MUC

Print Friendly and PDF

Thursday, March 16, 2017

LESSON 8 MAY 13- 19 PETER’ LAIKHAKTE SUNGA JESUH





SABBATH NITAK


TU KAAL SUNG SIM DING: 1Pet. 1: 18, 19; Kol. 1: 13, 14; Isa. 53: 1-12; Jn. 11: 25; Late 18: 50; 2Pet. 1:1.


KAMNGAH: “Eite, mawhna lamah misi bangin thuman lamah nungta in I gamtat theih nadingin Khrih mahmah in eite’ mawhna ama pumpi mahmah tawh singlamteh tungah apua hi. Ama liamna hangin note in damna na ngah uh hi” (1 Peter 2:24)

Peter in a laikhakna sung khempeuh ah Jesuh bulphuhin a gelh ahi hi. A thupatna ah Peter in amah le amah Jesuh sawltak, Jesuh sawlna ngah ahihna pulaak hi. “ Khrih sunga om khempeuh in nopna ngah ta hen,” ci-in thu-um mite hopih masa hi (1Pet. 5: 14).

Jesuh sihna in mawhna sung pan eite a hong tatkhiatna ding ahi hi. Jesuh in gimna lianpi thuak hi. Tua in Amah a zui khempeuhte nunzia ding hong lakkhol hi. Sihna pan a thawhkikna thu zong hong hilh hi. I si zongin Amah bangin i thokik ding hi. Jesuh in Pasian sathau nilh Vantung Messiah hi. Hih in Jesuh pianzia hong hilh hi. Jesuh in Pasian hi napi mihingin hong piangin, mihingin hong nungta-a, mihing bangin hong si hi. Hih thu hangin tawntung nuntakna kamciam nei i hi hi.

SUNDAY MAY 14

JESUH, EI A DING KIGO TUUNO

Lai Siangtho buppi deihna in Jesuh in mawhnei mi khempeuh a’dingin a hong kipiakna thu ahi hi. Adam le Eve a kipan Mangmuhna dong ah hih thu mah lampi tuamtuam tawh kipulaak hi. Pasian in mawhnei hon dingin hong zon tawntung hi (Luke 19: 10). Peter in zong hih thu pulaak hi.

1Pet. 1:18, 19; Kol. 1: 13, 14 sim in. Tankhia i cih in bang hiam? Koi bangin tatkhiatna le sisan in kizopna nei hiam?

_________________________________________________________________

_________________________________________________________________

Jesuh hong sihna tawh kisai-in “ Na pu na pate uh nuntakzia, bangmahin a kimang lo nuntakna panin a hong suahtaksak nadingin Pasian in note’ man dingin a piak pen a man a kiam thei ngun le khamte bang hi lo a, tuuno bangin paubaanna a om lo, a manpha mahmah Khrih, biakna-in a hong kipiakna tawh Pasian in note a hong suaktasak ahi hi” (1Pet. 1: 18, 19). Hih sungah limciinna nih kimu thei hi. Tatkhiatna le ganhing tawh biakna hi.

Lai Siangtho in lampi tuamtuam tawh tatkhiatna thu hong hilh hi. Gentehna-in, a suak masa la-no pen biakpiakna dingin kizang lo hi. Ta masa zong kizang lo hi (Pai. 34: 19, 20). Amaute aitangin tuuno kizang hi. A kizuak khin van khat sum tawh kitankik hi (Siam. 25: 25, 26). A thupi pen ah sila khat kitankhia thei hi (Siam. 25: 47 – 49). Peter gen mah bangin eite a hong kitatna in a sia thei nate tawh hi lo-in mawhna nei lo Jesuh sisan hi (1Pet. 1: 19). Tuuno in mawhsut biakpiakna hong phawksak hi.

Biakpiak nadingin tuuno a kigawh mah bangin eite mawhmai nadingin

Jesuh hong si hi. Mawhna bawl mi in biakbuk ah melhemna nei lo tuuno h paipih hi. Tuuno tungah a khut nga-in, tuuno kigo hi (Siam. 4: 32, 33).

Tuuno si pawl khat biakna tau-ah kitheh hi. A cianlai khempeuh biakna tau phungah kisung khia hi (Siam. 4: 34). Mawhnei mi a sih tangin tuuno in sihna thuak hi (Siam. 4: 35). Tua bangin mawhnei mi sih tangin Jesuh hong si hi. Ama sihna in mawhna le tawntung sihna panin hong honkhia hi. I thuak ding khempeuh Aman hong thuak hi.

Eite tangin hong si Jesuh bek mah i lametna hi, cih thu in mihing in Pasian tung bek mahah kinga i hihna bang hong hilh hiam?


MONDAY MAY 15     
KHRIH THUAK GIMNA


Khrih thuak gimna a thei lo i om kei ding hi. Greek laimal a kizang gimthuak cih kammal in Khrih in gualzo takin Jerusalem khuapi hong lut a kipan a sih dong a nunzia pulaak hi. Peter in zong hih thu pulaak hi.

1Pet. 2: 21 – 25; Isa. 53: 1- 12 sim in. Eite tangin Jesuh sihna bang

thu pulaak hiam?

____________________________________________________________

_____________________________________________________________________

Eite mawhna khempeuh Jesuh tungah kisuan hi. Ama pumpi mahmahin singlamteh dongah hong puaksak hi (Sawl. 5: 30). Dikna thu ah a nungta dingin mawhna ah misi i hih kul hi (1Pet. 2: 24). Mawhna in sihna piangsak hi (Rom. 5: 12). Mimawh i hih manin a si ding i hi hi. Ahi zongin mawhna nei lo Jesuh in eite sih tangin hong si hi. Tua manin tawntung sihna pan a suakta i hi hi.

Isaiah 53: 1- 12 sim in. Eite thuak ding khempeuh hong thuak Jesuh gimna bang pulaak hiam? Pasian zia le tong bang pulaak hiam?

____________________________________________________________

_________________________________________________________________

Satan kiang pan siatna in Jesuh lungtang nasak hi. Honpa in hankhuk simloh bang mah dang mu zo lo hi. Hankhuk panin lametna bang mah kipia lo hi. Pa Pasian in Ama kipiakna sang hi, cih a kipulaakna om lo hi. Mawhna lian lua mahmah a, Pasian tawh a tawntungin kikhenna hi dingin ngaihsun hi.Mawhna hangin gimna lian lua ahih manin hehpihna in honkhia zo nawn lo dingin ngaihsun hi. Mawhna hangin mihingte thuak ding Pasian’ hehna Jesuh tungah kisuan hi. A thuak ding gimna hai lian mahmah ahih manin

Pasian Tapa lungsim kitamzan hi.” Ellen G. White, The Desire of Ages, 753.

Eite a’ ding gimna a hong thuak manin Jesuh tawh bangci kizop ding i hiam? Koi bangin a hong hilh lampi zui ding i hiam? (1Pet. 1: 21)

TUESDAY MAY 16

SIHNA PAN JESUH THAWHKIKNA


1 Pet. 1: 3,4, 21; 3: 21; John 11: 25; Phillipians 3: 10, 11; Mang. 20: 6 sim in. Lametna bang hong lak hiam? Ei a’ding bang deihna nei hiam?

_____________________________________________________________________

_____________________________________________________________________

Peter in bawlsiatna thuak thu-um mite tungah laikhak hi. Tua bangin gimna thuakte tungah lametna thu pulaak masa hi. Tua lametna mitsuan tawntung ding hong hanthawn hi. Tua lametna in a nungta lametna hi. Bang hang hiam cihleh tua lametna in sihna pan Jesuh thawhkikna tungah kinga hi (1Pet. 1:3). Jesuh in sihna pan thokik ahih manin a kisia ngei lo, a tuul ngei lo ding i ngah ding gamh vantung ah kikoih hi (1Pet. 1:4). Tua hi-in bang bang piang taleh na khempeuh a bei khit ciangin i ngah ding nunna ngaihsun in.

Sihna pan Jesuh’ thawhkikna in eite zong i si zongin i thokik hamtang ding hi, ci-in lungmuanna i nei hi (1Kor. 15: 20, 21). Paul in a gen bangmahin “Khrih in sihna pan a hingkik lo hi leh eite upna in mawkna hi ding hi (1Kor. 15: 17). Sihna pan Jesuh pan nungta kik ahih manin sihna zo vangliatna nei hi, cih kimu hi. Tua hi-in Khristiante’n i neih lametna in Khrih thawhkikna siksan hi. Hununga a nungta mite’ lametna zong Khrih thawhkikna mah ahi hi.

Lametna le kamciam om kei leh koi mun i tung diam? Khrih in ei a’ding a sep khempeuh a tawpna ah thawhkikna kamciam hong guan hi. Mi tampi in misite’n bang mah khuaphawkna nei nawnlo hi, cih um lo uh hi taleh misite hong thokik ding hi, cih lametna om kei leh i lamet ding bang om diam?

Sihna in ihmutna hi. Tawmvei sung khuamial sungah a om, nunna nei lo hi bek hi. Khrih sungah a om mi in, eite nunna hong pia Khrih hong pai ciangin Khrih sungah a ihmu mi vangliatna tawh hong khanglo ding a, Topa tawh mangkhawm tawntung ding hi” (John 8: 51, 52; Kol. 3: 4). Khrih hong pai kik ciangin sihna manpha tawh a si khempeuh in Ama aw za ding uh a, hankhuk panin a si nawnlo dingin hong thokhia ding uh hi.” Ellen G. White, The Desire of Ages, 787.

Sihna thu ngaihsun in. Kuamah in pelh thei lo hi. Mi khempeuh in kihta hi. Bang hangin i nuntakna ah, thuzuihna ah thawhkikna kamciam up ding lamet ding thupi hiam?


WEDNESDAY  MAY 17

JESUH IN MESSIAH HI


I theihsa mah bangin Jesuh in nasep kipatcil in Amah in kua hiam,ci-in a dot ciangin Peter in “Nang in a nungta Pasian Tapa Khrih na hi hi,’ ci-in dawng hi (Matt. 16: 16). Khrih cih kammal in Greek laimalin ‘Christo’ hi-in,

Hebrew laimal in ‘mashiyach’ ‘sathau kinilh’ “Messiah’ cihna hi. Kumpi sem dingte zong sathau kinilh hi. Cyrus zong kumpi dingin sathau kinilh hi (Isa. 45: 11). Thuciam Lui siksanin Peter in Jesuh Khrih in Messiah hi, ci-in pulaak hi.

A nuai-a Lai Siangtho munte in ‘Messiah’ ‘sathau nilh’ cih kammal zang hi. A gen thu ngaihsun inla ‘Messiah’ ‘sathaunilh’ kammalte in bang khiatna nei ciat hiam? Peter in Jesuh in Messiah hi, ci-in a pulaakin ah, bangci bangin Peter in Messiah cih thu thei hi ding hiam?

Late 2:2 ____________________________________________________

Late 18: 50 __________________________________________________

Dan. 9: 25 ____________________________________________________

1Sam. 24: 6 _________________________________________________

Isa. 45: 1 ___________________________________________________

Kha Siangtho’hilhna tawh Peter in Jesuh in Khrih hi, ci-in pulaak hi taleh Peter in a pulaak thu theitel taktak nai lo hi (Matt. 16: 16, 17). Peter in Messiah in bang sem ding, koi bangin nasem ding cihte thei lo hi. Tua bang a thei lo Peter bek hi lo hi. Israel mite lakah Messiah tawh kisai lametzia tuamtuam om hi. Messiah, sathaunilh, cihte in Messiah tawh kisai thu pulaak khol hi mah taleh a kicingin kipulaak lo hi.

John 7: 40 in Messiah tawh kisai mite lametzia pulaak hi. Messiah in David khanggui pan hi dinga, Bethlehem khua ah hong suak ding hi (Isa. 11: 1- 16; Mikah 5: 2). A lamet uh bangin piang hi. Ahi zongin David bangin a galte uh zo mang dingin lamen uh hi. Roman mite a zo gawp ding Messiah lamen uh a, Romante’ thahna thuak ding Messiah hi dingin ngaihsun lo uh hi.

Peter in Khristian bawlsiatna thuak mite tungah a laikhakin Messiah tawh kisai theitel khin hi. Jesuh in Khrih hi, ci-in a laikhaknate-ah 15 vei bang pulaak hi.


THURSDAY MAY 18

JESUH, VANTUNG MESSIAH


Peter in, “Jesuh in Messiah hi, ci-in a pulaak banah Jesuh in Topa hi,” ci-in pulaak hi. A laikhakte a gelh khit ciangin Peter in Messiah in Pasian taktak hi, cih theitel hi. “ Topa’ cih kammal in Topa in Pasian ahihna pulaak hi. Peter in “ Jesuh in Khrih hi; Topa hi; Pasian hi, ci-in pulaak hi (1Pet. 1: 3; 2Pet. 1: 8, 14, 16).

Lai Siangtho gelh dangte bangmahin Peter in Jesuh le Pasian, Pa le Tapa kizopna zong pulaak hi.Gentehna-in “Topa Jesuh Khrih ii Pa, Pasian” (1Pet. 1:3; 2Pet. 1: 17). Jesuh pen Pa Pasian it Tapa kici hi (2Pet. 1: 17). Topa cih min in Jesuh thuneihna pulaak hi. Jesuh in vantung vangliatna a neihzia Pa Pasian tawh a kizopna panin kimu thei hi.

2Pet. 1: 1; John 1:1; 20: 28 sim in. Jesuh in Pasian hi, cih thu in bang pulaak uh hiam?

_____________________________________________________________________

_____________________________________________________________________

Eite Honpa Jesuh Khrih in Pasian hi (2Pet. 1:1). Greek laimal ah Pasian le Honpa a kibangin kipulaak hi. Pasian le Honpa in Jesuh hi. 2Pet. 1: 1 in Jesuh in Pasian takpi hi, cih kician takin pulaak hi. Khristian masate’n Jesuh tawh kisai theitel nai lo uh hi. Ahi zongin Peter laikhakte tungtawnin Pa, Tapa le Kha Siangtho thu theihbeh uh hi ( Pa le Tapa thu 1Pet. 1: 3, 2Pet. 1: 17; Kha Siangtho tawh kisai

– 1Pet. 1: 12; 2Pet. 1: 21). Kha Siangtho in Pasian ahih mah bangin Jesuh in Pasian hi. Khang tampi khit ciangin pawlpi upna ah Thumgawm Pasian khat hi, ci-in kipulaak hi. SDA pawlpi in zong Thumgawm Pasian khat um i hih manin Upna Thuguiletpi 28 lakah khatin kihel hi. Peter pulaak bangmahin Jesuh in Messiah bek hi lo-in Pasian takpi hi.


Jesuh nunzia, a sihna cihte in Pasian hi takpi hi, cih thu in banghangin i biak Pasian it ding, muan ding kul hiam? Na lawmte tawh kikum in.

FRIDAY  MAY 19

NGAIHSUTBEH DING: Khrih in Messiah hi. Khrih cih min in “Sathaunilh” cihna hi-in Hebrew mite’n zong hun thak a pan ding Pasian Sawltak khat lamen uh hi. Hebrew hi taleh Greek hi taleh Messiah cih a pulaak kammal in ‘sathaunilh’ cih khiatna nei hi. Jesuh in Khrih hi, cih thu in Ama masuan a pulaak kammal hi.

“Thuciam Thak in ‘Christos’ kammal 500 val vei bang pulaak hi. Kum zalom khat lai-a Jew mite’n Messiah tawh kisai lametzia tuamtuam a om hangin Messiah in Pasian tawh kizopna nei hi ding hi, ci-in lamet uh hi. Messiah in Pasian Gam phut ding a, hun thak pan ding hi. Messiah tungtawnin Pasian in a mite hon ding hi. Jesuh in a min dingin Messiah niallo hi. Ahi zongin zat ding thapia lo hi. Bang hang hiam cihleh mite’ ngaihsutna ah Messiah cih minin leitung gam vai hi. A nasepna ah amah le amah kilangtangin Messiah hi, ci-in a kipulaak loh hangin, Peter in “Nang in Messiah hiteh” ci-in a pulaak thu Jesuh in nial lo hi. Amah le amah Messiah ahihlam kitel hi. Khrih min suangin note tui hai khat hong pia mi in thaman ngah lo-in om lo ding hi, ci-in zong pulaak hi (Mark 9: 41)” The SDA Bible Commentary, vol. 12., 165.

KIKUP DING DOTNATE

1.    Isaiah 53: 1-12 sim in. Ei a’ ding Jesuh in bang sem hiam? Eite tangin a septe gelh khia in. Eite tangin a hong sihna thu na tel hiam? Bang hangin eite tangin a hong sih ding kisam hiam?

2.    A genthei mite lametna a pia dingin leitung nunna khitteh nunna om hi. Tu-in na nunna hamsa taleh Khrih hong pai ciangin na khempeuh nopna tawh kidim ding hi. Lai Siangtho in hih

thu hong hilh hi. Mi tampi in hih thu nial uh hi. Kikhemna hi, ci uh hi. Koi bangin na dawng diam?

3.    Thursday ni-a Khrih in Pasian hi, cih thu le Pasian zia le tong ngaihsun kik in. Bang hangin Jesuh in Pasian hi,cih thu in Pasian thu bang hong lak a, bang hangin lungdamna thu kici hiam?





To get the latest update of me and my works

>> <<