MUC

Print Friendly and PDF

Sunday, September 17, 2017

Lesson 12 ( Dec 16 - 22 ) THU HOIH TAWH THU SIA ZO



LESSON 12        Dec 16 - 22

                            THU HOIH TAWH THU SIA ZO




SABBTH NITAK:


TU KAAL SUNG SIM DING: Romans 12, 13.


KAMNGAH: “Hih leitung mite gamtat bangin gamta kei unla, na lungsim uh thaksuaksak-in na kikhel un. Tua hi leh a hoih, a sanhuai a kicing Pasian’ deihna bang ahi hiam cih na theitel ding uh hi” Romans12:2.


Romans mite’n thukham a theihna uh man a kisak uh hangun Paul in a khialhna uh theisak nuam hi. Thu-um mite zong nunna sang tawh a nungta dingin hanthawn hi. Thuman a zui mite’ kikhelna in lungsim kikhelna hi ding a, tua bang kikhelna in Pasian kiang pan hong pai hi-in a ki-ap mite bek mah kikhel hi. Khristian khat in Pasian’ deihna bangin a nungta dingin lunggulh ding hi. Kha Siangtho lo-in kuamah in Pasian’ deihna bangin a nungta zo kei hi. Pasian’deih bangin nuntakna in upna tawh kipawl hi. Paul in gamtatna nawlkhin ngei lo hi. Romans 13 – 15 sungah nunzia hoih limgen mahmah hi. Nunzia hoih in upna tawh diktanna thu hemkhia lo hi. Nunzia hoih in upna pulaak hi zaw hi.

Mi kimkhat in Thuciam Thak sunga thupiakte in Khrih hong pai khit ciangin kigelh ahih manin Thuciam Lui thupiakte sangin zuihhak zaw hi, ci-in ngaihsun uh hi. Ahi zongin tua bang hi lo hi. Thuciam Thak in Khrih sungah a nungta mite nunzia ding hong hilh hi. Khrih simloh kuamah in i nunzia ding hong hilh om lo hi. “Note in zong Khrih lungsim puak na nei un” (Phillipine 2: 5). Hih sangin a sangzaw nunzia om lo hi.


SUNDAY     DEC. 17
A KILAWM KITUAK NUNZIA

Romans 11 in Romans sungah upna tawh kisai a thukhupna hi. Romans 12- 16 sungah gamtatna tawh kisai hong hilh hi. Upna nei mi khat ii nunzia-te hong hilh hi. Upna in thuzuihna tawh hong kipelhsak lo hi. Upna in Topa’thupiak zuihna ding panin hong map lo hi. Tua thupiakte tuni dongin kip hi. Thuciam Thak in tua thupiak hong hilhcian hi. Topa’ thupiakte olno takin nuntakpih zawh hi lo hi. Hamsa mah ding hi. Bang hang hiam cihleh mawhna le cilesa’ deihna do ding hamsa hi ( 1Pet. 4:1). Ahi zongin a um mite tungah gualzawhna ding kamciam hong kipia hi. Hi mahtaleh Dawimangpa le a pawlte’n nasem ahih manin siatna a do den dingte i hi hi. A lungdamhuai thu in i puk kha zongin hong kinusia lo hi. Bang hang hiam cihleh eite aa dingin hong thuumsak Siampi Lian i nei hi (Heb. 7: 25).


Romans 12: 1 sim in. Koi bangin gentehna tawh Khristian khat ii nunzia ding hong hilh hiam? Koi bangin Romans 12: 2 tawh kizom hiam?

__________________________________________________________________

___________________________________________________________________

Romans 12: 1 in Thuciam Lui biakpiaknate siksan hi. Tua hunlai-in ganhing tawh biakpiakna kinei hi. Tu-in Khristiante in amau pumpi biakpiakna-in zang uh hen – ganhng bangin kithat ding hi lo-in, Ama aa dingin a nungta dingin hong hilh hi. Biakbuk ah biakpiakna dingin a kigo ding ganhing limtak sittel masa uh hi. Tua ganhing tungah melhemna khat peuh a kimuh leh biakpiakna dingin kizang lo hi. Bang hang hiam cihleh Pasian in poi-na khat a nei ganhing tawh piakbiakna deihlo hi.

Tua hi-in Khristiante zong i nuntakzia a siangtho ding, Pasian’ santham cing nunzia kisam hi. Tua dingin vangliatna kisam hi. Kuamah kicing kei taleh cihtak theihzah, hanciam theihzahin hanciam ding kisam hi.

“Hih leitung mite gamtat bangin gamta kei unla, na lungsim uh thaksuaksak in na kikhel un” (Romans 12: 2). Khristian nunzia-ah a khangto nunzia pulaak hi. Khristian nunzia in a ngei bangin a nungta den ding i hi kei hi. A hoih zaw, a sang zaw-ah kalsuan toto ding kisam hi.” Martin Luther, Commentary on Romans, 167. A hoihzaw, a sang zaw ah kalsuan i cih in bang hiam?


MONDAY DEC. 18

LIMTAKIN NGAIHSUTNA


Tu quarter sungin Thukham tawh kisai tampi i sin hi. Paul in Romans sungah zong thukham tawh kisai thu pulaak hi. Upna in Thukham beisak lo hi. Thukham zui napi, itna nei lo tampi om hi. Thukham in itna thu – Pasian itna le mite itna hi. Itna ka nei napi, a gamtat in itna pulaak lo gamtatna tampi om hi.


Romans 12: 3 – 21 sim in. Koi bangin mi it thei ding i hiam?

____________________________________________________________________

___________________________________________________________________

1Kor. 12, 13 mah bangin Paul in itna in Kha Siangtho gah hi, ci-in tawisang hi. Greek laimalin ‘agape’ in Pasian kiang pan hong pai itna pulaak hi. Pasian in itna hi (1John 4: 8). Itna in Pasian’ zia le tong pulaak hi. Itna nei cih ciangin Pasian in a hong it bangin mi it, Pasian’hong kep bangin mi nunna kem cihna hi. Itna in nuntakna sungah kimu thei ding hi. Kiniamkhiatna in itna bulpi khat hi. Itna sungah “Kihihsakna, kiphatsakna’ om lo hi (Rom. 12: 3). Ei le ei kiliansak lo-in midangte liansak zaw hi (Rom. 12:6). Ama pilna, theihna suanglo hi (Rom. 12: 16).

Khrih mahmah in zong “Keima hakkol kisuan unla, ka kiangah hong kisin un. Bang hang hiam cihleh keimah in lungnemin a kiniamkhiat mi ka hi hi” ci hi (Matt. 11: 29). Khristiante in a kiniamkhiat pen dingte hi. Ahi zongin ki-en lehang tua bang hi lo, hehpih huai mahmah hi lo i hiam? Kiphatsakna tawh kidim hi lo i hiam? Diktang ding, hotkhiat ngah dingin Khrih tungah kingak kitangsapzia na phawk hiam? Amah bek mah in hong khel thei hi lo hiam? Mihing in amau nunzia amah le amahin khel thei lo hi. Tua hi leh bang kiphatsakpih ding, kisialhpih ding ding bang om hiam? Kisaktheihpih ding bang mah i nei kei hi. Pasian muhna banah midangte mai-ah kiliatsak nading omlo hi. Tua hi-in Paul hong hilh bangin nuntak ding kisam hi.

Romans 12: 18 sim in. Koi bangin tua thute na nuntakpih hiam? Lai Siangtho hong hilh bangin a nungta ding kipuahphat ding na nei hiam?


TUESDAY  DEC. 19
KHRISTIANTE LE KUMPITE


Romans 13: 1-7 sim in. Ukna nei kumpi, u liante tawh kizopzia ding bang hong hilh hiam?

_________________________________________________________________

_________________________________________________________________

Paul in kumpi ukna nei-te tawh kizopzia a pulaakin kumpi gilo, gammite it lo, a nungta Pasian a thei lo kumpi’ uk sung hi. A sawtlo-in Khristiante’n bawlsiatna nasia takin thuak uh hi. A taktakin Paul in tua kumpite’ thahna thuak hi. Tua bang kumpi gilo khut nuai-ah kumpi’ thupiak mang dingin Paul in hanthawn hi. Bang hang hiam cihleh Lai Siangtho in gam uk kumpi tawh kisai limgen mahmah hi. Tua bang ukna neihtheihna Pasian kiang pan hi.

Khristiante in gam ki-ukna tawh kizui-in a nuntak ding uh kisam hi. Gammi hoih khat hih ding kisam hi. Ki-ukna nei lo cih pen Lai Siangtho tawh kituak lo hi. Ahi zongin Pasian in kumpi ki-ukna khempeuh hoihsa hi, cihna hi pah lo hi.

Pasian langpang kumpi tampi om hi. Hi taleh Khristiante in Pasian langpanna a hih kei nakleh kumpi thuneite’ ukna mang ding le panpih ding kisam hi. Tua hi-in kumpi’ thupiak khat peuhpeuh zuih ding ciangin Pasian tawh kituak hiam, kituak lo hiam, ci-in thungetna tawh hoih tak ngaihsut masak ding kisam hi. Kamsangte’ genkholhsa a om bangin Pasian tungah a citak mite’n kumpite’ bawlsiatna thuak ding uh hi (Mang. 13). Khristiante in koi koi ah i om zongin tua hun hong tunma kumpi’ thupiak zuih ding kisam hi.

“Leitung kumpi uknate in Pasian kiang pan phalna tawh ukna nei hi, cih i thei hi. Thu-um mi khat in gam ki-ukna thukhunte hoihtak a zuih ciangin Pasian’ thupiak zui ahi hi. Ahi zongin tua gam thukhunte in Pasian tawh kituak lo ahih leh mihingte’ thupiak zuih sangin Pasian’ thupiak zuih ding hi zaw hi. Mihing’ thukhunte sangin Pasian Kammal in vanglian zaw hi. Gam thukhun tawh kituak lo kampau a kipan laigelhte kidop ding kisam hi. Hotkhiat nasep a khaktan thei kampau, laihawm tuamtuamte pelh kul hi.” Ellen G. White, The Acts of the Apostles, 69.


WEDNESDAY      DEC. 20

KHAT LE KHAT KI-IT UN


“Khat le khat ki-itna longal kuamah lei na kibasak kei un.Bang hang hiam cihleh midang a itte in thukham a zui khin ahi hi” (Romans 13: 8). Koi bangin hih thu na theitel hiam? Itna i neih teh Pasian thukham zuih kul nawn lo hi, cihna hiam?

___________________________________________________________________

___________________________________________________________________

Mualtung Thuhilhna a om bangin Paul in sepna khempeuh itna siksan ding, itna hangin sepna hi ding hi, ci-in hong hilh hi. Bang hang hiam cihleh Thukham in Pasian’ zia le tong pulaak hi. Pasian in itna hi. Tua hi-in mi a itte in thukham deihna kicingsak hi. Ahi zongin Khristian pawl khatte’ gen bang hi lo-in Paul in itna in thukham beisak lo ahihna pulaak hi. Thukham 10 in kipden hi. Bang hang hiam cihleh tua in mawhna hong theisak hi. Tu-in leitungah kua in mawhna omlam nial thei ding hiam? Ahi zongin itna lo-in kuamah in thukham nuntakpih thei lo hi. Singlamteh tungah Khrih a kilh mite amau le amau thukham a zui-in kingaihsun uh hi.


Paul in itna tawh thukham nuntakpih tawh kisai-in bang gentehna pulaak hiam? Bang hang hi ding hiam? Romans 13: 9 , 10.

_____________________________________________________________

_________________________________________________________________

Itna kipulaak hun zandeuh hi lo hi. Kamsangte gen khempeuh in "nang le nang na ki-it bangin midangte zong it in” cih thupiak (Siam. 19:18) siksan hi. Tham lo-in Paul in Thuciam Lui siksanin Lungdamna Thu pulaak hi. Mi kimkhat in, Paul in thukham pawlkhat bek hilh hi, ci-in uh hi. Tua bang hi leh,

Khristiante in nulepa zahtak kul nawn lo maw? milim bia thei maw? Tua bang hi lo hi. Paul in bang siksanin pulaak hiam cih kantel kisam hi. Paul in mimal khat le khat kizopna a pulaak hi bek a, Thukham bei hi, a ci hi lo hi (Sawl. 15:

20; 1Thess. 1:9; 1John 5: 21). Tua banah Thuciam Thak gelhte in midangte itna in Pasian i itna hi, ci hi (Matt. 25: 40; 1John 4:20, 21).

Koi bangin midang tawh na kizopzia in Pasian tawh na kizopzia pulaak hiam?. Kizopna-ah itna in bangzahin thupi hiam? Pasian in a hong it bangin koi bangin midangte it thei ding na hiam? Bang in hong dal hiam?


THURSDAY DEC. 21

TUNI IN HOTNA NI HI


“Tuhun in bang hun hiam cih thei unla, ihmutna panin khanlawh hun mahmah ta ahihlam thei un. Bang hang hiam cihleh i upcil lai sangin eite hotkhiatna tu-in hong nai zawta hi” (Rom. 13: 11). Tu quarter sungin Paul in Rome pawlpi a laikhakte i sin hi. A diakdiakin Khrih hong sihna- Thuciam Thak siksanin, Rome pawlpi sunga om Jew le Gentile, upna le gamtatna tawh kisai thute i sin hi. A bulpi pen in koi bangin mawhnei mi khat in

Pasian mai-ah siantho-na le dikna ngah thei hiam cih thu hi. Thukham a siksan mite tungah Paul in thukham bulpi-in hotkhiatna thu hilh hi. Judaism biakna, Thuciam Lui in zong hehpihna bulphuh biakna hi-a, ahi zongin gamtatna, thukham bulpi sakna in siatna tampi hong tun hi. Tuhun pawlpi in tua bang siatna hong tun kik loh nading kidophuai hi lo hiam?

Romans 13: 11 – 14 sim in. Paul in bang thupiang pulaak hiam? Koi bangin tua thu lamen ding i hiam?

_____________________________________________________________

________________________________________________________________

Paul in a ihmut thu-um mite a tho dingin hilh hi. Bang hang hiam cihleh

Jesuh hong pai kik ding hi. Hih thu kipulaak zawh kum 2000 val khin taleh, tua sangin a thupi zaw in Jesuh hong pai baihta ding lamenin ngak ding ahi hi. Eite lunghimawh ding thu in sihna tawh i kinai mah bangin Jesuh hong pai ding hun tawh i kinai mahmah hi. Mitphiat kalin a bei thei i nunna hong bei leh, kum 40, kum 400 cihte a si mite aa dingin bang mah kilamdanna om lo hi. Misite’n a khuaphawk theihkik hun ding uh Khrih hong pai hun hi ding hi. Nuntak huntom, Khrih hong pai ding hun hong nai zaw semsem hi. Paul in Nihvei Kumkikna tawh kisai Romans sungah tampi a pulaak loh hangin, Thessalonica, Korinthian pawlpite laikhaknate ah tampi pulaak hi.

Khrih hong pai kik lo ding hi leh na khempeuh – lament, upna in a mawhna hi ding hi. Khrih hong pai kik ding hi, cih thu om kei leh upna tawh diktanna thu zong a mawkna suak lo ding hiam?

Khrih hong pai leh, na nunzia na kikhel ding a om diam? Bang hang? Kikhel ding kisam hi, ci na hileh bang hangin tumahin kikhel lo ding na hiam? Bang in kilamdangsak hiam?

FRIDAY DEC. 22

NGAIHSUTBEH DING: “ Lai Siangtho in Pasian’deihna pulaak hi. Pasian Kammal thuman thute in Sangpen Pa’ genkhiat thute hi. Hih thuman a nuntakpih mi in nunna thak tawh a nungta mi hi. Khuaksa thak ngah hi lo-in mawhna khuamial, thuman theihlohna kihepkhiatsak hi zaw hi. “Lungtang thak kong pia ding hi,” cih kammal in “ngaihsutna thak” cihna hi. A kikhel lungtang thuman theitel dingin a nungta ding ahihlam kiphawk hi. Lai Siangtho tawh a nungta, thungetna tawh a mainawt mi in thuman theihtelna nei hi.

Pasian kiang a zuat manin lungsim ngaihsutna zong picing zaw tawh kibang hi.” Ellen G. White, My Life Today, 24.

“Topa hong pai baihta ding hi. A hong pai ding kiginkholh kisam hi. A tatsa mite la dingin hong pai ding a, Amah i muh ding bang zahin lungdamhuai hiam? I ngak zawh sawt khin zo hi. I lametna kiam lo hi. Ama hoihna i mu tawntung ding hi. “ Inn tung ta” ci-in nakpi-in ka kap khia nuam hi. A tatsa mite tawntungin inn ah mang dingin, Khrih in vangliatna, minthanna tawh kidimin hih leitungah a hong pai ding hun nai mahmah hi.” Ellen G. White, Vol. 8., 253.

KIKUP DING DOTNATE

1.      Thursday ni-a dotnate na lawmte tawh kikum in. Na lawmte dawnnate zong ngai in. Koi bangin sang thei na hiam?

2.   Gammi hoih le Khristian mi hoih khat hih ding a haksat hun om hi. Pasian’ deihna bangin gamtatna le gam ki-ukna thukhun hong kituak kei leh, koi bangin na kalsuan diam? Koi zaw na zui diam? Tua bang hun ciangin bang hangin thungetna le limtak ngaihsutna kisam hiam? (Gam thukhun zui lo khempeuh humpi kua sung kidenna sam a hiam?

3.   Itna kihel lo thukham zuihna leh, lungsim takpi tawh Pasian le mite itna, koi in hamsa-zaw in na ngaihsun hiam? Ahih kei leh tua bang om thei kenteh ci-in na ngaihsun hiam? Bang hang?

4.   Tu quarter thusinna a zo ding i hih mah bangin Romans sung i sin thutawntungin bang hangin Kipuahphatna thupi hiam? Romans in bang thute umin, bang hangin um cih thu hong hilh hiam?








To get the latest update of me and my works

>> <<