MUC

Print Friendly and PDF

Tuesday, April 4, 2017

APRIL 29, 2017 Joyce’ lungsim a phawngvat thu Juste Cleona



APRIL 29

Joyce’ lungsim a phawngvat thu
 Juste Cleona

Joyce in vantung nga-in a khitui luang ka muh ciangin bang hangin na sanglaite zo lo na hiam ci-in ka dong hi. Joyce in kum 16 bek hi pan hi. Ahi zongin “naungek khat nei ing. Zan tawntung kap den hi. Ihmu thei keng”
ci-in hong dawng hi. Hong huh ding kuamah om lo hiam, ci-in ka dong hi. “ Ka nu simloh mi dang om lo hi,” ci-in hong dawng kik hi. Nau suak leng kei le kei bek hi ding cih pen ka nausuahma in zong ka theisak hi, ci-in hong dawng hi.

Kei zong khukdin kawmin Joyce khut lenin, “ Joyce aw, nang bek hi lo hiteh. Hong huh dingin kei om ing. Kong huh theih dingte hong gen in. Hong huh ding hing,” ci-in ka dong hi. “Jesuh thu um lo mi khat na hi mahteh. Ahi zongin Jesuh in a tawntungin nang hong huh den hi. Jesuh in nang hong it hi. Bang bang hamsatna, gimna na tuak kha zongin Jesuh in nang hong it hi. Hong huh nuam tawntung hi,”ci-in ka pulaak hi. Na nuntakna Jesuh ki-makaihsak lo ding na hiam? ci-in ka dong hi.

Nunna Thak

Tua bangin Joyce tungah ka pulaak ciangin Amah zong hong maitai zaw deuh hi. Hong lungnuam zaw hi, cih ka mu hi. Lai Siangtho sim hong kipan thei hi. Pastor tawh ka va hawh uh a, naungek kepzia ding zong ka hilh uh hi. Huh thei bangbangin huhin ka makaihna uh tungtawnin Joyce zong a nunzia nuamsa zaw semsem hi. Ahi zongin Joyce le a nu kikaal ah hamsatna om lai hi.

Thungenin, Joyce’ nu kiangah hawh dingin ka khensat hi. Ka va hawh takteh a nu in zong hoihtak hong hopih hi. Joyce gamtatzia hoih a saklohte a kipan a thuhilhnate hong gen hi. A tanu Joyce tungah a bawlzia a nu khial kisa lo hi. Ka ciah khiatma-in a nu kiangah kong gen nop khat om ci-in ka gen a, “ kei zong ka pasal tawh ka kitenma-in ta ka nei hi,” ci-in ka pulaak hi. Joyce ahih leh tu-in pasal nei khat hi-a, kei sangin hampha zaw mahmah hi. A tapa hoihtak pantah thei dinmun ah om khin hi. Joyce in a gamtatzia khial kisa khin hi. Amah zong kisik hi. Joyce in ama nuntak nading le a tapa aa dingin a hanciam theih zahin nasem hi. A picing nunzia lunggulh hi. Nang huhna lo-in piang lo ding hi, ci-in a nu kiangah ka gen hi.

Tawlpi khat khitteh Joyce’ nu tawh lawmta bangin ka kiho thei uh hi. Joyce in a makaih ding laihilh ding mi khat zong hong mu uh hi.

Ni khat ka lametloh thu ka za hi. Joyce in Jesuh tungah a nunna ki-ap, tui kiphum ding cih ka za hi. Tua thu ka zak manin Topa tungah ka lungdamna ka ko hi. Lamet bei ngei mi khat hi mah taleh tu-in lametna tawh kidim nunna hong nei thei hi.

A Kikhel Nunna

Gabon khua-a SDA pawl sang in na tampi sem hi. Hih sangah hong kah a tam zaw sangnaupangte in SDA hi lo uh hi. Tua banah guihtheih khamtheih tawh kidim innkuan sung pan naupang tampi om uh hi. Tua bang sangnaupangte lak pan Corneille min nei sangnaupang khat om hi. Amah zong guihtheih khamtheih tawh kidiah sangnaupang khat hi. Thumang hetlo hi. Sai hat mahmah mi khat hi. Lai kihilh thei lo hi. Sang Siapipa kiangah kitun mun mahmah hi. Thu kihilh thei mahmah lo hi mah taleh Corneille aa dingin deihsakna tawh thu ka ngen hi.

Chaplain/pastor in Cornelle Lai Siangtho sinpih hi. Sang ah zong nasep khat kiguan hi. Sangnaupang makai khatin zong ka koih uh hi. Zingsang simin Chaplain tawh thungenkhawm den uh hi. Tua khit ciang bekin laisin uh hi.

Damdamin Cornelle zia le tong hong hoih zaw semsem hi. Siate thugente zong ngai-in thumang zaw hi. A lawm le gualte tawh zong Pasian thu kikumin, Khrish thu-um mi khat hihna a manpha-na cihte pulaak hi. A veng sungah Pasian thugen siam penin ciaptehna dong hong ngahto hi.

Ni khat laisinna ah ka sangnaupangte kiangah “ mi khat in a gamtat zia le tong a khel thei diam, ci-in ka dong hi. Tua leh numei khat in hong dawng hi “ Khel thei mahin teh” bang hang hiam cihleh Cornelle zong a nunzia kikhel hi,” ci-in hong dawng hi.

I pawl sangte’ ngimna in naupangte in Jesuh Khrih thei-in ama nungzui suah ding ahi hi. Pasian’ huhna tawh sangnaupang tampi ka pantah thei uh hi. Gabon ah pawl sang Tan 10 khat bek om hi. A dang khat lambeh nadingin tu quarter Sabbath 13 sumpi kipuak ding hi.


1990 kimin Gabon khuapi Libreville ah gam makai khat in pawlpi khat hong phuan hi. Hih khua ah makai tampi in Khrih thu-um mi hi lo uh hi. Pawlpi khang mahmah hi. Lai Siangtho limtak hong kan uh ahih manin nidangin a phawk khak loh uh Sabbath thu hong mukhia uh hi. Hih khua mite’ upna in Lai Siangtho tawh kituak mah hiam, ci-in a kantel dingin mi kisawl hi. Gabon gam sungah ni sagih Sabbath ni a tawlnga a om hiam, ci-in hong kan uh hi. Tua bangin a kanna panun ni sagih Sabbath ni tawlnga om hong theih uh hi. Tua tungtawnin Libreville a om SDA makaipi Max Pierre thugen dingin hong sam uh hi. Tua a kimuhkhopna inn uh zong SDA biakinnin kizangsuak hi.

To get the latest update of me and my works

>> <<