LESSON 4 ( OCT. 21 – 27 ) UPNA TAWH DIKNA

LESSON 4                 OCT. 21 – 27

                     UPNA TAWH DIKNA

  

TU KAAL SUNG SIM DING: Rom. 3: 19 -28.

KAMNGAH: “Bang hang hiam cihleh mi khat peuh Pasian tawh a kipawltheihna pen Thukham zuihzawhna hang hi lo-in upna hang hi,ci-in i gen zo hi.” Romans 3: 28.

Tu kaal sung kikup ding thu in Romans sung a thu guipi –upna tawh diktanna cih thu hi. Thu dangte sangin hih thu hangin pawlpi kipuahphatna (Protestant Reformation) hong piangkhia hi. Pope Leo in AD 1520 kumin Martin Luther a mawhsak thute tuni dongin kikhel lo hi. Luther in upna tawh dikna thu hilh nawnlo dingin kipia hi. Luther in tua a ngah thupiakna lai-te haltum hi. Mawhnei mi in thukhenmang pa mai-ah thusitna thuak hi. A thu palsatna thaman tu-in a thuak ding hi ta hi. Upna tawh diktanna kingah hi, cih thu khel in thu dang pulaak dingin Luther in Pope’ thupiak zui zo lo hi. Thukham palsat mi khat in gimthuak ding hi ta hi. Ahi zongin mawhnei pa aitangin a nuntakna hong khaam khat om ahih manin thukham palsat mi in suahtakna ngah hi. Ama aitangin sihna thuak mipa a san manin thukhen pa mai-ah, cikmah hunin a mawh ngei lo bangin om thei hi.

A mawhmi aitangin a hong kipumpiak khat a om manin mawhneilo hongsuak hi. Mawhnei mi tangin a hong kipia mi in kicinna tawh kidim hi. Mawhnei lo, kicinna tawh kidim hi taleh mawhnei mi aa dingin thukhenna hong thuak hi. Ama dikna eite hong pia-in eite diklohna khempeuh amah kisuan hi. Gamtat hoihna hang hi lo, upna tawh a hong piak Ama dikna i san ciangin Pasian mai-ah midikin i om hi. Bang zahin lungdam huai hiam? Hih sangin lungdamhuai zaw bang om diam?

SUNDAY         OCT. 22

THUKHAM SIKSAN GAMTATNATE

Romans 3: 19, 20 sim in. Paul in thukham tawh kisai bang pulaak hiam? Thukham in bang sem a, bang sem thei lo hiam? Bang hangin Khristian khempeuh in a tel ding thupi hiam?

____________________________________________________________

___________________________________________________________

Paul in thukham thu a gen ciangin ama hun a Jew mite mah bangin tampi huam hi. Thukham (Torah) in Piancil pan Thuhilhkikna, Moses gelh bu 5 banah Thuciam Lui khempeuh huam hi. Hih sungah Thukham 10 kihel hi. Tua hi-in thukham in Judaism biakna tawh kisai hi, ci uh hi. Thukham nuai-ah om cih ciangin thukham ukna sungah om cihna hi. Thukham in Pasian’ mai-ah mihing kicinlohna hong phawksak hi. Thukham in tua kicinlohna hong hepsak thei lo hi. Kicinna lampi hong lak bek hi. Romans Jew thukham in tu-in kisam nawn lo ahih manin thukham 10 kiplai ahihzia hong hilh hi zaw hi.

Judah thukham in Jew mite a hotkhiat theih loh mah bangin Thukham 10 in zong mawhna sung pan hong hon lo hi. Thukham’ nasep in hotkhiat nasep hi lo hi. Thukham’ nasep in Pasian’ zia le tong pulaakin, mawhnei mi i hihlam hong hilh hi. Kuamah in Thukham 10 hi taleh biakna thukhamte zuihna tawh Pasian mai-ah midik hihna ngah thei lo hi.Thukham in midik i suah nadingin nasem ngei lo hi. I pumpi tungah natna khat i neihteh natna neihlam kitheihna in damna hong pia lo-a, siavuante kiang kilak ding hong phawksak hi. Tua mah tawh kibangin thukham in mawhmai-sak lo a, i mawhna hong lakin Khrih kiang zuan ding hong phawksak hi.

Thukham zuihna-ah kicingkhin na kisa hiam? Thukham zuihna in mawhna pan midik hong suaksak theihlohzia na phawk hiam?

MONDAY    OCT. 23

PASIAN DIKNA

“Ahih hangin Thukham le Kamsangte in teci a pan bangin Pasian in thukham lo-in a hong piak dikna tu-in a hong kilang zo hi.” Romans 3: 21. Hih thu koi bangin telthei ding i hiam?

Pasian' hong piak dikna le Jew mite’ lamet thukham zuihna tungtawnin dikna kibang lo hi. Pasian kiang pan dikna in dikna taktak, a siangtho dikna hi. Zeisu in mihingin hih leitungah a hong nuntak lai-in Pasian kiang pan dikna tawh hong nungta hi. Tua dikna kitangsam i hih manin, mi khempeuh tungah hong pia-a, ngah dingin kilawm lopi mah a, upna tawh Ama dikna hong kipia hi.

“Dikna i cih in thukham hong sawl bangin nuntakna hi. Thukham in dikna kal hi. Mawhnei mi in dikna leiba nei hi. Ahi zong tua leiba loh zo lo hi. Tua dikna leiba loh zawh nading lampi khat bek om a, upna tawh Pa Pasian kiang i zuat ciangin Khrih dikna le Ama thumanna mawhnei mi aa dingin hong pia hi. Mawhna dim mihing’ nunna mun ah Khrih’ dikna in mun hong lak takteh i mawhna kimu nawn lo-in Ama dikna bek kimu hi. Mawhnei mi in mawhna kisikin, mawhmai-na a ngahteh dikna puan bangin kisilhsak a, Pa Pasian in a Tapa a it bangin hong it hi.” Ellen G. White, 2SM., 367. Koi bangin a lamdang hih thu na sang hiam?

A lunghem lo muanna, Khrih sungah om upna na sungah hong om hi. Khristian nuntakna-ah upna in a thu-in theihna bek hi lo hi. Upna i cih in Khrih’ thu le a nunzia, a hong sihna thute theihtelna sangin thuk zaw hi. Upna i cih in Khrih in Honpa, kei aitangin hong si, kei dinmun ah hong kipia, ka Topa hi, ci-in Ama nun bangin nuntakna hi. Upna i cih in Amah muanna hi. Upna i cih in a Thupiak bangin nungta dingin Ama kiang zuatna hi.

TUESDAY     OCT. 24

“ HONG HEHPIHNA TAWH”

Thukham ii sep theih le septheih loh thute ngaihsun inla Romans 3:

24 sim in. Paul in bang gen hiam? Zeisu sung bek ah hotkhiatna om hi, cih thu in bang pulaak hiam? Dikna cih kammal in bang pulaak hiam?

____________________________________________________________________

___________________________________________________________________

Greek laimalin ‘dikaioo’ a khiatna in ‘dikna’ ‘siangthosak’ ‘siangtho hi ci-in pulaak’ ‘siangtho-in ngaihsun’ cih khiatna nei hi. “Dikaioo’ kammal in

‘dikaiosune’ ( siantho-na), ‘kikaioma’ ( siantho kul) cihte tawh a deihna kibang hi. Tua hi-in ‘dikna’ le ‘siantho-na’ in tonkhawm hi. Pasian in siangtho hi, ci-in a hong pulaak ciangin dik hong tangsak hi. Tua-ma-in siangtho lo, santhamcing i hi kei hi. A hong diktansak khitteh santhamcing kisuak pan hi. A hong hehpihna hang bekin midik hong hi sak hi.

Hehpihna i cih in maipha ngahna hi. Pasian i vazuat ciangin hehpihna bek in midik hong suaksak thei hi. Ngah dingin kilawm lopi Pasian’ maipha ngah i hi hi. Mihingin diktan a ngah nadingin hoihna, phatna khat beek nei lo hi. A cihmawhna simloh bang mah nei lo hi. Khrih in amah kiang a zuan mi khempeuh diktangsak hi. Mimawh mi dinmun ah amah mah hong kipia-in a hong sihna hangin mihing in hotkhiat ngah thei hi. Diktanna hun ciangtanlo, mi khat in bangzahin mawhin khial taleh Khrih kiang a zuatteh diktanna ngah hi. Dikna ngah nadingin singlamteh tungah Khrih in a nuntakna hong pia khin hi. Tu-in diktangin i om theihna a hang in diktang mi hi khinta i hih man hi (Rom.5:1). Diktang mi hi khin napi i khialh khak ciangin Khrih kiang a zuan kik mi in dikna ngah ding hi. Nisim in thaksuah ding kisam hi. Dikna in nuntakpih tawntung ding hi.

Hotkhiatna in thu hoih,lungdam huai thu hi napi, hotkhiatna sang dingin bang in hong khaktan hiam?Topa’hong piak kamciamte ngah dingin bang in hong dal hiam?

WEDNESDAY     OCT.25

KHRIH’DIKNA

Paul in hotkhiatna thu a genbehna Romans 3: 25 kimu thei hi. “ Pasian lungkim nading” (propitiation) kammal hih mun bekah kizang hi. Greek laimalin ‘hilasterion’ hi-in, Hebrews 9:5 ah ‘hehpihna tokhom’ ci-in kigelh hi.

Khrih tungtawnin hotkhiatna le diktanna kingah hi. Thuciam Lui biakbuk sunga hehpihna tokhom in hih hotkhiatna limcing hi. Khrih a hong sihna hangin a hong kitatkhiat nadingin sep dinga kisam khempeuh Pasian in hong sem hi.

Hotkhiatna-ah mawhmai-sakna kihel hi. Pasian in mawhna sang zo lo hi. Mawhmai nading Khrih' sisan i up ciangin mawhna khempeuh beisiang hi. Mawhmai cih kammal Greek lai-in ‘paresis’ kizang a, a khiatna taktak in ‘paisan’ ‘kantan’ cihna hi. Mawhna awlmawh lo cihna hi lo hi. Pasian in i mawhna khempeuh hong phiatkhiatsak hi. Bang hang hiam cihleh Khrih in mawhmai nadingin a nuntakna hong pia hi. Ama sisan a um mi khempeuh in mawhmai-na ngah ding hi. Bang hang hiam cihleh Khrih in mawhnei mi aa dingin hong si hi (1Kor. 15:3).

Romans 3: 26, 27 sim in. Paul in bang pulaak hiam?

_____________________________________________________________________

___________________________________________________________________

Paul in mi khempeuh tungah a hong gennop lungdamna thu in Pasian in Ama siantho-na mite tungah hong pia hi, cih thu hi. Tua siantho-na in gamtatna, sepna tawh kingah hi lo-in Khrih in Ama sep khempeuh i upna tungtawnin hong kipia hi. Singlamteh hangin Pasian in mimawh khat misiangtho-in hong ciamteh hi. Satan in Pasian a mawhsak ding om lo hi. Bang hang hiam cihleh mihingte a hong tatkhiat nadingin Pasian in sit khat beek nei lo hi. Satan in Pasian mawhsak hi. Bang hang hiam cihleh mihingte hotkhiat ngah ding kilawm lopi, honkhia hi, ci hi. Singlamteh in Satan mawhsakna nial hi.

Pasian in mihingte a mawh a kipan susia dingin Satan in ngaihsun hi. Satan’ lamet bang hi lo-in Pasian in mawhnei mi hon dingin Zeisu hong sawl hi. Hih in Pasian’ zia le tong bang pulaak hiam? Pasian’ zia le tong i theihna in i nunzia hong huzaap ding hi lo hiam? Pasian’ nunzia na theih a kipan na nunzia hong kilamdang ding hi lo hiam?

THURSDAY     OCT. 26

THUKHAM BANGIN GAMTATNA HI LO

“Tua ahih manin mi khat in thukham zuihna tawh hi lo-in upna tawh diktansakna a ngah hi, ci-in thu i khum hi.” Romans 3: 28. Thukham in mawhna sung pan hong honkhia thei lo ahihteh thukham kisam lo cihna hiam? Na telzia pulaak in.

_____________________________________________________________

__________________________________________________________________

Judaism tawh kisai Paul in thukham thu a gen ciangin thu tampi huam hi. Jew mi khat in bangzahin thukham zui taleh, Zeisu in Messiah hi, ci-in a up kei leh a gamtatna tungtawnin hotkhiat ngah lo ding hi. Upna tawh thukham zuihna in gamtat hoih kisialhpih lo hi (Romans 3: 28). Gamtatna in dikna hong pia hi leh kisialh om ding hi. I up Zeisu in dikna hong pia hi zaw hi. Mihing' gamtatna hi lo-in, mawhnei dik hong tangsak Pasian hi zaw hi.

Ellen G. White in “upna tawh diktanna i cih in bang hiam? cih dotna hih bangin dawng hi. “ Pasian in leivui panin a bawl mihing tungah vangliatna pia-a, mihing in ama tha tawh a piang thei lo ding Pasian in hong sepsak hi.” Ellen G. White, Testimonies to Ministers and Gospel Workers, 456.

Thukham bangin gamtatna in mawhna maisak thei lo hi. Khrih hong sihna bek in mawhmai-sakin hong diksak hi. Gamtatna tawh diktanna kingah lo hi cih thu in, mihing in amah le amahin midik hi thei lo cihna hi. Ahi zong Khristian tampi in hih thu telkhial uh hi. Um lehang gamtatna, thumanna, thukham 10 cihte kisam lo hi, ci uh hi. Paul thugente telkhialhna panin hih bang ngaihsutna hong om hi. Romans sung le Lai Siangtho mundangte ah Paul in thukham 10 kisam hi,ci-in hong hilh hi. Zeisu mahmah in zong thukham 10 zui hi. John le James in zong zui hi (Matt. 19: 17; Rom 2: 13;

James 2: 10, 11; Mang. 14: 12). Thukham tawh dikna kingah a hihloh hangin upna tawh diktanna ngah mi in Pasian thukham 10 nuntakpih hi. Upna bek tawh thukham kizui thei bek hi. Suahkikna lo-in diktanna ngah lo-in thukham deihna kicingsak ngei lo ding hi.

Bang hangin thukham in hong hon thei lo ahih leh thukham kisam nawn lo hi, ci-in kingaihsun hiam? Upna tawh diktanna kingah hi, ci-in mawhna thusim lo-in na om hiam? Bang hangin mawhna thuneu ngaihsutna in lauhuai hiam? Ahi zongin tawntung nuntakna kamciam om lo hi leh upna in bang manphatna nei diam?

FRIDAY     OCT. 27

NGAIHSUTBEH DING: Sim ding Ellen G. White, “The Righteousness of

Christ in the Law,” 236 – 239; “Come and Seek and Find,” 331 – 335; “Perfect Obedience Through Christ,” 373, 374 in 1SM., “ Things New and Old,” 128, 129; in Christ’s Object Lessons.

“Thukham in mawhmai-sak thei lo hi. Leiba le mawhna hong phawksak thei bek mah taleh mawhna kisikin, Khrih' hehpihna a um mi khempeuh mawhmai hi, cih hong kamciam khin hi. Pasian’ hong itna in mawhna hong kisiksak hi. Pa Pasian tawh Pasian hihna kibang Khrih’ hong sihna bek in mawhna maisak thei hi. Khrih nasep – a nunna, a hong kiniamkhiatna, a hong sihna, eite a ding hong thuumsak cihte in thukham tawisangin deihhuai-sak hi.” Ellen G. White, 1SM. 18.

“Khrih in ama gamtat zia le tong nangma zia le tong tawh hong laihsak hi. Tua manin Pasian in cikmahin a mawh ngei lo bangin hong sang hi.”

Ellen G. White, Steps to Christ, 62.

“Paul in gamtatna tawh dikna kingah lo hi, ci-in a pulaakteh, upna le hehpihna nasep a gen hi lo hi. A upna bangin a gamta mi in gamtatna tawh dikna ngah ahih lohlam phawk hi. A upna bangin a gamta mi in diktansakna ngah ding hi. Gamtatna a suang mi in a gamtatna tawh amah le amah midikin kingaihsun hi. Gamtat hoih ahih manin dikna kisamsa lo hi. A gamtat hoihna tawh dikna ngah dingin a gamtat kisialhpih hi.” Martin Luther, Commentary on Romans, 80.

KIKUP DING DOTNATE

1.   Tu kaal sung a thute a deihna bulpi gelh inla, na lawmte tawh kikum in. Amau gelhte zong ciamteh in.

2. Martin Luther’ pulaak thu (Friday ni ) ngaihsun in. Bang hangin gamtatna hi lo, upna tawh diktansakna kingah hi, ci-in pulaak thei hiam? Bang hangin hih thu in tuni dongin thupi hiam?

3. “SDA pawlpi in Reformation (Pawlpi kipuahphatna Lianpi) a zuite

hi; hehpihna hangin upna tawh dikna kingah hi; Hotkhiatna bucing a tangko a umte hi." Ivan T. Blazen, “Salvation” Handbook of SDA Theology (Hagerstown: Review and Herald, 2000), 307. SDA pawlpi in bang siksanin hih thu um hiam?