DAMNA PIA SANGINN
Jean le Andre
Jean Sangwa Samale in Libreville khua-a SDA Tan 4 sangsiapi hi. Ka sang
uh pen zato tawh kibang hi. Cinate in zato zuan uh hi. Tua bang mahin siatna
tuamtuam tawh kidim naupang, khangnote hih sanginn ah kipuak hi. Hih sanginn in
Zato Mangpipa tawh kibang hi.
“ A Kikhel kei leh kisia ding”
Tua bangin siatna sungah a nungta khangno Mapikoud in khamtheih,
guihtheih namcin tawh kidiah ngei khat hi. Amah pen kum 18 bek pha pan hi. Inn
pan sangkah ding paikhia napi sanginn tung ngei lo ahih manin a nu le pa tawh
ka kiho uh hi. A nu le pa in bang hong pulaak hiam cihleh “ Ka hilh mah uh hi
veh aw, ka cih na ding uh thei zo nawn kei ung,” hongci uh hi. A kikhel kei leh
kisia suak ding hi. Ka veng ka paamte in zong “ na sang uh pen naupangte hoih
takin kipantahna sang hoih mahmah khat hi,” hongci uh hi. Kumpi sangte ahih leh
a khawnkhongin kikah thei hi. Ahi zongin biakna sangte in naupangte hoih tak
hilh, makaih uh ahih manin biakna sangah paisak ding mah hoih zaw hi, ka ci hi.
Tua a kipan Mapikoud pen biakna sangah ka kha pah uh hi.
A sangsiate kiangah “ hoih tak na pantahsak un. Kong huh theih bang bang
uh hong hun ding hi ung, ci-in ka kivaikhak uh hi. Tua bangin a gamtat hoih lo
mi khat in gamtat zia le tong hoih a neih nadingin hanciam mahmah kisam ding
hi.
Tua bang teng tawh Lai Siangtho sinna ka nei uh hi. Mapikouh in Khrih
thu za ngei lo hi. Lai Siangtho sung tangthute a theih tawm mahmah hi. Khrih
sungah nunzia ding, khantoh zia ding cihte zong ka hilh hi. Tua bangin thusinna
ka neih uh a kipan Mapikouh in a zat ngei zongsatna hoih lo khempeuh khamtheih,
guihtheihte nusia-in Khrih tungah hong ki-ap uh hi.
Tua banah cidam nading tawh kisai thute zong ka hilh uh hi. Sangnaupang
makai khat ahih manin makaihzia tawh kisai thute zong ka hilh uh hi. Tua bang
teng hangin amah zong gamtat zia le tong a kipan a pumpi cidamna, lawm le gual
tawh kikholhnate ah hong picing semsem hi, cih ka mu thei uh hi. Tua bangin a
hong kikhel a nu le a pa in a muh uhteh Mapikouh’ naupang zong hih sangah
sangkahsak uh hi.
Kuama Phawkkhak loh Numei no
Gaban gam panin kong hopih uh hi. Kei pen Andre Kabwe, Librevillee khua
ah SDA sangsiapi a sem ngei khat ka hi hi. Sangnaupang lamdang mahmah a hong
kikhel Dorca thu pawl khat kong pulaak ding hi.
Dorcas numei no in sang a hong kahlai-in, nu le pa bangci hiam thei lo
hing. Bang hang hiam cihleh amah pen a pi tawh om hi.Numei no khat ahih hangin
siatna namcin tawh nungta hi. Khamtheih guihtheih khempeuh tawh kidiah hi.
Pasian thei kha vet lo hi.
Ahi zongin tu-in Dorcas in Khrih, a Honpa le Tanpa-in sang khin hi. Lai
Siangtho simin, Ellen G. White gelh laite zong sim tawntung hi. A lawm le
gualte tungah teci pangin a lawmte tampi in Khrih sungah hong ki-ap thei uh hi.
A lawmte khat in bang pulaak hiam cihleh nidang tawh kibang lo-in, Dorcas
gamtat zia le tong kikhelna hangin amah ding sa kha kei ung, ci uh hi. Tua
bangin a kikhel mi tampi in a muh uhteh Dorcas takpi mah hi ding hiam, ci uh
hi. Dorcas bang mahin khangno tampi in hih Gabon-a om SDA sang panin tampi in
nunzia thak tawh nungta uh hi.
Sanginn neu, nasep lian
Tan 10 sang ahih hangin hih sang in na lianpipi sem hi. Khua sung kim le
paam a om khamtheih zu le za tawh kidim khangno tampi in hih sanginn pan a
kikhel khangno tampi om khin hi. Hih sang ah hong kah a tam zaw sangnaupang pen
SDA hi lo hi. Hih khangnote in Lai Siangtho a sim theih nading uh, a nunna uh
Pasian tungah a kipiak nadingun hih sang in nasem hi. Gabon gam ah Tan 10 sang
khat bek kinei hi. A dang khat neih zawh nading kilunggulh hi. Tu quarter
Sabbath 13 sumpi in Gabon gam ah Tan 10 sanginn khat behlap nadingin kipuak
ding hi.
SDA conference in hong nung zaksak ding hi.
