Lesson 11 ( Dec 9 - 15 ) TELTUAM MITE

7

LESSON 11                            DEC. 9 – 15

                                      TELTUAM MITE

SABBATH NITAK:

TUKAAL SUNG SIM DING: Romans 10, 11, 16.

KAMNGAH: “ Tua ahih leh Pasian in a mite nawlkhin ahi hiam, ci-in ka dong hi. A nawlkhin peuhmah kei hi.Keimah tektek zong Abraham suan, Benjamin phung sung panin a piang Israel mi ka hi hi.” Romans 11: 1.

Tukaal sungin Romans 10, 11 sungte i sin ding hi. Paul’ ngaihsutna, a lungsim i theih nadingin Romans 10, 11 simkul hi. Pasian in mi khempeuh itin honkhia nuam hi. Minam bupin hotkhiatna nialom lo hi. Hotkhiatna ah

Greek mi, Gentile mi kilamdanna om lo hi (Rom. 10: 12). Mi khempeuh in mawhnei mi hi. Khrih tungtawnin Pasian’ hehpihna kisam lo kuamah om lo hi. Mi khempeuh tungah hehpihna hong kipia hi. Minam zui, paunam zui-a kipia hi lo hi. Thukham zuihna tungtawnin kipia hi lo hi. Khrih tungah upna nei khempeuh tua hehpihna ngah hi. Hotkhiat nasepzia kikhel kha thei mah hi. Ahi zongin hotkhiatna kikhel ngei lo hi.

Paul in a gensa om bangin Romans 11 sungah teltuam, saptuam cihte genkik hi. Tua teltuamte in hotkhiat ngah nading tawh kisai hi lo-in leitung mun khempeuh ah Pasian’ geel hotkhiatna thupuak nasep tawh kisai hi zaw hi. Hotkhiat ngah lo ding minam a tuamin kiseh lo hi. Singlamteh khit pawlpi masate sungah Jew le Gentile kihelkhawm a, hotkhiat nasem uh hi.

SUNDAY     DEC. 10

KHRIH LE THUKHAM

Romans 10: 1-4 sim in. Romans 10 ma-a kigen thute mangngilh ken. Koi bangin ei le ei in dikna ngah ding hanciamna in lauhuai hiam?

____________________________________________________________________

___________________________________________________________________

Gamtat, thukham siksanin dikna ngah ding hanciamna tuamtuam om hi. Midangte omzia a kipan nek le dawn, silh le ten, Sabbath thuzuihna cihte na muh ciangin amau gitnat lohna mu-in nangma gamtat hoihna, siantho-na kisaktheihpihnate in thukham tawh dikna ngah ding hanciamna lampi khat ahi hi. Tatsat lo-in Pasian’ siantho-na le mihingte in mawhna tawh kidim i hihlam phawk tawntung ding kisam hi. Tua in ei le ei dik kisakna panin hong dal thei ding hi. Mihing’ siangtho-na le Khrih’ siantho-na in kilangdo hi.

Romans 10:4 i sim ciangin Paul in bang siksanin gen hiam cih ngaihsut ding kisam hi. Jew mi tampi in thukham zuihna tungtawnin amau le amau dik, siangtho-in kingaihsun uh hi (Rom. 10:5). Ahi zongin Messiah hong pai takteh dikna, siantho-na taktak hong kilangh hi. Khrih sungah upna nei khempeuh in diktang, mi siangtho-in kiciamteh hi. Biakpiakna thukhamte in a pulaak kholh mah bangin Khrih in a nuntakna hong pia hi. Tua thukhamte kisam nawn lo hi bek a, Thukham 10 ahihleh kipden hi. Thukham 10 in i mawhna, i khialhna, kicinlohna hong theisakin, Honpa le Ama kiang pan mawhmai-na, dikna i kisaplam hong lak hi. Hih thu siksan lehang Thukham’ tawpna in Jesuh Khrih hi. Thukham in Jesuh kiang hong tunpih a, Ama siantho-na hong musak hi. Greek kammal ‘teloes’ a khiatna in mungtup, ngimna cihna hi. Thukham’ ngimna bulpi pen in Khrih kiang tun nading ahi hi. Thukham 10, a diakdiakin mi tampi in nambat 4-na bei ta hi, ci uh ahih manin, Paul hong hilh thu le Thuciam Thak a langdo uh suak hi.

 Midang tawh na kiteh ciangin na hoihte hangin a kisa thei mi na hi hiam? Khrih nunzia tawh ki-enkak lecin, nangma hoihna in hoihna takpi ahi diam?

MONDAY DEC. 11

HEHPIHNA IN HONG TEL

Romans 11: 1-7 sim in. Bang thuhilhnate nial a, bang thuman pulaak hiam?

___________________________________________________________________

____________________________________________________________________

“Pasian in a mite nawlkhin a hiam?” cih dotna tawh kisai-in Paul in thu-um mi tawmno a cianlai mite siksanin, Pasian in a mite nawlkhin lo hi, ci-in pulaak hi. Hotkhiatna in Jew mi hi taleh Gentile mi hi taleh, mi khempeuh tungah hong kipia hi. Khristian thu-um mi masate, Pentecost ni-a kituiphumte in Jew mi vive hi mah hi. Peter in Gentile mite tungah zong hehpihna kipia hi, cih a theihtel nadingin Pasian in a tuamin hilh hi (Sawl. 15: 7-9 le Sawl. 10 enkak in).

Romans 11: 7- 10 sim in. Jesuh a nial Israel minamte Pasian nial takpi hiam? Tua bang ngaihsutna a khial hiam?

____________________________________________________________________

____________________________________________________________________

Romans 11: 8-10 in Thuciam Lui siksanin kipulaak ahi hi. Israel minamte’n khuamu lo ding, khuaza thei lo dingin Pasian in mittaw-sak, bengngongsak bangin kigen hi. Pasian in thuman mu-in hotkhiatna tawh kipel dingin amaute mittaw-sak hiam? Tua bang hi lo hi. Romans 9 siksanin Romans 11: 8- 10 gen thute i et kul hi. Paul in mimal hotkhiatna gen hi lo hi. Bang hang hiam cihleh Pasian in minam bupin kuamah nial lo hi. Tua hi-in hih munah Paul’ pulaak thu in hotkhiatna thu tangko ding le nasem dingin Pasian in amaute nial hi zaw hi.

Pasian in minam buppi-in hotkhiat ngah dingin nial hi, cih thu in bang hangin man lo hiam?Mi khempeuh honkhia dingin Khrih hong si hi, cih thu tawh bang hangin kituak lo hiam? Gentehna-in Pasian in Jew minam buppi a nial hi leh bang zahin lipkhap huai ding hiam?

TUESDAY     DEC. 12

OLIVE HIANG

Romans 11: 11 – 15 sim in. Paul in lametna thu bang pulaak hiam?

___________________________________________________________________

__________________________________________________________________

Paul in thunih pulaak hi. Khatna-ah: “Israel mite’ kicinna” (aneu 12); nihna-ah “sihna pan nunna” (aneu 15). Tawlkhat sung kinawlkhiin hi taleh kicinna, nuntakna ngah kik ding uh hi, ci-in hong hilh hi. Hih in Romans 11 kipatna-ah “ Pasian in a mite nawlkhin hiam” cih thu tawh kisai-in Paul in a hilhcianna ahi hi.

Romans 11: 16 – 24 sim in. Paul in bang thu pulaak hiam?

____________________________________________________________________

__________________________________________________________________

Paul in a cianlai Israel mite le olive kung genteh hi. Olive kung panin a hiang pawl khat kisatkhia hi. Tua in uplohna limcing hi. Ahi zongin Pasian in a mite paaikhia lo hi (Rom. 11: 2). A kung le a zung om lai hi. Hih olive kungah, Gentile mite, hiangdangte kipeh hi. A kung le a zung panin a kisam an le tuite ngah uh hi. Gentile mite’n Israel mite tung panin thuman thutak ngah uh hi, cih hong hilh hi.

Jesuh a nial mite tung a piang thute Gentile mite tungah zong piang thei hi. Lai Siangtho in, khat vei hotkhiatna i ngah leh a tawntungin hotkhiatna kitaan thei lo hi, ci-in hong hilh ngei lo hi. Manpiakloh a hong kipia ahih mah bangin a khongin kinial thei hi. Hotkhiatna lampi pan lampial khak ciangin i phawk ding thu in: kicin mateng hotna ngah lo ding cihte pelh ding kisam hi. Pasian in a hehpihna tawh hong tuam ciangin mihing in deihtel thei nawn lo cih thu hi lo hi. Hehpihna i ngah khitteh bang bangin nungta mah leng hotkhiatna kitaan lo cih thu in upkhialhna hi. A tawp dong Ama hoihna sungah a nungta mite bek hotkhiatna sung om ding hi (Rom. 11: 22).

Kuamah in ama hoihna, kicinna kisialhpih ding hi lo hi. Eite hong kihotkhiatna in i thalawh hi lo hi; piakkhong hi. Singlamteh mai, Pasian’ siantho-na mai-ah mi khempeuh kikim hi; Honpa kisam mimawh vive i hi hi. Mihing in kisialhpih ding bang mah nei lo hi. Jesuh bek eite kisialhpih ding hi. Jesuh in mihingin hong nungta-in, Ama nunzia in eite nunzia ding hong hilh a, ei aa ding hong si hi. Ama tung bekah kingak ding kisam hi. Amah lo-in lamet i nei kei hi.

WEDNESDAY     DEC. 13

ISRAEL KHEMPEUH KIHON DING

Romans 11: 25 – 27 sim in. Paul in a lian thupiang bang pulaak hiam?

_____________________________________________________________________

___________________________________________________________________

Romans 11: 25 – 27 sung kibuaipih kum tampi cingkhin hi. Ahi zongin i thei ding hi. “Pasian in a mite nawlkhin hiam,” cih dotna tawh kisai-in, Pasian in amaute nawlkhin lo hi. Tawmvei sung mittaw-sak hi, cih thu in Greek laimal ah ‘porosis’ hi-in a khiatna in ‘lungtangkhauh’ cihna hi. Gentile mite kicin hun hong tun mateng Jew mite’n khuavak mu lo hi, cih thu in bang hi ding hiam? Hih in leitung mi khempeuh tungah Lungdamna Thu a tangtunna pulaak hi. Khrih a upna thu leitung mun khempeuh ah hong kizel hi. Mun khempeuh ah Lungdamna Thu kitangko hi. Jesuh hong paikik ding hun naita hi. Hih bang hun mahin Jew mi tampi in Jesuh zuan uh hi.

“Jew mi khempeuh kihon ding hi” cih thu kibuai-pih mahmah hi (Rom.

11: 26). Khrih hong pai ciang Jew kici khempeuh in hotkhiatna ngah ding hi, cihna hi lo hi. Lai Siangtho in mi khempeuh in tawntung nuntakna ngah ding hi, ci-in hong hilh lo hi. A umte bek in hotkhiatna ngah ding hi (Rom. 11: 14).

Mi kimkhat in Messiah um uh a, kimkhat in um lo uh hi. Romans 11 tawh kisai-in Ellen G. White in hih bangin pulaak hi: “Leitung mun khempeuh ah Lungdamna Thu kizelh madeuh hun ciangin Jew tampi in Khrih Honpa-in hong sang ding uh hi” The Acts of the Apostles, 381.

“Nasep ding lianpi om hi. Gentile-te bek hi lo, Jew mite kiangah zong tangko ding kisam hi. Jew mite lak pan a kikhel ding om hi. Amaute’n a mipih dangte aa dingin khuavak hi ding uh hi. Jew mite omna mun khempeuh ah khuavak a taan kul hi. Tua a kikhel mite’n a kikhel ngei lo Pasian’ thukham hong tangko ding uh hi.” Evangelism, 578.

Khristian biakna hong khankhiatna Jew biakna ngaihsun in.  Koi bangin Jew biakna in Khristian biakna hong theitelsak hiam?

THURSDAY    DEC. 14

MIMAWHTE A KIHOTKHIATNA

Rom. 11: 25 - 27 in Paul in a mipihte a itzia pulaak hi. Jew mite’n Paul le

Lungdamna Thu nakpi’n a langpan manun bang zahin a lunggim hiam? Ahi zongin Paul in Jesuh in Messiah hi, cih a upna nusia lo hi.

Romans 11: 28 – 36 sim in. Koi bangin Paul in, Pasian in Jew bek hi lo, mi khempeuh a hong hong itna pulaak hiam? Bangci bangin Paul in a lamdang Pasian’ hong hehpihna pulaak hiam?

__________________________________________________________________

___________________________________________________________________

Romans 11:28 – 36 in Jew le Gentile kibang kei taleh Pasian in mi khempeuh tungah a kibangin migi-in hehpihna, itna nei hi. Leitung pianma-in hotkhiatna ding kigeel khol khin hi. Pasian in Ama nasem dingin minam khempeuh sawl hi.

Ki-ap thungen kawmin Romans 11: 31 sim in. Topa aa ding sepna khat peuh ah, Jew mite banah mi khempeuh tungah sep ding bang hong hilh hiam?

___________________________________________________________________

____________________________________________________________________

Khristiante in Jewte tawh kizopna hoih nei hi leh Jew tampi in Messiah sangkhin ding uh hi. Khrih hong sihkhit kum tampi khitteh Khristian biakna sungah dawi biakna hong lutteh piansak ni sagih Sabbath nawlkhinin Sunday siantho-sakna hong hat semsem hi. Hihte in Jew mi khat thu-um a hong suah ding dongkholhsak hi.

Hehpihna i ngah mah bangin midangte zong hehpih ding kisam mahmah hi, cih na phawk hiam? Khristian khat in midangte zong a hehpih kei leh

Khrih nungzui taktak hi lo hi (Matt. 18: 23 – 36).

Hehpih taakcing lo hi taleh na hehpihna kisam mi a om hiam? Hamsa taleh bang hangin hehpih lo ding na hiam? Jesuh in zong hong hehpih hi lo hiam?

FRIDAY DEC. 15

NGAIHSUTBEH DING: Sim ding: Ellen G. White, “ Before the Sandedrin,”

77 – 79; “From Persecutor to Disciple,” 112- 114; “ Written From Rome,” 474, 475 in The Acts of the Apostles,” 155, 156 in 1SM.

“Israelte in a minam bupun lamphial taleh amaute lakah hotkhiat ngah ding thuman zui mi tawmno veve hi. Leitungah Khrih in mihingin a hong pai masak lai-in mi tawmno khat in Tuiphum John thugen um ahih manun Messiah hong pai ding genkholhnate kan khol uh hi. Pawlpi masate sungah zong Nazareth khua mi Jesus in Messiah hi, ci-in a um Jew mi tawmno hi.” Ellen

G. White, The Acts of the Apostles, 376, 377. Tarsus khua mi Saul mah bangin Jew mite lakah Lai Siangtho a lenkip, Pasian’ thukham kip hi, ci-in a um Jew pawlkhat om hi. Topa’nasemte in nawlkhin, deidan thuak mite lakah nasemin amaute’n hotna ngah ding uh hi,” 381.

“Lungdamna Thu tangko nasep kizawhkuan ciangin, Jew mite lakah nakpi-in nasepna lian semsem dingin a kithehthaang Jew tampi in hotna ngah ding uh hi. Tua hun ciangin Lai Siangtho in Pasian’ deihna, a geelnate a pulaak mah bangin Jewte aa dingin nuamna ni hi ding hi. Messiah, thuman thutak a santheihlohnate kihong khia ding a, thuman mu-in Khrih in Messiah hi, ci-in um ding uh hi. Jew tampi in Khrih Honpa-in sang ding uh hi,” 381.

KIKUP DING DOTNATE

1.      Hun nunung ciangin Pasian’ Thukham, a diakdiak in Sabbath

thupiak in mun khempeuh zel ding hi. SDA thu-um mite mah bangin Jewte zong Thukham a lenkip mite ahih manun tua hun ciangin Jew mite’n zong Thukham thuman tangko ding uh hi. Sabbath tawlngak tawh kisai-in Jew mite in SDA thu-um mi khat sangin bulkip zaw kha ding hi. Hih thu kikum un.

2.    Bang hangin pawlpi tuamtuamte lak pan SDA pawlpi in Jewte lakah hotkhiatna thugen lawhcing pen hiam? Koi bangin Jew khat kiangah Honpa thu na gen diam?

3.    Israel mite’ khialhna tungtawnin bang thu na mu thak hiam? Koi bangin tua bang khialhnate pelh ding na hiam?