Leo hong nusiat thupha
Nung Sabbath Mission News a zom…… Leo hong nusiat Thupha
Nung Sabbath Mission news ah Bienevevu in Topa tungah ki-ap tangval khat hi-in, Sabbath thuman a zuihna hangin a sepna ah zong lawhcing hi, cih thu i za zo hi.
Sum ngah theihna hoih mahmah khat nusia ka hih manin a thak kipan kik ding hong suak hi. Supna-in ka ngaihsun tuan kei hi. Bang hang hiam cihleh Pasian hong thupiak ka zuihnop manin, Sabbath ni-in sum ngah theihna hoih nasep ka sep sangin Pasian thu ka mang nuam zaw hi. Ka pa hong nusia khin ahih manin, ka nu ka khoi kul hi. Sabbath ni tawlnga thei-a nasep hoih khat ka ngah kik nadingin thu ka ngen hi.
Mang Lamdang Man
Tua bangin thu ka ngen a, zan khat lamdang kasak mahmah mang khat ka man hi. Biakinn sung khat hi-in, mi khat in hong hopih hi. Tua mipa kiangah hih pawlpi mi na hiam, ci-in ka dong hi. “ Hi keng” ci-in hong dawng hi. Ka lunghimawhna tuamtuamte hangin bang teng hong hopih hiam cih zong ka phawk man kei hi. Tawl khat sung a pau pau khitteh biakinn sung pan pusuak dingin hong kithawi hi. Tua leh ken zong Lai Siangtho sunga Jacob tungah vantungmi khat in a hopihna thu ka phawk hi. Vantungmi in thupha a piak mateng Jacob in tua vantungmi khahkhia nuam lo hi. Biakinn sunga ka muh mipa vantungmi a hi kha tam maw, ci-in ka ngaihsun hi. Tua bangin ka ngaihsut khawmin a khe ah manin, “hehpihna tawh hong nusia peuhmah kei in,” ci-in ka thuum hi.
Tua mi in bang deih na hiam ci-in hong dong hi. Ka et leh a nung ah sumlom tampi, inn hoih nono, mawtaw tampi pi mante le puansilh hon khat ka mu hi. Bang deih na hiam ci-in hong dong hi. “ Piak ding khat nei ing. Ahi zongin a ngah dingin kiging nai kei teh” ci-in hong dawng hi. “ Bang hong pia ding na hiam? ci-in ka dong kik leuleu hi. Hong dawn kikna ka za nawn kei a, tua leh ka ihmutna panin ka khanglo hi.
Khukdinin thunget ka kipan hi. “ Topa Pasian aw, hauhna deih keng. Nong piak bang bang tawh ka lungkim ding hi” ci-in thu ka ngen hi. Ka veng Adventist thu-um mite hangin ka lungdam hi. Tu-in midangte kiangah Adventist thu ka puaksawn zawh nadingin hong huh in,” ci-in thu ka ngen hi.
Hamphatna Thak
Tua bangin lungsim takpi tawh ka thunget khitteh video le maan (photo) tawh kisai ka sin hi. Hih bang siamte tawh Pasian nasepna le pawlpi nasep tangzai nadingin kizang thei dingin ka ngaihsun hi. Maan zaihna (camera) khat ka lei hi. Pawl sung nasepna tuamtuamte ah ka zang thei pah hi. Tua bang maan zaihna pan ka ngah sumte khol in camera lei behin nasem ding mi dang zong ka cial hi.
Pawlpi sung biakpiaknate a kipan nasepna tuamtuamte maan ka la kawikawi a, khua sung TV khatah ka suaksak uh hi. Tua bang mi tampi in ka nasep uh hong thei uh hi. Ko deihna ahih leh pawlpi in TV channel neih zawh ding ahi hi. Ko innkuan tungah Adventist thu hong puak mi pa tungah ka lungdam hi. Gabon khua sunga om mi khempeuh in Adventist thupuak hong theih ding ka mungtup uh ahi hi.
Ngimna tawh Ka nasep uh
Mi tampi in pawl sang tungtawnin Adventist thupuak za thei uh hi. Tan 4 sang khat le Tan 10 sang khat ka nei uh hi. Tu quarter Sabbath 13 sumpi in Tan 10 sanginn khat lambeh ding hi. Hih sanginn in SDA hi lo naupang, khangno tampi tungah SDA thuman theisak hi.
SDA conference in Sabbath 13 na sumpi zatna hong zasak ding hi.
