Ka pa pen ngabeng mi khat hi. Ka nu
in inn nasem hi. Ka suahin ka nu le ka pa lungdam mahmah uh hi. Ahi zongin ka
nau numei hong suah ciangin ka pa in zu dawn hong kipan hi. Nidang hong bang
nawn lo hi. Kuaman a zu dawn ding khaam zo nawn lo hi. Zan hong ciah hak denin,
hong ciahteh thu ompi, inn sungah kitom den hi. Tua bangin ka nu kah hi.
Tagah
Kum 10 pha khin, ni khat ka nu in ka
naunu tawh sang hong kha-in inn ciah kik hi. Inn a tunteh ka pa zukham ahih
manin hoihtak kihopih thei lo hi. Ka nu in bangmah genlo, ka pa in ka nu
kiangah a zu lei nading sum ngen hi. Ka nu in sum nei keng ci-in dawng kik hi.
Ka pa hehlua mahmah, a nihun kitawng uh hi. Ka pa in ka nu vua gawp, ka nu hon
ding kuamah pai lo hi. Ka pa in datsi la-in ka nu buak a, mei tawh hal hi. Ka
nu mei in kanggawpin, venglepaamten zato va puak uh a, ka nu nak kat lua khin
ahih manin siavuanten dam zo nawnlo dingin pulaak uh hi. Ka pa zong zato panin
taisim hi. Ka nau tawh ka nu khoi-in zato ah ka om uh hi. Ni 15 khitteh ka nu
in hong nusia hi. Ka nu hong nusiatna hangin ka dah mah mah uh hi. Ka pite un
hong kem uh hi.
Mukik:
Ni khat SDA pastor khat ka pi
kiangah hong hawh hi. Pastor in hong hehnem hi. Pastor in James Memorial
Adventist sang ah kah dingin hong gen hi. Sangkah nading kisam khempeuh hong
vaihawm sak ding hi ung, ci-in zong hong gen hi. Tua bangteng tawh Adventist
Child India huhna tawh sang ka tung thei uh hi.
Hih sang panin Pasian thu ka
zakcilna uh hong suak hi. Lawmlegual kithuahpih mi thak zong ka nei uh hi. A
nungta Khrih thu zong ka thei uh hi. Nisim Lai Siangtho simin, thu ka ngen uh
hi.
Tu-in kum 14 ka cingta hi. Tan 10 ka
sin hi.Ka nau nu in kum 12 cingkhin a, Tan 8 kah hi. Topa thupha hangin ka lung
dam hi. Ka nu ka pa in hong nusiat hangin Vantung Pa in hong nusia lo hi, cih
ka thei uh hi. Ka boarder uh kisia mahmahta hi. Numei 100 bang om ka hih manin
kicing nawn lo hi. Tu quarter Sabbath 13 sumpi in ka sangkahna boarder lambeh
nadingin kizang ding hi.
MUC in Sabbath School sumpi quarter
2na pen Valpavungh biakinn puah nadingin kipuak a, tu quarter aa pen Saihkhen
biakinn puah nadingin kipuak ding hi.
