LESSON 7 ( NOV.11 – 17 ) MAWHNA ZAWHNA

LESSON 7              NOV.11 – 17

                                   MAWHNA ZAWHNA

  

    SABBATH NITAK

TU KAAL SUNG SIM DING:  Romans 6; 1John 1: 8 – 2: 1.

KAMNGAH: “Thukham nuai-ah om loin hehpihna nuai-ah om na hih man un mawhna in note a hong uk kei ding hi.” Romans 6:14.

Gamtat hoih in hong honkhia thei lo ahih leh gamtat hoih kisam nawn diam? Bang hangin mawhna tawh nungta lo i hiam? Romans 6 in hih thu tawh kisai hong hilh hi. Paul in Khristian nuntakna ah siantho-na i cih in mawhna zawhzawhna le Khrih zia le tong kilaksak nunzia hi, ci-in hong hilh hi. Roman sungah ‘siantho-na’ cih kammal nih vei bek kigelh hi (Rom. 6:19, 22). Greek laimal “hagiasmos” kici hi. Lai Siangtho sungah ‘kisiansuah’ ‘kisiangsak un’ cih ciangin a khiatna in Pasian tungah ‘ki-ap’ding cihna hi. Tua hi-in Khrih in hong siangsak hi, cih ciangin a beisa thu pulaak hi; gentehna-in “A hong siantho-sak mi khempeuh’(Sawl. 20: 32). Pasian in a sianthosak mite Ama tungah a ki-ap mite hi. Ahi zongin Lai Siangtho in siantho-na hong hilh ciangin i nuntak buppi huam hi.

Tu kaal sung i kikup ding thu in a kitelkhial mahmah thu: upna tawh hotkhiat ngah cih thu – Zeisu’ hotkhiat mi khat ii nunna ah mawhna tungah zawhna kamciam thute i en ding hi.

SUNDAY NOV. 12

MAWHNA A TAMNA MUNAH

“Tua thamlo-in thupalsatna a khan nadingin thukham hong lutbeh hi. Ahi zongin mawhna a khan ciangin hehpihna a khang zaw sem hi” (Romans 5: 20). Bang zahin mawhin siatna tawh kidim mi khat tungah Pasian hehpihna kicing hi. Mimal khat ciat aa dingin, a diakdiakin mawhna lianlua bangci bangin mawhmai zo ding a ci mite aa dingin lametna lianpi hi lo hiam! Mawhna in sihna hong tun hi. Pasian hong hehpihna in sihna pan hong khahkhia-in nuntak tawntungna hong pia hi (Romans 5: 21).

Romans 6: 1 sim in. Paul in bang hong hilh hiam? Koi bangin Romans 6: 2-11 tawh kizom hiam?

________________________________________________________________

___________________________________________________________________

Paul in diktang khin mi khat in mawhna sungah nungta dingin kilawm nawnlo hi, ci’n hong hilh hi. Bang hang hiam cihleh mawhna-ah misi bang i hi hi, ci-in Paul in pulaak masa hi. Tua khitteh a gennop thu pulaak hi. Tui sungah kiphumna in ‘mihing nunlui,’ mawhna sungah nuntakna a bei-na limcing hi. Bang si hiam? Mawhna ah gamtang lo cihna hi. Mawhna sungah nuntakna in si ahih manin mawhna tawh a nungta nawn lo nunna pulaak hi. Romans 6 sungah mawhna pen sila-te tungah ukna nei, to bangin kipulaak hi. Tui sung pan i pusuahkhiat in nunna thak tawh nuntakna limcing hi; mawhna sila pan suakta cihna hi. Khrih in mawhnei khempeuh aa dingin khat vei hong si khin hi. Ahi zongin tu-in nungta tawntung hi. Khristian khat in mawhna ah si-in, mawhna sungah nungta ding hi nawn lo hi. Tuiphum khin Khriatian khat in tui sung pan i pusuah bangin mawhna hong ukcipna pan thakhatin i suakta kei hi. Mawhna ukcip pan a suakta mi in mawhna do nawn lo hi, cihna hi lo hi.

“Mawhna ah a si i hi hi. Pasian aa dingin a nungta i hi hi. Mawhna tawh i kipelh theih loh hangin cilesa deihna, mawhzolna zui lo-in a nungta i hi hi. Bang bang hi taleh leitung nuntakna a bei mateng mawhna tawh kipelh thei ding kuamah om lo hi. “ Bang hang hiam cihleh ci le sa lunggulhna in Kha Siangtho deihna tawh kituak lo a, Kha Siangtho deihna in ci le sa lunggulhna tawh kituak lo hi. Na gamtat nop bangun na gamtat theihloh nadingun tua nihte khat le khat a kilehbulh den hi.” Gal. 5:17. Tua hi-in sawltakte le mi siangthote in mawhmai nget ding kisam a, i pumpi in leivui suakin sihna pan a si thei nawnlo vangliatna tawh kidim pumpi dingin sihna pan a thokik pumpi i ngah masiah ci le sa deihna i nawkkha den ding hi.” Martin Luther, Commentary on Romans, 100.

MONDAY NOV. 13

MAWHNA IN A HONG UKCIPTEH

Romans 6: 12 sim in. Bang in hong uk hiam?

_____________________________________________________________________

___________________________________________________________________

Kumpi khat in ukna a neih bangin mawhna in eite hong uk hi. Greek laimalin 'uk' cih kammal a khiatna in ‘kumpi bangin ukna nei’ cihna hi. Mawhna in i pumpi, gamtat luheek hong uk nuam hi. Paul in “mawhna ki-uk sak kei un” a cihteh diktang khin mi khat in a nuntakna a uk nuam mawhna nial thei hi, cih pulaak hi. Hih mun ah khensatna kisam hi. Lungsim takpi tawh khensatna, utna lungsim kisam hi. Mihing in deihtel thei hi. Khentat thei hi.

A nunzia khempeuh in khentatna tungah kinga hi. Pasian in deihtelna hong guan hi; mihing in tua deihtelna a zatsiam ding kisam hi. Na lungtang na khel thei kei hi. Na lungtang deihna khempeuh Pasian na pia zo kei hi. Ahi zongin Ama nasem dingin na khentat thei hi. Ama tung i lungsim khempeuh i pia thei hi. Tua bangin a ki-ap mi sunga Topa deihna tangtung ding hi. Kha

Siangtho in tua bang mi nuntakna khempeuh uk hi. Na deihna khempeuh, na ngaihsutna, na lungsim khempeuh in Amah mitsuan ding hi.” Ellen G. White, Steps to Christ, 47.

Ci le sa deihna cih kammal in na hoih deihna zong hi thei hi. Mawhna in hong uk leh a hoih lo deihna zong hi thei hi. Mihing tha le ngal bek tawh hi leh tua deihna in siatna manawh hi. Mawhna in siatna bek hong tun ding a, siatna in pha zo hi, cih nei lo hi. Upna tawh a hong kipia zawhna kamciamte i pom tak ciangin mawhna in hong uk thei nawn lo ding hi. Tua hi-in Romans 6: 12 sung a om thute mah bangin a kituiphum mi in Pasian aa dingin a nungta mi suak hi. Tua nunna thak in Pasian tungah kinga hi. Tua bang mi in Pasian aa dingin nungta, nasem, Ama deih nate sem ahih manin mawhna in uk nawn lo hi. Khrih tungtawnin Pasian aa dingin a nungta mi hong suak hi.”

Deihtelna tawh kisai Ellen G. White gen thute ngaihsun in. Khentatna nei thei mihing in a sia, a pha, thuman, thu zuau, Khrih ahih kei leh leitung nate, khat zawzaw deihtel thei hi. Deihtel theihna letsong zangkhial thei, a hoihin zang thei hi lo na hiam?

TUESDAY NOV. 14

THUKHAM NUAI HILO HEHPIHNA NUAI-AH

Romans 6:14 sim in. Koi bangin na tel hiam? Thukham 10 kisam nawn lo hi, cihna a hiam? Hi lo ahih leh bang hangin hi lo hiam?

________________________________________________________________

_________________________________________________________________

Romans 6: 14 in Romans sung thu laigil khat hi. Hih thu siksanin mi tampi in piansak ni sagih Sabbath kisam nawn lo hi, ci uh hi.Ahi zongin

Romans 6: 14 in tua bang ci lo hi. Mawhna om ahih leh bang hangin Thukham bei ding hiam? Bang hang hiam cihleh Thukham a om manin mawhna om hi. Romans sung khempeuh sim lehang mawhna pulaak Thukham 10 om nawn lo hi mawk leh mawhna kici om nawn lo ding hi.

Paul in thukham nuai-ah om mi a cihteh Jew ngei-na khempeuh pulaak hi zaw hi. Tua bang mi in mawhna ukna sungah a om lai mi ahi hi. Ahi zongin hehpihna nuai-ah a om mi ahih leh mawhna tungah zawhna ngah mi hi. Bang hang hiam cihleh a lungtang tungah thukham kigelh khin hi. Kha Siangtho in a nuntakna makaih hi. Zeisu Khrih in Messiah hi, ci’n a um mi in diktansakna ngah mi, Ama tawh si-khawm, nunlui nusia-in nunna thak tawh kalsuan, cihte in mawhna uk sungah a om nawnlo nunna hi. Romans

6: 14 sunga thute in mawhna tungah gualzawhna kamciam siksan hi. Thukham nuai-ah cih kammal kitelkhial thei ahihteh hih kammal ah kidop

kul hi. Hehpihna nuai-ah nungta kici napi Pasian Thukham a nial mi in hehpihna ngah lo-in mawhsakna bek ngah ding hi. Hehpihna nuai ah nungta cih thu in Pasian hehpihna hangin Zeisu Khrih in thukham palsatna hangin mawhsakna khempeuh a hong hepkhiatsak pulaak hi. Tua hi-in tu-in thukham palsatna hangin mawhsakna tawh a kipelh thei i hi hi. Tu-in mawhna sila hi nawn lo, mawh ah a si khin hi-in, nunna thak tawh nungta i hi hi.

Koi bangin Khrih sungah nunna thak tawh na nungta hiam? Bang in nunna thak pulaak hiam? Bang in hong khaktan hiam? Bang hang in a hong khaktante hemkhia lo ding na hiam?

WEDNESDAY  NOV. 15

MAWHNA MAW THUMANNA

Romans 6: 16 sim in. Paul ii gen bang thu hiam? Bang hangin koplekaih tuah ding hi lo, Satan maw Zeisu tel ding hong hilh hiam? Hih in bang hong hilh hiam?

_________________________________________________________________

_________________________________________________________________

Upna tawh nunna thak in mawhna sungah ci le sa deihna bangin nuntakna ding hi lo hi. Upna in mawhna zawhna hi. Upna tawh zawhna kamciamte i ngah thei hi. Ukna nei kumpi bangin mawhna a pulaak khitteh mawhna in hong ukcip nuam den hi. Ahi zongin eima khentatna thupi hi.

Mawhna zui dingin na teel theih mah bangin dikna zui dingin na teel thei hi. A nihin lenkhawm cih bang om thei lo hi. Nuntakna maw, sihna khat teitei teel kul hi.

Romans 6: 17 koi bangin Paul in hong hilhcian hiam?

_________________________________________________________________

_________________________________________________________________

Thupiak zuihna le upna man kizopzia kimu thei hi. Greek kammalin

‘doctrine’ cih a khiatna in ‘thuhilhna’ cihna hi. Rome khua Khristiante’n upna tawh nungta uh hi. Upna man in thuhilhna man hi-in, lungsim takpi tawh thuzui mi in dikna’ sila hi (Romans 6: 18). Tua hi-in Galatia pawlpi sunga a man lo upnate hangin Paul lunghimawh hi. Tua manin thuhilhna man kisam mahmah hi.

Mawhna sila le dikna sila in a tawntungin kido den hi. Tuiphum khitteh i khialh khak leh hotkhiat ngah taktak lo cihna hiam? 1 John 1:8 – 2:1 sim in. Koi bangin Zeisu nungzui napi khialh khak ciangin kalsuanzia ding hong hilh hiam?

THURSDAY NOV. 16

MAWHNA PAN SUAKTA

Tuciang i sin thu in Romans 6 sunga thute hi. Romans 6: 19- 23 sim in. Paul gen thute a tomin pulaak in. Koi bangin tua thuman nuntakpih ding na hiam? Bang thu kibuaipih hiam?

_____________________________________________________________________

____________________________________________________________________

Paul in mawh dim mihing nunzia tel mahmah hi. Mihing in thanem, khial baih, ze-etna sung tung baih hi. Mihing in ama deih zawk teel theihna nei hi. Tua hi-in mihing' thanemna phawkin Zeisu tungah ki-ap lungsim kisam hi. Zeisu bek mah in nunna thak hong guan hi. Romans 6: 23 in mawhna thaman sihna pulaak hi. Mawhna in a sila tungah vangik guan a topa tawh kibang hi. Tua vangik sihna panin Topa in hong honkhia hi. Mawhna sila maw nunna sila- koi zaw teel ding na hiam?

Mawhna' ukna pan suakta cih thu in mawhnei lo cihna hi lo hi. Mawhna langdo kul lo, khial thei nawn lo cihna hi lo hi. Mawhna' ukna sung pan suakta cih ciangin mawhna sila hi nawn lo cihna hi.Mawhna tawh kuamah kipelh thei lo mihing ihih manin nisim in mawhna tungah zawhna kamciam tawh a nungta den ding kisam hi.

Tua hi-in mawhna sila-in a nungta mite aa dingin a vanglian kamciam hi. Mawhna in sihna simloh bang mah hong pia lo hi. Tua hi-in sia le pha khentel thei mi in mawhna sila panin a suahtak ding kisam hi. Ahi zongin dikna' sila-te in thuman thutak le a hoihnate tawh nungta uh hi. Amau hoihna siksanin dikna ngah dingin kingaihsun lo uh hi. Nunna thak ii gah gamtat hoih tawh nungta uh hi. Gamtat hoih siksan in hotkhiat ngah thei ding hi le Zeisu hong tatna in a mawkna hi ding hi.

FRIDAY NOV. 17

NGAIHSUTBEH DING: Sim ding Ellen G. White, “Victory Appropriated,”

105, 106 in Messages to Young People; “The True Motive in Service,” 93 – 95 in Thoughts From the Mount of Blessig; “Appeal to the Young,” 365 in

3T., 1074, 1075, in The SDA Bible Commentary, vol. 6.

“Zeisu in mawhna zui ngei lo hi. A lungsim ah zong mawhna om lo hi. Tua bang dingin eite zong hong deih hi. Khrih a mihing hihna le Pasian ahihna in pumkhat hi. A nunna in Kha Siangtho tawh kidim tawntung hi.

Mihing in Pasian zia le tong nei thei dingin Khrih in leitung ah hong nungta hi. Upna tawh Ama kiangah zuanin amah tawh pum khat a suak mi khempeuh in mawhna sungah a nungta nawn kei ding uh hi. Pasian in upna tawh a nungta mi khat a cingtak Khrih’ nunzia tawh a nungta dingin makaih tawntung hi.” Ellen G. White, The Desire of Ages, 123.

“Tuiphum ciangin Satan le amah tawh kizopna khempeuh nusia dingin kamciam kipia hi. Lungsim, nunna khempeuh tawh vantung gam zai nadingin ka nungta ding hi, ci-in i pulaak hi. Thumgawm Pasian – Pa, Tapa le Kha

Siangtho in mihing lungsim ah nasemin hong siangsak dingin hong huh hi.” Ellen G.White Comments, The SDA Bible Commentary, vol.6., 1075.

Pasian thu-um kici napi a upna le a nunzia kituak kei leh a thu zuih in a mawkna hi. Kua-mah in Pasian le Satan kopkhawm thei lo hi. Siatna tawh a nungta mite’n Satan nungzui uh hi. Satan a nusiat matengun, Pasian sila hi thei lo ding hi. Vantung Kumpi' ukna sungah nungta dingin Satan a nusiat uh hangin amau siatna ding hi lo hi. Satan nungzui-in siatna bang mah piang lo hi, a ci phial uh zongin a tawpkhakna ah siatna sung tung vive ding uh hi. Pasian in a kamsangte tungah vantung thuman hong lak hi. Siatna sungah nungta nawnlo-in Khrih aa ding kisiansuah dingin hong hilh hi. SDA thu-um mi khat in a upna bangin a nuntak ding kisam hi.”Ellen G.White,7T.,404.

KIKUP DING DOTNATE

1.   Mawhna a zo dingin kamciam hong kipia zongin Khrih Honpa-in sangin a kikhelte zong siatna tawh kidimin, i lungsim in siatna tawh kidim hi lo hiam? Hih thunih a kilehbulh hiam?

2.   Khrih in nang aa dingin a septe ngaihsun in. Ama sungah nunna thak tawh na nunzia ngaihsun pha in.

3.   Khrih in ei aa dingin a sepna bek in hong honkhia thei hi, cih thu in thu bulpi lianpen hi mah taleh Ama nunzia kilangsak ding, Ama siantho-na tawh nuntakna cihte awlmawh lohna in bang zah in lauhuai hiam? Bang hangin hihte geel thupi hiam?