MUC

Print Friendly and PDF

Thursday, March 16, 2017

LESSON 5 APRIL 22 – 28 PASIAN A’DINGIN NUNGTA






SABBATH NITAK


TU KAAL SUNG SIM DING: 1Pet. 3: 8 – 12; 4: 1, 2, 3-11; Gal. 2: 20; Rom. 6: 1-11; 2 Sam. 11: 4.


KAMNGAH: Topa in a thuman mite mu a, amaute’ thungetna pia tawntung hi. Ahi zongin a gamtatsia mite Topa in a langbawl hi,”na ci hi. 1Peter 3: 12.


Lai Siangtho gelhte in mawhna tawh kidim mihingte’ nunzia tel mahmah uh hi. Bang hang thei lo mawk ding? Leitung in hih zahin siatna tawh kidim!

Tua banah amau le amau mimawh ahihlam uh kithei uh hi (1Tim. 1: 15).

Mawhna hangin singlamteh tungah Khrih hong sihna thu in mawhna beimang nading hi, ci-in tangko uh hi. Mawhna in bang zahin sia hiam, cih kilang hi.

Ahi zongin Lai Siangtho gelhte in Khrih vangliatna in mawhna tawh kidim mihing nunzia hong khel thei a, mithak hong suaksak thei hi, cih thu zong pulaak uh. Tu kaal sung i thu sin ding in: Khrih kiangah a ki-ap mi khempeuh in kitui phumin, Khrih sungah nunna thak nei thei hi, cih thu Peter’ pulaak thute i sin ding hi. Nunzia kikhel taktakte amau kikhellam uh mite’n thei lo-in a om kei ding hi. Peter in tua bangin kikhelna pen olno takin piang thei hi, ci lo hi. Hamsatna tuamtuam nawktan kul hi, ci hi. Tua ciang bekin Topa kamciamte i ngah thei bek ding hi (1Pet. 4: 1).

Peter in Lai Siangtho thulaigil – Jesuh sunga om mite in a neih ding uh itna thu pulaak hi. Itna in mawhna tampi maisak hi (1Pet. 4:8). Itna nei-in i tungah hong khialte’ mawhna maisak lehang Jesuh nasep a kilangsak i hi hi.

SUNDAY APRIL 23

LUNGSIM KIKHAT


1Pet. 3: 8 – 12 sim in. Peter in Khrihtian nunzia ding bang pulaak hiam? A gensa thu (1Pet. 2: 20, 21) bang pulaak kik hiam?

______________________________________________________________

______________________________________________________________

Peter in Khristian thu-um mite lungsim kikhat ding hong hanthawn hi. Puatham kibatna, kisutna a pulaak hi lo hi. Sepna, ngaihsutna, thuzuihna kibang khin dikdek ding cihna hi lo hi. Hih thu i tel nadingin Paul in pumpi nate tawh genteh hi (1Kor. 12: 1- 26). Pumpi tungah khut, mit, khe, cihte in kibatna nei lo uh hi. Ahi zongin amaute in pumkhat sakhat suak uh hi. Tua bang mahin thu-um mite zong mimal khat ciat tungah Kha Siangtho letsong hong pia hi. Tuate in a tuam ciat ahih hangun ngimna, mungtup kibang hi.

Tua bang kipum khatna in olno takin a piang thei hi lo hi. Khristian pawlpi tangthu ah zong hih thu kimu thei hi. Peter in thu-um mite in Khrih sungah kipumkhat dingin hong hanthawn hi. Gentehna-in Khristiante’n mi hehpih lainat ding kisam hi (1Pet. 3:8). Gimna thuak mi khat, a cimawh mi khat a om ciangin amau tawh thuak khawm, gim khawm ding uh hi. A lungdam mi tawh lungdam khawm ding zong kisam hi (1Kor. 12: 26). Hehpihna in mite’ muh bang hong musak thei a, tua in hong kipumkhatsak thei hi. Tua thu hangin Peter in khat le khat ki-it ding hong ci hi (1Pet. 3:8). Jesuh mahmah in zong a hong hilhin ah khat le khat ki-itna tungtawnin Jesuh nungzui hihna hong mu thei ding uh hi (John 13: 35). Tua banah Khristian in itna lungsim tawh kidim ding hi, ci hi (1Pet. 3: 8). Gim thuak mi khat, a khial mi khat hehpih ding hi, ci-in zong hong hilh hi.

“Kei cih lungsim sisak in; na hoihna sangin midangte’hoihna mu zaw in.

Tua hi leh Khrih tawh pum khat na hi thei ding hi. Vantungmite mai, pawlpi mite mai le mite mai ah Pasian’ tanu tapa na hihna kilang ding hi. Topa in etteh taakcing na nunna thupha hong pia ding hi.” 9T., 188.

Peter hong hilh bang mahin siatna pen siatna tawh thuk lo-in na om hiam? (1Pet. 3:9). Siatna pen thuhoih tawh thukkik nadingin ‘kei’ cih lungsim si masak ding kisam hi lo hiam? Koi bangin tua bang piang thei ding hiam? Gal. 2:20.

MONDAY APRIL 24

PUMPI GIMNA


Jesuh in mihing’ mawhna hangin hong si hi. Ama bek mah i lamet, hotkhiatna le dikna hi. Jesuh in mimawh mi, Pasian mai-ah midik hong hi sak hi. Jesuh Khrih hangin Pasian in cikmah huna a mawh ngei lo mi bangin eite hong sang hi.” Ellen G. White, Steps to Christ, 62.

Ahi zongin Pasian’ hehpihna in i mawhna hong maisak hi bek lo hi. Mawhna zawhna tha hong guan hi.

1Pet. 3: 18, 21; 4: 1, 2; Romans 6: 1-11 sim in. Hamsatna le mawhna zawh theihna in bang kici zop hiam?

__________________________________________________________________

__________________________________________________________________

Jesuh hong sihna pulaak kammal Greek in ‘hapax’ kizang hi (1Pet. 3: 18). A khiatna in ‘mi khempeuh aa dingin khat vei bek’ cihna hi. Jesuh in mi khempeuh a’dingin gimna hong thuakin si hi. Eite khempeuh in Pasian kiang i tun nadingin tua bangin a hong thuak hi (1Pet. 4: 1, 2; 3: 18 – 22). “Tui kiphumna in hotkhiatna limcing hi” (1Pet. 3: 21). Tui kiphumna in Khrih thuak sihna hangin mawhna tawh kisawhkha nawn lo nunna limcing hi (1Pet. 4:1). Tui kiphum ciangin Khrih’ sihna le sihna pan a thawhkikna limcing hi. Tui kiphum mi in a nuntal laiteng Topa’ deihna bang bekin a nungta dingin a kiciamna ahi hi (1Pet. 4: 2). Tua bangin i nuntak nadingin nisimin Topa tungah ki-ap kul hi. Tua lo-in ci le sa deihna lungsim si lo ding hi (Gal. 5: 24).

Tui kiphum mi in Khrih tawh sikhawm, Khrih tawh thawhkikna limcing hi. Tui kiphum ciangin mawhna thu-ah misi cihna hi. Siatna ah misi i hih kul hi. “Note zong Khrih Jesuh tawh kipawlin mawhna thu-ah si-in, Pasian’thu-ah a nungta-in na kingaihsut ding uh ahi hi.” (Rom 6: 11). Hih in a gualzo Khristian nuntakna thusim ahi hi.


Mawhna na nial manin gim na thuak nunung pen in bang hun hiam? Tua in na Khristian nunzia bang pulaak hiam?

TUESDAY APRIL 25

SUAHKIKNA

Khrih sungah nunna thak i nei hi; na khempeuh a thak suak hi. Eite in a suakkik i hi hi. Nunlui le nuntak kilamdang hi. Jesuh le a hong hehpihna hangin a lamdang nunzia kikhel na za ngei hiam? Mawhna thu-ah misi bangin, Khrih sihna le sihna pan a thawhkikna sungah kiphum mi in nuntak thak tawh a nungta mi a hi hi.

1Pet. 4: 3-6 sim in. A kikhel nunzia bang hong hilh hiam? Mite’n tua bangte koici muh hiam?

____________________________________________________________________

____________________________________________________________________

Peter in nun kikhel tawh kisai-in kammal thum pulaak hi. ‘Zunekna,’ ‘uangtatna,’ ‘zukhamluatna,’ ‘numei pasal paktatna,’ cihte nusia-in tua bangin nungta nawn lo uh hi (1Pet. 4: 4). Tua hi-in thu-um lo mite tungah thu va genta kei leng i gamtatna in amaute a’ding khuavak hi pah hi. Tua bangin siatna panin a kikhel nunzia, Pasian’ deih bang nunzia sangin a vanglianzaw thuhilhna om lo hi.

Peter in thukhenna tawh kisai bang pulaak hiam?

_______________________________________________________________

_______________________________________________________________

Peter pulaak bang mahin John 5: 29; 2Kor. 5:10; Heb. 9: 27 cihte in zong ni khat ni ciangin gamtatna khempeuh in thukhenna thuak ding hi, cih thu hong hilh hi (1Pet. 4:2). Peter in misi tungah hotkhiatna thu hilh a cih ciangin (1Pet. 4:6), a sih khit nunga hilh hi lo-in, a nuntak lai-un hotkhiatna thu kihilh a, kikhel theihna hun ngahin Pasian hehpihna ngah thei lai hi napi uh amaute in kisik lo-in kikhel lo uh hi. Ahi zongin tu-in amaute si khin ahih manun kikhel hun ngah nawn lo uh hi. Tua hi-in amaute tungah Pasian’ thukhenna in thuman hi.

Jesuh thu-um mi khat in a thu-up ma hun lai tawh koi bangin kilamdang hiam? Jesuh in na nunna ah bang hong kilamdangsak hiam?

WEDNESDAY APRIL 26

CI LE SA MAWHNA


Nidangin siatna tawh kidim ahih hangun Jesuh a up tak uhteh numei pasal paktatna kiciamteh hi.

1Pet. 4:3 sim kik in. Bang siatna teng kimu thei hiam?

______________________________________________________________

______________________________________________________________

Pasal le numei kizopna kammal nih kimu thei hi. ‘Aselgia’ cih kammal in pasal ang le zi ang kizopna-ah ‘numei in ama nopsakna, pasal in ama pasal nopsakna pulaak kammal hi. ‘Epithumia’ cih kammal in mawhpih nopna lungsim, kilunggulhna pulaak kammal hi. Pasal ang le zi ang kizopna-ah numei in a nopsakna, pasal in a nopsakna pen mi tampi in mawhna-in ngaihsun uh hi. Lai Siangtho in tua bang nupa lupkhopna langpan lo hi. Pasian in numei le pasal kitenna piangsak hi. Zi le pasal lupkhopna pen piancil - Eden huan panin kipan hi. “Pasal in a nu le a pa nusia-in a zi tawh kigawm a, amaute gel pum khat a bang uh hi. Mipa le a zi a guaktangin om uh a, maizum lo uh hi (Pian. 2: 24, 25). Suan le khak neihtheihna- zi le pasal lupkhopna nupa kikal sih dong citak ding kisam hi. A dal omlo tua bang nupa kikal nopna in Pasian in a mite a hong itna limcing hi (Jer. 3; Eze. 16; Hosea 1-3).

Nupa, zi (numei) le pasal (pasal) kikal nupa nopsakna in thupha hi. Mi zi, mi pasal tawh vamawhna in a lian mahmah siatna hi. Tua bang mawhna hangin leitung ah hih zahin siatna piang hi. Nupa nopsakna kisiatna hangin bang zahin leitungah tagah, meigong tam semsem hi lo hiam?

2Sam. 11: 4; 1Kor. 5: 1; 10: 8; Pian. 19: 5 sungah a kibang bang thu pulaak uh hiam?

__________________________________________________________________

__________________________________________________________________

Zi le pasal kikalah citak lohna hangin gimna le siatna tampi piang hi lo hiam? Nupa kikal siatna hangin khuasung kimlepaam zong sia hi. Nupa kikal cihtak lohna zong mawhna hi. Khrih in tua mawhna hangin zong hong si hi. Numei pasal thangtat mite nawlkhin pah ding hi lo hi. “ Na mit sunga singluang la khia masa lo-in midangte mit sunga om niin lakkhiat ding hanciam kei in” (Luke 6: 42).

THURSDAY APRIL 27

ITNA IN MAWHNA KHEMPEUH MAISAK


Peter huna a nungta thu-um mite in amau nuntak hun sungin Khrih hong pai dingin lamen uh hi. “Na khempeuh a bei nading hun hong naita hi. Nomau pumpi ki-uktawm thei-in pilvang unla, hoihtakin thu a ngen thei-in om ta un” (1Pet. 4:7). Hun bei ni a ding kiging khol ding hong hilh hi. Leitung a bei nai kei zongin i leitung nunna hong bei leh ei a’dingin a bei-na hi pah hi. Sih khit nungah bang mah kisem thei nawn lo ding ahih manin a tawntungin hun bei-na a nai hi lel hi. I sih dinga i thawhkikteh Khrih a hong pai hun hi ding hi.

“Na khempeuh a bei ding hun hong naita” ahih manin koi bangin nungta ding kisam hiam? 1Pet. 4: 7 – 11.

____________________________________________________________________

___________________________________________________________

Ki-ap a thungen tawntung ding hi-in, tua banah mi itna nei ding kisam hi. Bang hang hiam cihleh itna in mawh maisak hi (1Pet. 4: 8). Bangci bangin itna in mawhmai sak hiam?

_____________________________________________________________________

_____________________________________________________________________

Muhdahna in kitotna piangsak a, itna in mawh maisak hi (Pau. 10: 12).

Mi i it takteh i tungah hong khialhnate i maisak zo ding hi. Khrih’ hong itna in midangte zong hong itsak hi. Mite i it takteh mi mawhna zong i maisak hi. Itna khang leh mi’ siatna kizong lo hi; mawhna maisak hi. Peter in zong

Jesuh le Paul’ pulaak thakham thu – lungsim khempeuh tawh Pasian it ding le eima pumpi it bangin midangte zong it ding hi, ci hi (Matt. 22: 34 – 39; Rom. 13: 8 – 10).

Peter in zindo hahkat ding zong hong hilh hi. Khrih hong pai ding nai-ta ahih manin mi tawh kizopna thupi lo hi lo hi. Thu-um mite in midangte tawh kizopna ah Pasian’ kammal a pulaak hih ding uh kisam hi. Leitung hun bei ding nai-ta ahih manin thuman gen ding kisam zaw semsem hi.


“Itna in mawhna tampi maisak hi.” Na tungah hong khial a om hiam? Koici bangin i kitangsap mawhmai sak itna kilangsak na hiam? Bang hang in mawhmaisakna in i thupha ngahna hi zaw hiam?

FRIDAY APRIL 28

NGAIHSUTBEH DING: “Itna, hehpihna nei khat in khialhkhak khat mawhna lianpi-in pulaak lo hi. Midangte’ siatna gengen lo hi. Lungduai hi. A khial mi khat Khrih kiang tunpih ding hamciam lehang a nunzia kikhel lo-in a om kei ding hi.Jesuh’ hong itna in mawh maisak hi. Hoih zaw ding ahih kei buang leh Khrih’ hehpihna in mite’ khialhna pholaak lo hi.” Ellen G. White, Counsels to Parents, Teachers and Students, 267.

Jesuh le a mawh laitak matthuak numei ngaihsun in (John 8: 1-11).

Numei tungah Khrih hehpihna bek ngaihsun kha zel hi hang. Ahi zongin tua sangin thuthuk zaw om hi. Jesuh in biakna makaite a thuhilhnopna in bang hangin amaute mawhna leivui ah gelh hiam? Jesuh in tua numei bang mahin a mawh biakna makaite’ mawhna a thei lo hi lo-a, bang hangin pulaak khia ziau lel lo hiam? Jesuh in amau kineihkhemna thei taleh mite tungah pholaak sese lo hi. A mawhna uh kisikin a kikhel ding uh deih ahih manin Jesuh in amau mawhna selpho lo-in thuhilh hi. Hih in i tungah hong mawhte’ mawhna selpho loh ding hong hilh hi.

KIKUP DING DOTNATE:

1.   Kipumkhatna le mel kibatna (uniformity) kibang lo hi. Pawlpi nasepna ah mel kibatna kisam hiam? A kisap leh koi munte, bangte ah kisam hiam? Thu khat ah ngaihsutzia tuamtuam, kibat lohna in siatna hiam? Pawlpi hong huh hiam?

2.   Mawhna nusiat nadingin bang gimna na thuak ngei hiam? Tua in bang khiatna nei hiam? Pasian’ vangliatna in nunzia hong khel hi, cih thu in hamsat kullo-in mawhna kizo hi, cihna hiam? Hi lo ahih leh bang hang hiam? Hi ahih leh bang hang hiam?

3.   Khamtheih zu tuamtuamte hangin siatna na mu hi. Koi bangin pawlpi in guihtheih khamtheih dal ding hiam? Kangnote in khamtheih zu namkim a pelh nadingun bang sem ding na hiam?


To get the latest update of me and my works

>> <<