LESSON 2 ( OCT. 7 – 13 ) KIDO-NA LIANPI

LESSON 2               OCT. 7 – 13

            KIDO-NA LIANPI

   

SABBATH NITAK

TU KAAL SUNG SIM DING: Heb. 8:6; Matt. 19: 17; Mang. 12: 17; Siam. 23; Sawl. 15: 1-29; Gal. 1: 1-12.

KAMNGAH: “Bang hang hiam cihleh Moses tungtawn in thukham hong kipia a, ahih hangin Zeisu Khazih tungtawnin hehpihna le thuman thutak hong pia hi. John 1: 17.

Pawlpi masate sungah Jew tampi kihel uh a Zeisu in Messiah hi, ci-in um uh hi. Zeisu in Messiah hi, cih upna in a pu a pate uh upna nusia,

Pasian in A mite tungah a thuciam le a kamciamte panin lampialna hi, ci-in ngaihsun lo uh hi. Hih pen ahi mah hi. Jewte buaipih thu in mi khat in Jesuh a up nadingun Khristian suah masak kul hi. Gentile mi khat in Khrih nung a zuihma-in Jew mi a suah masak kul hi, ci uh hi. Hun khat khitteh Jerusalem Council panin Gentile mite’n Zeisu nungzui a hih nadingun Jew mi suah masak kul lo hi, ci-in kipsakna nei hi. Tua bangin khensatna om khin hi napi mi kim khat in Gentile mite’n hotkhiatna a ngah nadingun vun at a kipan Jew thukhamte a zuih uh kul hi, ci teitei uh hi. Gentile mite’n thuciam le kamciam a ngah nadingun Israel mite mah bangin biakpiakna le thukham a zuih uh kisam hi cih thu koi bangin lemtuah uh hiam?

SUNDAY          OCT.8      

A HOIH ZAW THUCIAM

Heb. 8:6 sim in. Bang hong hilh hiam? Koi bangin “A hoih zaw thuciam” na telthei hiam?

____________________________________________________________

______________________________________________________________

Nazareth khua mi Zeisu kici Messiah a pianna thu in Thuciam Lui sunga biakpiaknate le Thuciam Thak sung a biakna kilamdangsak hi. Amah pen Honpa dingin Pasian hong sawl ahi hi. Amah a nial peuh mah in hotkhiatna ngah ding lam et om lo hi. Ama hong sihna hang bekin tawntung nunna ngah dingin mawhmai-na ngah thei i hi hi. A hong silhsak Ama dikna bek in Pasian mai-ah mawhnei lo-in hong omsak hi. Zeisu' dikna bek in eite hong honkhia hi. Tua lo hong hon ding om lo hi.

Moses le kamsangte’ hun lai-a mi siangthote in Messiah hong pai ding lamen tawntung uh hi; hotkhiat kamciam mitsuanin nungta uh hi. Sawltakte hunlai-in Nazareth khua-mi Zeisu in Pasian hong sawl Messiah, amaute Honpa dingin a sang takpi uh hi diam, ci-in mi tampi in dong uh hi. Amah a um mi khempeuh, Amah tawh a nungta khawm khempeuh, Ama tungah kipia khempeuh in a hong piakkhong dikna hangin hotkhiatna ngah ding uh hi. Tua hi-in Ama hong hotkhiatna ngah mi khempeuh in Thukham 10 zui uh hi. Bang hang hiam cihleh Thukham 10 in Pasian’ zia le tong, Khrih’ nunzia hong lak ahih manin Thukham 10 kip tawntung hi.

Matt. 19: 17; Mang. 12: 17; 14: 12; James 2: 10, 11 sim in. Thuciam

Thak in Pasian Thupiak 10 tawh kisai bang hong hilh hiam?

____________________________________________________________

_____________________________________________________________________

Biakpiakna tawh kisai thukhamte, thukhunte in Thuciam Lui thupiakte'n Israel minam hihna pulaak hi mah hi. Zeisu hong sihna le Siampi a hongsepna limcingkholh biakpiakna tawh kisai thukhamte kisam nawn lo hi taleh, biakpiakna thukhamte sangin a hoih zaw kamciam siksanin thupiak thak a zui i hi hi.

Paul in ngimna bulpi tuamtuam siksanin Roman a gelh hi-in, Jew le Gentile mite’n Judaism panin Khristian biakna hong piankhiatna a tel nading uh ngimna zong kihel hi. Jew tampi in Zeisu sang taleh kikhelna om dingin kiging nai lo uh hi.

Lai Siangtho kamciam teng pan na deih deuh a om hiam? Koi bangin tua kamciamte na nuntakpih hiam? Na nuntakna ah tua kamciamte a tangtun nadingin bang khensatna nei na hiam?

MONDAY OCT. 9 

JEW TAWH KISAI THUKHAMTE LE THUKHUNTE

Siampi Laibu sim in. A lian 12, 16, 23 cihte limtak sim in. Biakpiakna thukhamte'n bang hong phawksak hiam? Bang hangin Zeisu hong sihkhit ah biakna thukhunte kisam nawn lo hiam?

_____________________________________________________________

__________________________________________________________________

Thuciam Lui sunga thukhamte hih bangin kikhen thei hi: ( 1) Thukham 10 (nunzia hong hilh thukham) (2). Biakpiakna thukham ( 3) Gam ki-ukna thukham (4). Thukhenna tawh kisai thukham (5). Cidamna thukham

Thukham tawh kisai i tel nadingin hih bangin kikhen hi a, a taktakin khat le khat kizom bilbial uh hi. Nidanglai-in tua bangin khen lo uh hi. Thukham 10 in nunzia ding khempeuh hong hilh hi. Tua thupiak 10 i tel nadingin Piancil pan Thuhilhkikna sungah thupiak tuamtuam tawh hong kihilh kikkik hi. Hih thukham 10 in na khempeuh huamkhin hi. Gam ki-ukna tawh kisai thukhunte zong hih thukham 10 tungah kinga hi. Khat le khat kizopzia ding, ukna nei-te tawh kizopzia ding cihte zong hong hilh hi. Tua thukhun a palsatte thuak ding gimnate zong kipulaak hi.

Biakpiakna thukhamte in meihal biakpiakzia ding, biakpiakna tuamtuam piakzia ding le mimal sep ding thute pulaak hi. Biakna pawite le pawi bawlzia ding zong pulaak hi. Biakpiakna pawi bawl ni dingte zong kipulaak hi. Tua ni ciangin sep ding le sep loh dingte zong kigelh hi.

Cidamna thukhamte in biakpiakna thukhamte tawh kibatna tampi nei hi.

Biakpiakna ah kihel lo ding a sianglo tawh kisai-in zuih ding thukhun zong om hi. Ahi zongin cidamna thukham, siantho-na thukhamte in cidamna le siantho-nate sangin thu thuk zaw hi. Sa siang le sa sianglo thukhunte in pumpi taksa cidam nading bulphuhin a hong kipia ahi hi.Hih thukhamte in Pasian thupiak hi-in, Jew mite’n tua thukhamte lomkhat sakhat bangin ngaihsun uh hi.

Pasian in Thukham 10 mi khempeuh tungah a piak hi. Biakpiakna thukhunte in, biakbuk a om laiteng kizang hi. Gam thukhunte ahih leh Jew mite in namdangte’ khut sungah om in, saltangin a om uh a kipan, kizang thei nawn lo hi. Biakbuk a suksiat a kipan biakpiakna pia thei nawn lo uh ahih manun biakpiakna thupiakte a maimangsuak hi. Tua banah Messiah hong pai ciangin tua biakpiakna thukhamte kul nawn lo hi.

TUESDAY OCT. 10

MOSES THUPIAK BANGIN

Sawl. 15:1 sim in. Bang in kipawlna susia hiam? Bang hangin mi kim khat in tua thupiak in Jew mite aa ding bek hi lo hi, ci-in pulaak uh hiam? Pian. 17:10.

___________________________________________________________________

_____________________________________________________________________

Sawltakte in Antioch pawlpi makaite le thu-um mite tawh khut kilenin na a sepkhop uhteh mi tampi in thu-um mi suak uh a, Judea gam pan Jew mi Pharisee kimkhat in pawl sungah buai-na hong tun uh hi; Gentile mite’ zaknop thu hi lo hi. Tua Pharisee-te’n a hong hotkhiat ngah nadingin vun at kul a, biakpiakna thukham khempeuh zuih kul hi, ci uh hi. Biakna makai dingin Pasian’ teltuam Jew mite’n, a minam hihna uh siksanin Pasian' maipha ngah dingin kingaihsun uh a, tua mah kisak theihpih uh hi. Khrih Honpa-in a sankhit uh hangin Jew kimkhat in tua bang lungsim pomlai veve uh hi. Pasian in tua bangin a thupiaksa cihmah hunin khel lo ding hi, ci-in ngaihsun uh hi.

Jew biakpiakna tawh kisai thukhun tuamtuamte Khristian biakna sungah kizang dingin hanciam uh hi. Biakpiakna thukhunte in Khrih hong sih ding limcing khol ahih manin Khrih a hong sihkhitteh tua thukhamte kisam nawn lo hi, cih thu thei thei lo uh hi.

Sawl. 15: 2- 12 sim in. Koi bangin tua buai-na lemtuah uh hiam?

_____________________________________________________________________

____________________________________________________________________

Pawlpi tungah kipia thuneihna a phawk mah bangin Paul in a nasepnate-ah Pasian’ makaihna lamen tawntung hi. Vai thupi khat peuh a om ciangin makaihna kisam tawntung ahihlam phawk ahih manin tua bang ciangin pawlpi tungah pulaakin, thu-um mite kipum khatin Pasian kiang pan pilna le khensatna hoih ngenkhawm uh hi.” Ellen G. White, The Acts of the Apostles, 200.

Paul in tatkhiatna thu tangko dingin Zeisu’ sapna ngah a, a masuan dingte a kipan mun tuamtuam a om pawlpite tawh na a sepkhopnopna pulaak hi. Minamte kiangah nasem dingin sapna a ngahlam kitel hi. Tua dingin zong a hih theihzahin sem hi.

Koi bangin pawlpi kimakaihzia na mu hiam? Bangci bangin makaite na panpih hiam?Bang hangin mapankhop thupi hiam? I ut bang tekin gamta lehang pawlpi nasep a mazang diam?

WEDNESDAY  OCT. 11

GENTILE THU-UM MITE

Sawl. 15: 5 – 29 sim in. Jerusalem council in bang khensat hiam? Bang siksan uh hiam?

___________________________________________________________________

____________________________________________________________________

Jerusalem Council in Judah biakna makaite’ ngaihsutna tawh a kilehbulhin thukhen uh hi. Judah makaite'n “Gentile thu-um mite’n vun-at uh hen; biakna thukhamte, Jew thukhamte zui uh hen,” ci uh hi. Ellen G. White, The Acts of the Apostles, 189.

Peter in biakna thukhamte puakzawh loh vangik tawh genteh hi (Sawl. 15:10). Topa in tua thukham vangik dingin a mite a piak ahi diam? Vangik ding a kipia hi lo hi. Thupha a hi dingin kipia hi napi biakna makaite’n vangikpi suah uh hi. Jerusalem biakna makaite’n hih vangik panin Gentile mite suaktasak dingin ngaihsun uh hi. Gentile mite’n Thukham 10 zuih kul lo hi, cihna om lo hi. Sisan nek ding kiphal lo ahih leh mithahna, numei pasal paktatna cihte zong kiphal ding hiam?

Gentile thu-um mite zuih ding bang thu kipia hiam? Bang hangin kipia hiam? (Sawl. 15: 20, 29).

___________________________________________________________________

___________________________________________________________________

Jew thu-um mite’n amau ngeina le thukhunte Gentile-te’n zong zui ding a sawlloh uh hangin Zeisu sungah Gentile mite tawh pumkhat ahihna-uh a susia thei khempeuh a pelh ding uh kisam hi. Gentile thu-um mite’n milim biakna-ah kizang an ne lo ding, numei pasal paktatnate pelh ding, sisan ne lo dingin sawltakte le upa-te’n hilh uh hi. Mi kimkhat in Sabbath thupiak kihel lo ahihteh Gentile thu-um mite’n Sabbath kul nawn lo hi,ci uh hi. Tua bang hi leh, mi thahna, a manlo teci pang lo ding cih thupiakte kihel lo ahihteh mi thah thei, zuau puak thei cihna pah lo hi.

Pasian’thupiak hilo, pupa ngeinate vangik i suaksak hiam? Koi bangin Pasian thukham 10 vangik suaksak i hiam?

THURSDAY OCT. 12

PAUL LE GALATIA PAWLPI MITE

Galatia pawlpite thuman hoihtak kihilh hi napi, mi pawl khat in amau hoihsak bangin gamta veve uh hi; Gentile mite’n Jew ngeina le thukhunte zui dingin gen tawntung uh hi. Paul in hih thu nakpi-in nial hi. Tua bang thu in upna tawh kisai thu hi-in Khrih hong’ piak Lungdamna thu zong a nial suak hi.

Gal. 1: 1-12 sim in. Koi bangin Paul in Galatia pawlpi buai-nate lemtuah hiam? Tua thu in bang zahin thupi hiam?

________________________________________________________________

__________________________________________________________________

I gensa mah bangin Galatia pawlpi buaipih thute Rome pawlpi in zong buaipih hi. Paul in Rome a laikhak bang mahin Galatia pawlpi zong laikhak hi. Jew mi kimkhat in “Moses tungtawnin Pasian in a piak Ama thukhamte thupi mahmah hi; Gentile mite’n zong a zuih ding uh kisam hi,” ci uh hi. Paul in Jew mite tungah thukham’ dinmun le a sep thute pulaak hi. Paul in Jew makaite in Galatia pawlpi a huzaap bangun Rome pawlpi zong a huzaap ding deih lo hi. Galatia le Rome sung a kigen thukham in Thukham 10 ahih kei leh biakpiakna thukham hiam koizaw hiam cih thu in Paul’ gen thute nawlkhinna hi.

A taktakin a kibuaipih thu in Gentile mite’n vunat hiam, Moses thukham kisam hiam cih thu hi lo hi. Jeresalem council in hih buai-na siangsak khin hi. Ahi zongin makai kim khat in Jerusalem’ khensatna nial uh hi. Biakna makai kimkhat in Khritiante aa dingin Pasian Thukham 10 – a diakdiakin Thukham li-na kisam nawn lo hi, ci-in hilh uh hi. Ahih hang tua mite in Paul' hilhnop thu bang thu piang siksanin Paul in thu hilh hi, cih ngaihsutin nei lo uh hi.

Upna bek tawh dikna kingah hi. Gamtatna, thukham zuihna tawh hotkhiat kingah hi lo hi. Tua bang i cih ciangin Thukham 10 kul nawn lo hi, a ci hi lo hi. Paul in Thukham 10 tawh kisai thubuai a hong hilh hi lo hi. Paul in tua hunlai pawlpi makai kimkhatte telkhialh hilhcian hi zaw hi.

Mi khat in "Sabbath kisam nawn lo hi,” hong ci hi leh koi bangin na dawng diam? Koi bangin Sabbath in hotkhiatna thu tawh kilehbulh hi lo hi, ci-in na thei hiam?

FRIDAY OCT. 13

NGAIHSUTBEH DING: Sim ding Ellen G. White, “Jew and Gentile” pp. 188

– 192, 194 – 197; “ Apostasy in Galatia,” pp. 383 – 388 in The Acts of the

Apostles; “ The Law Given to Israel,” 310- 312; “ The Law and the Covenant,”

370 – 373 in Patriachs and Prophets; The Chosen People,” 27 – 30, in The Desire of Ages.

Pawlpi in buai-na tuak den hi. Hih pen lamdang lo hi. Satan in tawlnga lo-in pawlpi do hi. Pawlpi masate zong buai-na tuamtuam tawh kidim uh hi.

Pawlpi masate in buai-nate hemkhia zo lo uh hi leh pawlpi kip zo lo ding hi.

Zuau thuhilhsiate hangin Galatia pawlpi sungah minam kideidanna, khat le khat kilangneihna, pawl kikhenna cihte hong lut hi. Hih zuau hilhsiate in Jew ngeina le hotkhiatna thu helhzau-in thugen uh hi. Amaute'n Jerusalem council’ kipsak thute thudon lo ahih manun Gentile mite’n Jew ngeina thukhamte a zuih uh kul hi, ci uh hi.” Ellen G. White, The Acts of the Apostles, 383.

KIKUP DING DOTNATE:

1.     Wednesday ni-a dotnate kikum un. Mi tungah vangik a suan na hiam?

Pawlpi a buai-sak mi na hiam? Na nunzia na kitel hiam? Na nunzia in

Khrih sungah a nungta mi’ nunzia a hi hiam? Thukham10 kisam nawn lo hi, a ci mite’n bang siksan uh hiam? Koi bangin tua thute na hilhcian diam? Bang hangin tua bang ngaihsutna khial hiam? Bang hangin Thukham 10 kul nawn lo hi, kici hiam?

2.     Gal. 1: 1-12 sim in. Koi bangin Paul in Lungdamna Thuman lenkip hiam?

Koi bangin tuhun thuzuihna tuamtuam om taleh Paul bangin thuman ah kip ding i hiam? Thuman thutak in kikhel ngei lo hi, cih thu na ngaihsun thei hiam?

3.     Bang thute in Protestant Reformation ( biakna kiphatna lianpi) piangsak hiam? Tuni dongin tua thute a kimu thei hiam?