MUC

Print Friendly and PDF

Wednesday, June 14, 2017

LESSON 9 AUG 19 – 25 THU-UM MITE TUNGA PAUL’ NGETNA





LESSON   9    AUG  19 – 25


THU-UM MITE TUNGA PAUL’ NGETNA


SABBATH NITAK: TU KAAL SUNG SIM DING: Gal. 4: 12- 20; 1Kor. 11:1; 9: 19 – 23; 2Kor. 4: 7 – 12; Phil. 3: 17.

KAMNGAH: “ Sanggamte aw, Thukham thu tawh kisai-in note’ gamtat bangin ka hong gamtat mah bangin kei’ gamtat mah bangin na hong gamtat ding uh ka hong thum hi. A beisa hunah kei tungah na hong gamta khial nai kei uh hi.” Galatia 4: 12.


Galatia pawlpi a laikhakna-ah kamzol zang lo hi. Paul in a phuh pawlpi a deihsakna hangin khuahtak kampau hi zaw hi. Upna man thupi mahmah ahihna pulaak hi. Thu up thupi lo-in ngaihsunin, a man lo upna thudon kei lehang bang hangin Paul in thuman hilh tangtang ding hiam? Thuman thutak

a   thupi mah bangin i up thute zong thuman thutak ahi ding kisam hi.

Paul in a thuhilhzia laih mah taleh a gen thute zomto lai hi (Gal. 4: 12 –

20). Galatia pawlpi sunga up khialhnate hoihtak hilh pha hi. Tuucingte in a tuute uh hoih tak a cin mah bangun, thuhilh zuaute bang lo-in Paul in deihsakna, lunghimawhna, lametna le itna tawh Galatia pawlpi laikhak hi.

Paul in up khialhnate a hilh bek hi lo-in a it mite in upna picing nei dingin deihsakna tawh nasem hi.

SUNDAY         AUG  20

PAUL LUNGTANG

Gal. 4: 12 – 20 sim in. Paul in bang thugil pulaak hiam?

______________________________________________________________

______________________________________________________________

Aneu 12 ah Paul in a lunghimawh thu pulaak hi. Galatia pawlpi in Paul bangin upna sungah a kip dingun thum hi. Greek laimal (deomai) thuum cih kammal in ‘ngen’ ‘kho’ cihna-in zong kizang hi (2Kor. 5: 20; 8:4; 10:2). Mi tampi in ‘deomai’ kammal deihna taktak telkhial hi. Galatia pawlpi aa dingin

Paul lunghimawh thute in Pasian thuthuk le upna thute bek hi lo-in, ama nasepna tungtawnin Khrih a um mite in upna thu-ah picing ding bek mah lunggulh pen hi. Amaute aa dingin lawm bek hi lo, upna thu ah ‘pa le tapa’ kizop bangin kizom ding deih hi. Naupaai nupi khat in nausuak ding a gim bangin Paul in Galatia pawlpi a ngaihsutna-in a lunggimzia pulaak hi (Gal. 4:

19). Paul in gimpi-in nasepna hangin Galatia pawlpi hong piang thei hi-in, tu-in Galatia pawlpi in thuman panin lampial uh hi. Upna man sung a tun kik nadingun khat vei hamsa takin nasep kik kul hi.

Paul in Galatia pawlpi aa dingin bang ngimna nei hiam? Paul in amau aa dingin a nasepna panin a gah bang mu nuam hiam? Gal. 4: 19.

___________________________________________________________

____________________________________________________________

A masa hunlai-in Galatia pawlpi in naubu sung a om naungek tawh genteh hi. Tu-in ahih leh naupaai thei ding dinmun tung uh hi. Naubu sung panin nuntakna nei pumpi hong kipanin, naungek hong suak khia hi. Naungek panin u ham dongin hong khangto hi. Thu-upna ah zong mimal hi taleh mihon

(pawlpi) in hi taleh a khangto dingin Paul in hilh hi. Khrih nungzui mi in thu-um mi bek lo-in Khrih sun dingin kikhelna kisam hi. Paul in Galatia pawlpi puahpha banah amaute sungah Khrih a kimuh nadingin zong nasem hi” Leon

Morris, Galatians ( Downers: Intervarsity Press, 1996), 142.

Koi bangin na nunzia in Khrih kilangsak hiam? Na kipuahphat ding bang om hiam?




MONDAY      AUG  21

UPNA PICING AH KALSUAN

1Kor. 11:1; Phil. 3:17; 2Thess. 3: 7-9; Sawl. 26:28, 29 sim in. Gal. 4:12 tawh kizomin bang thu kigelh hiam? Koi bangin a gen thute tel ding i hiam? Khristiante in Paul etteh dingin a laikhak mun tampi ah pulaak hi. Tua bangin a hanthotna munte ah Paul in ukna nei uliante bang in thugen hi. Amah mah mite’ etteh taakcing dingin nasem hi. Midangte gim guan lo-in, Thessalonia pawlpite in amau le amau kikhuangkho zawh nadingin nasem ciat dingin hanthawn hi (2Thess. 3: 7 -9). Korin pawlpi tungah amau le amau a ding sangin midangte masak zawk nadingin hilh hi (1Kor. 11: 1). Galatia pawlpi tungah a gen thu ahih leh thudang khat hi.

Paul in Galatia pawlpi in ama nung zui dingin gen lo hi. Bang gen hiam cihleh Paul bangin amaute zong nungta dingin hanthawn hi. Bang hang hiam cihleh Korin pawlpi bang mahin Galatia pawlpi in zong gamtat zia le tong gina lo, siatna tawh kidim pawlpi hi. Galatia pawlpi in Khristian biakna laigil thute tawh buai den hi. Siatna bawl bek lo-in, amau mahmah sia uh hi. Paul thuhilh in thu-um mite ama nung zui ding banah ama nun bangin a nungta dingin hilh hi. “Ka hong thuum hi” cih Paul kammal mah Sawl. 26:29 ah “ka ngen” cih kammal tawh a deihna kibang hi. “ Nangmah a kipan tuni-a ka thugen a za mi khempeuh hun tomno sung ahi a, hunsau sungin ahi zongin, hih bangin sikkhau hong kikhihna simloh, keimah nong batkim nadingun
Pasian kiangah thu ka ngen hi,” a ci hi.

Paul in a thuak khempeuh Khrih bulphuh hi. Thukham bangin gamtatna hi lo-in Khrih in mawhnei mite aa ding nuntakna a hong piak upna tungtawnin nungta hi. Galatia pawlpi in Khrih tawh pumkhat suah ding sangin amau gamtatna liansak zaw uh hi. Galatia pawlpi in Paul bangin koici om ding cih a pulaak loh hangin na khempeuh ah amah bangin a nungta dingin pulaak lo hi. Bang hang hiam cihleh ama lunghimawh lianbel thu in Galatia pawlpi in thukham bulphuh thu zuihna liansak pen hi. Paul deihsak thu ahih leh Khrih sunga kingah suahtakna, nuamna, itna le hotkhiatna thute hi. Khrih a ngaihsutna-in Paul in na khempeuh niin bulom bangin ngaihsun hi (Phil. 3:
5-9) Tua bangin Galatia pawlpi zong a nungta dingin laikhak hi.

Jesuh simloh etteh thamcing mi na mu ngei hiam? Na muh leh bang etteh ding na hiam? Koi bangin nunzia hoih tawh nungta ding na hiam?



TUESDAY      AUG  22

NOTE BANGIN KEI ZONG KA NUNGTA

1Kor. 9: 19 – 23; Sawl. 17: 16 – 34; 1Kor. 8: 8 – 13; Gal. 2: 11 - 14 sim in. Koi bangin Gal. 4: 12 sung thute hong telsak hiam?

____________________________________________________________________

____________________________________________________________________

Gal 4: 12 in telhak hi. Paul in Galatia mite bangin thukham neilo-in nungta ngei hi napi, bang hangin amaute in Paul bangin nungta ding kisam hiam? Paul’ deih thu in amah bangin Galatia pawlpite zong upna kip nei-in nungta ding le Khrih hong hotkhiat kicing a muan ding uh ahi hi. Paul in amaute nun bangin nungta cih thu in hun khat lai-in Paul in thukham nei lo Gentile mite bangin nungta hi. Bang hang hiam cihleh thukham nei lo Gentile mite a ngah theih nading ahi hi. Gentile mite laka nasem khat ahih mah bangin Paul in Jew mite hi ta leh Gentile mite tungah hi taleh nasemzia ding tel mahmah hi. Lungdamna Thu in kikhel ngei lo a, ahi zongin a genzia, pulaak dan mun le mual, hun zui-in kikhel khel hi. “Lungdamna Thu puak nasep ah Paul in madawk mahmah khat hi-in mite nunzia, khuasakzia tawh kizui-in Lungdamna Thu hilh hi.” Timothy George, The New American Commentary: Galatians (Nashville: Broadman & Holman Publishers, 1994), 321.

1Kor. 9:21 en lehang Paul in Lungdamna Thu puakzia-te in ciangtan nei ahihlam pulaak hi.Paul in Gentile mite le Jew mite kiangah suakta takin nasem mah taleh, tua suahtakna in thukham nei lo ut bangin nungta ding hong phal lo hi. Bang hang hiam cihleh Khrih thu-um mi in Khrih thukham sungah om hi.”

A mun le mual, hun zui-in Lungdamna Thu puak nasep a baih hi lo hi. Ahi zongin Lungdamna thugil le ngei-na tuamtuamte kibatlohna tel sinsen ding kisam hi. Lungdamna Thu puakzia in tua thugil panin lam hong pialpih loh ding kisam hi. Tua dingin Paul etteh ding kisam hi.” Timothy George, Galatians, 321, 322.

Thuman pen thuman bangin pulaak ding hamsa hi, hi mah lo maw? Khristian suahzawh kum sawt semsem leh, thuman panin lampial khak ding ol semsem hi. Bang hang ai diam? Na nunzia sittel in. Thuman panin na lampial khakna a om hiam? Om taleh bang siksan na hiam? Koi bangin na lampialna pan thuman lampi-ah kalsuan ding na hiam?





WEDNESDAY  AUG  23  
A BEISA LE TUHUN

Tuhun a kibuaipih zahin Paul le Galatia pawlpi kizopzia a buai lua uh hi lo hi. Paul in Galatia ah a thugen masak hunte a ngaihsut kik ciangin Galatia pawlpi in amah tawh kizopna hoih nei uh hi, cih mu hi. Tua leh bang thu hong piang hiam?

Bang thupiang in Galatia ah thuhilh dingin Paul sawl hiam? Gal. 4: 13.

_________________________________________________________________

________________________________________________________________________

A tungin Paul in Galatia ah nasem dingin geel masa lo hi. Bangci banga Galatia ah nasem kipan hiam cihleh khualzinin a om laitak damlohna khat hangin Galatia ah tawlkhat taam lai ding maw, ahih kei leh a dam nadingin Galatia ah va zin ding thu hi. A damlohna tawh kisai hih natna hi, cih kiciamteh lo hi. Mi kimkhat in nattun hi, ci hi. Pawl khatin mit natna hi, ci uh hi. Bang hang hiam cihleh Galatia thu-um mite’n ka mit uh la khia-in nang hong pia nuam ung, ci hi. Paul damlohna in ‘ka pumpi tunga ling” (2Kor. 12:7) a cih pen hih natna hi kha ding hi.

Bang bang natna hi taleh tua natna dongkholh mahmah hi. Tua hunlai-in natna pen Pasian’ danpiak hi dingin ngaihsun uh hi (John 9: 1, 2; Luke 13: 1-4). Tua hi-in Paul damlohna hangin Galatia pawlpi in ama thugen a up ding uh hamsa sak thei hi. Ahi zongin amaute in Paul gen bangbang um thei uh hi. Bang hang? Paul in Singlamteh thu hilhin, tua in amaute lungsim zo khin hi (Gal. 3: 1). Kha Siangtho in amaute tawh om khawm hi. Tu-in ahih leh a lungsim kikhelin, a up thuman panin a lam pialna uh bang siksan hi ding uh hiam?

Bang thu hangin Pasian in natna thuak dingin Paul phal hi ding hiam? Paul in a natna mah tawh koi bangin nasem hiam? Rom. 8: 28; 2Kor. 4:7 – 12; 12: 7 – 10.



Paul in bang natna thuak cih i theih loh hangin tua natna gimpih mahmah hi. A natna hangin Pasian ngawh thei hi. Ahih kei leh zong a nasep nusia thei hi. Paul in tua bangin gamta lo hi. Natna thuak taleh a hih theihzah sitlo-in nasem zaw hi. Tua natna in Pasian hehpihna muangsak zaw hi. Pasian in i thuakkhak hamsatna, natna, bawlsiatna, nuntak hamsatna a kipan zinling, tuikhang, cihte tungtawnin Ama hehpihna hong musak hi. Tua banah hotkhiatna kizelhna lampi zong suak thei hi.” Timothy George, Galatians, 323, 324.

Koi bangin na thuak gimna, hamsatnate in Topa hong muangsak zaw hiam?


THURSDAY      AUG  24

THUMAN PULAAK


Gal. 4: 16 sim in. Paul in bang pulaak hiam? Nang zong na thuak kha ngei hiam? John 3: 19; Matt. 26: 64; Jer. 36: 17 – 23.

____________________________________________________________

______________________________________________________________

“Thuman gen in” cih thu tukhang hunin hamsa hi. Thuman kigen nuam tatak lo hi. Hangtakin thuman gen, kuamah awlmawh lo-in ahi bang bang gen, mi zakdah ding hi taleh a gen veve ding mi hamsa hi. Gal. 4: 12 -20; 6:9, 10 cihte om lo hi leh Paul in itna thu gen ding sangin hotkhiatna thuman gen ding lunglut zaw hi, ci-in kingaihsun kha ding hi. Ahi zongin tua bang hi lo hi. Paul in Galatia pawlpi a itna hangin thuman thei-in Lungdamna thuman theihsaknopna lungsim neisak hi (Gal. 2:5, 14). Thuman hi taleh kuamah in a zak noploh thu gen ding hamsa hi. Mi khat ii khialhna va hilh ding baihlo hi. Ahi zongin tua bangin a gente in deihsakna a neihman hi-in, hehna ding, thangpaih nading deihna tawh kigen hi lo hi. Ahi zongin khat veivei i gen thute in mite hehna piangsak kha thei hi. Langpanna suak kha zel hi. Ahi zongin thuman a zak ding, a theih ding uh deihsakna tawh gen veve ding kisam hi.

Gal. 4: 17 – 20 sim in. Paul in amah a langpangte tungah bang gen hiam? Paul in amaute pulaak thute a nial banah a zuih ding uh bang thu pulaak hiam?

________________________________________________________________

_________________________________________________________________

Galatia pawlpite hehin amah a langpanna uh a hi kha phial zongin Paul in deihsakna le lungsim siangtho tawh a theih ding thuman gen veve hi. Paul langpante’n in ahihleh tua bang hi lo-in, Galatia pawlpi mite lungkim nading, deihnsakna kihel lo hi. Koi bangin langpangte’n Galatia pawlpi khaktan nuam cih a kitelloh hangin, langpangte in vunat mateng hotkhiatna tawh kigamla ding uh hi, ci-in hilh uh hi.

Mi khat in a theih dinga kisam thuman pulaak hi mah lecin tua in mi khat hehna a suak hiam? Koi bangin mailam hun ah a hoih zaw-in na sem thei ding hiam?




FRIDAY       AUG  25
NGAIHSUTBEH DING: Galatia pawl sungah Lungdamna Thu langpangin, zuau thu kizel hi. Judah biakpiakna thukhamte zui-in upna bulkip Khrih nial uh hi. A lauhuai zuau thu in Galatia pawlpi tungah huzaap a neih zawh loh nadingin khuahtakin panlak kul hi, cih Paul in mu khol ahih manin, amah mah in thu-um mite zahdak phial dongin thuman lampi hilh hi.

Khrih aa ding nasem mi khempeuh in thuman a kimuh theih nadingin Paul sepzia zuih ding kisam hi. Lungduai-na, hehpihna, dingkip, khensatna cihte kisam hi. Mi kibang lo, ngaihsut kibang lo, dinmun kibang lo ahih manin limtak ngaihsunin pilvang ding kisam hi. Hih nasep in Kha Siangtho’ siansuahna, pilna, khensiamna cihte kisam hi.

Paul in hun khatlai-a Pasian vangliatna theikhin napi a nungtolh mite kiangah thu va hilh hi; a it ngei uh Lungdamna thu it kik dingin amaute sam hi. Khrih sungah suahtak ngah theihna in hamphatna lianpi hi. Amah a zuan mi khempeuh tungah Khrih in Ama dikna puanpaak silhsak hi. Hotkhiat ngah mi in thuman thutak tawh nungta-in Pasian sungah nuamsa hi.

Paul thugen in a mawkna suak lo hi. Lamkhialhsa-te leh Kha Siangtho in vangliatna guan a, nasep lawhcing hi. Thuman a nunghei-te’n thuman zui kik uh hi. Khrih sungah suahtakna ngah kik uh hi.” Ellen G. White, The Acts of the Apostles, 385, 386, 388.

KIKUP DING DOTNATE

1.      Pasian in gimna, hamsatnate tungtawnin a nasepziate ngaihsun in. Koi bangin hoihtuamna, phattuamna hong pia lo gimthuaknate na ngaihsun hiam?

2.    I sungah Khrih hong nungta cih thu lungngai in. Bang a cihnopna hiam? Koi bangin na sungah Khrih hong nungta hi, ci-in theithei na hiam? Thakhat thu-in na nunzia a kikhel kei leh bangci bangin Khrih kiang zuan veve ding na hiam?

TOMLAKNA

Paul in tatkhiatna langpangte a thuhilh dikdek khitteh deihsakna tawh mimal in Khrih sungah a om dingin thum ngetngut hi. A thuhilh a zui dingin zawlbawl a, hun khat lai-a mimal kizopnate, khatlekhat ki-itnate genkik hi. Upna thu ah amaute pa ahihlam zong pulaak hi.










To get the latest update of me and my works

>> <<