MUC

Print Friendly and PDF

Tuesday, April 4, 2017

May 13, 2017 Khuamial Sung pan Awging



Khuamial Sung pan Awging
Abraham

Kum 40 sung tawntung si dek phialin zu dawn mi khat ka hi hi. Bang hangin zu dawn kipan ka hiam cih ka thei kei hi. Ka nunzia kikhel dingin cikmahin ka ngaihsun kha kei hi. A kisia cip dingin ka kingaihsun hi.

Ka zi pen Khristian khat hi-in, tu-in hong nusia khin hi. A nuntak lai-in kei aa dingin nisimin thu hong ngetsak den hi. Jesuh hong itna thu hong gen den hi. Jesuh in na nunna hong khel nuam hi, ci-in hong hilh den a, tua bang hun ciangin ka zu thawl tawh sat dingin ka ngim zel hi.

Ahi zongin nitak khat ka lupna tungah khukdinin thu ka ngen hi. “ Jesuh aw, na huhna ngah ding kilawm keng, mi mawh pa hing, hih zu ngawl theihlohna panin hong honkhia in,” ci-in kapkawm in thu ka ngen hi. Tua bangin thu ka nget khitteh lungnopna khat ka ngah hi. Ka lungsim ah “dingto inla, ka Nung hong zui in” cih khat hong suak hi. Kei zong ka khedap bulhin inn pua lamah ka pusuak khia hi.

Khua sungah pai-in “ khawl ning cih ka ngaihsut mateng lamdung ka zuizui hi. Tua bangin ka pai pai leh mun khat ka tunteh Seventh-day Adventist ci-in lai kigelh khat ka mu hi. “ Ka lungsim ah bang hong suak hiam cihleh hih mun hi, na thunget na ding” cih hong suak hi.

Tua biakinn sung ka lut leh, mi kikhawm ka mu a, kei zong a nunggual pen ah ka tu hi. Thugenpa thugen limtak ka ngai hi. Zaknop ka sa a, a zingsang le nitak (Friday) niteh zong kikhop om ding hi,cih hong kigen ciangin kei zong hih kikhopnate ah kihel dingin ka khentat hi.

Tua leh ka lungsim ah bang hong suak leuleu hiam cihleh “ Om mawkmawk ken. Jesuh aa dingin na khat sem in” cih khat hong suak hi. Bang sem thei ding ka hiam, ci-in ka ngaihsun hi. Bang hang hiam cihleh kei pen ka kum tamta, ka tha hat nawn lo hi. Bang thu ka za kik diam ci-in tawl khat sung ka lungngai hi.

Biakinn Kempa

Nipi nih khit bangteh Friday ni khat biakinn ah ka pai-a biakinn ka hahsiang hi. Sualte phiatin, kongkhakte tunga leivuite nul cih bangin na ka sem hi. Hong kikhawm mite zong hopihte zong ka hopih hi.Tua bangin ka nasep pen pawlpi mite’n zong hoihsa uh a, Pasian in hih bang sem dingin hong sawl hi, ci-in ka pulaak hi.

Nipi khat khit ciangin khua sungah vanzuakna khat ah sum tam ngah zaw ding sai-ngak ding nasep khat ka ngah hi. Tua bangin nasemin ka om sungtengin “ ka inn kim ah lopa sau khin, puah ding tampi om a, bang hangin hih munah om na hiam ci-in ka lungsim ah hong suak kik hi. Tua leh inn ka ciah a, biakinn ah pai-in, biakinn kimteng ka hahsiang hi.

Itna tawh Nasepna

Galkap sung panin pension ka la hi. Ka pension ngah pen tam lo hi. Ahi zongin pawlpi aa dingin ka pension ngahte ka pia hi. A beisa kum 40 sung a mawkna in ka hun beisakte a manphatna tu-in ka phawk hi. Tua hangin sep thaman bangmah la lo-in pawlpi aa dingin nasem ka hi hi.

A beisa kum 40 sung zu tawh kidiah mi khat ka hih manin ka mit in hoihtakin khua mu thei nawn lo, ka bil zong ngong mahmah khin hi. Ahi zongin nisimin Topa thupha ka ngahte hangin ka lungdam hi. Topa Pasian in hih pawlpi sung hong lutpih hi. A si thei lo ding nunna ngah ding ka hih manin ka lungdam hi.

A lamdang mahmah thu

Khrih ka Honpa le Tankhia Pa in ka sang khin hi. Kei mah bangin ka lawm ka gual zu tawh kidiah mite kiangah pai-in Jesuh hong itna thute ka pulaak hi. Lamet bei mite aa dingin lametna khat om lai ahihlam ka pulaak hi. Khrih tungah a ki-ap mite, Khrih in makaihin lametna guan hi, ci-in ka gen hi.

Na ka peuhpeuh sem ding zekai lua khinsa-in na lung a kiat ciangin Jesuh tung pan tha la in. Na hoih sep ding hun lo cih om lo hi. Tu-in kum 83 ka cingkhin hi. Ka nuntak laiteng Topa aa dingin na ka sem ding hi.

Tu quarter Sabbath 13 sumpi in Gabon gam ah Tan 10 sanginn lam nadingin kipuak ding hi. SDA conference in hong nung zaksak ding hi.


To get the latest update of me and my works

>> <<