LESSON 6 APRIL 29 – MAY 5 KHRIH A’DING THUAKNA

SABBATH NITAK

TU KAAL SUNG SIM DING: 1Pet. 1: 6, 3: 13 – 22, 4: 12- 14, 4: 17 – 19;

2Tim. 3: 12; Mang. 12: 17.

_KAMNGAH: “Khrih mahmah in zong note a’dingin thuakin, ama khekhap na zuihtheih nadingun etteh ding lim hong nusiat ahih manin hih bangin a thuak ding mahin Pasian in note a hong

sam ahi hi” (1Pet. 2: 21).

Kum zalom masa lai-in Khristiante’n bawlsiatna thuak uh hi. Sawltakte Tangthu sungah tua thute kiciamteh hi. Peter in bawlsiatna, gimna a thuak mite tungah laikhak hi. “Tua ahih manin tu laitakin mite’ bawlsiatna a tuamtuam na thuak manun tawlkhat na lungkham uh ahi zongin hih bang thuakna hangin lungdamzaw un. Hih bang thuaknate in a um takpi mah na hihna uh hong kilangsak hi. A siathei khamte nangawn, a hoih taktak mah ahi hiam, ci-in mite in mei tawh sin uh ahih manin, kham sangin a manpha zaw note’ upna zong kiptak mah ahi hiam, ci-in Pasian in hong sin ding mah ahi hi. Tua bangin na thuakzawh uhleh Khrih hong kilat Ni ciangin phatna, minthanna, le pahtawi-na na ngah ding uh hi” (1Pet. 2: 6, 7). “ Tawlkhat na thuak khit uh ciangin, Khrih tawh na kipawlna hangun tawntung minthanna a ngah dingin note a hong sam, hehpihna kicingin a nei Pasian in note a cingtaakin hong bawl ding a, kipna, thahatna, bulkip kician hong pia ding hi” ci-in pulaak hi (1Pet. 5: 10).

Peter laikhak tawmno khat hi. Tua sungah Khrih a’ding gim thuakna mun thum ah pulaak hi (1Pet. 2: 18 – 25, 3: 13 – 21, 4: 12 – 19).

SUNDAY APRIL 30   

KHRISTIAN MASATE KIBAWLSIATNA

1Pet. 1:6, 5: 10 sim in. Peter in bang thu pulaak hiam? Thu-um mite’n bawlsiatna a thuak uhteh a upna uh bangci hiam?

_______________________________________________________

________________________________________________________________________________________________________________________

Kum zalom masalai-a thu-um mite’n gimna le sihna thuak uh hi. Roman Emperor Trajan tunga lai kikhak khat in Khristian thu-um mite nunna a lauhuai-zia pulaak hi. Trajan lai a khak pen kua hiam cihleh Pontus le Bithynia gam uk Pliny hi (AD 111 – 113). Peter laikhakna ah zong hih gam nihte kihel hi (1Pet. 1: 1).

Pliny in Khristian thu-um mite tawh kisai bangcih ding i hiam ci-in Trajan kiangah thudong hi. Khristian hi ing, a kicite’n thahna thuak uh hi. Khristian pawl khatte ahih leh nidangin Khristian hi-in, bawlsiatna a hong tunteh Khristian hi kei ung, ci-in pulaak uh hi. Pliny in Khristian upna nusia taktak maw cih thei nuam ahih manin tua mite kiangah Trajan, pasian tuamtuamte tungah paknamtui hal dingin sawl hi. Tua banah Jesuh hamsia dingin thupia hi.

Rome gam sungah emperor (gam uk) biakna a tam hangin a damlai emperor biakna pen tam lua lo hi. Emperor khat in ama min tawh biakna mun bawl thei hi. Tua biakna munte in siampi nei le biakna tau nei hi. Pliny in tua biakna munte ah emperor milimte a’ding meihal biakna pia dingin a gam mite thupia hi. Asia Minor sungah hih bangin biakna pia uh hi.

Kum zalom masalai-in Khristian tampi in hamsatna lianpi thuak uh hi. Emperor Nero hun (AD 54 – 68) le Domitian (AD 81 –96) sungin bawlsiatna nasia mahmah hi. Peter Masa sungah kigelh bawlsiatnate in mun khat a om Khristiante’ kibawlsiatna, a man lo-in kimawhsakna (1Pet. 2: 12), gensiatna le langbawlna (1Pet 3: 9, 4: 14) a thuak mite tungah laikhak ahi hi. Bawlsiatna lianpi a thuak uh hangin Peter sungah thahna, thongkiatna cihte kipulaak lo hi.Ahi zongin a upna uh hangin gimna thuak uh hi, cih pen kidawk hi. Tua manin Peter Masa sungah thu upna kip ding kilim gen mahmah hi.

MONDAY MAY 1

GIM THUAKNA LE KHRIH LIMPHA

1Pet. 3: 13 – 22 sim in. Koi bangin upna hangin bawlsiatnate thuaktanzo ding? Koi bangin Khrih’ gim thuakna le thu-um mite’ thuakna kizom hiam?

___________________________________________________________

__________________________________________________________

Peter in “Thumanna hangin gim thuak mite hampha hi” ci-in pulaak hi (1Pet. 3: 14). Hih in Jesuh kammal hong phawkkiksak hi: “ Pasian’ deihna bangin gamtatna hangin bawlsiatna a thuak mite in thupha ngah ahi uh hi” (Matt. 5: 10). Tua hi-in Peter in ‘hong bawlsia mite kihta kei un. Khrih in Topa hi, cih phawk un, ci-in hanthawn hi (1Pet. 3: 15). Tua bangin Topa muanna lungsim in bang bang langpannate kantanzo sak ding hi. Khristiante’n sunga om lametna midangte zong theisak un. Lungnemna le mite deih theih dingin pulaak un, ci-in hong vaikhak hi (1Pet. 3: 15, 16).

Mite muhkhialh dingin a gamtat loh nadingun kidawm uh hen. Mawhsaktheihna tuamtuamte pel un hen, ci-in vaikhak hi. Lungsim kisuanna omsak kei un (1Pet. 3: 16) Tua hi leh amau a mawhsak, a langpan mite’ maizumna piang zaw ding hi.

Khialhna hanga gimthuakna in thupha hi lo hi (1Pet. 3: 17). Ahi zongin thu-um mite’ gim thuakna in thuman, a upna uh hangin gim thuak uh hi zaw hi. Hih gimna nihte kibang lo hi. “Gamtatsia-in i om sangin Pasian’ deihna ahih nakleh i gamtat hoihna hangin gimna i thuak hoihzaw hi” (1Pet. 3: 17).

Tua bang a pulaak khitteh etteh ding Khrih’ gimthuakna thu genbeh hi. Khrih in ama dikna hangin gimthuak hi. Amah a mudah, a langpang mite’ mawhna le Ama mawhneihlohna tehkak theih ding hi lo hi. Khialhna hang hi lo, thumanna hangin gim thuak mi a om leh, tua in Jesuh Khrih hi.

Ahi zongin Khrih gimthuakna hangin hotkhiatna ngah thei i hi hi. Mawhnei mite sihtangin amah hong si hi (1Pet. 3: 18). A mawh lo mi khat mi mawh a’dingin hong si hi. Amah a um mi khempeuh in tawntung nuntakna kamciam ngah ding hi.

Na khialhna hang hi lo, na hoih nasepna hangin gim na thuak ngei hiam? Tua in Khristian hihna bang hong hilh hiam? Koi bangin Khrih’ zia le tong kilangsak cih thu na tel hiam?

TUESDAY MAY 2

GIMNA LIANPI

1Pet. 4: 12 – 14 sim in. Bang hangin bawlsiatna i tuahteh lamdangsa kei un, ci hiam?

_________________________________________________________

____________________________________________________________

Peter in Khristiante’n gimna a thuak uh ciangin Khrih bangin gimna a thuak uh hi, ci-in hilhcian hi. Lamdangsak ding hi lo hi. Paul in zong ‘ Pasian’ deih bangin a gamta nuam mi in gimna tawh kipelh lo hi,’ ci-in hong hilh hi (2Tim. 3: 12). Khrih mahmah in zong a nungzuite hong hilhkholhin ah “Note hong kibawlsia-in hong kithat ding a, keima hangin Gentail mi khempeuh in note hong mudah ding uh hi. Tua hun ciangin mi tampi in a upna uh khahsuah ding a, khatlekhat kimudahin khatlekhat kilehhek ding uh hi” (Matt. 24: 9, 10).

Ellen G. White in zong hih bangin hong hilhkhol hi: “ Khrih sungah a nungta mi in bawlsiatna thuak ding hi. Khrih lungsim a nei mi peuhmah in langpanna le bawlsiatna thuak ding hi. Abel a kipan Pasian’mite in bawlsiatna a thuak toto hi. Bawlsiat gimthuakzia a kibat loh hangin, Pasian mite’ thuakna bei nai lo hi.” The Acts of Apostles, 576.

Mang. 12: 7 sim in. Hun nunung ciangin Khristiante kibawlsiatna bang hong hilhkhol hiam?

____________________________________________________________

____________________________________________________________

Peter hun lai mah bangin hun nunung ciangin zong a citak Khristiante in bawlsiatna thuak ding hi. Tua bang bawlsiatna meikuang tawh kigenteh hi. Meikuang in na tampi susia hi. Ahi zongin na tampi tak mah hahsiang hi.

Meikuang a thuakte tungah kinga hi. Mei hangin innkang thei hi. Kham le nungte mei tawh kihahsiang hi. Kuaman a ngaihsun kha kei zongin Pasian in bawlsiatna panin na hoih piangkhiasak hi. Tua hi-in Peter in “bawlsiat thuak pen deihhuai lo hi. Ahi zongin bawlsiatna i tuah ciangin lamdangsa lo-in, lungkiat loh ding kisam hi. Upna tawh mainawt ding thupi hi, ci-in hong hilh hi.

Bangci bangin a upna hangin gim thuak mi khat thapia-in Topa sungah na kipzawkna dingin na huh diam?

WEDNESDAY  MAY 3

THUKHENNA LE PASIAN MITE

1Pet. 4: 17 – 19 ; Isa. 10: 11, 12 le Mal. 3: 1-6 enkak in. Bang thu pulaak uh hiam?

____________________________________________________________

____________________________________________________________

Pasian mite tungah thukhenna kipan masa hi. Peter in Pasian mite’ thuak gimna le Pasian thukhenna kizopzia pulaak hi. Amaute’ thuak gimna in Pasian thukhenna a thuak uh hi ding hi. Bang hang hiam cihleh Topa thukhen pen A mite tawh kipan ding hi. “ Tua ahih ciangin Pasian’deihna bangin gimna a thuak mite gamtat hoihin, a kamciam a tangtungsak tawntung hong Piangsak pa muangin ama khut sungah a ki-ap ding uh ahi hi” (1Pet. 4: 19), ci-in hong hilh hi.

Luke 18: 1-8 sim in. Koi bangin Pasian’ thukhen ding hong phawksak hiam?

____________________________________________________________

_____________________________________________________________

Lai Siangtho sungah thukhenna pen deihhuai khat hi. Meigongnu in thukhen pa kiangah pai-in a thu kikhensak nadingin ngen den hi. Meigong nu in sum nei lo hi. Ama ngah dingin kilawm a ngah nadingin thukhenmangpa kiangah ngen hi. Thukhenna tawh kisai Jesuh in “A sun a zanin ama tungah a thumthum ama mite’ thu a manin Pasian in khensak lo ding ahi hiam? Amaute a huh ding kizekaisak ding ahi hiam? ci-in hong hilh hi (Luke 18: 7).

Mawhna in leitungah siatna hong tun hi. Pasian’ mite in na khempeuh a kibawlpha kik ding a ngak uh sawt khinta hi. “ Topa aw, nang, kua in hong kihta lo ding a, na liatna hong phat lo ding ahi hiam? Nang bek na siangtho hi. Thumanin na sepnate mi khempeuh in mu uh ahih manin minam khempeuh nang kiangah hong pai-in na mai-ah hong bia ding uh hi” (Mang.

15: 4).

Siatna bawl napi nuamtakin a om, a suakta mite ngaihsun in. Bang hangin thu-um mite a’dingin thuman tawh thukhenna thupi hiam? A man thukhenna om ding hi cih kamciam in bang lametna hong guan hiam?

THURSDAY MAY 4

GIM THUAK TALEH UPNA

I pulaaksa bang mahin Peter in amau upna hangin gim thuak mite tungah laikhak hi. Tawlkhat sung gentheih gimna om lai ding hi. Gimna khitteh tawldamna a ngah mah bangun tuhunin zong gimna thuak mah taleh lungnop khamuanna kingah hi.

Bang hangin gimthuak? Hih dotna kum tampi cingkhin hi. Lai Siangtho kigelh masa penpen Job sungah zong hih thu mah kidong hi. Jesuh simloh, guta, mithat, siatna bawl lah hi lo gim thuak Job hi. “Ka nasem Job na phawk kha hiam? A paubaang lo, a thutang, Pasian zahtakin gamtat hoih lo a peel amah tawh a kibang midang leitungah na mu kei ding hi,” kici hi (Job 1:8). Ahi zongin ama nunzia ngaihsun lehang, ama khialhna hang hi lo, a gamtat hoih manin gimthuak hi.

1Pet. 5:8; Mang. 12: 9, 10 in, koi bangin gimna kipatna pulaak hiam?

__________________________________________________________________

__________________________________________________________________

A tomin genleng Satan in Khrih a dona sungah nungta i hih manin gimthuak i hi hi. A om lo thu khat a kigen mawk hi lo-in, a piang takpi, a om takpi thupiang ahi hi. Dawi gilo om takpi hi. Jesuh om takpi hi. Khrih in mihingte a’dingin hong do-sak hi.

1Pet. 4: 19 sim in. Koi bangin tu-a gimnate hong musak hiam?

_____________________________________________________________

______________________________________________________________

Eima khialhna lo napi gim i thuak ciangin Job mah bangin “bang hangin gim thuak ka hiam,? ci-in i dong kha zel hi. Ahi zongin a hang i tel zo kei hi.

Peter hong hilh bang mahin gimthuak mi khat peuh in Pasian tungah ki-ap ding, Amah muang veve ding kisam hi. Bang hang hiam cihleh Pasian in ciampel lo ei hong Piangsak Pa, na hoih a sem tawntung Pasian hi.

Gimna a thuak mi khat in bang hangin Pasian in hoihna tawh kidim, itna tawh kidim Pasian hi, ci-in phawk tawntung ding thupi hiam? Koi bangin Ama hoihna, hong itna phawk zaw ding na hiam?

FRIDAY MAY 5

NGAIHSUTBEH DING: Sunday ni-a thusinna ah Khristian kibawlsiatna kihel hi.Pliny in Trajan kiangah bang gen hiam cihleh “ Khristian upna a nusia mite ka dotna ah Khristian ka hi, a ci mite Khristian na hiam ci-in nihvei ka dong hi. Ka dot ciangin Khristian na hih leh hong kithat ding hi, ci-in ka gen hi. Khristian hi ngei- napi tu-in a upna a nial mite kiciamna ka neisak hi. Amaute in milim bia-in paknamtuai hal uh a, Khrih samsia uh hi.” Pliny Letters, Vol. 2., 401 – 403.

KIKUP DING DOTNATE:

1.  Pliny hun lai-in Khristiante’n bang hamsatna lianpi tuak uh hiam? Vantungmi Thumna thupuak bang mah in hun nunung ciangin tua bang hong tung kik ding hi lo hiam? Satan maw, Khrih maw, kua bia zaw ding cih tawh kisai bang thu pulaak hiam?

Leitunga gimna a piang khempeuh Pasian’ thupiak a zui mite hangin a piang hi, ci-in kingawh ding hi. Gal kido-na, sisan luanna, kialtunnna, zinlinna, cihte hangin Pasian’ mite in muhdah, langpanna thuak ding uh hi. Amaute hehna in lian semsem ahih manin Pasian thuzuih mite bawlsia tektek ding uh hi.” Ellen G. White, The Great Controversy, 614. Bawlsiatnate bang hun ciang hong piang ding cih i theihkholhloh hangin, koi bangin kigingkhol ding na hiam? Kiginkholh ding bang thupi pen hiam?