MUC

Print Friendly and PDF

Thursday, March 16, 2017

LESSON 7 MAY 6 – 12 A KINIAMKHIAT MAKAI




SABABTH NITAK


TU KAAL SUNG SIM DING: 1Pet. 5: 1-10; Sawl. 6: 1-6; Matt. 20: 24

– 28; Jer. 10: 21; Pau. 3: 34; Mang. 12: 7 – 9.
KAMNGAH:“Pasian in note hong kem ding ahih manin na lungkhamnate khempeuh uh ama kiang tunpih un” (1Pet. 5: 7).


A khangto pawlpi in a muibun kimakaihna nei hi. Tua bang kimakaihna in Pasian kiang pan le Ama kammal pan hong pai hi. Pawlpi mimal khat ciat in Pasian piak siamnate zangin hotkhiatna thu tangko uh hi. Pawlpi kimakaih ding kisam mahmah hi. Manlahpi mah kipiakkhiat manin hotkhiat nasepna ah kihel mi tampi hi. Pawlpi nasepna ah kihel nuam lo-in pawlpi thapia, biakpiaknate ah zong kihel nuam lo uh hi. Pawlpi makai khat pen upna kip ding kisam hi.

Peter in bawlsiatna thuak pawlpi laikhakin, tua bang hun laitakin makaite’n zong hamsatna thuak ding uh hi. Kua in bawlsiatna thuak pawlpi makaih zo diam? Peter in khuatual pawlpi kimakaihna pulaak hi (1Pet. 5: 1-10). Pawlpi le pawlpi mite omzia ding zong hong hilh hi. Ama laikhakte in tuni dongin mannei hi.


SUNDAY MAY 7

PAWLPI MASA-A UPA-TE


Sawl. 6: 1-6, 14: 23, 14: 23, 15: 6; 1Tim. 5: 17; 1Pet. 5:2 cihte in pawlpi in bang tuak a, makaite’n bang masuan nei uh hiam?

_________________________________________________________________

______________________________________________________________

Pawl sungah mi tampi hong ki-ap uhteh pawlpi in Pasian thupha sang hi. Ahi zongin Khristian masate’ hun lai bang mahin pawlpi khan ciangin buaina zong hong om hi. Kha Siangtho in nasem a, thu-um mi kibehlap hi (Sawl. 1-5). Pawlpi mi tamlua ahih manin makaite’n makai zo nawn lo uh hi. Pawl sungah kideidanna hong om hi. Tua in buaina lianpi suak hi. Greek kampau meigongte kiphawk kha lo hi. Tua thu hangin nungzui 12 a huh dingin upa, deacon teelkhia uh hi. Kha Siangtho in pawlpi masate makaih hi. Ahi zongin pawlpi ki-uk, kimakaihzia khel kul hi. Pawlpi makai huh dingin upa ding teel uh hi. Paul le Barnabas in a pai-na peuh uh ah Khrih thu hilh uh a, pawlpi phutin upa le deacon ding teel uh hi ( Sawl. 14: 23).

Pawlpi masa lai-in pawlpi upa in na tampi sem hi. Pawl sung a lut thak mite thuman hilh uh hi. Thugen uh hi. Pawl sungah a kisam bangin nasem uh hi (Sawl. 15: 6; 1Tim. 5: 17; 1Pet. 5: 2).

A tawntungin kithuhual kei ta le uhcin, koi bangin pawlpi upa tawh nasemkhawm ding na hiam?


MONDAY MAY 8
UPA-TE


1Pet. 5: 1-4 sim in. Upa khat in pawlpi tungah bang lungsim a neih ding kisam hiam? Koi bangin pawlpi mi khempeuh in tua bang lungsim nei thei ding hiam?

____________________________________________________________________

_____________________________________________________________________

Peter in pawlpi upa khat ii omzia ding a hilhna ah amah mah zong upa khat ahihlam kiphawk hi. Ama zia thu nih pulaak hi:Khrih thuak gimna le sihna teci ahihna le a hong tung ding vangliatna ngah ding ci-in lametna pulaak hi. Upa khat in eite tangin Khrih hong thuak gimna le a hong piak lametna phawk tawntung ding kisam hi.

Upa khat ii nasep pen tuucing tawh kibang hi. Tuu-te in amau thu-in lampial uh hi. Tua bang mahin thu-um mite zong lampial kha thei hi. Lampial loh nadingun makaih kisam hi; huh kul hi. Upa khat in kiniamkhiatin mite etteh dingin a nuntak ding kisam hi.

Jer. 10: 21; Eze. 34: 8 -10; Zech. 11: 17 sim in. Tuucingte tungah bang thu kihilhkhol hiam?

_______________________________________________________________

_______________________________________________________________

Tuucingte in tuu-te a nusiat loh mah bangun pawlpi upa khat in zong a pawlpi mite nusia lo ding hi; amaute tawh nasem khawm ding hi. Pawlpi mite in biakpiakna ah a kihel dingun kamnem tawh zol ding hi. Hotkhiatna thei nailote hilh ding hi. Ut lopi-in sem lo ding hi. Utna lungsim tawh sem ding hi.

Upa nasep in a baihno nasep hi lo hi. Hoihtakin pawlpi in na a sep nadingin pawlpi mimal khat ciat in nasep kul hi. Mi tampi in upa sem nuam lo hi. Bang hang hiam cihleh hun, neihlelamh a kipan kipiak kul hi. Kim khatin upa dingin amau le amau kilawm kisa lo uh hi. Ahi zongin Peter hong hilhna-ah lungsim tak tawh upa ding a kiseh mi khat in hoihtak sem dingin hong hilh hi.


TUESDAY MAY 9  
MI NASEM MAKAI


1Pet. 5:3; Matt. 20: 24 – 28 sim in. Kimakaihna tawh kisai thupaipi bang hong hilh hiam?

_____________________________________________________________

_______________________________________________________________

Greek laimal ah ‘katakurieuontes’ (1Pet.5:3) kizang hi. Hih kammal mah

Matt. 20: 25 ah zong kizang hi A khiatna in mi khat tungah ‘ukna nei’ ‘to sem’ cihna hi. Makai khat in mite tungah ukna nei, to nasem ding hi lo hi” cih hong hilh hi (1Pet. 5: 3). Jesuh in zong hih mah hong hilh hi (Matt. 20: 25).

James le John’ nu in Jesuh kiang hong pai-in Jesuh in a Kumpi Gam hong phut ciangin James le John in Jesuh’ vei le tak ah panmun ngah dingin a ngetna tawh kisai-in Jesuh in makaihna tawh kisai hong hilh hi (Matt. 20:

20-23; 20: 24 – 28). Jesuh in tua bang ngetna mawhsak lo hi. Jesuh in amaute ngaihsutna khempeuh telmuh khin hi. Jesuh a itna uh kimu thei hi. Cilesa deihna pulaak ahih sam hangun amaute tungtawnin hotkhiat itna panin hong pai itna hi, cih kimu hi. Jesuh in amaute han lo-in, lungsim siangtho nading le itna kip a nei dingin hilh zaw hi.” Ellen G. White, The Desires of Ages, 548.

Jesuh in tua bang zaliatna pia lo-in Pa Pasian piak dingin pulaak hi. Tua banah Ama Gam, kimakaihzia le Gentail kimakaihzia kilamdanna zong pulaak hi. Jesuh Kumpi Gam ah makai nuam mi khat in amah le mah kiniamkhiatin Jesuh Khrih bangin sila ahih kul hi. Mite in Ama nasem dingin Mihing Tapa hong pai hi lo hi; mite nasem dingin hong pai hi zaw hi. Mi tampi aa dingin a nunna hong pia hi (Matt. 20: 28).

Pawlpi upa khat in ama deihna nial in, Jesuh Khrih mah bangin mi nasem ahihlam a kiphawk ding kisam mahmah hi. Phill. 2: 4-8 sim in. Koi bangin Paul’ thuhilh le Peter’ hilh in kibang hiam? Lai Siangtho hong sawl bang mahin pawlpi in koi bangin nasem ding hiam?


WEDNESDAY MAY 10 
KINIAMKHIATNA PUAN BANG SILH


Peter huna mite khat le khat kideidanna lian mahmah hi. Nampi, namneu, mihau, mizawng kikhen uh hi. Sila nei tampi om hi. Mineute’n ulian mai-ah kiniamkhiat kul hi. Greek laimalin kiniamkhiat cih kammal in ‘thanem,’ ‘nunniam,’ ‘thupilo’ ‘mizawng’ cih pulaak hi. Khua sungah bangmah lo mite cihna hi.Khristian le Judaism biakna simloh in ‘kiniamkhiat’ ding pen sila nunzia hi; bang mah manlo nunna pulaak kammal khatin ngaihsun uh hi.

1Pet. 5: 5-7 sim in. Tua hun lai mite’nunzia siksanin Peter in bang thu pulaak hiam?

__________________________________________________________________

_____________________________________________________________

Lai Siangtho in Peter huna mite’ ngaihsut bangin kiniamkhiatna pen manpha-sa mahmah hi. Peter in Paunak 3: 34 siksanin (Septuagint

– Greek pau tawh kigelh Thuciam Lui) kiniamkhiat a thupitna pulaak hi. James 4:6 in zong tua mah pulaak hi. Kamsangte in zong kiniamkhiat ding mah hong hilh hi (Isa. 13: 11; 23:9; Job 40: 11).

Pasian mai-ah nunzia hoihte lakah kiniamkhiatna zong kihel hi. “Pasian in ama hoihsak hun ciangin note hong laptoh theih nadingin a thahat Pasian’ khutnuai-ah kiniamkhiatin na om un” (1Pet. 5: 6), ci-in hong hilh hi. Pasian tawh kizopna-ah kiphasak, kiliatsakna sangin kiniamkhiatna kisam hi.

Mawhnei mite in Pasian’ hehpihna hangin hotkhiatna ngah i hi hi. Hih in mi khempeuh kikimna pulaak hi. Tua hi-in Singlamteh mai-ah eite in kiniamkhiat ding kilawm hi. Mi tawh kizopna ah kiniamkhiat kisam hi. Makai khat in a kiniamkhiat kul hi. Na khempeuh a Piangsak Pa Pasian mai-ah kiniamkhiat ding kisam hi. I makai-te tungah i kiniamkhiat thei a, ahi zongin i nuai-siahte mai-ah kiniamkhiat ding hamsa hi. Mi khempeuh tungah kiniamkhiat kul hi. Hih in Topa deih kiniamkhiatna ahi hi. Peter gen kiniamkhiatna zong hih mah ahi hi.

Singlamteh le Khrih nunzia in hong kiniamkhiatsak hi lo hiam?


THURSDAY MAY 11  
A HAWK HUMPI BANGIN


Peter in bawlsiatna thuak mite tungah laikhak hi. Amaute a kipan tu dongin Kidona Lianpi sungah i om hi.

1Pet. 5: 8 – 10; Mang. 12: 7 -9 sim in. Mawhna kipatna le Satan’ nasep bang pulaak hiam?

_____________________________________________________________________

_____________________________________________________________________

Khristian thu-umte’n nuntakna le sihna kido-na ah masuan nei hi. Nunna lampi in kumpite’ Kumpi, topate’ Topa, Pasian Kammal Jesuh’makaihna lampi hi. Sihna lampi ahihleh tanglai Gulpi Satan’ makaihna lampi hi (Mang. 19: 13; 12: 7 -9; 20: 7,8). Tuhunteh mi tampi in Satan om kei a ci zongun Satan pen om takpi a, siatna ding bekin nasem hi. Ahi zongin a lungdamhuai thu in a sawtlo-in Satan beimang ding hi (Mang. 20: 9, 10).

Peter in Galpa khemna a lauhuai-zia hong hilh hi. Satan in humpi bangin a muh khempeuh ne dingin zong kawikawi hi(1Pet. 5:8). Bawlsiatna a thuak mite’n a thuak gimna in Satan nasep hi, cih a theih ding uh kisam hi. Ahi zongin amau thuak gimna a bei ciangin a bei ngei lo nuamna tawh kidim ding uh hi (1Pet. 5: 10).

1Pet. 5: 10 sim kik in. Peter in bang gen hiam?

__________________________________________________________________

__________________________________________________________________

Tua huna Khristiante’ thuak gimna i theih loh hangin Peter in amaute tungah lamet na guan hi, cih kimu thei hi. Dawimangpa in nasem takpi hi. Tua manin gimna tawh i kipelh thei kei hi. Ahi zongin Pasian hong hehpihna in Dawimangpa zo khin zo hi. Tua hi-in bang bang gimna i thuak zongin Topa tungah a citak mi in gualzawhna ngah ding hi.

Bang bang piangta leh koi bangin na upna kip ding hiam?


FRIDAY MAY 12

NGAIHSUTBEH DING: Jesuh in a nunzuite tawh Nitak An a nekna-ah a gamtatzia in mi nasem makai khat ii makaihzia ding hong hilh hi.Tua hun laitakin Jesuh in Pasian Tapa ahihlam kithei-in a sawt lo-in a Pa kiangah ciah kik ding cih thei hi (John 13:1). Annek khitteh Jesuh in a nungzuite’ khe silsak hi. Tua khitteh “Note’ Topa le Siapa in na khe uh hong silsak ka hihleh note khatlekhat na kisilsak kan ding uh kilawm hi. Note tungah ka hong gamtat bangin note na gamtat theih nadingun a lim a hong lak ka hi hi” (John 13: 14, 15). Khrih nungzuite khatlekhat khe kisilsak ciangin Jesuh’ hong thupiak bangin a zui i hih banah Khrih hong lamlah bangin Ama gam a’dingin mi nasem makai i hihna a pulaak i hi hi. Jesuh tawh a kikhenkhit uh ciangin Nungzuite’n a Topa uh phawkin Amah bangin kiniamkhiat uh hi. Tua bang mahin makai khat in mite’n ama nasem hi lo-in, mite’ na sem ahihlam kiphawk ding hong hilh hi.

Vangliatna tawh kidim Jesuh in mihingin hong kiniamkhiat hi. Na khempeuh kipiansak ma-in a om khin, kipatna le tawpna nei lo hi kei leh mihingin hong kiniamkhiat lo ding hi. Khrih in mihing dinmun ah a hong om theih nadingin a Kumpi puan, a kumpi lukhu, ama vangliatna khempeuh nusia-in mihingin hong nungta hi. A hong kiniamkhiat manin eite khempeuh in Pasian tanu tapa hihna i ngah hi.

“A kiniamkhiat, hehpihna tawh kidim nu le pa in Khrih zia le tong kilangsak ding kisam hi” Ellen G. White, Sons and Daughters of God, 81.

KIKUP DING DOTNATE:

1.   Jesuh in a nasep kipatna dingin Dawimangpa in na ze-et masa hi. Ni 40 val anngawl hi. Lai Siangtho siksanin Dawimangpa’ ze-etna naang zo hi ( Matt. 4: 1-11; Mark 1: 12, 13; Luke 4: 1-13). Koi bangin ze-etna zo ding na hiam?

2.   Kiniamkhiatna man na theihte pulaak in. Koi bangin kiniamkhiat ding na hiam?

3.   Tu kaal sunga makai hoih khat in a neih ding zia le tongte banah a dang bang om lai hiam? Pawlpi makaite’ zia le tong in leitung makaite’ neih zia le tong a kibatna uh om hi lo a hiam? Bangte in kilamdang hiam?

4.   Satan in a taktak hi lo-in a limciinna bek hi, cih upna koi bangin nialin a takpi mah hi, cih na hilh diam?





To get the latest update of me and my works

>> <<