A nu in amah le amah gui-awk in kithat, a innkuanpihten inn
pan hawlkhia taleh a neu lai-a kihilh thute hangin Ranjiit in lametna tawh
nungta hi.
Ranjiit in a cimawh genthei innkuan sung pan khangkhia hi. A
neu lai-in a innkuan un SDA innkuan khat inn ah innsap uh hi. A teekpaten huhna
tawh amah nungta thei hi. Teekpa in nisim thungen in, Lai Siangtho sim in.
Zeisu in hong makaih ding hi, ci-in hilh den hi.
Inntekpa in Ranjiit hehpihin SDA sangah sangkahsak hi.
Ranjiit in Tan 5 a sinteh inntek pa in khua dang khat kituah ahih manin Ranjiit
in kumpi sangah sangkah hi.
Lamet loh thupha
Adventist Child India huhna tawh Ranjiit in SDA sangah
sangkah theih nading huhna hong ngah hi. SDA sangah pilsin thei dingin a
vaihawmsak lungdam mahmah hi. Tan 7 a sin dingin Ranjiit in James Memorial
Higher Secondary School ah sang va kah hi. Tua a kipan nidanga a innsapna pa un
a hilh thute- nisim thungen, Lai Siangtho sim ding cihte hong phawk hi. Tua
bangin a om manin inn tawh a kigamlat hangin a sangkahna mun pen inn bang mahin
ngaihsun thei hi. A inn uh pen nuamsa lo hi. A nu le pa kitawng tawng mai hi. A
sangkahna-ah tua bang kitotnate za nawn lo hi.
Dahna khat tuak
Tan 8 a sin ciangin dahna khat hong tuak kha hi. A nu le pa
kitawng uh a, a nu in amah le amah mei tawh kihal lum mawk hi. Meikang tawh a
nuntakna bei mawk hi. A nu sihna thu a zakteh Ranjiit in na sa mahmah hi. Ahi
zongin a sangkahna ah nuamsa mahmah ahih manin amah a kem, a khoite tungah
lungdam mahmah hi.
A nu nusiat a dahna hangin Zeisu tungah cihtak ding khensat
hi. Sanginn hi taleh biakinn ah hi taleh nasep a om bangbang thadah lo-in nasem
hi. Ranjiit in a upna hangin a innkuanpihte hawlkhiat thuak ahih hangin Pasian
in nusia lo-in ama nuntak nading vaihawmsak den hi. A nu le pa tungah Pasian
itna pulaak nuam hi taleh, inn pan kihawlkhia ahih manin tua bangin pulaak hun
ding ngah lo hi.
A pa in zi kik nei a, a nu kik in lah Ranjiit mudah mawk hi.
Tua bang hun laitakin Ranjiit zong lungkham mahmah hi. A sanglaite hong zo
nawnlo hi. A lawm le gualte huzaap hangin a upna nusia ding hong kipan hi. Tua
leh thunget kikhopna ah va kihel a, pastor in thungetsak hi. Tua a kipan a upna
hong hat zaw hi.
Upna le tha thak
Ranjiit upna hong thaksuahin hong hat zaw semsem hi. Tu-in
Ranjiit in kum 17 cingta hi. Plus 1 kah hi. Nisimin thungen, Lai Siangtho sim
hi. Zeisu vaikhakna bangin tui kiphum ding hong khensat hi.
“ Ka sangkahna mun pen kei aa dingin mun muanhuai mahmah khat
hong suak hi. Pawlpi in kei aa dingin ka bukna suangpi bang hi,ci-in Ranjiit in
pulaak hi. James Memorial Adventist Sang in Tamil Nadu ah om hi. 1941 kumin
kiphuan hi. Sangnaupang 936 bang om hi. 80% in SDA innkuan sung pan hi. Boarder
ah om 243 bang pha hi. Sangnaupangte in Zeisu thuman thutak theihna-in nei uh
hi.
Tu quarter Sabbath 13 sumpi in James Memorial Adventist sang
puah nadingin kipuak ding hi. Numei boarder lam nadingin kizang ding hi. Tu
laitakin hih sangah numei boarder kilam zawh kum 65 cingkhin hi. Dailenbuk 5 le
kisil buk 5 bei nei uh hi. Hih sang ah kum khat in sangnaupang tui kiphum 50-
60 kikal om den hi.
MUC in Qr 2 na sunga te Valpavungh biakinn aa dingin kipuak
a, tu quarter aa pen Saihkhen biakinn puah nadingin kipuak ding hi.
