mawhsakna ding om nawn lo hi. Mawh ngei lo hi lo-in, Khrih in tua mawhna pua-in, mawhnei mi in Khrih’ siantho-na ngah hi zaw hi. Tua hangin mawhnei mi tungah mawhsakna om nawn lo hi. Ahi zongin Lungdamna thu in mawhsaklohna bek hi lo hi.

Bang in mawhna’sila panin hong suakta sak hiam? Rom. 8: 2

Khrih in a hong hotkhiat ciangin “Kha Siangtho tawh a nungta dingin’ hong hon hi. Tua bang nunna in mawhna le sihna tawh kido hi. Romans 7 sunga kigelh mah bangin mawhna’uk nunna in sihna hong tun hi. Khrih' thukham in nunna le suahtakna hong pia hi.

“Pasian tungah a ki-ap lo mi in Satan’ ukna sungah a nungta mi hi. I nuntakna eima aa hi lo hi. Tua bang mi in suahtakna thu a pulaak zongin mawhna’sila hi kha thei hi. Amah le amah thuman zui-in kingaihsun napi ci le sa deihna zui-in khuamial sungah nungta ahihlam kiphawk lo hi. Khrih in tua bang dinmun panin hong honkhia dingin hong pai hi.” Ellen G. White, The Desire of Ages, 466.

Mawhna sung koltang na hiam? Khrih sungah a suakta mi na hiam? Koi bangin na dinmun na kithei diam?

MONDAY    NOV. 27

THUKHAM IN A SEP THEIHLOH NATE

Bang zahin biakpiakna thukhamte, Thukham 10 in hoihin deihhuai-ta leh tuate in mawhna pan hong honkhia lo hi. Thukham zuihna in mawhna thukhenna le sihna tawh hong kipelhsak thei lo hi. Tua dingin Jesuh i kisam hi.

Romans 8: 3, 4 sim in. Thukham in a sep theihloh Zeisu in a sep bang kipulaak hiam?

______________________________________________________________

______________________________________________________________

Pasian in mawhna sung pan mawhnei mi a hotkhiat nadingin a Tapa mimawhin a hong nungta dingin hong sawl hi. Tua manin Jesuh in mawhna thaman sihna thuak hi. Jesuh in mihingin hong piang hi, cih thu in hotkhiatna thu ah thupi mahmah hi. Singlamteh tawisang ding hi mah hi. Ahi zongin Jesuh in mimawhin a hong nuntakna zong thupi mahmah hi.

Pasian in a Tapa tungtawnin a hong sepnate hangin tu-in eite in thukham hong kalh dikna a ngah thei i hi hi. Dikna thu tawh a nungta thei i hi hi. Thukham tawh dikna kingah lo hi taleh Khrih sungah tua dikna tawh i nungta thei hi (Romans 6: 14). Ahi zongin i mangngilhloh ding thu in: thukham’ deihna bangin nuntakna in hotkhiat ngah nading hi lo hi. Pasian in thukham’deihna bangin a hong nungtasak hi zaw hi. Ci le sa deihnate si khinin amah tawh a sikhawm mi in Pasian thupiak a zui, a thu mang hi zaw hi” (Gal. 5: 24). Tua bang nunzia in Khrih’ nunzia kilangsak hi.

Romans 8: 4 sungah ‘zui’ cih kammal in gamtat hoihin nungta ding cih a pulaak kammal hi. Ci le sa cih kammal in siatna tawh nungta-in a kikhel nai lo nunzia pulaak hi. Ci le sa tawh a nungta mi in mihing’ deihna a ki-uksak mi hi. Ahi zongin Kha Siangtho tawh kidimin a nungta mi in thukham’ deihna kicingsak hi. Kha Siangtho’ huhna bek in midik hong hi sak thei hi. Jesuh sung bek ah thukham’ kalhna kicingsak dingin hong suakta-sak hi. Khrih lo-in suahtakna om lo hi. Mawhna’ sila-in a nungta mi in hoihna khat beek nei lo hi (Romans 7: 15, 18).

 Thukham hoihtak a zui mi na hi hiam? Hotkhiatna ngah dingin thukham zui na hihloh hangin na nunna ah thukham dikna a kicing hiam? Kicing lo ahihleh bang hang hiam? Bang paulap na hiam?

TUESDAY       NOV. 28

AMA PUMPI’ DEIHNA MAW KHA SIANGTHO’ DEIHNA

“Ci le sa deihna banga a nungtate in ci le sa tawh kisai thute lunggulh uh a, Kha Siangtho deihna banga a nungtate in Kha Siangtho tawh kisai thute a lunggulh uh hi. Ci le sa lungsim sihna piangsak a, ahi zongin Kha Siangtho lungsim puakna in nuntakna le lungmuanna a piangsak hi” (Romans 8: 5,6). Hih thute ngaihsun in. Bang thu laigil pulaak hiam? Na nunzia bang pulaak hiam?

______________________________________________________________

_____________________________________________________________

Ci le sa tawh nungta ding maw? Ahih kei leh Kha Siangtho’ makaihna zui zaw ding maw, mimal khensat ding hi. I khensat bangin kinungta hi. Ngaihsutna,khentatna in i gamtatzia ding makaih hi. Ci le sa tawh a nungta mi in bang sem zo lo hiam? Rom.8:7,8.

_______________________________________________________________

_____________________________________________________________

Ci le sa gamtat ding a ngaihsun mite in Pasian langpang uh hi. Pasian’ deihna bangin nuntak ding awlmawh lo uh hi. Mite’muhin Thukham palsat uh hi. Khrih tawh lo-in kuamah in Pasian’ thukham nunpih zo lo hi. Paul in hih thu gen kikkik hi. Bangzahin hanciamta leh kuamah in Khrih tawh lo-in thukham nuntakpih zo lo hi. Paul’hilhnop lianpi pen in Jew mite’n thukham (Torah) banah a kitangsap uh om hi. Pasian’ lamlahna ngah minam ahih uh hangin Gentile mite tawh kibangin mimawh mi hi (Romans 2). Messiah kisam uh hi. Amah lo-in mawhna khol pan suahtak nading nei lo uh hi; suahtak zo lo uh hi. Biakpiakna thukhamte le Thukham 10 in hotkhiat ngah nadingin kicing lo ahihlam hong hilh hi. Ahi zongin Messiah lo-in hotkhiatna om lo ahihlam a tel ding uh kisam hi.

A beisa na nunzia enpha in. Na nunzia in ci le sa kimakaihsak maw? Ahih kei leh Kha Siangtho a kimakaihsak nunzia hiam? Tua in na nunzia hong theisak hi lo hiam? Ci le sa zui na hih leh bang kikhel ding na hiam? Koi bangin kipuah ding na hiam?

WEDNESDAY      NOV. 29

NA SUNGAH KHRIH HONG NUNGTA

Paul in nunzia nih – Kha Siangtho tawh kidim nunzia le ci le sa tawh kidim nunzia tawh kisai tampi gen hi. Kha Siangtho tawh kidim nunzia in tawntung nuntakna hong tunpih ding hi. Ci le sa tawh kidim nunzia in tawntung sihna hong tunpih ding hi. Khat zawzaw tawh kinungta hi. Kha Siangtho makaihna lah hi lo, ci le sa nunzia lah hi lo cihbang om lo hi. Jesuh mahmah in “ Kei tawh kipawl lote kei hong langpang hi; kei hong kaihkhoppih lo peuhmah a thehthaang hi” ci-in pulaak hi (Matt. 12:30). Namnih khoppih hi thei lo hi.

Romans 8: 9- 14 sim in. Khrih tungah a ki-ap mite tungah bang kamciam om hiam?

________________________________________________________________

______________________________________________________________

Ci le sa tawh nunzia le Kha Siangtho tawh nunzia in kilangdo hi. Kha

Siangtho tawh kidim nunzia in Kha Siangtho’ makaih nunzia hi. Romans 8 sungah Khrih kiang pan hong pai Kha Siangtho ci-in kipulaak hi. Khrih aitangin nasem hi. Kha Siangtho tungtawnin Khrih in thu-um mite sungah hong nungta hi (Rom. 8: 9, 10). Paul in Romans 6: 1- 11 sunga gentehna, tuiphumna tawh a hilh, mawhna pumpi siksakna thu hilh kikkik hi. “Nunlui ngei-na khempeuh Khrih tawh si khawm hi” (Rom. 6:6). Tui sungah kiphum suak lo-in tui sung pan pumpi a thawhtohkik bangin Khrih sungah nunna thak tawh nuntak kisam hi. Mimal in nisim tatsat lo-in nunlui a sih ding khensat kul hi. Pasian in mimal deihtel theihna khaktan lo hi. Nunlui si khin phial taleh mawh kik kha zel hi. “Leitung pumpi deihna khempeuh ….. si sak un” (Kol. 3:5), ci-in hong hilh hi.

Tua hi-in Khrih Honpa-in a sang khin khat in mawhna langpan tawntung ding kisam hi. Kha Siangtho tawh kidim mi in tua mawhnate zo ding hi. Tham lo-in tua mi in mawhna’ sila panin kisuakta-sak khin hi. Mawhna’ sila-in a nuntak ding hi nawn lo hi.

Sihna pan Jesuh a thokiksak Pasian Kha Siangtho in na sungah hong nungta thei hi, cih thu ngaihsun in. Tua vangliatna ngaihsun in. Bang nate in Kha Siangtho tawh na kidim ding hong dal hiam?

THURSDAY    NOV. 30

TA HONG SUAKSAK KHA SIANGTHO

Koi bangin Paul in Khrih sungah nunna thak pulaak hiam? Romans 8: 15. Bang lametna kamciam hong kipia hiam? Koi bangin tuate nuntakpih ding na hiam?

_______________________________________________________________

_____________________________________________________________

Hih nunna thak in lau-na pan suahtakna hi. Sila in thongkia tawh kibang hi. A tawntungin lau-na tawh kidim hi. Bang bang a sem zongin ama ngah ding bangmah om lo hi. A topa aa ding bekin nasem hi. Khrih a sang mite ahihleh tua bang hi lo hi. Utna lungsim tawh nasem hi. Lau-na nei lo hi. Bang hang hiam cihleh itna ah lau-na kihel lo hi (1John 4:18). Tapa dinmun tawh nungta ahih manin ciangtan omlo gamh luah ding hi ta hi. “ Sila nunzia in a tawntungin ama gamtatna le thukham siksan dikna ngah ding hanciam hi. Abraham tungah kipia kamciam bangin Khrih sungah upna tawh a nungta mite in lametna tawha nungta mite hi.” Ellen G. White, The SDA Bible Commentary, vol. 6., 1077.

Pasian in a ta dingin hong koih hi, ci-in bang in hong lungmuangsak hiam? Romans 8: 16

____________________________________________________________

_____________________________________________________________

Kha Siangtho in Pasian’ta i suahna hong theisak hi. Kampau tawh pulaakna bek hi lo-in Pasian' kammal hong makaihna zui-in, Pasian’ ta taktak nahihlam Kha Siangtho’ hong hopihna zak ding kisam hi. Pasian’tate in Vantung Pa Pasian’gamh luahte hi; Pasian’ innkuan sungah a om i hi hi (Romans 8: 17). Hih in thalawh theih hi lo hi. Khrih sungah nunna thak tawh a nungta mite tungah hehpihna hangin hong kipia hi zaw hi. Mi khempeuh tungah tua hehpihna hong kipia hi. Bang hang hiam cihleh eite sih ding tangin Khrih hong si hi.

Bang zahin Topa tawh na kinai hiam? Amah mah a thei na hiam? Ahih keileh a thu a thei bek na hiam? Na hong Bawlpa, hong Honpa tawh na kinai zawk nadingin bang kikhel ding na nei hiam? Bang in hong khaktan hiam? Bang hang hiam?

FRIDAY      DEC. 1

NGAIHSUTBEH DING: Hotkhiatna lampi in thuakna, gimna tawh kipelh lo hi. Khrih a zui ding mite in pumpi deihna a nial kul hi. Tua bangin gimna thuakna, pumpi deihna i nialna tungtawnin Khrih’ nunzia i nei thei ding hi.

Khrih tawh i thuakkhop ciangin vantung pilna, Ama deihna bangin kiseekna nei-in Amah tawh tungtawn nopna sungah a mangkhawm ding i hi hi.” The SDA Bible Commentary, vol. 6., 568, 569.

“Vantung Pasian tokhom pan hong tuaksuk itna in a niam penpen nunzia hong baansuk hi. Khrih in mawhna guamthuk sung pan hong honkhia-in

Pasian’ tanu tapa dinmun ah hong koihin, sihtheih nawnlohna gamh luah ding le a tawntung Amah tawh a mangkhawm dingin hong koih hi.” Ellen G. White, 7T., 229.

“Vantungmi khempeuh in a pahtawi uh Khrih in hong kiniamkiat i etteh dingin mihingin hong nungta hi. Mawhneite i sih ding tangin Amah mah hong si-in mawhna’ thaman hong a pia Honpa umin, a thupiak a zui mi in tawntung nunna ngah ding hi, cih thu vantungmi khempeuh le vantung dangdanga om khempeuh in a theih dingin kipulaak hi. Satan’ sila dingin nuntak kul lo hi. A vanglian eite hong Huhpa in ei tawh hong om den hi.” Ellen G. White, 5SM., 309.

KIKUP DING DOTNATE

1.     Friday ni-a Ellen G. White’ lai kigelh en kik in. Bang lametna na ngah hiam? Bangci-in tua kamciamte na nuntakpih hiam? Khrih in ei aa dingin na khempeuh hong sem hi napi, bang hangin kinungtolh kha thei hiam?

2.     Koi bangin Kha Siangtho tawh kipawl thute tawh nungta ding na hiam?(Rom. 8:5). Kha Siangtho tawh nungta cih in koi bang hiam? Kha Siangtho in bang deih hiam? Kha Siangtho a dal thei mit tawh muhtheih nate, bil tawh zaktheih nate le lungsim ngaihsutna na nei hiam?

3.   Satan pawl ah maw, ahih kei leh Pasian tawh kipawl na hiam? A nihin kopkhawm cih om thei lo hi. Bangci bangin thuneu no khat in hong huzaap thei hi, ci-in tel ding na hiam?