Chadamla, 42
Chandamla in Sabbat ni khat SDA biakinn pua-ah va tung hi. A
nuntakna ah buaina tuamtuam nei hi. Taxi motor hawl hi-in sum ngah mawh lo hi.
Ahi zongin a zi tawh kilem pha lo ahih manin kikhen ding lunghimawh hi. Kha
khatin tam veipi a zi sat zel thei hi. A zi sat lah khawl thei tuan lo hi.
Biakinn sung pan pastor in Jacob thu a gen hong za hi.
Vantung le leitung kizom kahlei ah vantung mite a kahto, a tuaksuk a kipan a
ngah zah pan 10 ah khat pia hi, cihte a zak ciangin lamdangsa-in biakinn sungah
hong lutin pastor kiangah hih bang thute koi pan na theih hiam ci-in va dong
hi. Pastor in Sabbath School lesson laibu khat pia-in na sim in ci-in sawl hi.
Chadamla zong lungdamin inn ah hong ciah hi.
Chadamla Buaina
Tua Sabbath nitakin Chadamla in suun a a thuzakte hong
ngaihsun hi. A gitloh gamtatnate khat khit khat hong ngaihsun hi. Chadamla in
kum 22 a phakin zi nei a, a zi in kum 18 hi. A kiteen zawh uh kha thum a cin a
kipan a zi sat den hi. A nupa-un Hindu biakna sungah om uh hi. Chadamla in
Hindu huih pasian min siksanin kipuak min hi. A zi min zong Hindu nusian khat
siksanin kipuak hi.
A kiteenma-un a zi in a pasian un sapna ngah hi. Biakpiakna
a piak uhteh a pasian un a sung uah lutin kipum khuk, a puansilhteng uh
suahkhia cih bangin diangin lam ziahziah hi. A khuapihten zong a inn uah na sam
thei zel uh hi. Tua bangin diangin a lamteh mangmu thei zel ahih manin, a
khuapihten a theih nop thute uh dong zel hi. Chadamla in Hindu biakna zui ahih
hangin a zi in tua bangin a om pen deih lo hi. Bang hang hiam cihleh tua bangin
a zi-in mangmu-in biakpiakna a neih khitteh khua sung lampi-ah lamgawpin,
biakpiakna tau ah aktal ahih kei leh keeltal khat tawh biakna a piak kul den
hi. Tua bangin biakpiakna a neihteh a pumpi teng sisan tawh kidim den hi. Tua
bangin biakna a piak khitteh a khua phawk theihna ngah kik a, inn ciah thei hi.
Tua bang biaknate a pasal in deih lo hi. Dawi tawh kidim a zi nunzia deih lo
hi. Tua hangin a zi satin, vua zel hi.
Dawi Huzaap
Tua bangin a zi a sat hangin khial kisa veve hi. Ahi zongin
a zi sat lo-in om thei lo hi. A sawtteh a zi a ompih dawi gilo in amah zong
ompih ahih lam hong phawk hi. Dawi in tua bangin a zi sat dingin sawl ahihlam
thei kha lo hi. Lai Siangtho a sim a kipan tua dawi in Satan kiang pan hi, cih
hong phawk thei hi. A zi a sat ciangin a zi in a pasal en gega-in, kei bangin
hong mu na hiam, nong sat dingin kei bang hong sa na hiam ci-in dong hi.
Khat veiveiteh a zi in a nute kiangah va tai zel hi. A pasal
a hehna a dam ciangin a pasal kiang hong zuan kik hi. A pasal in sat taleh a
biakna nusia tuan lo hi. Tua bangin biakpiakna ah diangin laamin a omna hangin
nih vei bang nausia ngei hi. Tua bangin nupa sung buaina a tuah laitakun
Chadamla in SDA biakinn gei khat hong ngawk kha hi. Chadamla in Jacob thu a
kicingin hong thei nuam hi. Pastor tawh a kimuh a kipan a nunzia kikhel ding
cih pen Chadamla in theikhol het lo hi.
Mai Sabbath zop kik ding……
