LESSON 6 ( NOV. 4 – 10 ) ADAM LE ZEISU

LESSON 6                       NOV. 4 – 10

                              ADAM LE ZEISU

SABBATH NITAK: 

TU KAAL SUNG SIM DING: Romans 5

KAMNGAH: "Tu-in upna hangin Pasian tawh kipawl khinta ihih manin i Topa Zeisu Khrih hangin Pasian tawh a kilemkik ta ihi hi.Ama hangin upna tawh tu-a i omna Pasian hehpihna sungah a tung ihi a, Pasian tawh minthanna ngahkhawm ding, ci-in lamen ihih manin i lung a dam hi.” Romans 5: 1,2.

Khrih dikna upna tawh i san ciangin Pasian tawh kipawltheihna, dikna a ngah thei i hi bek hi. Paul in hih thugil hong hilh hi. Gamtatna tawh hi lo, upna tawh hotkhiatna kingah hi, ci-in hong hilh a, Abraham bangin dikna i nei kei zongin, mawhna hong kipatna, mawhna hangin sihna pan a hong suakta-sak ding Khrih hong thuaknate ngaihsun dingin hong hilh hi. Mi khat bek hangin leitungah mawhna hong lut manin sihna, manthanna, siatna i thuak hi. Ahi zongin mi khat hang bek mahin mi khempeuh in Pasian tawh a nungta khawm thei dingin hong koih hi.

Khrih i upna tawh mawhmai-na i ngah a, mawhna, mawhna hanga i thuak ding tawntung gimna pan hong khakkhia hi. Paul in Adam le Zeisu nunzia enkak dingin hong lak hi. Adam cinzawh loh khempeuh Zeisu in kicingsak hi. Adam hangin kisiatna khempeuh Zeisu in bawlpha kik hi. Adam’ mawhna hangin mi mawh khempeuh in Khrih upna tawh hotkhiatna ngah thei hi. Mawhnei mi khempeuh aitangin Ama hong sihna in hotkhiatna bulpi hi. Amah a um mi khempeuh Jew, Gentile, deidan om lo dikna kipia-in mawhmai-na hotkhiatna ngah hi. Hihte eite lametna bulpi hi.

SUNDAY     NOV. 5

UPNA TAWH DIKTANNA

Romans 5: 1-5 sim in. Paul gente a tomin gelh in. Bang thu na nuntakpih thei diam?

_____________________________________________________________________

___________________________________________________________________

“Dik hong tangsak” cih ciangin “diktanna ngah khin” cih pulaak hi. Gamtat hoihna tawh hi lo, Zeisu Khrih i sanna tawh diktanna i ngah hi. A kicing

Zeisu nunna, mawh neilo a nunzia, kicingtakin thukham a nuntakpihte in amah a um mite aa dingin hong kipia hi. I mawhna khempeuh Ama tungah kisuan hi. Pasian in mimawhin a hong muh tangin, Zeisu mawhnei mi-in mu hi. I ngah dinga kilawm lohpi i ngah a, i ngah ding kilawm i ngah kei hi. Zeisu ahih leh thuak dinga kilawmlo hong thuak hi. Mimawhte aa ding hih sangin lungdam huai zaw bang om hiam?

Greek laimalin ‘vangliatna’ cih kammal (Romans 5:3) ‘lungdamna’ (Romans 5:2) ci-in kigelh hi. Tua hi'n hih thunihte in kizopna nei ahihlam kidawk hi. Diktanna nei khin mite’n hamsatna tuakta leh nuamna tawh kidim vive uh hi. Bang hang hiam cihleh amau upna le muanna in Zeisu Khrih bek hi. Amaute’n Pasian in na khempeuh a hoihlamin sem hi, ci-in um uh hi.

Khrih aa ding gimnate hangin angtang uh hi (1Pet. 4: 13). Romans 5: 3-5 sunga a thuluanzia a nuai bangin kimu thei hi.

Lungduai-na: Greek laimalin ‘hupomone’ hi-in a khiatna in ‘thuakzawh hatna’ cihna hi. Gimthuak, genthei mahmah taleh Khrih a upna, a lametna khuahsuah lo thuakzawhnate a pulaak kammal hi.

Phutkhakna: Greek laimalin ‘dokime’ kizangin, a khiatna in ‘nuntak hoihna’ ‘ a deihhuai zia le tong hoih’ ‘gamtat hoih a piangsak gimthuakna’ pulaak kammal hi.

Lametna: Thuakzawhna in Zeisu sungah lametna hong neisak hi. Zeisu i up laiteng, mawhna kisikin, a thu man laiteng lametna tawh kidim i hi hi.

Na dangte sangin i nuntakpih ding lametna in bang hi ding hiam?

Koi bangin tua lametna Khrih sungah hong tangtung ding hiam? Khrih sungah lametna kip na nei hiam?

MONDAY    NOV.6

MIMAWH I HIH LAITAKIN

Romans 5: 6-8 sim in. Pasian’ zia le tong bang hong hilh hiam? Banghangin lametna lianpi tawh kidim i hiam?

___________________________________________________________________

___________________________________________________________________

Adam le Eve in Pasian’ thupiak a palsat a kipan Pasian tawh kizopna nei nawn lo-in maizumna tawh kidim uh hi. Pasian tawh kizop kik nading amah mah in hong bawl hi. Mihingte hotkhiatna dingin ah Pasian mah in lampi hong sialsak hi. Tua lampi a zui dingin mi khempeuh hong sam hi. “A hun a cin ciangin Pasian in a Tapa hong paisak hi” (Gal. 4:4).

Romans 5:9 ah Zeisu tungtawnin Pasian hehna pan i suakta thei hi. Koi bangin hih thu na telthei hiam?

__________________________________________________________________

___________________________________________________________________

Egypt gam pan a paikhiat nitakun Israel mite’n kongkhak tung ah sisan baangsak uh hi. Tua in Egypt’ ta upa khempeuh tunga kibua Pasian’hehna panin suaktakna hi. Tua bang mahin Zeisu’ sisan hangin diktanna ngah khempeuh in a nunung pen Pasian’ hehna tawh kipelh ding uh hi. Mi kimkhat in itna tawh kidim Pasian in hehna nei cih thu hangin lungbuai uh hi. A taktakin itna a neih manin hehna om hi zaw hi. Itna nei Pasian in mawhna tungah heh thei kei leh, bangci Pasian hi ding hiam? Mawhnei mite a hong lunghimawh ahi diam? I nuntakna ah bang piang cihte lunghimawh lo ding hiam?

Mawhna’ suksiat na khempeuh en in. Pasian in leitungah hih zahin siatna hangin heh lo ding hiam? Bang thute hangin a lungdam dingin hong kihilh hiam? Romans 5: 10, 11.

__________________________________________________________________

___________________________________________________________

Lai Siangtho hilhcianna pawl khatte ah Romans 5: 10 in eite tungah hong kipia Zeisu nunna, leitungah Zeisu in mawhna nei lo, a kicing mihingin a hong nuntakna pulaak hi, ci uh hi. Khrih in mawhnei lo mihingin hong nungta mah hi. Paul in Khrih sihna, sihna pan tho-in a tawntungin a nuntakna hong hilh hi (Heb. 7: 25). Zeisu nungta ahih manin eite in hotkhiatna i ngah hi. Hankhuk pan tho lo hi leh a tawntungin kisia ding, lametna i nei kei ding hi. Topa sungah a lungdam ding i hi hi. Banghang hiamcihleh Zeisu in ei aa dingin a nuntakna hong pia hi.

TUESDAY     NOV  7

MAWHNA HANGIN SIHNA

Sihna in i gal hi. Pasian in mihing a hong bawlcilin a tawntungin a nungta dingin a hong bawl ahi hi. Si nuam ahi a, si nuam kei zongin mi khempeuh in gimna, natna tawh nuntakna bei hi. Sihna in nuntakna tawh kido hi. Bang hang hiam cihleh Pasian in a hong piansakin a nungta tawntung ding, sihna a thei kha lo dinga a hong bawl i hi hi.

Romans 5: 12 sim in. Paul in bang gen hiam? Bang hong hilh hiam?

_____________________________________________________________________

____________________________________________________________________

Lai Siangtho hilhcian mi kimkhat in Romans 5:12 in mundangte sangin kibuaipih zaw hi, ci’n pulaak uh hi. Tua pen bang hang hi ding hiam cihleh

Paul ngimna le a mungtup tawh kituak lo hi kha ding hi. Bang thu buaipih uh hiam cihleh bangci bangin mihing in Adam’ mawhna ngah hiam? Adam’ suanlekhakte in ama mawhna luah uh hiam? Ahih kei leh amau mawhna tekmah tawh Pasian mai-ah mimawh mahin kiciamteh hiam? Romans 5:

12 siksanin sanzia tuamtuam om hi. Ahi zongin Paul gennop thu in tua thu hi lo hi. Ama pulaaknop thu in “ mi khempeuh mimawh hi’ cih thu hi (Rom. 3: 23). Mimawh ihihlam kiphawk ding kisam hi. Bang hang hiam cihleh tua bang kiphawkna in Honpa i kitangsapna pulaak hi.

Paul hong hilhnop thu in: Adam hanga mawhna in bangzahin sia hiam?

Adam’ mawhna hangin sihna pan hong honkhia thei ding Pasian in hong Khrih a hong paisakna thu hi. Ahi zongin Romans 3:23 in Adam’ hangin mawhna hong lutna thu hi-in tua mawhna a sian nading a pulaakna hi lo hi. Lungdamna Thu a vangliatna khat in nuntakna sungah sihna beimang hi.

Zeisu in sihna zo-in “ Ke in a nungta mipi ka hi hi. Kei ka si ngei hi. Ahi zongin tu-in hong en in, a nungta tawntung ka hi hi. Sihna le misite omna gam keima khutnuai ahi uh hi” Mang. 1:18. Bang hang hiam cihleh Zeisu in sihna zo ahih manin sihna in Amah uk thei lo hi.

Sihna thu bangci bangin na tuak ngei hiam? Bang hangin khawl hun nei lo sihna sangin a lian zaw lametna, na khempeuh sangin a vanglian zaw siksan ding kisam hiam?

WEDNESDAY NOV. 8

ADAM PANIN MOSES DONG

Romans 5: 13, 14 sim in. Paul in thukham thu bang pulaak hiam?

______________________________________________________________

_________________________________________________________________

“Thukham hun hong tun ciangin” cih thu in “ Adam panin Moses” cih kammal tawh kibang hi. Paul in bang gen hiam cihleh piancil panin Sinai ciang dong, hih hunin Israel mite tungah thukhun le biakpiakna thukhamte kipia nai lo hi. Hih sungin Moses tungah Thukham 10 kipia nai lo hi. Ahih hang Sinai ma-in mawhna om khin hi. Koi bangin? Moses tungah Thukham 10 kipiak ma-in zuau genna, thahna, numei pasal mawhna, milim biakna cihte in mawhna hi, ci-in kiciamteh hiam?

Sinai ma-in mihingte in Pasian piak thute theikim lo uh hi. Mawhna theihna ciang bek mah kihilh hi. Pasian pen a thuman Pasian ahih manin kuama tungah thuman lo-in thukhen lo hi. Sinai ma-a mite si uh hi. Sihna in mi khempeuh tungah hong tung hi. A malmalin Pasian thukham a piak nai loh hangin Sinai ma- mite mawhnei lo om lo hi. Piansak nate tungtawnin Pasian kilaak napi amaute in a thu don kei uh leh mawhna hangin thukhenna thuak ding uh hi. “ Pasian in leitung a piansak cil a kipanin a kimu thei lo ama pianzia ahi tawntung vanglianpa le Pasian ahihna thute ama bawlsa nate tung panin teltakin hong kilang hi. Tua ahih manin “Thei kei ing” ci-in paulap a zontheih nading uh om lo hi.” Romans 1: 20, 21.

Pasian in bang ngimna tawh thukham tungtawnin hong kilaak hiam? Romans 5: 20, 21.

____________________________________________________________

____________________________________________________________________

Thukham 10 om khin hi taleh Sinai tung a kipia thukhunte lak ah Thukham 10 zong kihel hi. A kisim thei dingin Thukham 10 kigelh khia-a Israelite mite’n a muh uhteh mimawh, mawhna tawh kidim, mawhna sungah nungta ahihlam uh kiphawk thei uh hi. A mawhna uh mu thei uh hi. Honpa kitangsam ahihlam kiphawk uh hi. Tua panin Pasian hong piakkhong hehpihna sang thei dingin lamhilh hi. I pulaaksa bang mahin Thuciam Lui in upna siksan hi. Thukham siksan lo hi.

Koi bangin gam sung thukhunte in sia le pha hong khentelsak thei hiam? Kumpi’ thukhunte in tua bangin a hoih le a sia khentel theihna hong pia ahih leh a kip tawntung Pasian Thukham 10 in bangzahin hong theisak hiam?

THURSDAY                 NOV. 9

ZEISU, ADAM NIHNA 

“ Tua ahih manin mi khat thu palsatna hangin mi khempeuh tungah mawhsakna thukhenna a hong tung hi. Tuamah bangin mi khat diktatna hangin khawnkhong letsong mi khempeuh tungah tunga, tua in nuntakna tawh kipawl diktannsakna a piangsak hi.  Bang hang hiam cihleh mi khat thumanlohna in mi tampi mimawh a suahsak bangin mi khat thumanna in mi tampi midik a suaksak hi.” Romans 5: 18, 19. A kibang lo thu nih bang pulaak hiam? Khrih sungah lametna bang hong kipia hiam?

          ____________________________________________________________________

          ___________________________________________________________________

Mihing in Adam tung pan sihna simloh bangmah ngah lo hi. Ahi zongin Khrih in Adam dinmun ah hong om in, mi khempeuh aa dingin ze-etna khempeuh zozo hi. Adam kiang pan hong pai siatna, mawhna, supna khempeuh panin hong honkhia hi. Tua hi-in eite tangin Pasian’ hehna Khrih in hong tuak hi. Tua manin Amah pen Adam nihna  kici hi.

          “Adam Nihna in sia le pha khentel theihna nei hi. A gamtat bangin a gah at hi. Adam masa bang lo-in siatna khempeuh in a tuamcip hangin mawh lo hi. Ze-etna khempeuh kantan zo hi. Mawhna tawh Ama dikna kisia-sak lo hi. Amah bek mah mawhnei lo hi.” Ellen G. White, The SDA Bible Commentary, vol. 6., 1074.

          Koi bangin Adam’ gamtat le Khrih’ gamtatzia kipulaak hiam? Romans 5: 15-19.

          _____________________________________________________________________          ____________________________________________________________________

Hih munah a kilangneih thute ngaihsun in: sihna, nuntakna; thumanlohna, thumanna; mawhsakna, diktanna; mawhna, mawh nei lo.  Adam thupal khempeuh Zeisu in zui hi. Adam diklohna khempeuh Zeisu in nei hi. Romans 5: 15- 17 sungah piakkhong cih kammal 5 vei bang kimu hi. Paul hong hilh thu in diktanna, mawhna neihlohna pen gamtatna tawh kithalawh thei ding hi lo hi. Piakkhong hi. Ngah dingin i kilawm kei hi.  Letsong hong kipiak ciangin i san mah bangin diktanna zong upna tawh i san dinga hong kipia hi.

         

Letsong na ngah a hoih penpen bang hiam?Bang in tua letsong hoihsak hiam? Thalawh hi lo, piakkhong hi ta leh, bang zahin na nuam veve hiam? Ahi zongin tua sangin Khrih hong piak khong letsong tawh tehthei ding na hiam?

FRIDAY  NOV. 10

NGAIHSUTBEH DING: Sim ding Ellen G. White, “Help in Daily Living,” 470–472, in The Ministry of Healing; “ Christ the Center of the Message,” 383–384 in 5SM; “The Temptation and Fall,” 60 – 62 in Patriachs and Prophets; “Justification,” 712 – 714 in The SDA Encyclopedia.

“Mi tampi in amau lungsim theitel lo uh hi. Mihing lungsim in na khempeuh sangin sia mahmah ahihna tel lo uh hi. Amau le amau hoih kisa ciat uh a, mihing hoihna pen hoihna taktakin ngaihsun uh hi.” Ellen G. White, 1SM., 320.

Khrih bek in lametna le hotkhiatna lampi hi, ci-in pulaak ding kisam pha mahmah hi. A dangtak khualzin mi khat in tui a muh mah bangin upna tawh diktanna kingah hi, cih thu in hong tawldamsak hi. Khrih in Ama dikna a hong silhsak theihna pen i gamtat hoihna hang lo hi; Pasian’ hong piakkhong taktak hi, cih thu in manpha mahmah hi.” Ellen G. White, 1SM., 360. Khrih in bangci bangin hong nungta hiam? Koi bangin Adam in Khrih pulaak hiam? Adam khit a mihingte in nekloh ding singgah a nek loh uh hangin Adam mawhna hangin mimawh kisuak khin hi. A ngah dingin kilawm kei taleng Khrih a hong pai manin Ama dikna i ngah hi. Bang hang hiam cihleh Khrih in Singlamteh tungah eite tangin mawhna thaman hong thuak hi. I sungah Khrih a hong nuntak manin Ama dikna eite dikna hong suak hi. Ama kicinna eite kicinna hong suak hi.’ Martin Luther, Commentary on Romans, 96, 97.

KIKUP DING DOTNATE

“Pasian kammal Lai Siangtho tatsat lo-in sim kul hi. A diakdiakin nidang sangin tuhunin Daniel le Mangmuhna sim huai mahmah hi. Roman vangliatna, papacy vangliatna cihte deihkaih theih hi lo hi. Kha Siangtho makaihna tawh kamsangte, sawltakte hong hilh thute limtak ngaihsut ding kisam hi.” Ellen G. White, Evangelism, 577. Koi bangin hih thu na tel hiam?

Sihna thu ngaihsun in. Nuntakna thu bek hi lo-in nuntak manneihna zong hong hilh hi lo hiam? Mi pil tampi in nuntakna in a mawkna hi; tawntung sihna manawhin kinungta hi, ci uh hi. Koi bangin na mu diam? Bang hangin Khrih sungah lametna bek in nuntakna mannei-sak hiam?

Adam mawhna in mi khempeuh tungah mawhna hong tun manin, Zeisu in nuntak tawntungna hong pia a, hih thu upna tawh i san kul hi. I mai-ah hong kilui suahtak theihna lampi zui dingin bang in hong khaktan hiam? Koi bangin mite’n hih thu a theihtel nadingin huh ding na hiam?