MUC

Print Friendly and PDF

Thursday, March 16, 2017

LESSON 9 MAY 20 – 26 NA UPNA BANGIN NUNGTA IN





SABBTH NITAK


TU KAAL SUNG SIM DING: 2Pet. 1: 1-15; Eph. 2:8; Rom. 5: 3-5; 6: 11; Heb. 10: 38; 1Kor. 15: 12 – 57.

KAMNGAH: “Hih thu hangin na upna ban uh ah gamtat hoihna na behlap unla, na gamtat hoihna uh thutheihna tawh na behlap un; na thu theihna uh pumpi ki-uk zawhna tawh na behlap unla, na pumpi ki ukzawhna uh thuakzawhna tawh na behlap un; na thuakzawhna uh Pasian bangin gamtatna tawh na behlap unla, Pasian’ deihna bangin na gamtatna uh sanggam ki-itna tawh na behlap un; na sanggam ki-itna uh itna thukpi tawh na behlapzawh nadingun na hanciam un” (2Pet 1:5-7).


Mihing in Thuciam Thak’ hong hilh thute bangci nuntak pih ding hiam? Telhak hi. Gentehna-in 2Pet. 1: 1-14 ah Peter in upna tawh dikna thu pulaak hi. Jesuh tungah a ki-ap mite’n Pasian vangliatna ngahi ding hi. Tua banah Pasian’ pianzia nei ding cihte a kipan leitung nate deihna na nial un, cihte pulaak hi (2Pet. 1: 4). Peter in Khristian nunzia ding hong hilh ziau lo-in a banbanin khat khit khat hong gelh hi. Tua banah Khrih sungah a nungta nunna, ‘kisawpsiang’ Khrih sungah khamuanna, tawntung Gam, (2Pet. 1: 9, 11) misi-te omzia tawh kisai thute hong hilh hi.

SUNDAY MAY 21

A MANPHA UPNA


2Pet. 1: 1-4 sim in. Peter in Jesuh Khrih sungah a hong kipia khin thu bang pulaak hiam? Koi bangin hehpihna pulaak hiam?

________________________________________________________________

________________________________________________________________

Peter in a laikhak thupatna-ah ‘Kote tawh a manpha mahmah upna a ngah khawm mite’ ci hi (2Pet. 1:1). Hih in thu-um khempeuh ngah a kikim hamphatna, manneihna pulaak hi. Tua hamphatna pen thaman bangin a ngah uh hi lo hi; ngah dingin kilawmna tawh a ngah uh hi lo hi. Pasian in a hong piakkhong hi, ci hi. Paul in zong hih bangin pulaak hi: “Hehpihna thupha hangin upna tawh hotkhiatna a ngah na hi uh hi. Note’ thalawhna hangin a ngah hi loin Pasian’ hong piakkhong ahi hi” (Eph. 2:8). Upna in manpha hi. Bang hang hiam cihleh upna lo-in Pasian lung kidamsak thei lo hi (Heb. 11: 6). Upna in manpha hi. Bang hang hiam cihleh upna tawh Topa kamciamte i ngak hi.

A siangtho nuntakzia i neih nadingin Jesuh vangliatna kisam hi (2Pet. 1:3). Pasian’ vangliatna hangin a nungta thei i hi hi. Ama vangliatna tawh a siangtho i hi hi. Hoihna, liatna tawh hong sam Pasian theihtelna tungtawnin tua vangliatna i ngah hi (2Pet. 1:3; John 17: 3).

Pasian a it dingin hong kisam hi. Ahi zongin itzia ding i thei kei hi. Jesuh tungtawnin, Lai Siangtho tungtawnin, piansak nate le upna le a thu piak zuihna tungtawnin Pasian i thei hi. Nisim hong piak hehpihnate hangin zong

Amah i thei hi. I tuahkhak thute, i nuntakna ah Ama nasepnate hangin Pasian theihna i ngah hi. Tua theihna in hong khel kul hi.

Tua banah a lian mahmah, a manpha mahmah kamciam – Pasian pianzia eite hong kipia hi (2Pet. 1: 4). Pasian limlemel sunin mihing hong kibawl hi-a, mawhna hangin tua limlemel mualin, melhem khin hi. Nih vei a suak kik peuhmah in, Khrih sungah nunna thak nei hi-in, Khrih in Pasian limlemel sun dingin hong puahpha hi. Ahi zongin nih vei a suak kik peuh mah in leitung siatna le cilesa deihna a nial kul hi.

Upna nei kei lecin koi bangin na nungta diam? Bang hangin Pasian hong piakkhong upna thupi hiam?

MONDAY MAY 22

ITNA, KHRISTIAN MUNGTUP


2Pet. 1: 5-7; Romans 5: 3-5; James 1: 3, 4; Gal. 5: 22, 23 sim in.

Bang thulaigil kipulaak hiam?

__________________________________________________________________

__________________________________________________________________

Tanglai mipilte in zong nunzia ding hilh den uh hi. Amau hilh nunziate zong Romans 5: 3-5; James 1: 3, 4; Gal. 5: 22, 23 sungah zong kimu thei hi. Peter’ pulaak thute tua huna mite’n zong tel pah ding uh hi. Bang hang hiam cihleh tua hun lai mipilte’ gen thute le Peter pulaak thute kilamdanna a neih hangin a kibatna om hi. Peter in a gualh zia le tong hoihte a mawk gualh hi lo-in khiatna nei takin a gualh hi-in a tawpna-ah itna pulaak hi.

Upna: hotkhiat ngah nadingin Jesuh upna (Gal. 3: 11; Heb. 10: 38)

Gamtat hoihna: Greek laimalin ‘areke’- na khat peuhpeuh a hoihna pulaak kammal hi. Upna thupi hi. Ahi zongin upna in nunna a khel kul hi.

Thutheihna: Leitung thu tuamtuam theihna a gen hi lo-in Jesuh Khrih tawh kizopna hangin Ama thu theihna hi.

Pumpi ki-ukzawhna: A picing Khristian khat in cilesa lunggulhna a kipan a na khat peuhpeuh a khengval lo dingin kikepsiam hi.

Lungduaina/thuakzawhna: ze-et bawlsiatnate thuakzawhna hi.

Pasian’ deihna bangin gamtatna: Pasian a bia lo mite in zong gamtat zia le tong hoih nei uh hi. Thuciam Thak in a nungta Pasian kiang pan hong pai zia le tong hoih pulaak hi (1Tim. 2:2).

Sanggam ki-itna: Khristian thu-um mite in innkuan khat hi. Gamtat hoih in khat le khat hong ki-itsak hi.

Itna: Peter in itna a kisam penah koih hi. Paul in zong hih bangin hong hilh hi: “ Upna, lametna le itna. Hih thum panin itna lianpen hi, ci hi (1Kor.

13: 13).

Gamtat zia le tong hoihte in ol takin kinei thei hi lo ahih manin hanciam kul hi (2Pet. 1:5). Pasian’ deihna bangin nuntakna, Ama tungah citakna puahphat nasepna ah mihing in bang panpih thei hiam?

TUESDAY MAY 23    
NA UPNA BANGIN NUNGTA IN


Peter in Khristian khat ii nunzia ding a pulaak khitteh tua bangin a nungta mi in a ngah ding thupha pulaak hi.

2Pet. 1: 8 – 11 sim in. Khrih in Amah a um mite a’ding a sepkhit thute le Khristian khat nunzia ding, bang in hih thunih tonkhawmsak hiam?

_____________________________________________________________

______________________________________________________________

Peter in a laikhak simte tungah Khrih sungah a thak nunna tawh nungta dingin hanthawn hi. Upna, gamtat hoih, thutheihna, pumpi ki-ukzawhna, thuakzawhna, Pasian’ deihna bangin gamtatna, sanggam ki-itna le itna cihte sung khangcing dingin hanthawn hi (2Pet. 1:8).

Ahi zongin Khristian khempeuh tua bangin nungta lo hi. Kim khat in Topa a theihna bangun nungta lo uh hi (2Pet. 1:8). Tua bang mite’n mawhna sung pan a kihotkhiatlam uh phawklo uh hi (2Pet. 1:9). Khristian khat in Jesuh sungah nunna thak a neih kul hi. Khrih sungah mawhmai-na, siantho-na le Pasian’pianzia a ngah ding uh kisam hi. Tua hi-in a hong teelna le a hong sapna thu-ah kiptak in om ding kisam hi (2Pet. 1: 10). Paulap tuamtuam hangin nunlui ngeina, gah nei lo nunna cihte nial ding ahi hi.

“Upna tawh kisai thu tampi i za khin hi.Ahi zongin gamtatna kisam lai hi. Mi tampi in singlamteh lo-in Zeisu nung zui uh hi. Cilesa deihna zui-a thuman a zui lo mi in amah le amah kikhem ahi hi.” Ellen G. White, Faith and Works,

50.

Romans 6: 11 sim in. Thu-um mite a’dingin Peter’ gen thute Paul in bang pulaak hiam?

__________________________________________________________________

___________________________________________________________________

Peter le Paul in upna bangin nungta ding hong hilh uh hi. Khrih sunga a nungta mi in mawhna pan a suakta mi hi-in, Pasian’pianzia a nei mi hi pah hi.Tua manin a hong kisapna tawh kituakin a nungta i hi hi. Khristian a khiatna in Khrih nun bangin nungta cihna hi. Khristian kici khempeuh in tua bangin a nungta ding i hi hi.



Koi bangin Khrih sun na hiam?Koi mun ah hoih zaw thei lai ding na hiam?

WEDNESDAY  MAY 24

LEITUNG NUNNA

“Hih buk sungah ka teen laiteng hih thute kong phawksak ding hoih ka sa hi. Bang hang hiam cihleh i Topa Jesuh Khrih in a hong lahsa mah bangin hih ka buuk ka suahkhia baihta ding hi ci-in ka thei hi. Tua thamlo in ka sih khit ciangin zong hih thute na phawk tawntung theih nadingun ka hanciam nuam hi” (2Pet. 1: 13, 14).

1956 kumin Oscar Cullman in Immortality of the Soul or Resurrection of the Dead? The Witness of the New Testament’ kici laibu gelh hi. A genna-ah sihna pan thawhkikna le si thei lo nunna cih pen kituak lo hi, ci hi. Thuciam Thak in sihna pan thawhkikna thu limtak hong hilh hi, ci-in pulaak hi. “ Ka laigelh dangte in hih bang thu pulaak ngei lo hi, ci-in genbeh hi.
1Kor. 15: 12 – 17 sim in. Sih ciangin bang piang hiam?

___________________________________________________________________

_________________________________________________________________

Cullman mah bangin Lai Siangtho thuthukkan mipilte in zong sihna le sihna pan thawhkikna thu in thuman hi, ci-in pulaak uh hi. Thuciam Thak in sihna pan thawhkikna thu hong hilh hi. I nunna in si thei lo hi, ci lo hi. Paul in sihna hangin a dah a kap mite tungah, Khrih hong pai ciangin a si mite in hong thokik ding uh ahih manin, hih thu tawh kihehnem dingin hanthawn hi

(1Thess. 4: 16- 18). Paul in sihna pan a hong tho ding mite’ omzia ding zong hong hilh hi (1Kor. 15: 12 – 57). Paul in Khrih in sihna pan a thawhkikna thu pulaak masa hi. Jesuh in a thokik lo hileh upna in kimanna nei lo ding hi. Khrih in a si mite lak panin a gah masa pen hi, ci-in pulaak hi. Sihna pan Khrih a thawhkik manin Khrih sungah a si khempeuh zong hong thokik ding uh hi.

Paul in a si thei pumpi le sihna pan a thokik ding pumpi kilamdanzia pulaak hi (1Kor. 15: 35 – 50). Tu-a i pumpi in si thei hi. Ahi zongin sihna pan a thokik ding pumin si thei nawnlo ding hi. Thuciam Thak in sihna a gen ciangin sihna pan thawhkikna thu a gen hi-in, tu laitaka mihing nunna in a si thei lo nunna hi lo hi. Hih thu in 2Pet. 1: 12- 14 sunga thute i tel nading kisam hi.

THURSDAY MAY 25

SIHNA PAN A THO KIK DING UPNA


2Pet. 1: 12 – 15 sim in. Peter in ‘ka pumpi/buuk ka nusia ding hi,’ a cihteh bang a gen hi ding hiam?

____________________________________________________________________

_____________________________________________________________________

1Pet. 1: 12 – 14 in Peter in a laigelh laitaka khua hun pulaak hi. Peter in a sih ding naikuanta hi, cih theikhol hi. A laikhakna-ah kam vaikhakna le teci panna kihel hi.

‘Hih buuk sungah ka om nawn kei ding hi…. hih buuk ka nusia ta ding hi” ci-in Peter in a genteh a sawt lo-in si ding cih pulaak hi (2Pet. 1: 13, 14). Peter in i leitung pumpi le buuk genteh hi. Sih khitteh a si thei lo, khua phawk thei khat om lai hi, a ci hi lo hi. Pumpi a tuam, nuntakna huu a tuam, ci-in kikhentuam thei lo hi.

2Pet. 1: 12 – 15 sim kik in.Koi bangin Peter in a sawt lo-in a bei ding a nunna mu hiam? Upna tawh kisai bang lungsim puak hong hilh hiam?

____________________________________________________________________

_____________________________________________________________________

2Pet. 1: 12 – 15 in Peter kammal a thupitna hong musak hi. A sawtlo-in a bei ding a nunna phawksa-in laikhak hi. Bang hang hiam cihleh Topa in tua thu mukholsak hi. Ahi zongin patauh nading, lungkhamna ding, kihtak ding om lo hi. A thupi pen in a nungta lai mite in upna ah zungkipin, a cidam ding uh thupi hi. Peter in a nungta lai mite in thuman sungah kiptakin a om ding uh hong hilh hi. A nuntak laiteng hih thu mah gen tawntung hi.

Peter in Topa tawh a kizopzia pulaak hi. A sawt lo-in a nuntakna a bei ding hi ta hi. Sih nuam tawh si ding hi lo hi (John 21: 18; Ellen G. White, The Acts of the Apostles, 537, 538). Ahi zongin lunghimawh lo hi. Mite phattuam ding nunna a neih ding lunghimawh zaw hi. Tua hi-in Peter in a upna bangin a nungta mi ahi hi.

Koi bangin i upna in sihna hong nawkzo sak hiam? Bangci bangin Khrih sungah i neih lamet tawh nungta den ding i hiam?

FRIDAY MAY 26

NGAIHSUTBEH DING: I pulaaksa mah bangin Peter in a sawt lo-in a nuntakna bei ding hi, cih theikhol hi. Koi bangin a nuntakna bei ding cih zong mukhol hi. Bang hang hiam cihleh Khrih in hilhkhol khin hi. “ A man takpi kong cihin ah, na khangno lai-in na kawng gakin n a zan ding a, midangte in na kawng hong hensakin na pain op lohna munah hong paipih ding uh hi’, a ci hi (John 21: 18). A nunna bang tawh bei hiam?

Peter in Jew mi le gamdang mi khat hi, ci-in singlamteh tungah khailupna thuak hi. A sih ding lau ahih manin a thusit thuak a Topa a nial hunte phawk kik hi. Hun khatlai-in Topa a nial khak hangin tu-in a Topa a’dingin a nuntakna a piak ding pen mi hampha khatin kingaihsun hi. Peter in lungsim takpi tawh a mawhna kisik a, Khrih in zong Peter mawhna maisakin, a Tuute kem dingin thupia hi. Ahi zongin Peter in amah le mah kilungmuang zo lo hi. A Topa a nial khaknate a lungsim ah suakkik den hi. Singlamteh tungah kibungkhai dingin ngen hi. Ama ngetna bang mahin bungbu khai-na thuakin thuman a’dingin a nunna pia hi.” Ellen G. White, The Acts of the Apostles, 537, 538. Peter in gimna lianpi a thuak hangin thu-um mite in upna sungah a picinna ding uh lunghimawh zaw hi.

KIKUP DING DOTNATE

1.  Peter a kipan Lai Siangtho in nunna siangtho ding hong hilh tawntung hi. Ahi zongin bang hangin Jesuh nungzui hi napi Khristian nunzia kinei zel hiam?

2.  2Pet. 1: 5-7 sim kik in. Koi bangin Khristian nunzia ding khat khit khat a pulaakte ah na khangto hiam? Bangci bangin midangte zong tua thu ah a khangto dingin huh ding na hiam?

3.  Peter in thanemna a neih hangin Pasian zat sawltak lianpi khat hong suak hi.Ama nunzia panin lametna le thangahna bang na nei hiam?

4.  2Pet. 1: 12 ‘thuman thutak’ cih thu in Peter hun in bang hi ding a, tuhunin bang hi ding hiam?

5.  Mi kim khat in “Sihna galah nunna om takpi mah diam,? ci uh hi. Mihing i hih nak leh a si ding i hi hi.Koi bangin Khristian khat in hih sihna thu pom ding hiam?


To get the latest update of me and my works

>> <<