Mi vakvai le mangthang kitam semsem a, tampite pen a nuai aa
na sim mah bangin kisikkik in gupkhiatna a ngah zong om uh hi. Ahih hangin,
“Lucifer Pawlpi” ci in min phuak a, pawlpi a dingkhia makaipi Jacob Mc Kelvy
bang piangthak in tui hong kiphumte pen “Ngasa golpi’ ali thuk sung pan a mat
bangin manpha mahmah ding hi.
A naupan lai in a sanggamnu gul in tu-in si ahih manin, Jacob
McKelvy pen Pasian tungah lungkim thei lo in Pasian langpan den hi. Tua a
lungkim lohna in leitung pumpi a Lucifer pawlpi phuatkhiat ciang dong tun mawk
hi. Texas ah “Great Church of Lucifer’ min tawh pawlpi 2015 in a lunglut peuh
zop theih dingin na hong hi. Akim apam le a gamla munte panin zong lehdona
tampi na tuak uh hi. Pawlkhatte in hih “Lucifer Pawlpi” biakinn gei ah pai in,
a gamtatzia uh a deihlohna uh ot san in, khua sung pan zong hawlkhiat ding ut
in, midangte asiat sak ban ah hih pawlpi a omte pen mudah mahmah uh hi.
Ahih hangin, hih khua a Spring First Church Pastor, Robert
Hogan in ahih leh, a pawlpi mite kiangah hih bangin amaute kobawl lo dingin gen
a, amaute “itna” lah dingin Topa’n hong deih zaw hi, na ciden in; ni khat ni
ciangin amaute Pasian kiang lam hong kihei ding alamet thu gen tawntung hi.
Pastor Robert Hogan in tua hun hoih ngak kawm in, thungetna nei tawntunga, a
zekai luat ma, midang tampite in a buaisak ma in, Pasian in nalamdang khat
teitei piangsak dingin thungen tawntung a, a thunget lawhcing petmah ta hi.
Bangzah vei hiam khat a vahawh a, a vazol khit ciang in
Lucifer pawlpi makaipa Jacob pen Spring First Biakinn ah hong hawh hi. Pastor
Robert Hogan tawh a kiho nuamna thu gen in, nai 4 sung bang a kiho khit uh
ciangin Jesu Christ pen a nuntak sunga Honpa le Gumpa dingin hong sang thei ta
hi.. (Halelujah)
Tua bangin Texas a Lucifer Pawlpi, Jacob Kelvy makaih pawlpi
pen biakinn kikhak sak zo mah leh, leitung bup mun tuamtuam ah pawlpi 41 bang
na nei khin mawk uh hi. Jacob Kelvy in kum 20 sung bang apai khialhpih a, atuah
khak thute tungtawn in midangte ahoih lam bekin thuhilhna in na nei den hi.
Tulai tak a, a mangthang tampite zong ahih theih zahin vazol den hi. Jacob
Kelvy in itna le thungetna’ vangliatna pen hong tel mahmah ta a, “Bangzah takin
Pasian kiang pan gamlapi taisan khin mah leteh, na ciah nadingin hunhoih le
lampi Pasian in hong pia tawntung hi” cih thu pen a tangko pen ahi hi. Jacob
Kelvy’ zi zong tui hong kiphum in CBN News in interview a neihna ah, amaute
thukhamte ahi Luciferianism a kici Satan biakna pen tudong in a om thu leh,
apai khial khempeuh in Satan abiak loh uh thute, pawlkhatte in ahih leh Satan
om takpi dingin a up loh thute, ahih hangin amaute suahtakna alamdang a piakna
thute na gen hi.
Jacob McKelvy in Pasian’ itna in amah azawhna thu gen pen in
nei a, “Pasian langpan nadingin Lucifer Pawlpi na kipan khia a, tua zah in
gammang himah leng Pasian in hong it lai veve hi” ci in Pasian’ itna pen
uanggen penpen in nei hi. Greater Church of Lucifer in North America, Central
America, South America le Europe te ah pawlpi tampi nei hi. Amaute in Pasian
Pawlpi pen “Suahtakna khempeuh hong laksak hi ci uh a, nuntakna a nawngkai sak
mahmah, pawlpi sal ah mitampite tang sak in, amaute in a ut bangun nungta
theilo in om uh a, tua ahih man in, Pasian Pawlpi pen mawhna khempeuh hong
pianna bulpi hi, ci-in na ki hilh kisin sak uh hi.
Source: CBN.COM
Eite Pasian bangzah in paisan in, gamlapi taisan mang taleng,
"Note pen it tawp loin kong it hi" hong ci lai hi. Halelujah.
(Jeremiah 31:3). Na Khialna pan le na pukna panin kilehkik in Topa zuan leteh
Topa'n na mawhnate na thum ciangin bangzah alian mawhna ahi zong hong maisak
hi. Amen (1 John 1:9) Bangzah takin na puk khin zongin, abul pan na kipat nuam
nak leh Topa in hong sang bek tham loin, akhat veina kipatna (first attempt) in
nang hong it, ih Pa Pasian in hong sang tawntung hi. Amah in bangzah vei amah
taisan khin in khialna tampi bawl khin mah lecin, kisik kikna tak tawh na
mawhna thum in, Amah na zuat nak leh tuate hong maisak khit ciangin mangngilh
khin hi. Halelujah! (Pr. PL Thlenga). Lungdam Topa thupha
Daniel Shoute
