Janeesh in cancer natna nei-in sawt nungta lo dingin kigen
hi. A veng a paam in bang hang hi ding hiam ci’n lungmang uh hi. SDA a suah
hangin cancer ngah hi, ci-in kigen kawikawi hi. Sunday sia-te tawh kinial
pahpah hi.
Cancer a neih a kipan kum nih bang ahih hangin, dam lai hi.
Pasian nasemin om a, Jesuh thu a gen ciangin zaknop kisa mahmah hi. Lai
Siangtho thuman a gen thute mite’n zaknopsa mahmah uh hi. Bang hang hiam cihleh
ama tuahkhak thute vive gen a hih manin mite’n zaknopsa uh hi.
Janeesh in khuaneu a teng Khristian innkuan khat sung pan
khangkhia hi. A khangno lai-in Lai Siangtho sangkah ngei hi. A sangkah hun
sungin Adventist khangno khat in Friday nitak khat kikhawm dingin zawn hi. A
kikhop nitakin pastor in mailam thupiang dingte tawh kisai thugen hi. Janeesh
in hoih tak ciamteh hi. A telloh thute a sia-te dong zelzel hi.
Ni
sagih Sabbath thu a zakteh Janeesh in lamdangsa mahmah hi. Sabbath a man lohlam
Lai Siangtho siksanin pulaak ding hanciam hi. A sia-te kiangah pai-in Sunday
ni, tawlngak ni ding mah hi, ci-in Lai Siangtho siksan ding zongzong hi. Ahi
zongin a sia-te in hilh thei lo uh hi. Janeesh zong Saturday ni-in kikhawm
dingin biakinn va zuan hi.
A sangkahna ah Saturday ni-in kikhawm a, sangkhakin inn a
ciahteh Sunday ni-in kikhawm hi. Tawlkhat khitteh SDA pawlpi ah kituiphum
dingin khensat hi.
